Eclesiástico 7
7
Tik'ojeltak cha'añ kuxtälel
1Mach amel joñtolil,
che' jiñi, jiñi joñtolil ma'añik mi' kaj itajet.
2Täts'ä lok'el abä ti' tojlel mulil,
che' jiñi, jiñi mulil mi' kaj iñajt-esañ ibä ti atojlel.
3Mach acha'leñ chuki machbä tojik,
cha'añ ma'añik ma taj ñukbä toj mulil ti wi'il.
4Mach ak'ajtibeñ Lak Yum
cha'añ ma' awäk'beñtel ñukbä awe'tel,
mi' yomik ak'ajtibeñ jiñi yumäl añuklel ti' itojlel.
5Mach awäl cha'añ isujmäch aña'täbal ti' tojlel Lak Ch'ujutat,
mi' yomik apäs aña'täbal ti' itojlel jiñi yumäl.
6Mach ma' wochel ti e'tel ti xmeloñel,
mi mach mejlet awujtesañ chuki machbä tojik.
Kome cha'añ mi' mejlel ijisañ ip'ätälel jiñi ñuko'bä,
yom añ ich'ejlel lak pusik'al yik'ot tojbä ti lak melbal.
7Mach amel mulil ti' itojlel jiñi tejklum,
mi yomik apek'esañ abä ti tojlel wiñikob.
8Mach añumeñ chäñ cha'leñ mulil,
kome jasäljach juñyajl ma' mel cha'añ mi' yäk'et ti toj mulil.
9Mach ma' wäl: «Lak Yum mi ichäñ k'el bajche' ka'bäläch mik käk' jiñi majtañäl;
che'bä mij käk'eñ, jiñi Ñukbä Yumäl mi kaj ich'ämbeñoñ».
10Yom acha'leñ k'ajtiya ti' tojlel Lak Ch'ujutat, ti jump'ejl jach apusik'al,
yik'ot mach yom akäy amel koltaya ti itojlel p'ump'uño'bä.
11Mach atse'tañ jiñi wolibä iyu'biñ ka'bäl wokol;
la' k'ajtäyik acha'añ che' añ juñtikil
mejlbä ipek'esañoñla yik'ot mi' ichañ-esañoñla.
12Mach asajkäbeñ imul jiñi awerañ,
mi jiñik ti' tojlel api'äl akäñäbä.
13Mach tijikñayet achäñ mel lotiya,
kome jiñi mi' ikaj ich'äm tilel ka'bäl wokol ti' atojlel.
14Mach axäñ otsañ abä che' woli itempañob ibä jiñi yumälob,
mach achäñ al ka'bäl t'añ che' mi' acha'leñ k'ajtiya.
15Mach ts'uts'ubetax amel jiñi e'tel,
kome jiñäch Lak Yum tsi' ixuk'choko.
16Mach achañ-esañ apusik'al ti' itojlel api'älob;
la' k'ajtäyik che' jiñi Lak Yum mach jalik mi' iyäk' toj mulil.
17Ñumeñ pek'esañ jiñi itsukulel apusik'al,
kome che' ti' ijilibal jiñi wiñik mi' ijilel ti motso'.
Mach añumeñ k'ajtin che' ma' amel k'ajtiya;
su'beñ abä Lak Ch'ujutat yik'ot ch'ujbiñ chuki mi' iña'tañ.
Bajche' yom lak cha'leñ ti' itojlel lak pi'älob
18Mach ak'ex api'äl ti' kaj tak'iñ,
mi jiñik awerañ k'uxbibilbä ti' kaj ñumeñ k'äñlemañbä tak'iñ.
19Mach awajleñ x-ixik ambä iña'täbal;
awilañ ñumeñ ñuk ik'äjñibal iyutslel ipusik'al bajche' t'o'olbä xajleltak.
20Mach atik'lañ x-e'telob acha'añ che' uts'at woliyob imelob iye'tel.
21Yom mi' ak'uxbiñ jiñi x-e'tel p'ip'bä ijol che' bajche' ma' k'uxbiñ abä,
yik'ot mach achäkibeñ ikojlel che' ti yorajlel.
22Mi' añ awälak', yom mi' ak'uxbiñ ja'el,
mi' uts'atäch mi' yäk'eñet achu'bä añ yom mi' akäñtañ.
Bajche' yom mi' chumtälob jiñi tatälob yik'ot iyalobilob
23Mi añ awalobilob,
cha'leñ käñtesa ti' itojlelob,
yik'ot yom awäk'eñ ich'ujbiñ xik'ojel che' ch'itoñobto.
24Mi añ awixik'alob,
käñtañ cha'añ tojob ipusik'al,
ya'i mach alaj ak'eñob chuki yomob.
25Che' mi awäk' ti ñujpuñijel awixik'al,
yom ma' wäk'eñ juñtikil wiñik ambä iña'täbal.
26Mi añ awijñam, yom mi' ak'uxbiñ.
mi ma'añix ma' mulañ, mach awäk' apusik'al ti' itojlel.
27K'uxbiñ jiñi atat ti' pejtelel apusik'al,
mach ñajayik acha'añ jiñi wokol tsa'bä iñusa aña'
che'bä tsa' awila pañämil.
28Yom ma' ña'tañ cha'añ ti' ik'uxbiya ti ipusik'alob tsa' awila pañämil.
¿Bajche' mi mejlel atojbeñ pejtelel tsa'bä imeleyob ti atojlel?
29Ti' ipejtelel apusik'al k'ele ti ñuk Lak Yum,
yik'ot yom apäs ak'uxbiya ti' itojlel imotomajob.
30K'uxbiñ ti' pejtelel ap'ätälel Lak Yum tsa'bä imeleyet,
yik'ot mach abajñel käy x-e'telob icha'añ.
31Ch'ujutesañ Lak Yum,
yik'ot k'uxbiñ imotomajob ja'el.
Ak'eñ ichobejtäbal bajche' ts'ijbubil:
Ak'eñ jiñi ñaxambä iwut apäk'äb,
jiñi sejetobä wakaxtak,
jiñi majtañ tilembä ti pusik'aläl ak'bilbä,
jiñi tsänsäbilbä majtañäl,
yik'ot jiñi tak'iñ ak'bilbä ti ch'ujul.
32Yom ma' chäñ akoltañ jiñi p'ump'uño'bä,
cha'añ che' jiñi, Lak Yum mi' chäñ ch'ujutesañet.
33Yom ak'uxbiñ jiñi kuxulo'bä yik'ot jiñi chämeño'bixbä ja'el.
34Mach ajalitesañ abä akoltañ wolibä ti uk'el,
yik'ot ñuk'esañ ipusik'al jiñi wolibä iyu'biñ ch'ijiyemlel.
35Mach akäy jiñi ambä ik'amäjel,
ti wi'ilbä k'iñ jiñi mi' kaj ik'uxbiñet.
36Yom k'ajal acha'añ ajilibal ti' pejtelel chuki ma' mel,
che' jiñi ma'añik ma' akaj acha'leñ mulil.
ទើបបានជ្រើសរើសហើយ៖
Eclesiástico 7: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM