Eclesiástico 25
25
Uxchajp chuki uts'atbä yik'ot chuki machbä uts'atik
1Añ uxchajp chuki mi' mulañ kpusik'al,
yik'ot uts'atäch mi' k'el Lak Yum yik'ot wiñikob:
Jiñi che' añ ñäch'tälel ti' tojlel lak pi'älob
yik'ot che' mi iku'xbiñob ibä jiñi ipi'älbä ti chumtäl
yik'ot che' jump'ejlo'jach ipusik'al jiñi ñoxi'aläl yik'ot ijñamäl.
2Yik'ot añ uxchajp wiñikob mu'bä its'a'leñ kpusik'al,
ixku imelbal mux iyäk'eñ ti mich'lel kpusik'al:
Jiñi p'ump'umbä chañbä mi' mel ibä,
jiñi xchäkbä ambä ka'bäl ichu'bä'añ,
yik'ot jiñi ñoxo'bä ka'bälbä mi' imulañ x-ixik
yik'ot machbä añik iña'täbal.
Iñuklel ñoxo'bä
3Mi ma'añik ma' asajkañ jiñi ña'täbaläl che' ch'itoñeto,
¿Bajche' mi kaj ataj che' ñoxetix?
4¡T'o'oljax ti k'elol jiñi säko'ixbä ijol che' mi' icha'leñ xik'oñel!
5¡T'o'oljax ti k'elol jiñi tatuchob che' añob iña'täbal,
yik'ot k'uxbilbä k'elbilob che' mi' icha'leñ tojbä toj-esaya!
6Jiñi ichobejtäbal xñoxob jiñäch jiñi ña'täbäl käñäbä icha'añ,
ixku iñuklelob jiñäch che' mi' ñopob Lak Yum.
Lujunchajp chuki yom lak mel
7Añ boloñchajp wiñikob k'äläl ilujuñchajplel
mu'bä kña'tañ añob itijikñäyel:
¡Tijikña jiñi wiñik mu'bä itijikñesañ ibä ti ikaj iyalobilob,
yik'ot che' kuxulto mi' yilañ ti lajmel jiñi xts'a'leyajobä ti' itojlel!
8Tijikña jiñi wiñik ambä xuk'ulbä iyijñam,
yik'ot che' xuk'ulob ipi'älob ti e'tel.
¡Tijikña jiñi machbä añik mi' icha'leñ mulil ti' it'añ,
yik'ot machbä añik mi' cha'leñ e'tel ti' tojlel juñtikil machbä tojik!
9¡Tijikña jiñi mu'bä itaj xuk'ulbä ikäñäbä ipi'äl,
yik'ot mu'bä icha'leñ t'añ yik'ot juñtikil mu'bä iñäch'tañ chuki mi' iyäl!
10¡Ñumeñ ñukäch itijikñäyel mu'bä itaj jiñi ña'täbaläl,
ixku ma'añik ilajol jiñi mu'bä iñumeñ ñop Lak Yum!
11Ik'uxbiñtel Lak Yum jiñäch ñumeñ ñukbä ik'äjñibal ti' itojlel pejtelel chukitak añ,
ma'añik majch mejl ilajiñ yik'ot che'bä mi' imel bajche' jiñi.
[12Ñaxañ yom ak'el ti ñuk Lak Yum,
che' jiñi mi' mejlel ak'uxbiñ.
Mi ñaxañ ma' achäñ sajkañ
mi kaj awajñel ti' itojlel.]
Jiñi joñtolbä yik'ot tojbä x-ixik
13¡Ma'añik ñumeñ k'uxbä lojwel che'bä ilojwel lak pusik'al,
mi ñumeñbä joñtolil ak'bilbä icha'añ x-ixik!
14¡Ma'añik ñumeñbä wokol melbilbä cha'añ ts'a'leya,
mi añik ñumeñbä lekojbä k'extaya joñtolil
che' bajche' ik'exoñel jiñi xjoñtolilob!
15¡Ma'añik ñumeñ xtsäñsabä ts'ak bajche' iya'lel iyej lukum,
mi añik mich'lel che' bajche' icha'añbä x-ixik!
16Ñumeñ uts'at che' mi lak chumtäl yik'ot jiñi bajlum yik'ot ajiñ,
che' bajche' mi lak chumtäl yik'ot joñtolbä x-ixik.
17Jiñi joñtolil mi' ik'extäbeñ ipusik'al jiñi x-ixik:
¡Mi' sutk'iñ bajche' junkojt joñtolbä bäte'el!
18Che' iñoxi'al mi' buchtäl ti' tojlel ikäñäyo'bä,
ma'añik mi' käy imel ipusik'al.
19Ts'itajach ba'ikachbä joñtolil,
che' mik lajiñla yik'ot ijoñtolil x-ixik;
jiñäch jiñi tojmulil mu'bä itaj majki mi' imel joñtolil.
20Che' bajche' wokol mi' xäñ ji'lumilbä wits ñoxixbä wiñik,
che'äch yilal x-ixik yujilbä u'yaj ti tojlel utsbä iñoxi'al.
21Mach awäk' abä ti lotiñtel cha'añ weñ t'o'oljaxbä x-ixik,
mi mejl amulañ chuki añ icha'añ,
22kome jiñi, mach tojik yik'ot kisiñtikax
che' jiñi x-ixik mi' imä'lañ jiñi iñoxi'al.
23K'uñyalemjachbä ik'äb, tsiltsilña'bä ipix:
Che'äch yilal jiñi wiñik machbä añik itijikñäyel ti' ikaj iyijñam.
24Ti' tojlel juñtikil x-ixik tsa' tejchi mulil,
ti' kaj jiñi x-ixik ti lak pejtelel mi lak chämel.
25Mach amelbeñ ibijlel jiñi iya'lel kolem ja',
mi jiñik yom ma' kol x-ixik joñtolbä.
26Mi ma'añik mi' ich'ujbiñ axik'ojel,
yom ma' atäts lok'el ti' atojlel.
ទើបបានជ្រើសរើសហើយ៖
Eclesiástico 25: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM