Eclesiástico 24
24
Jiñi k'ay icha'añ ña'täbaläl
1Mux ibajñel ñuk'esañ ibä jiñi ña'täbaläl,
ya' ti' iyojlil itejklum, mi' itsiktesañ iñuklel.
2Ya' ti' itojlel jiñi ich'ujulbä tempajbä icha'añ iyangelob Lak Yum mi' tsiktesañ iñuklel:
3«Joñoñ tsa' lok'iyoñ ya' ti' iyej jiñi K'ax Ñukbä
yik'ot che' bajche' tokal tsa' kmoso jiñi pañämil.
4Ya' añ kotot wajali ya' ti panchañ;
jiñi kbuchlib ya' xuk'chokobil iyoyel ti' pam tokal.
5Tsa' kbajñel cha'le xämbal ti' joytälel yäxkojañbä panchañ,
yik'ot tsa' xäña ñumeñ tambä iye'bal pañämil.
6Tsa' kmele kyumäñtel ti' pam kolem ja' yik'ot ti' ijoytälel pañämil,
yik'ot ti' pejtelel tejklumtak yik'ot yumäñteltak.
7Ti' itojlel pejtelel jiñi yumäñteltak
tsa' ksajka jump'ejl ajñibäl baki mik kajel ti chumtäl.
8Che' jiñi, jiñi Lak Yum tsa'bä imeleyoñ
yik'ot tsa'bä imele pejtelel chukitak añ,
tsa' k'oti iña'tañ baki yom mik wa'chokoñ kchumlib;
tsi' isu'beyoñ:
»“Wa'chokoñ awotot ti' Israel,
la' acha'leñ chumtäl ya' ti' itejklum Jacob.”
9»Che' maxto chajpäbilik jiñi pañämil,
Lak Yum tsi' meleyoñ ti' tejchibal;
¡Jiñ cha'añ mi kaj kchäñ ajñel ti pañämil ti' pejtelel k'iñ!
10Tsa' kmele ke'tel ti' tojlel Lak Ch'ujutat ya' ti ch'ujulbä iyotot
yik'ot tsa' ajñiyoñ ya' ti Sión wits.
11Lak Yum tsi' iyäk'äyoñ ti k'aj oj
ya' ti Jerusalén, k'uxbibilbä itejklum,
yik'ot k'äläl ya'i, mik cha'leñ yumäñtel che' bajche' yom.
12»Tsa' kwa'choko ajñibäl ya' ti ili ñukbä tejklum,
jiñi yajkäbilbä yumäñtel icha'añ Lak Yum.
13Tsa' koliyoñ che' bajche' ch'ujte' ambä ya' ti Líbano,
che' bajche' jiñi ciprés te' ambä ya' ti wits ti Hermón,
14Tsa' koliyoñ che' bajche' jiñi xañ ambä ya' ti Engadí
che' bajche' jiñi t'ojoljaxbä ñichim ya' ti Jericó.
Tsa' koliyoñ che' bajche' t'ojoljaxbä olivo te' ya' ti joktäl;
che' bajche' jiñi castaño te' tsa' chañ-äyoñ.
15»Tsa' kpuku xojokñabä jkuts'il che' bajche' ñichte',
che' bajche' xojokñabä sik'ä yik'ot yajkäbilbä mirra,
che' bajche' xojokñabä ipomiltak jiñi te',
che' bajche' jiñi pom mu'bä ipulel ya' ti ch'ujulbä ajñibäl.
16Tsa' ktich'i jk'äbtak che' bajche' terebinto te':
Ambä t'o'oltakbä yik'ot kolemtakbä ik'äbtak.
17Tsa' ch'ok'a kbuts che' bajche' ts'usubil
jiñi kñichtak yik'ot kwuttak t'o'oljax yik'ot ka'bäläch.
[18»Iña'oñ jiñi k'uxbiya, jiñi t'o'olel,
jiñi ch'ujbiya yik'ot jiñi pijtaya ti lak Yum.
Ak'biloñäch ti' tejchibal pañämil;
joñoñäch jiñi majtañäl mu'bä ikajel ich'ämob kalobilob,
tsa'bä yajkäñtiyob ti' tojlel Lak Ch'ujutat».]
19«Läk'äla abä baki añoñ mu'bä la' mulañoñ,
yik'ot ñaj-esañ la' abä che' bajche' k'amel ti kwut,
20kome che' mi akäñoñ yik'ot che' ma' atajoñ,
ñumeñ tsajäch yilal che' bajche' iya'lel cha'b.
21Jiñi mu'bä ik'uxoñ mu'to ikajel iñumeñ mulañ k'uxoñ,
jiñi mu'bä iyuch'iñoñob mu'to ikajel iñumeñ japoñob.
22Majki mi' ch'ujbiñ chuki mik su'beñ ma'añik mi kaj iyajlel;
jiñi tojbä mi' ik'äñ iña'täbal ma'añik mi kaj ti mulil».
23Ti' pejtelel iliyi jiñäch ijuñilel cha'añ it'añ Lak Yum ti panchañ,
jiñäch jiñi toj-esäñtel lak cha'añbä tsa'bä ixuk'choko Moisés,
jiñäch ichobejtäbalbä ak'bilbä ti' itejklum Jacob.
[24Yom chäñ ajñemetla ti' itojlel Lak Yum,
cha'añ jiñi mi' iyäk'eñetla ap'ätälel.
Kome kojach jiñi Lak Ch'ujutat machbä añik ip'isol ip'ätälel,
mejl ikoltañoñla.]
25Ili toj-esäñtel but'uläch ti ña'täbaläl
che' bajche' kolem ja' ambä ya' ti Pisón,
yik'ot che' bajche' ñoja' ik'aba' Tigris che' iyorajlel iyäk' tsijib wut te';
26mu'bä ibek' p'ip'lel che' bajche' kolem ja' Eufrates,
che' bajche' Jordán che' mi' iweñ bujt'el;
27mux icha'leñ tik'oñel ti k'amel che' bajche' ñoja' ik'aba' Nilo,
yik'ot che' bajche' ñoja' Gihón che' ti yorajlel but'ja'.
28Mi juñtikilik, mi jiñik ñaxañbä yik'ot wi'ilixbä,
tsi' ujti ikäñ jiñi ña'täbaläl,
29Awilañ jiñi chuki mi' iña'tañtak ñumeñ ñuk bajche' kolem ja'
yik'ot ikäñtesa ñumeñ tamtak bajche' jiñi kolem ak'älel.
30Joñoñ lajaloñ che' bajche' iñumib alä ja' lok'embä ti kolem ñoja',
bajche' alä ja' mu'bä ich'äm majlel ja' ti päk'äbäl ñichim.
31Tsa' jkälä: «Mi kaj klilja'leñ jiñi päk'äbäl,
muk'ix kaj käch'esañ lomtältak».
Ya'i jiñi kalä ja' tsa' sujti ti kolem ñoj ja'.
yik'ot jiñi kolem ja' tsa' sujti ti kolem ñajb.
32Mi kaj kmel cha'añ jiñi käñtesa mi yäk' isäklel bajche' mi isäk'añ pañämil,
yik'ot jiñi isäklel ik'äk'al mi' ik'otel ti ñajt;
33mi kaj jkäk' jiñi käñtesa bajche' x-alt'añ,
ya'i mux kaj käybeñob ti p'ojlemal talo'tobä.
34K'elela awilañ, che' ma'añik tsa' kcha'le e'tel cha'añ ti kbajñel weñlel,
tsa' kcha'le e'tel cha'añ ti' pejtelel mu'bä isajkañob ña'täbaläl.
ទើបបានជ្រើសរើសហើយ៖
Eclesiástico 24: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM