Eclesiástico 26
26
1Tijikña jiñi wiñik xuk'ulbä iyijñam,
kome mi' kaj itaj ka'bäl ija'bilel ila ti pañämil.
2Juñtikil ch'ejlbä x-ixik mi' yäk'eñ itijikñäyel ipusik'al iñoxi'al,
mi' tajob iñäch'tälel ipusik'al k'äläl che' wä' añob ti pañämil.
3¡K'ax tijikña che' mi lak taj juñtikil xuk'ulbä x-ixik!
Jiñäch jump'ejl majtañäl mu'bä iyäk'eñ Lak Yum majki mu'bä ik'uxbiñob.
4Mi ka'bäl ichu'bä añ yik'ot mi' p'ump'uñob,
tijikña ipusik'al mi' kaj iyajñel ti' pejtelel k'iñ.
5Añ uxchajp mu'bä ibäk'ñañ kpusik'al,
ichämp'ejlel jiñäch ñumeñbä mik bäk'ñan:
jump'ejl tejklum che' t'oxolob,
yik'ot che' chañ mi' melob ibä ti' tojlel ambä iye'tel,
yik'ot che' mi' cha'leñob u'yaj t'añ;
ti' pejtelel iliyi, ñumeñ bäbäk'eñ che' bajche' chämel.
6Ixku jiñi x-ixik mu'bä ichäkleñ iñoxi'al ti' tojlel yambä x-ixik,
mi' päy tilel ka'bäl ñukbä ch'ijiyemlel,
iyak' lajaläch che' bajche' jiñi pächi mu'bä ijats'onla ti lak pejtelel.
7Che' mi lak läk'tesañ lakbä ti' tojlel jontolbä x-ixik,
lajaläch che' bajche' mi lak chuk jiñi siñan.
8Jiñi x-ixik mu'bä iyäk'esañ ibä, mach mejlik imuk ikisiñ,
mi kaj iyotsabeñ imich'lel ipusik'al iñoxi'al.
9Ti' iwut mi laj käñ juñtikil x-ixik machbä añik ikisiñ.
10Mi' añ juñtikil xch'okbä awalobil bajche' iliyi,
mach yomik ma' sät awut ti' itojlel, cha'añ ma'añik mi' iñusañ at'añ,
ame ibajñel mel che' bajche' yom ipusik'al.
11Yom ma' käñtañ abä ti' tojlel juñtikil x-ixix machbä añik ikisiñ,
mach ma' läk'tesañ abä ti' tojlel: Ame iyäk'et ti yajlel ti mulil.
12Ma'añik mi' iyajkañ jiñi wiñik cha'añ mi' ipi'leñ,
lajal bajche' juñtikil xñumel ambä itikiñti mu'bä ijap baki jachbä ja'.
Jiñi xuk'ulbä ijñamäl
13Juntikil tojbä x-ixik mi' itijikñesäbeñ ipusik'al iñoxi'al,
che' añ ka'bäl iña'täbal mi' koltañ cha'añ mi' itaj pejtelel chuki yom.
14Juñtikil xuk'ulbä x-ixik yik'ot tojbä ipusik'al jiñäch jump'ejl majtañäl ti Lak Yum.
15Juntikil x-ixik machbä añik mi' chañ-esañ ibä, yik'ot che' xuk'ul ipusik'al
mach lak tajbeñ itojol.
16Che' bajche' isäklel k'iñ ya' ti panchañ che' ti säk'ajel,
che'äch ja'el iweñlel jiñi tojbä x-ixik
che' xuk'ul mi' imel iye'tel ya' ti' yotot.
17Che' bajche' isäklel ik'äk'al ñichim ambä ti ch'ujulbä ajñibäl
che'äch yilal ja'el itijikñäyel juñtikil t'o'oljaxbä x-ixik,
18yik'ot lajaläch che' bajche' its'ajkil melbilbä ti k'äñlemañbä tak'iñ
k'äch chokobilbä ti ipam säklemañbä tak'iñ,
che'äch yilal jiñi p'ätälbä yik'ot t'o'olbä iya'.
[19K'uxbibilbä kalobil, käñtañ abä ti' itojlel joñtolbä x-ixik,
che' jiñi, che' añix aja'bilel ma' kaj ataj xuk'ulbä awijñam.
20Lajaläch che' bajche' ma' ataj yäxbä lum baki mi' imejlel awäk' apak',
che' jiñi, ti wi'il tijikña ma' kaj atempañ iwut.
21Che' mi' ikolelob awalobilob,
xuk'ulob ipusik'alob mi' ikaj iyu'biñob ti' atojlel,
ixku Lak Yum mi' ikaj iyäk'eñob pejtelel chuki yomob.
22Juñtikil ts'i'lel x-ixik ma'añix ik'äjñibal,
ixku che' ma' awotsañ abä api'leñ yik'ot juñtikil x-ixik ambä iñoxi'al,
woliyet asajkañ achämel.
23Mi' mux ats'a'leñ ixik'ojel Lak Yum,
ma' akaj ataj juñtikil x-ixik machbä añik iñopbal ti Lak Yum,
ixku che' ma' ch'ujbiñ,
Lak Yum mi' kaj iyäk'eñet xuk'ulbä awijñam.
24Juñtikil x-ixik machbä añik ikisiñ,
che'äch mi' icha'leñ baki jach mi' imajlel,
ixku jiñi xuk'ulbä ijñamäl,
mi' cha'leñ chuki uts'at mach yälä mi' ibajñel jach ti' itojlel iñoxi'al.
25Juñtikil x-ixik machbä añik ikisiñ,
ti' ipejtelob mi' k'elob bajche' junkojt ts'i',
ixku che' xuk'ul ipusik'al,
mux ich'ujbiñ ixik'ojel Lak Yum.
26Jiñi xuk'ulbä ijñamäl mi' ik'el ti ñuk iñoxi'al,
ixku ñajt tsikil che' joñtol ipusik'al.
Majki ambä icha'añ juñtikil xuk'ulbä ijñamäl,
tijikña mi' kaj iyajñel ti' pejtelel k'iñ.
27Ixku jiñi joñtolbä x-ixik
lajaläch bajche' iyuk'el kolem lajte' ti iyojlil jisaya.
¡Ti' pejtelel imajchilob ambä ti itojlel
mi' chäñ ajñelob ti iyojlil jisaya yilal!]
Uxchajp machbä uts'atik
28Añ cha'chajp mu'bä iyäk'eñoñ ich'ijiyemlel kpusik'al,
jixku jiñi yuxchajplel mi' techbeñoñ kmich'ajel:
Che' mi' yajlel ti p'ump'uñlel juñtikil weñ chumulbä wiñik,
che' ma'añix mi k'uxbiñtelob jiñi wiñikob año'bä iña'täbal,
yik'ot che' mi' yajlel ti mulil juñtikil xuk'ulbä wiñik.
Majki mu'bä imel bajche' jiñi,
Lak Yum mi' kaj iyäk'ob ti chämel.
Imulil xchoñoñel
29Ma'añik juñtikil xchoñoñel tojbä imelbal.
ទើបបានជ្រើសរើសហើយ៖
Eclesiástico 26: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM