Eclesiástico 23
23
1¡KYum kcha'añ, tatäl yik'ot iyumetbä jkuxtälel,
mach awäk' cha'añ mi' ikächoñ jiñi kak' che' mi' icha'leñ ka'bälbä t'añ,
yik'ot mach awäk'oñ yajlel ti wokol ti ikaj!
2¡La' itoj-esañ yik'ot la' iyäk' ti toj mulil jiñi aña'täbal chuki mik ña'tañ!
Mach yälä che' ma'añik mi' iñusañ kmul
mi' muk'ik imuke' jiñi kmul.
3Cha'añ ma'añik mi' ip'ojlel jiñi machbä uts'at tsa' kmele,
mi muk'ik iñuk'esañ jiñi kmulil,
cha'añ ma'añik mik pek'esäñtel ti' tojlel jiñi ts'a'leyajob kcha'añ
mi muk'ik icha'leñob tse'ñal ti ktojlel.
4KYum, Tatäl yik'ot iyumetbä jkuxtälel
mach awäk' kñusañ kbä ti' tojlel kpi'älob
5yik'ot täts'ä lok'el ti ktojlel mu'bä ijoñtol mulañ kbäk'tal.
6¡Mach ijisañoñ jiñi wo'olel uch'el o jiñi imuläñtel ts'i'iyel!
¡Mach awäk'oñ kmulañ itsukulel pañämil!
Ik'äñol yik'ot ijoñtol k'äñol jiñi t'añ
7Kalobilob, u'biñla käñtesäñtel cha'añ mi' akäñla kt'añ;
jiñi mu'bä iñop ma'añik mi' mel imulil.
8Ti' it'añ mi' yäk' ibä ti kächol xmulil,
ya'i jiñi machbä añik ik'uxbiya yik'ot ñukbä ti' ichañlel
mi' ikaj ti yajlel ti' ikaj it'añ ja'el.
9Mach yom achäñ ñämijel ak' axuk'ulbä at'añ ti' itojlel Lak Ch'ujutat,
mi yomik aloñ laj tajbeñ ik'aba'.
10Mi muk'äch ichäñ k'ejlel iye'tel jiñi yaj e'tel,
ma'añik mi' to'o kolel ti jats'ol;
che'äch ja'el jiñi mu'bä iyäl yik'ot mi' itaj ti it'añ Lak Yum ti' pejtelel chuki mi' iyäl
ma'añik mi' kaj ikojlel cha'añ ma'añik imul.
11Jiñi mu'bä ichäñ al ixuk'ulbä t'añ, mi' kaj iyoñ-añ imul
yik'ot jiñi toj mulil mi' ikaj ichäñ ajñel ti' iyotot.
Mi' tsa' iyälä it'añ che' mach xuk'ulik ipusik'al,
añäch ti' tojlel jiñi mulil;
yik'ot che' mach weñ ña'täbilik mi' icha'leñ mulil,
cha'yajlelto mi' ijoliñel imul,
ixku che' mi' iyäl it'añ che' lot jach,
añäch imulil ti' tojlel, jiñi wokolil ya' mi' kaj itilel ti iyotot.
Jiñi tsukut'añ mu'bä lak jkäl
12Añ t'añtak lajalbä che' bajche' chämel;
¡Mach wis ajlik ti juñyajlel ya' ti itejklum Jacob!
Jiñi año'bä iñopbal mi' ikäñtañob ibä iyälob jiñi,
yik'ot ma'añik mi' ts'i'buñob ibä ti mulil.
13Mach añämtesañ abä ti tsukut'añ yik'ot chuki jach yom awäl,
kome che'äch bajche' jiñi mi' kaj awotsañ amul.
14Mach ñajäyik acha'añ atat yik'ot aña'
che' woliyet ti buchtäl ti' tojlel jiñi año'bä iñuklel,
ame ñajäyikob acha'añ che' yax añet ti' itojlelob,
ya'i mi kaj amel abä che' bajche' machbä añik iña'täbal;
che' jiñi, mi' kaj awäl mach weñ che' tsa' chok'ayet,
yik'ot mi kaj añik'i su'beñ jiñi k'iñ che' tsa' awila pañämil.
15Jiñi mu'bä iñämijel ti tsukut'añ
ma'añik chuki mi' ikaj iñop che' kuxulto.
Jiñi ts'i'lel
16Añ cha'chajp uxchajp wiñikob mu'bä ip'olob mulil,
yik'ot mi' ipäybeñob tilel imich'lel Lak Yum:
17Jiñi wiñik mu'bä iyäk' ipusik'al ti ts'i'lel bajche' lejmeñbä k'ajk,
ya'i ma'añik mi' ikaj iyajpel jiñto mi' mele ijoñtolil.
Jiñi wiñik ka'bälbä mi' mulañ x-ixik ma'añik chuki mi kaj ñaj-esañ,
jiñto che' jiñi k'ajk mi' laj pule'.
Jiñi wiñik mu'bä imulañ ti ka'bäl x-ixik,
ba'ikaxbä kaxlañ wa' sumuk mi yu'biñ,
ma'añik mi kaj iyäktañ jiñto mi' chämel.
18Jiñi wiñik mu'bä ti ts'i'lel che' añix iyijñam,
mi' iyäl ti' ipusik'al: «¿Majki mi ikaj iyilañoñ?
Pejtelel ik'yoch'añ pañämil,
jiñi ts'ajktak mi' imukoñ,
ma'añik majki woli' iyilañoñ,
¿Chuki mi kaj kbäk'ñañ?
Jiñi Yumäl ti panchañ ma'añik mi' ik'el jiñi kmultak».
19Kojach chuki mi' ibäk'ñañ jiñäch che' jiñi wiñikob mi' iyilañob,
yik'ot ma'añik mi' ik'otel iña'tañ cha'añ jiñi iwut Lak Yum
ñumeñ añ isäklel bajche' k'iñ,
mi' laj yilañ chuki woli imelob jiñi wiñikob,
yik'ot mi' isäjlel ochel k'äläl baki mach tsikilix.
20Che' maxto ilaj mele chukitak añ,
Lak Ch'ujutat ilaj käñäyix icha'añ,
che'äch ja'el che' ujtemix imel chukitak añ.
21Jiñi wiñik mu'bä imel ts'i'lel
mi' ikaj ichujkel che' ma'añik woli ipijtañ,
ya'i mi' kaj itoj imul baki mi' iyujtel tempajbä.
22Che'äch mi' yujtel ja'el jiñi x-ixik machbä xuk'ulik ipusik'al ti' tojlel iñoxi'al,
mu'bä iyäk'beñ iyalobil icha'añ machbä iñoxi'alik.
23Ti ñaxañ, tsa'ix iñusäbe ixik'ojel Lak Yum;
ya'i mux imel imul ti' tojlel iñoxi'al,
yik'ot ti wi'il mi' ibi'besañ ibä ti ts'i'lel
che' tsa' iyila iyalobilob machbä iyalobil iñoxi'al.
24Jiñi x-ixik mi' ikaj ipäjyel majlel ti' tojlel tempajbä,
yik'ot jiñi ichobejtäbal ti' kaj imul mi' kaj iyajlel ti' tojlel iyalobilob.
25Jiñi iyalobilob ma'añik mi' ikaj itajob ichu'bä añ;
mi añik chuki uts'at mi kaj imelob.
26Che' mi' itajbeñtel ik'aba' ti alol jiñi x-ixik,
mi' ikaj isu'beñtel t'ojti'iñtel,
ya'i ma'añik mi' ikaj isujkuñtel ikisiñ.
27Jiñi yaño'bä mi' ikaj ikäñob
cha'añ ma'añik ñumeñ ambä ik'äjñibal che' muk'äch lak k'uxbiñ Lak Yum,
mi añik ñumeñ tsajbä che' mi lak ch'ujbiñ ixik'ojel.
ទើបបានជ្រើសរើសហើយ៖
Eclesiástico 23: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM