Eclesiástico 11
11
1Jiñi ambä iña'täbal,
mach yälä mi p'ump'uñ,
ma'añik chuki mi kisñiñ;
yik'ot mi' imejlel ti buchtäl
yik'ot ñuko'bä iye'telob.
2Mach añuk'esañ juñtikil cha'añ t'o'ljax ti k'elol,
mi yomik abi'leñ majki machbä t'o'lik.
3¡Alätikax jiñi chab ti' pejtelel chäñiltak yujilo'bä wejlel,
ixku ñumeñ tsajäch ichä'bil mu'bä imel!
4Mach atse'tañ che' añ majch ñoxixbä ipislel läpäl icha'añ,
mi yomik atse'tañ majki wolibä iyu'biñ wokol.
Kome jiñi Lak Yum mi' imel ñukbä iyejtal,
machbä k'ot iña'tañ jiñi wiñikob.
5Ka'bäl jiñi tik'läbilo'bä tsa' buchleyob ti' ibuchlib yumälob,
mi' ña'täbil icha'añob tsa' xojbeñtiyob ich'äjlib ijol.
6Ka'bäl ñuko'bä iye'tel tsa' yajliyob ti wokol,
yik'ot jiñi iñuklelob tsa' käle ti' tojlel yaño'bä.
7K'uxbibilbä kalobil,
mach acha'leñ wulwult'añ che' maxto awujilik chuki tsa' ujti,
ñaxañ yom aweñ ch'ämbeñ isujm,
ti wi'il cha'leñ tik'oñel.
8Kalobil, ñaxañ yom añäch'tañ chuki mi' yäjlel,
che' jiñi, mi' mejlel ajak';
ixku che' woliyob ti t'añ, mach ma' wotsañ abä.
9Täts'ä abä ti' itojlel woliyo'bä ti a'leya,
che' ja'el mach acha'leñ tsätsbä t'añ yik'ot xjoñtolob.
10Kalobil, ¿Chuki ik'äjñibal che' ma' achäñ ajñel ti' itojlel a'leñtel?
Che' mi' achäñ sajkañ, mi' kaj ataj atoj mulil.
Ma'añik chuki mi' ataj che' loñ käläx mi acha'leñ ajñel,
yik'ot mach mejlet ti puts'el che' awom amuku puts'el.
11Añ ka'bälob mi' lujbañob cha'añ ajñel
ixku mi' mach mejl ik'otelob che' ti' iyorajlel.
12Mach yälä mi añet ti p'ump'uñlel,
Lak Yum mi' ikaj ik'elet ti uts'at,
che' jiñi, mi' kaj ichäñ koltañet,
13yik'ot mi' kaj iñuk'esañet
cha'añ uts'at ma' wajñel ti pañämil,
che' jiñi yaño'bä mi' toj sajtelob ipusik'al,
che' mi' yilañet.
14Pejtelel chukitak añ laj tilem ti Lak Yum,
chuki uts'atbä yik'ot chuki machbä uts'atik,
lak kuxtälel yik'ot jiñi chämel,
jiñi p'ump'uñlel yik'ot che' añ lak chu'bä añ,
laj tilem ti Lak Yum.
15Ixku jiñi ña'täbaläl
yik'ot jiñi tojbä melbal, yik'ot jiñi k'uxbiya,
jiñäch jiñi majtañäl tilembä ti Lak Yum.
16Jiñi ch'aplomlel yik'ot pejtelel chuki machbä uts'atik,
icha'añob tsa' mejli cha'añ jiñi joñtolob.
Jiñi joñtolil mi' ichäñ ajñel
ti' itojlel jiñi joñtolo'bä ipusik'al.
17Jiñi majtañältak icha'añbä Lak Yum,
mi' iyäk'beñtelob ti' itojlel jiñi tojbä mi' imelob;
jiñi mi' k'uxbiñob yik'ot ti' pejtelel k'iñ mi' ikoltañob.
18Añ ka'bälob mu'bä itaj ka'bäl ichu'bä añ
che' mi' yäk'beñ ipusik'al iye'tel,
ixku ti wi'il ma'añik mi' taj ichobejtäbal.
19Mi' yäl: «Mejloñix ti k'aj oj;
mi kaj kweñ tijikñesañ kbä cha'añ kchu'bä añ».
Ixku mach yujil jayp'ej k'iñ wä'añ ti pañämil,
ti wi'ilbä k'iñ wä' mi' käybeñob yaño'bä
ichu'bä añ che' bakibä k'iñ mi' ichämel.
20Kalobil,
ak'ä apusik'al amel awe'tel,
chäñ mele bajche' mi' aña'tañ,
la' ñox'aket amel awe'tel ti jump'ejl apusik'al.
21Mach yom ak'el ti uts'at iye'tel xjoñtolob;
xuk'chokoñ apusik'al ti Lak Yum,
yik'ot pijtäbeñ cha'añ mi' ipäsbeñet bij.
Awilañ, ti Lak Ch'ujutat ma'añik wokol,
cha'añ mi' yäk'eñ ichu'bä añ jiñi p'ump'umbä.
22Jiñi mu'bä imelob chuki uts'at,
mi' ikaj itajob ich'ujutesäntel Lak Yum,
jiñi ipijtaya mi' ikaj iñuk'añ che' k'otemix iyorajlel.
23Mach awäl: «Tsa'ix ktaja pejtelel chuki tsa' kmula,
ma'añik chuki machbä añik kcha'añ».
24Mach awäl: «Añix kcha'añ pejtelel cha'añ uts'at mik chumtäl,
¿Chuki ti joñtolel mejl itilel ti ktojlel?»
25Jiñi tijikñäyel, mi' yäk' ti ñajäyel jiñi wokol,
ixku jiñi wokolil mi' yäk' ñajäyel tijikñäyel.
26Cha'añ ti Lak Ch'ujutat ma'añik wokol
mi' iyäk'beñ jiñi wiñik che' mi' ichämel;
ichobejtäbal tsa'bä imele ti' pañämil.
27Jiñi wokol mu'bä itilel ti lak tojlel
mi' iyäk' ti ñajäyel muläbilbä lak tijikñäyel;
ixku kojax ti wi'ilbä k'iñ mi kaj itsiktiyel
chuki añ ti lak pusik'al ti jujuñtikiloñla.
28Kome kojach che' ti' yorajlel ichämel
mi' tsiktiyel chuki añ ti' ipusik'al wiñikob,
jiñ cha'añ, mach yom lak käl cha'añ tijikña mi' chumtäl.
Käñtañ abä ti' itojlel machbä akäñä acha'añ
29Mach apäy ochel ti awotot machbä akäñä acha'añ,
kome ka'bälob oñbä ijoñtolel ti' ipusik'al,
30mu'bä iña'tañob iyäk'et ti wokolil.
Lajalob che' bajche' mate'el mut mu'bä iyajlel ti yak,
che' bajche' bäte'el ts'i' mu'bä ichijtañ iwe'el.
31Jiñi x-u'yajt'añ mi' ik'extañ chuki uts'at ti joñtol,
yik'ot mi' ipuke'tak jiñi lotiya ti' tojlel ñumeñ k'uxbibilbä acha'añ.
32Jiñi alä k'ajk mejl ti sujtel ti bäbäk'eñbä pulel,
ixku jiñi xjoñtolil chajpäbil ibä cha'añ mi imel tsäñsa.
33Käñtañ abä ti' tojlel xjoñtolo'bä,
kome mi' mejlel iyäk'eñet ti wokol
yik'ot mi' mejlel iyäsiñ iñuklel ak'aba'.
34Mach aläk'tesañ abä ti' itojlel xjoñtolo'bä,
kome mi' ikaj isojke' amelbal,
ya'i mi' kaj isutk'iñet ti machbä xuk'ulik ti iye'tel.
ទើបបានជ្រើសរើសហើយ៖
Eclesiástico 11: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM