Iruruputo 19
19
Paula Epesasi peuru kale
1Ni so keru Apolosi Koriniti peuru kale obeta eva keru inio Paula ta ota kai taliake koa rana vasi ama koko kiṉu ni o baroake Epesasi. Ni vota o toraemake kake seke tuvevo putani sai 2ni vota o kuimaemake se, “Meta me voe vo Tabu ala Auvana meme duvevo pute keru kio?” kiolake. Ni seta ke vati tiorikake vo ni eri kikelake, “Pui, eṉeta maba pui ṉeda va sasa dimana vo Tabu ala Auvana,” kikelake. 3Nio vo Paula ta eri kiolake mata, “Zio, sole noni ama bapitaiso ikio me lula me qoako?” kiolake.
Nio seta eri kikelake, “Jone ko bapitaiso,” kikelake.
4Nio eri kiolake vo Paula, “Jone ko bapitaiso ta seke liliziovini seko sarueko kale azo ko pala ikio, ni vota o bazueme se Izireli amu tu seta ke tuvevo puevou vo o kilo ala voko tova—vo inio vo Jisu,” kiolake.
5Nio so keru seke viqa keru voko so kio, seta bapitaiso keta evake vo Lekasa Jisu ko ṉikale. 6Ni Paula ta omai ivikake voko ṉase ni vo Tabu ala Auvana ta o saqorake se tona, ni seta ke pesipesitake edoedoloma pesio kale ni kekai bazubazutake vo Baṉara ko bazu voa Auvana mai avozio kale. 7Ni sea poso ko ataataiti ta kama toni omuqa madu.
8Ni vo Paula ta o amaqeake mati se Jiu amu ko ilusato ko pade kale ni zouke kaboso vota parani putole o bazubazutake sai ke ilusatani maba poso kasi. Vota omai titiake se ni o madoekake mai nianiiekiko vo Baṉara ko lekasa puo. 9Melai kake ta zokele bulo keta evake ni seta pui ke tuvevo putake, ni seta kekai balebaleitake vo Baṉara ko keve koa matuma padopadoilo maba ko tanama kale. So sole Paula ta o odiemake seke tuvevo putani ni o mati olake, ni kiadama ṉaniu poso kale seta ke pesipesitake vo Tairanasi ko nianiiekato ko pade kale. 10Komi quli ta omuqa sabere kota ereivake, so sole kiadama maba se Eisia rana ke evani, Jiu amu ni pui Jiu amu, ta ke viqake vo Lekasa Jisu ko bazu.
Sikeva ko lasive meqora poso
11Ni vo Baṉara ta o erekake edoloma ko pui kiada keru o erekako jari ama aqasiele ama iruruputo Paula kale kude. 12Suma lupilupi lezu kale ama ni ailolo sabosabo vo lula okai iruruputako ta ke kati olake vere amu kasi, ni seko vere poso ta koma epezikake, ni ko ziolo poso melai kota ma rerikake. 13Nio kake se Jiu amu seke lipilipitani ni ke rerikani ko ziolo poso, se melai ke madoekake kai iruruputo vo Lekasa Jisu ko ṉi se ziolo komai onobatani kasi kikelake. So sole seta eri kikelake se ziolo poso kasi, “Aṉata a akoemela me vo Jisu ko ṉikale, vo Paula ovai bazubazutani,” kikelake. 14Ni sea sikeura tamania, vo Jiu ala raura kala siama Sikeva va kikelani ko lasive meqora poso ta ke erekake koa kalo.
15Melai ko ziolo ta eri kikolake sekasi; “Aṉata avai nianiia vo Jisu, ni avai nianiia vo Paula; melai me—ta lave mela inio ko me?” ma kikolake.
16Ni voa maba ziolo kovai onobatani ta omai kasakeake se ni zara o imake sea kiadamu. Ni seta keta soqoike voko pade kasi azo, tabi ma tabi amu ni solemauru amu. 17Ni kiadama Jiu amu ni pui Jiu amu Epesasi peuru kale ke eveni ke viqake koa bazu, ni seta keta matu ṉake, so sole seta ke matu rauraekake vo Lekasa Jisu ko ṉi. 18Ni kubo madu se lula ke tuvevo putani ta ke kuevake ni kekai eraeraoke ni kasa ke ikake ubutiania se lula ke erekako quli. 19Matu kubo madu seke erekeni ko kakokakoto ta ke kati padoivake seko kakokakoto ko buka poso ni ke siqaekake vaki ko vilu kasa. Seta keta ka padoekake koa buka poso ko tatabara, ni koko ataataiti ta sike toni vuro dola kota baroake. 20Nio koa piza kama keve kale inio vo Lekasa Jisu ko bazu kobeta olake aera ni lilimo matu kubo madu.
Epesasi ko ereima ikirato
21Ni ko quli poso ko ereilo ko tova inio Paula ta o vatoeke tu o zio Masedonia ni Akaia ranama peuru poso kale ni soa beta zio Jerusalema. Ni eri kiolake, “Sai a ziovou saita, inio Romu peuru melai aba soipikou,” kiolake. 22So sole vota o soroekake voko omuqa tauvezato ko maba kidi Timoti ni Erasitasi Masedonia rana kuleto, melai o ṉavi ta obeta evake Eisia vasia rana saita.
23Ni koa taku kale ta matu tapata kama ṉiṉoreo kota evake Epesasi peuru kale vo Baṉara ko keve kale avo. 24Ako kala maba Dimitiriasi va kikelani vo siliva okai iruruputani, ta o erekake Atemisi reko baṉara#19:24 Atemisi reko baṉara: Kota se Quriki amu ko arare ko baṉara ikio. ko siliva beku poso ni koko jelepade jaria kelo ama sasa beku jelepade poso, ni voko iruruputo kale ta kubo iruruputo ko maba poso ta matu batiro keta evake. 25Ni vota o padoemake sea kiadamu ni kama so jari ama beku ko iruruputo maba poso ni vota eri kiolake sekasi, “Meva, meta meqai nianiia ta animeko batiro ta ko kueva komia iruruputo kale azo. 26Ni erisana, meta meqai nianiia ni me viqa nea maba Paula o erekako quli. Vota eri kiola, maba madu ṉase kale ke erekako beku baṉara poso, ta pui tuvevo ama baṉara poso kiola, ni vota lula o lilima matu kubo maba madu komia Epesasi peuru kale amu ni sipole kiadama komia Eisia ranama peuru poso kale amu. 27Koa tapata ta ko mela lovou, ni komia animeko iruruputo ta ruqe ama ṉi ko kovou. Ni pui koko kiada, melai koa tapata ta matuma baṉara Atemisi ko Jelepade ta pulia quli ko ikou ni ko ṉaviko ṉaṉaidara melai kota ka niumaekou, kiadama maba Eisia peuru poso kale ke evani ni kiadama peuru ma peuru kale amu ke ilusikako koa baṉara!” kiolake.
28Nio so keru sea matuma vaki ke viqa keru koa pesio, seta keta matu iqaike ni ke taniekake upaupato ni eri kikelake, “Raura kama Atemisi Epesasi ama!” kikelake. 29Ni matuma tibaraputo kota evake koa pado ama peuru kale. Ni seke ikiratani ta ke saputikake Qaiasi ni Arisitakasi, nioqata Masedonia nioqa qo lulueveni nioqa vo Paula, ni ke rerikiniake seko padoilo ko matu zaekale. 30Ni Paula ta oka zariake amaqeo koa matu padopadoilo ko kuleto, melai seke tuvevo puteni ta pui ke zarievake vo tu o zio. 31Ni kake koa Eisia kale ama tanatanamu, se voko baerebaere poso melai keva soroekake ko bazu tu vota pui o puratou koa matuma padoilo ko zaekale. 32Ni koa padopadoilo kale kake ta kekai velavelaoke kama pado quli, ni kake ta kama edoloma quli kekai velavelaoke, ako kubo madu ta pui ke paqumukake se kekai padoivake quli sai sole. 33Ni kake sea maba poso ta upaupatole ke bazubazuevake vo Alekezada, ako se Jiu amu ta ke kuletivake vo sole. Nio Alekezada ta o moise-moisemake se voko ṉase kale tu o moizaemo, tu o ereko qaraqarailo sama pesio. 34Melai so keru seke nianiieva keru ta vota kala Jiu ala, sea kiadamu ta omadeu velavelao kekai evake omuqa aoa ko eri, “Raura kama Atemisi Epesasi ama!” kikelake.
35Ni koko tova inio koa peuru kale ama kauniseli vo rikito ko maba ta o moizaemake sea matuma vaki ni eri kiolake, “Me Epesasi amu mela! Kiadamu peuru ma peuru kale amu ta ke paqumuka ta Epesasi amu mela ta me qati vaila ko raura kama Atemisi ko Jelepade ni koko tabu lado koko piavema aukale azo. 36Puliala ta opa taka zoliovou komi quli. So sole meta pui ereko ko sarube ama kalo kerukeru pide ama. 37Meta lula me qati kuela nioqia omuqa maba koi komia padopadoilo kale melai nioqata pui nio qota mela niumaeka ko Jelepade poso ma ruqe kaseko qota mela eva ko animeko baṉara. 38Dimitiriasi ni voko iruruputo maba poso ta kuiripato saṉa ke ivou kala kikevou ta, animeta tanatanamu samela inio, ni pitopito ama titizato ko ṉaniu samela inio, ni sai nio ko roveovoa koi ko kuirikinio. 39Melai meta mata meqa zariovou kama quli ta kota ko korotiovou anime koizamela ko padoilo kale, korokoroti ama kalo kale me ereko ama. 40Ako ko vairutu lula ko ereivako quli ta kuiripato saṉa inio ko rovea imelo komia ṉiṉoreo. Kota puliama koko raki sama kiadama komia ikirato ni animeta pui meba roveovou taka kaseko koko kio ni kalo,” kiolake. 41Nio voko so kio ko tova vota o bazuemake sea vaki tu ke vaeko koa zae ni ke aero.
ទើបបានជ្រើសរើសហើយ៖
Iruruputo 19: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
