Iruruputo 18
18
Koriniti peuru kale
1Ni koko tova vasi nio Paula ta o vaekake ko Atenisi peuru ni ota olake Koriniti peuru kale. 2Sai nio vota o toraevake kala Jiu ala maba Akuila va kikelani, Ponitasi rana o alileni, vo vairua kilo obe evani sai voko reko Pirisila sate, ako vo Romu ala Aikovakova Kalaudiasi ta o bazuemake kiadama Jiu amu tu seta ke vaeko ko Romu peuru kiolake sole. Nio Paula ta o olake soipimole se, 3ni vota o evake sai ni o iruruputake se sate sai, ako vota kala pado se jari o erekani ko tepe pade sole 4Ni vota o bazubazutake Jiu amu ko ilusato ko pade kiadama Sabati ṉaniu poso kale tu o madoeko lilimo se Jiu amu ni se sai ke lotumatani Quriki amu.
5Ni so keru Sailasi ni Timoti qo baroake sai Masedonia azo, Paula ta okai iruruputake voko pado ama taku kai bazubazutole ko bazubazu, ni vota oma matu kasevake se Jiu amu vo Jisu vo inio vo Baṉara o soroeveni Pakio kiolake. 6Melai seta ke vati bikoirikake ni ruqe kasevo ke evake vo, so sole vota o zavarukake voko sabosabo tu ota ka ṉamuko ko vuruvuru ko topi ama tu kasa oma iko seko bikoirivo vo Baṉara, ni eri kiolake sekasi, “Vo Baṉara ta o koqotaemelou me heli kale tea, me ṉavi me inio meko koqotailo ko raki mela! Ako aṉata lula a ereka aṉako sake mekasi sole aṉata pui aba kai kuiriziovou meko koqotailo. So sole erisaṉa azo aṉata a ziovou ni a bazubazutou se pui Jiu amu kasi,” kiolake. 7Nio vota o vaemake, ni ota olake ni o evake kala pui Jiu ala ko pade kale Titiasi Jasitasi va kikelani, vo o ilusivani vo Baṉara, ni voko pade ta koa Jiu amu ko ilusato ko pade ko papara. 8Ni Kurisipasi koa Jiu amu ko ilusato ko pade vilua pikopiko ota kai evani, ni kiadama voko saidi ta keta tuvevo puevake vo Lekasa Jisu, ni matu kubo Koriniti ke evani maba poso seke viqeni ko Uri ama Bazu, ta keta tuvevo putake, ni bapitaiso keta evake.
9Ni omadeu ipu kale inio Paula ta o keake kama pado kelokelozato, ni vo Lekasa Jisu ta eri kiolake vokasi, “Ṉota pui ṉalo, melai beta ola bazubazuto ni pui niaba elo, 10ako aṉata ṉo sase abeta eva sole. Puliala ta opa niumaeṉou ṉo, ako kubo madu komia peuru kale amu ta aṉako maba poso sole,” kiolake. 11So sole Paula ta o evake sai omadeu ka kobu sabere, ni vota omai nianiiekikake vo Baṉara ko bazubazu.
12Ni so keru Qalio qavuna o eva keru Akaia kale ama peuru poso kale, se Jiu amu ta ke padoivake, ni seta ke noqoevake vo Paula, ni ke vati olake titizato kale. 13Ni seta eri kikelake, “Nea maba ta omai titia se maba poso tu seta ke ilusivo vo Baṉara bazu ko bikoirikako kalo kale!” kikelake.
14Nio Paula ta oka zariake tu mati tioriko se melai Qalio ta eri kiolake se Jiu amu kasi, “Komi ta kama ruqe ama quli ma kama sarueko ta lula ko ereiva ta a qea tea, aṉata ada mela lulueko inio me Jiu amu mela kimelani. 15Melai kota pesio poso ni ṉi poso ko zolizoliekinio ni me ṉaviko bazu kale ama, sole me ṉavi me inio me qorotikou ko. Aṉata pui aba titizikou soama quli!” ma kiolake. 16Ni vota o butuemake se koa titizikinio ko zaekale azo. 17So sole seta ke noqoevake vo Sosotenisi, se Jiu amu ko ilusato ko pade ko vilua pikopiko ni ke pazovake vo koa titizato ko zae ko taqo kale. Melai Qalio ta pui oka lilitake ko.
Vaito Siriama Anitioko peuru kale
18Ni Paula ta o evake seke tuvevo putani sase matu kubo ṉaniu Koriniti peuru kale, ni koko tova vota o vaemake se ni ota zazuake kala tepe vaka topi tu o vaito Siria. Ni Pirisila ni Akuila melai qo luluevake vo. Vo Paula ta lula ota tabutabui voko pui kobueko kale voko tou, ni kota kobeta okote voko tabutabuo ko taku, so sole puliako tadao vaka kale Senikeria azo vota mata o kobuekake ko. 19Ni seta ke varerikake Epesasi, sai vo o vaekekoi Pirisila ni Akuila. Sai nio vota o amaqeake se Jiu amu ko ilusato ko pade kale ni o mati pesipesitake se Jiu amu. 20Ni se maba poso ta ke pasevake vo tu vota tu o keu sai, melai vota pui oka zariake. 21Melai voko uluemo kale se vota eri kiolake, “Vo Baṉara ko vato ko elou ta aṉata a vaitou mekasi,” kiolake. So sole vota ota tadaoke Epesasi azo.
22Ni so keru vo o varerika keru Sizaria, vota o olake Jerusalema soipikole ko lotu qoqono sai ko evako, sai kazo inio vota o olake Anitioko. 23Voko sasa tu keu saizama ko tova inio vota ota olake kiadama Qelesia ni Pirijia rana, pizatimole kiadamu seke tuvevo puteni.
Apolosi Epesasi ni Koriniti peuru kale
24Ni koa taku keru inio kala Jiu ala Apolosi o ṉi sala, Alekezadaria o alileni, ta o kuevake Epesasi peuru kale. Vota kala nianiiola maba ni o uria patapataekani ko Tabu ama Riki. 25Ni vota kevai uria nianiiekikeni vo Lekasa ko keve, ni matuma lainizato sate o bazubazutani ni sidopua kai nianiiekato okai evani vo Jisu ni voko kalo. Melai Jone ko bapitaiso ko kiada ikio vo okai nianiiako. 26Ni Apolosi ta parani putole o bazubazutake se Jiu amu ko ilusato ko pade Ni Pirisila ni Akuila ta qota va viqake voko bazubazuto, Saita inio nioqata qo odievake vo ni qo vati olake nioqako pade kasi ni nioqata sidopua zakaremu pueko qovai evake vo Baṉara ko keve. 27Ni Apolosi ta oka zariake zio Akaia ranama peuru poso kale, so sole se Epesasi ama lotu qoqono ta ke tauvevake vo seko ma rikieko kale seko paseto sama leta Akaia ma lotu qoqono poso kasi tu seta ke baroekivo vo. Ni so keru vo o baroa keru sai, vota o matu tauvemake sea maba poso vo Baṉara ko pakiezato sama roquano kale ke tuvevo puteni. 28Ako voko piza kama zakaremu puto sama pesio kale inio vota zara o imake se Jiu amu voko vaki ale ama tuvevo taka kaseko kale ko Tabu ama Riki kikolani ta vo Jisu inio vo Baṉara o soroeveni Pakio.
ទើបបានជ្រើសរើសហើយ៖
Iruruputo 18: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
