मरकुस 9
9
1तेखअ बोलअ ईशू तिन्नां लोगा और आपणैं च़ेल्लै लै, “हुंह खोज़ा तम्हां का सत्त कि ज़ुंण तम्हैं इधी आसा खल़्हुऐ दै, तम्हां मांझ़ै आसा कोऐ इहै बी, कि ज़ेभै तैणीं परमेशरो राज़ पूरी शगती संघै नांईं एछे, तेभै तैणीं निं तिन्नां लै मौत एछणी।”
ईशूओ रूप बदल़णअ
(मत्ती 17:1-13; लुका 9:28-36)
2छ़हा धैल़ी बाद निंयैं ईशू पतरस और याकूब और युहन्ना सोभै ज़ण्हैं कांगनरांगै दी एकी धारा प्रैंदा लै संघा।
तिधी बधल़ूई ईशूए काया तिन्नें सम्हनै एही कि 3तेऊए झिकल़ै हुऐ इहै शेतै कि एसा पृथूईओ कोई बी धोबी निं तिहै झिकल़ै धोई सकदअ। 4ता तिधी शुझुऐ तिन्नां चिई च़ेल्लै का परमेशरो गूर मुसा और एलियाह और तिंयां दुहै लागै ईशू संघै गल्ला करदै।
5एता लै बोलअ पतरसै ईशू लै, “हे गूरू, अह हुअ ठीक कि हाम्हैं आसा ताह संघै इधी। हाम्हां बणांणैं इधी चअन मंडप; एक ताल्है, एक परमेशरे गूर मुसा लै और एक एलियाह लै।” 6तिन्नां का निं थोघै त कि किज़ै बोल़णअ, और तिंयां तै बडै भारी डरै दै।
7तैबै एक बादल़ घोर्हुअ तिन्नां प्रैंदै, बादल़ा पिछ़ू का शूणअ तिन्नैं कि परमेशर इहअ बोलदअ, “अह आसा मेरअ शोहरू हुंह करा एऊए बडी झ़ूरी एऊए शूणां ज़िहअ तम्हां लै बोले तिहअ।” (2 पतरस 1:17; भज़न 2:7) 8तिन्नैं भाल़अ फेर और ईशू छ़ाडी निं तिन्नां आप्पू संघै होर कोहै शुझुअ।
9धारा का उंधै होथदी बोलअ ईशू तिन्नां लै, “ज़ेभै तैणीं मुंह मणछे शोहरू परमेशर मरी करै भी ज़िऊंदै निं करी हेरे, तेभै तैणीं निं इना गल्ला कोही का खोज़ी ज़ुंण तम्हैं आझ़ धारा प्रैंदै भाल़ी।”
10तिन्नैं डाही ईंयां गल्ला आद और आप्पू मांझ़ै लागै छफल़दै कि मूंऐं दै मणछो ज़िऊंदै हणैंओ मतलब किज़ै आसा होए?
11तिन्नैं पुछ़अ ईशू का कि “ईंयां शास्त्री ता इहअ बोला, कि एलियाह गूरो आसा मसीहा का पैहलै एछणअ ज़रूरी?”
12ईशू बोलअ तिन्नां लै, “ईंयां गल्ला ता आसा सच्च़ी, परमेशरै आसा आप्पै बोलअ द कि एलियाह एछणअ। तेऊ करनै कई लोग मसीहा एछणें धैल़ी लै तैर। पर मुंह मणछे शोहरू लै इहअ किल्है आसा लिखअ द कि तेऊ लै हणैं बडै भारी दुख और सह निं तिन्नां किछ़ू कामों समझ़णअ?
13 “पर हुंह खोज़ा तम्हां का सत्त कि एलियाह आसा मुक्कअ द एछी! ज़िहअ तिन्नें दिलै बोलअ तिहै किऐ तिन्नैं तेऊ लै दी ज़ुल्म ज़िहअ पबित्र शास्त्रा दी पैहलै ई आसा लिखअ द।”
भूत शाचअ द शोहरू ठीक करनअ
(मत्ती 17:14-21; लुका 9:37-43)
14ज़ांऊं ईशू और तिंयां चअन च़ेल्लै होरी च़ेल्लै सेटा धारा का उंधै होथै, ईशू भाल़अ कि तिन्नां फेर आसा बडै भारी खास्सै लोग कठा हुऐ दै और शास्त्री आसा लागै दै तिन्नां संघै हठल़दै। 15और ईशू भाल़ी करै हुई सोभी बडी रहैनी, और तेऊ सेटा लै ठुर्ही करै एछी करै किअ नमस्ते।
16ईशू पुछ़अ तिन्नां का, “तम्हैं इना संघै किज़ू गल्ले बारै आसा हठल़दै लागै दै?”
17तिधी कठा हुऐ दै खास्सै लोगा मांझ़ा का बोलअ एकी ईशू लै, “हे गूरू, मंऐं आसा आपणअ शोहरू ताह सेटा लै आणअ द तेऊ दी आसा टाट्टअ भूत शाचअ द। 18ज़िधी बी एऊ अह भूत एछा अह पल़ा तेभै धरनीं लाम्मअ, संघा निखल़ा एऊए खाखा का शेफा, अह किला आपणैं दांद और तेखअ फिरा अह ल़ेल़अ।
“मंऐं बोलअ तेरै च़ेल्लै का बी कि एऊ भूता काढा एऊ का पोर्ही पर इने भलै निस्सअ अह निखल़ी।”
19इहअ शूणीं करै बोलअ ईशू तिन्नां लै, “हे बैहम करनै आल़ै लोगो! मुंह कधू तैणीं रहणअ तम्हां संघा कि तम्हैं विश्वास करे? मुंह केभै तैणीं रहणअ तम्हां न्हैल़ै लागी कि तम्हैं विश्वास करे? ओर्ही आणा एऊ लान्हैं मुंह सेटा लै!”
20तिन्नैं आणअ सह ईशू सेटा लै और ज़ांऊं ईशू सह भाल़अ, ता तेऊ भूतै मरोक्कअ सह मणछ धरनीं माटै जैंदरी बदल़ी और तेऊए खाखा का निखल़ी शेफा।
21तिन्नैं पुछ़अ तेऊए बाप्पू का, “एऊए अह एही हालत कधू ओर्ही आसा?” 22तेऊए बाप्पू बोलअ, “एऊओ आसा अह हाल होछ़ी उझै; एऊ भूतै ता अह हारी मारी आणअ, केभै शोटअ अह तेऊ भूतै पाणीं जैंदरी, ता केभै शोटअ आगी जैंदरी, ज़ै तूह किज़ै करी सका, हाम्हां लै कर झींण और एऊ कर ठीक।”
23ईशू बोलअ तेऊ लै, “ज़ै तूह करी सका; अह कै गल्ल हुई? विश्वास करनै आल़ै लै सका सोभ गल्ला हई।”
24शोहरुए बाप्पू का छ़ुटै तेभी लेरा लाई आशू और तेऊ बोलअ, “हे ईशू, मुंह आसा विश्वास कि तूह सका मेरी मज़त करी पर मेरअ विश्वास निं मज़बूत आथी। तूह कर मेरी मज़त ताकि मेरअ विश्वास पाक्कअ होए।”
25ज़ांऊं ईशू भाल़अ कि बडै भारी लोग हूऐ तिधी कठा, ता, ईशू तेऊ भूता लै झ़ाहल़ काढी करै बोलअ, “टाट्टै और टौणैं भूता, हुंह बोला ताल्है एऊए देही का निखल़ पोर्ही और भी निं लागी एऊए देही दी हटी एछी।”
26तेखअ पाई तेऊ भूतै ज़ोरै-ज़ोरै लैल़ा-क्रुंगा, और तेऊ मरोक्की करै निखल़अ पोर्ही और सह शोहरू पल़अ ज़िहअ धरनीं नर्तान। लोग लागै इहअ बोलदै कि अह शोहरू मूंअ। 27पर ईशू तेऊ शोहरूओ हाथ ढाकअ और सह उझ़ुअ खल़अ।
28ज़ांऊं ईशू और तेऊए च़ेल्लै घरा लै आऐ ता तिंयां लागै ईशू का कांगनरांगै दी पुछ़दै, “हाम्हैं तेऊ भूता किल्है निं काढी सकै?”
29ईशू बोलअ तिन्नां लै, “इहै भूता सका तम्हैं सिधी प्राथणां करै काढी एतो निं होर किछ़ै लाज़ आथी।”
ईशू खोज़अ आपणीं मौत हणें बारै पैहलै ई
(मत्ती 17:22-23; लुका 9:43-45)
30तेखअ नाठै तिंयां तिधा का गलील लाक्कै बाती आजू। ईशू च़ाहा त इहअ कि एसा गल्लो थोघ निं लोल़ी कोही का लागअ।
31किल्हैकि ईशू करा त आपणैं च़ेल्लै लै एही शिक्षा दैई और इहअ बोली “हुंह मणछो शोहरू पाणअ तिन्नां कैद और तेखअ पाणअ तिन्नां हुंह मारी पर हुंह हणअ मरी करै चिऊथै धैल़ै भी ज़िऊंदअ।” 32पर ईशूए ईंयां गल्ला निं तिन्नां समझ़ आई, इना गल्लो भेद पुछ़णै का बी लागा ती तिन्नां डौर।
सोभी का बडअ कुंण
(मत्ती 18:1-5; लुका 9:46-48)
33तेखअ आऐ तिंयां कफरनहूम नगरी और एकी मणछे घरै पुजी करै ईशू तिन्नां का पुछ़अ, “बाता तम्हैं किज़ू गल्ला पिछ़ू तै हठल़दै लागै दै?”
34तिंयां सोभ हुऐ च़ुप्पी, किल्हैकि तिंयां तै बाता हांढदी इहअ हठल़दै लागै दै कि हाम्हां मांझ़ै बडअ कुंण आसा? 35तेखअ बेठअ ईशू धरनीं और तिंयां बारा च़ेल्लै आप्पू सेटा लै शादी करै तिन्नां लै बोलअ, “ज़ै तम्हां मांझ़ै कुंण बडअ हणअ च़ाहा, ता तेऊ लागा पैहलै सोभी का होछ़अ हणअ।”
36तेखअ किअ ईशू तिन्नां मांझ़ा का एक लान्हअ खल़अ। सह आपणीं कल़टी दी बशैल़ी करै तिन्नां लै बोलअ,
37 “ज़ुंण बी मेरै नांओंऐं इहै शोहरू लै झींण करे, सह करा मेरी कदर। ज़ुंण मेरी कदर करा सह निं सिधी मेरी कदर करदअ पर सह करा तेऊ परमेशरे कदर ज़ुंणी हुंह संसारा लै आसा छ़ाडअ द।”
ज़ुंण खलाफ निं आथी सह आसा पक्षा दी
(लुका 9:49-50)
38तेखअ बोलअ युहन्ना ईशू लै, “हे गूरू, हाम्हैं भाल़अ तेरै नांओंऐं एक मणछ भूता काढदअ हाम्हैं लागै तै तेऊ लै नांईं करदै बी कि इहअ निं करै; किल्हैकि सह हाम्हां संघै ता एछदअ निं आथी।”
39ईशू बोलअ तिन्नां लै, “तेऊ रोकदै निं लागी किल्हैकि इहअ निं कोहै बी आथी ज़ुंण मेरै नांओंऐं च़मत्कारे काम करा और तेभी बोले मुल्है बूरअ।
40 “ज़ुंण म्हारै खलाफ निं आथी सह आसा म्हारै पक्षा दी। 41ज़ुंण बी मसीहे समझ़ी करै तम्हां लै एक गलास पाणींओ पणैंऊंए तेऊ भेटणअ परमेशरा का तेतो फल।”
ज़ुंण होरी का पाप कराऊआ
(मत्ती 18:6-9; लुका 17:1-2)
42 “ज़ुंण मुंह दी विश्वास करनै आल़ै का पाप कराऊआ तेऊ लै दैणीं परमेशरा सज़ा। च़ाऐ सह मणछ इना लान्हैं ज़िहअ किल्है निं होए। तेऊ लै हणअ त इहअ ठीक कि तेऊए गल़ै बडी टोल्ह बान्हीं करै पाणअ त सह समुंदरै।
43 “ज़ै तूह आपणैं हाथा करै पाप करा, ता तेता करै पाप करने पाआ छ़ाड, च़ाऐ ताह सह काटणअ किल्है निं पल़े। टुंडअ हई करै सदा रहणैं आल़ी ज़िन्दगी दी डेऊणअ आसा ताल्है एता का भलअ कि दुही हाथा संघै तूह नरके आगी दी पल़े ज़ुंण आग कधि निं हिशदी। 44नरकै रहा तिन्नें देही खांदअ इहअ किल़अ लागी ज़ुंण कधि निं मरदअ और नां कधि तिन्नां दहणैं आल़ी आग हिशदी।
45 “ज़ै तूह आपणैं खूरा करै पाप करा, ता तेता बी कर आप्पू का दूर। च़ाऐ ताह सह काटणअ किल्है निं पल़े। किल्हैकि लाट्टअ हई करै सदा रहणैं आल़ी ज़िन्दगी दी डेऊणअ आसा ताल्है एता का भलअ कि तूह दुही खूरा संघै नरके आगी दी पल़े। 46‘नरकै रहा तिन्नें देही खांदअ इहअ किल़अ लागी ज़ुंण कधि निं मरदअ और नां कधि तिन्नां दहणैं आल़ी आग हिशदी।’
47 “ज़ै तेरी आछी का कई गल्ला भाल़ी तूह पाप करा, तिन्नां पापा दी पाणै आल़ी गल्ला भाल़णैं का रह दूर। च़ाऐ ताह सह आछ पोर्ही किल्है निं पल़े काढणीं। कांणअ हई करै ई परमेशरे राज़ा दी डेऊणअ आसा ताल्है भलअ कि तूह दूई आछी संघै नरका दी पल़े। 48‘नरकै रहा तिन्नें देही खांदअ इहअ किल़अ लागी ज़ुंण कधि निं मरदअ और नां कधि तिन्नां दहणैं आल़ी आग हिशदी।’ (याशायाह 66:24)
49 “परमेशरा करनअ हरेक मणछ आगी करै शुचअ ज़िहअ बल़ीदान की दी च़िज़ा लूंण पाई शुचै करा तै। 50लूंण आसा ठीक पर ज़ै लूंणो सुआद लूंणअ नांईं होए ता सह किज़ू करै करनअ लूंणअ? आप्पू मांझ़ै रहा लूंणा ज़ेही साथ डाही करै मिल़ी-ज़ुल़ी।”
ទើបបានជ្រើសរើសហើយ៖
मरकुस 9: OSJNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This work is licensed under Creative Commons Attribution-ShareAlike 4.0 License.