लुका 11
11
च़ेल्लै का प्राथणां करनी सखाऊंणी
(मत्ती 6:9-13)
1ईशू त एकी ज़ैगा प्राथणां करदअ लागअ द और ज़ांऊं सह प्राथणां करी मुक्कअ ता तेऊए च़ेल्लै मांझ़ै बोलअ एकी, “हे प्रभू ज़िहअ युहन्ना आपणैं च़ेल्लै का प्राथणां करनअ सखाऊअ तिहअ ई सखाऊ हाम्हां का बी।”
2ईशू बोलअ तिन्नां लै, “ज़ेभै तम्हैं प्राथणां करे, तम्हैं करै एऊ साबै प्राथणां,
हे बाप्पू, सोभी लोल़ी तेरै पबित्र नांओंए कदर की
और तेरअ राज़ लोल़ी आअ।
3 हर धैल़ै दै हाम्हां लै बैल़ी-क्लारी ज़ेते हाम्हां ज़रुरत आसा।
4 म्हारै पाप कर माफ,
ज़ेही हाम्हैं बी होरी लै माफी छ़ाडी ज़ुंणी हाम्हां लै ज़ुल्म किऐ।
हाम्हां निं परखी आथी।”
प्राथणां करने बारै ईशूए शिक्षा
(मत्ती 7:7-11)
5तेखअ बोलअ ईशू तिन्नां लै, “तम्हां मांझ़ै इहअ कुंण आसा कि ज़सरअ एक साथी आसा और सह आधी राची एछी करै इहअ बोले, ‘आरा साथी, मुल्है दै चअन रोटी।’ 6किल्हैकि एक मसाफर आसा आअ द मेरै घरै और तेऊ लै निं मुखा खैऊंणा लै किछ़ै आथी। 7ता सह बोला भितरा का, ‘मुंह तंग करदअ निं लागै, ऐबै हेरअ हाम्हैं दूआर बंद करी और मेरै लान्हैं आसा मुंह संघै च़ैन्नै सुत्तै दै, हुंह निं एभै ताल्है रोटी दैंदअ खल़अ उझ़ुई सकदअ?’ 8पर हुंह बोला तम्हां लै कि, ज़ै सह साथी हई करै बी च़ैन्ना का उझ़ुई करै रोटी नां दैए, ज़ै सह भी-भी दुआर टोके ता तेऊए लाज़ शरम छ़ाडी करै मांगणैं भाल़ी हेरनअ तेऊ लै तेतरअ दैई ज़ेतरी तेऊ ज़रुरत आसा।
9 “हुंह बोला तम्हां लै कि मांगदै रहा लागी; तै जाणीं तम्हां सह गल्ल भेटी ज़ेता तम्हैं मांगा। दुआरा रहा टोकदै लागी और सह दुआर जाणअ तम्हां लै खुल्ही। 10किल्हैकि ज़ुंण मांगा तेऊ लै हेरा दैई और ज़ुंण लोल़ा तेऊ जा भेटी। और ज़ुंण दुआरा टोका तेऊ लै हेरा दुआर खोल्ही।
11 “तम्हां मांझ़ै इहअ कुंण बाप्पू हणअ कि तेऊओ शोहरू मांगा रोटी और सह दैआ तेऊ लै पात्थर! तेखअ ज़ै माह्छ़ली मांगा ता तेते बदल़ै दैआ तेऊ लै दानअ! 12ज़ै आंडअ मांगे, ता तेऊ लै दैआ बिंच़ू! 13ज़ै तम्हैं बूरै हई करै बी आपणैं शोहरू लै राम्बल़ी च़िज़ा दैई सका, तै थारअ स्वर्गे रहणैं आल़अ बाप्पू परमेशर आपणैं मांगणैं आल़ै लै पबित्र आत्मां किल्है निं दैई सकदअ।”
ईशू और भूतो राज़अ
(मत्ती 12:22-30; मरकुस 3:20-27)
14तेखअ ईशू एकी मणछा का काढअ एक टाट्टअ भूत। ज़ांऊं सह भूत तेऊ का पोर्ही निखल़अ ता सह टाट्टअ मणछ लागअ गल्ला करदअ और लोग हुऐ बडै भारी रहैन। 15पर तिन्नां मांझ़ै बोलअ कई इहअ, “अह काढा भूते राज़ै राख्से शगती करै इना भूता।” 16कई बोलअ तेऊ लै कि, ज़ै तूह असली दी परमेशरै आसा हाम्हां सेटा लै आसा छ़ाडअ द, तै रहैऊ हाम्हां का सरगै एक नछ़ैण।
17ईशू हेरी तिन्नें गल्ला भुझ़ी और ईशू बोलअ तिन्नां लै, “ज़हा राईसी दी फूट पल़ा, सह हआ बरैबाद ठीक इहअ ई ज़हा घरै फूट पल़ा, सह घर बी हआ बरैबाद। 18ज़ै राख्स आपणअ ई बरोधी होए ता तिन्नों राज़ किहअ करै रहणअ बणीं? किल्हैकि तम्हैं बोला मुल्है इहअ कि राख्सा करै काढा इना भूता? 19ज़ै तम्हैं मुल्है इहअ बोला कि हुंह काढा राख्सा करै इना भूता दूर! तै हुई अह गल्ल बी शुची कि थारै च़ेल्लै काढा भूत राख्से शगती करै? मुखा बी आसा इहअ थोघ कि अह गल्ल आसा गलत! एसा गल्लो न्याय हेरअ तिन्नैं करी कि तम्हैं बोला झ़ुठी गल्ला। 20पर ज़ै हुंह परमेशरे शगती करै इना भूता दरल़ाऊआ, तै गअ परमेशरो राज़ तम्हां सेटा पुजी। 21राख्सा ज़िहै जोधअ मणछ ज़ुंण अस्त्र-शस्त्र संघै आपणैं घरे हेर-सभाल़ करा तेऊओ घर निं कोहै लुटी सकदअ। 22पर ज़ै तेऊ का बडअ जोधअ तेऊ जुधा लै एछे, तै ज़िता तेऊ का सह जोधअ और तिंयां अस्त्र-शस्त्र ज़ेथ दी तेऊ भरोस्सअ त तिन्नां पाआ सह छ़ड़ैऊई और तेखअ सका सह लुटी। 23ज़ुंण मुंह संघै नांईं आथी सह आसा मेरअ बरोधी। ज़ुंण मुंह संघै नांईं झाल़दअ सह पाआ पोछी।
कज़ाण बिद्या खाआ प्राण
(मत्ती 12:43-45)
24 “ज़ांऊं भूत मणछा का बागै निखल़ा, सह लोल़ा शुक्की ज़ैगा दी राआमा करना लै और ज़ांऊं तेऊ नांईं भेटा ता तेखअ बोला सह आप्पू लै इहअ, ‘मुंह डेऊणअ तेऊ ई मणछा दी बस्सणा लै बापस ज़िधा का हुंह पैहलै आसा निखल़अ द।’ 25बापस फिरी करै भाल़ा सह तेऊ मणछा शुन्नैं, धोअ-शोअ और सज़ाऊऐ दै घरा ज़िहै। 26तेखअ आणा सह भूत आप्पू का बी बूरै सात होर भूत आप्पू संघै शादी और तिंयां बस्सा सोभ तेऊ दी। तेऊ मणछे हआ तेखअ पैहलै का बी खास्सी बूरी दशा।”
परमेशर कसा लै हआ खुश?
27ज़ांऊं ईशू इना गल्ला बोलदअ त लागअ द ता लोगे झाल़ै मांझ़ा का बोलअ एकी बेटल़ी ज़ोरै-ज़ोरै, “परमेशरे बर्गत आसा तेऊ गर्भा लै ज़ेथ तूह रहअ, और ज़सरअ तंऐं दुध झुटअ।”
28ईशू दैनअ तिन्नां लै ज़बाब, “हाँ, पर परमेशर हआ तिन्नां लोगा करै खुश ज़ुंण परमेशरो बैण शूणां और तिहअ करा बी।”
स्वर्गे नछ़ैण रहैऊंणे मांग
(मत्ती 12:38-42)
29ज़ांऊं तिधी खास्सै लोगो झाल़अ हुअ ता ईशू लागअ बोलदअ, “एसा पोस्तीए बूरै लोग लोल़ा नछ़ैण, पर योना गूरे नछ़ैणां छ़ाडी निं तिन्नां होर नछ़ैण भेटणअ। 30ज़िहअ परमेशरो गूर योना निनबे नगरीए लोगा लै नछ़ैण हुअ, तिहअ ई हणअ हुंह मणछो शोहरू बी लोगा लै नछ़ैण।
31 “दखण देशे राणीं लाणअ न्याय हणें धैल़ी एऊ ज़मानें लोगा संघै उझ़ुई करै तिन्नां लै दोश कि सह आई सुलैमाने ज्ञैना शुणदी पृथूईए दुजै बाढा का पर तम्हैं निं आपणअ मन बदल़अ। हेरा, इधी आसा सुलैमाना का बी बडअ। (1 राज़ा 10:1-10; 2 इतिहास 9:1) 32निनबे नगरीए लोगा बी लाणअ न्याय हणें धैल़ी एऊ ज़मानें लोगा लै दोश। किल्हैकि योना गूरे प्रच़ारा शूणीं छ़ाडी तिन्नैं बूराई करनी पर तम्हैं निं आपणअ मन बदल़अ। हेरा, इधी आसा परमेशरे गूर योना का बी बडअ। (योना 3:5-10)
देहीओ प्रैशअ
(मत्ती 5:15; 6:22,23)
33 “लोग निं लाटू ज़ाल़ी करै पाटल़ै हेठै दाबी डाहंदै तेता डाहा उछ़टै दी ताकि सारै घरै प्रैशअ होए।
34 “तेरी देहीओ प्रैशअ आसा तेरी आछ। ज़ै तेरी आछ ठीक होए, तै हणीं तेरी सारी देही प्रैशी। पर ज़ै तेरी आछ खोईए तै हणीं तेरी सारी देही न्हैरी। 35एसा गल्लो डाहै धैन कि ज़ुंण प्रैशअ तम्हां भितरी आसा, सह निं लोल़ी न्हैरअ हुअ। 36ज़ै तेरी सारी देही प्रैशी होए और कोऐ बी ज़ैगा तेते न्हैरी नां होए, तै हणीं सोभै गल्ला एही प्रैशी ज़िहअ लाटू ज़ाल़ी करै प्रैशअ हआ।”
शास्त्री और फरीसी लै सीख
(मत्ती 23:1-36; मरकुस 12:38-40)
37ज़ांऊं ईशू इना गल्ला बोलदअ त लागअ द, ता एकी फरीसी मणछै की ईशू सेटा अरज़ कि हे प्रभू, आझ़ खाआ मेरै घरै रोटी; और ईशू नाठअ भितरा लै रोटी खांदअ। 38सह फरीसी लागअ एसा गल्ला सोठदअ कि ईशू रोटी खाणैं का पैहलै म्हारै पित्तरे रिती-रबाज़े साबै न्हैऊअ किल्है निं? 39प्रभू बोलअ तिन्नां लै इहअ, “हे फरीसी लोगो, तम्हैं बतिल्लू और थाल़ू बागा का ता धोआ पर भितरा का आसा तम्हैं ऐईबी और बूराई करै भर्हुऐ दै। 40हे नांसमझ़ मणछो, ज़ुंणी बाघलअ भाग बणांअ, तेऊ आसा सह भितरा का बी बणांअ द। 41पर हाँ, भितरे च़िज़ा करा गरीबा दान, तेखअ भाल़ै तम्हैं कि तम्हां लै हणीं सोभै गल्ला शुची।
42 “पर हे फरीसी लोगो, तम्हां लै एछणी बडी भारी खरी! तम्हैं सोभी रंगे भाज़ी, पदिनै और शाग-पाचो दसुअ हेस्सअ ता दैआ पर न्याय और परमेशरे झ़ूरी डाहा तम्हैं पिछ़ू। हुअ ता लोल़ी त इहअ कि इना गल्ला बी रहंदै मंदै और तिन्नां बी नांईं छ़ाडदै। (मत्ती 23:23; मीका 6:8; लेबी बधान 27:30)
43 “पर हे फरीसी लोगो, तम्हां लै एछणी बडी भारी खरी! आराधना सभा दी झ़ूरा तम्हैं खास ज़ैगा बेशणा लै। बागै भितरी च़ाहा तम्हैं कि लोगै लोल़ी तम्हां सेटा हाथ ज़ोल़ै। 44तम्हां लै एछणी बडी भारी खरी! किल्हैकि तम्हैं आसा ज़िहै घोरी दाबै दै मुल्दै ज़िहै, ज़हा प्रैंदा बाती लोग हांढा पर तिन्नां का निं थोघ हंदअ।”
45तेखअ एकी शास्त्री बोलअ ईशू लै, “हे गूरू, इहअ बोली करै करा तूह म्हारी निंदा।”
46ईशू बोलअ, “हे शास्त्री लोगो, तम्हां लै भाल़ किहअ शोग हणअ! तम्हैं आसा इहै बोझ़ै ज़ुंण कोहिए निं च़खदै। तेता लादा तिंयां होरी मणछे पिठी। पर आप्पू निं गुंठी करै उटअ पाच तुआणअ करनअ च़ाहंदै। 47तम्हां लै एछणी बडी भारी खरी! किल्हैकि तम्हैं हआ परमेशरे तिन्नां गूरा लै समाधी बणांदै लागै दै ज़ुंण थारै पित्तरै आसा मारी पाऐ दै। 48इहअ करै खोज़ा तम्हैं आपणैं बारै आप्पै और आपणैं पित्तरै किऐ दै कामां दी आसा तम्हैं साझ़ू, किल्हैकि तिन्नैं ता पाऐ तिंयां मारी और तम्हैं खण्हां तिन्नें खात्ती। 49तैहीता परमेशरे बुधि इहअ बोला कि ‘मुंह छ़ाडणैं तिन्नां सेटा लै आपणैं गूर और शधाणूं और तिन्नां पाणै तिन्नां मांझ़ै कई ज़ण्हैं मारी और कई करनै तिन्नां दुखी।’
50 “ताकि परमेशरे ज़ेतरै गूरो लोहू संसारे मूल़ ओर्ही बहाऊअ द आसा, तेतो साब-कताब लणअ एऊ जुगे लोगा का। 51हाबिले हत्या ओर्ही जकरयाह तैणीं ज़सरअ बेदी और मांदरा मांझ़ै लोहू बहाऊअ द आसा, हुंह खोज़ा तम्हां का सत्त कि तेतो साब-कताब लणअ एऊ ई जुगे लोगा का। (मूल़ 4:8; 2 इतिहास 24:20-21)
52 “हे शास्त्री लोगो, तम्हां लै एछणी बडी भारी खरी! कि तम्हैं आसा डाही दी ज्ञैने कुंज़ी आप्पू का, नां ता तम्हैं आप्पू स्वर्गै नाठै और नां तम्हैं तिन्नां डेऊणैं दैंदै ज़ुंण डेऊई सका।”
53ज़ांऊं ईशू तिधा का नाठअ ता शास्त्री और फरीसी पल़ै पिछ़ू और तिंयां लागै छफल़दै कि खास्सी गल्ले च़रच़ा करनी 54तिंयां रहै एसा गल्ले ताका कि ईशूए मुंहां कोई बी गलत गल्ल ढाकी सके।
ទើបបានជ្រើសរើសហើយ៖
लुका 11: OSJNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This work is licensed under Creative Commons Attribution-ShareAlike 4.0 License.
