MATAYO 27
27
Yesu Yahilwa khu Pilato
(Mk 15:1; Luka 23:1-2; Yoh 18:28-32)
1Nukushili mu mavwevwe, vasalisi vakali voosi nende vasakhulu vakanila halala nivaloshitsa khuli vanyala khwiira Yesu. 2Vavoha Yesu khu masili, nivamurulitsaho khandi nivamuhila khu Pilato, wali nali gavana wu lusomo lwa Varoma.
Yuda Yisunga Mwene
(Vikh 1:18-19)
3Lwa Yuda, wali natsami Yesu, yahulila ndi Yesu umali khukhalachilwa likhutsa, yikanila, nakalushitsa tsisenti tsialombwa khu ifetsa vitonye makhomi kavaka khu vasalisi vakali nende vasakhulu. 4Yavoola, “Kholi vwoni khutsama mundu uvula vutamanu vwosi.” Vareeva, “Kenako kali nu vukhonyi shina khu khutsi? Ni koko mwene.”
5Yuda yasiuva tsisenti tsialombwa khu ifetsa tsienetso hasi mu Litempeli, narulaho; yasimukha natsia khwisunga. 6Vasalisi vakali vatola tsisenti tsialombwa khu ifetsa tsienetso, nivavoola, “Yitsi ni tsisenti tsi shisahi; khandi nu vutamanu khulondokhana khu Malako keru khutsivikha mu livishilu li Litempeli.” 7Lwa vali nivamali khulomolomakhu shindu khulondokhana khu tsisenti tsienetso, vakuula Mulimi ku Muloonji wi Tsinyungu, khuva havundu ha vanyala khuyeveelanga mivili chia vandu vacheni nivamali khukhutsa. 8Nako kachilanga mulimi kwenoko nu kulaangwa “Mulimi kwi Shisahi” khali nunundi.
9Khulwa yako, makhuva ka Muprofeti Yeremia yali niyavoola karweshitswa,
“Vavukula tsisenti vitonye, makhomi kavaka tsialombwa khu ifetsa, tsia Vaisraeli vali nivahulishitsane khumurunga, 10nivakuula mulimi ku muloonji, khuli Mwami Nyasaye yali niyambolela.”
Pilato Yareeva Yesu Mareevo
(Mk 15:2-5; Luka 23:3-5; Yoh 18:33-38)
11Yesu yasinjila imbeli wa gavana, namureeva, “Nivi Mwami wa Vayahudi?” Yesu yachipa, “Toto, uvooli.” 12Navutswa lwa yayaalwa na vasalisi vakali nende vasakhulu, shindu shivulakhuho shia yachipakhu.
13Nalwo lwa Pilato yamureeva, “Ushili khuhulilakhu vindu yivi viosi via vakhuyaalilakhu?” 14Navutswa shindu shivulakhuho shia Yesu yachipakhu; nikachenyinya muno gavana.
Yesu Yakhalachilwa Likhutsa
(Mk 15:6-15; Luka 23:13-25; Yoh 18:39—19:16)
15Shia litukhu liu Mulukha kwa Pasaka, gavana yali nu mwiima kukhuvoholola muvohe mulala wa vandu venyanga. 16Mumatukhu kenako, khwaliho nu muvohe wali niyamanyikhana walaangwangwa Baraba.#27:16 Baraba: Mahandiko kandi kakhale kavoolanga Yesu Baraba. 17Khulwa yako, lwa shituma shia vandu vali nivakanile halala, Pilato yavareeva, “Mwenyanga muvohololele viina, Baraba inoho Yesu ulaangwangwa Masiha?” 18Pilato yali umanyi vulahi ndi valolele Yesu imbotokha lwa vamulera khuye.
19Lwa Pilato yali niyikhale mu inzu ya vakhalachilamu vandu, mukhali wewe yarumana likhuva navoola, “Uvuli khukholakhu shindu shiosi khu mundu wi likhola liu vulunji woyo, shichila vutukhu vunu, nyakhane vutamanu muno mu malooro shichila ye.”
20Khulwa yako, vasalisi vakali nende vasakhulu vakaatilitsa vandu vareeve Pilato avoholole Baraba, na Yesu yiirwi. 21Navutswa Pilato yareeva shituma shia vandu, “Ni viina khu vavili yava wa mwenyanga muvohololele?” Vamuchipa, “Baraba.”
22Pilato yavareeva, “Ni shina shia mwenyanga khole Yesu uli ni lira Masiha?” Voosi vamuchipa, “Khutukha avambwi.”
23Pilato yareeva khandi, “Ni shindu shina shitamanu shia ye akholi?” Navutswa voosi valaanjilila ikulu muno, nivavoola, “Khutukha avambwi.”
24Lwa Pilato yalola vandu vamukutilili, khali shileeche nishili himbi khuraanga, yavukula matsi, nasava makhono keke imbeli wi shituma shia vandu. Yavoola, “Mbula vutamanu vwosi khulondokhana khu likhutsa liu mundu uyu! Kali khu munyi vene.”
25Shituma shia vandu voosi vachipa, “Shisahi shieshie shive khu khutsi halala na vaana veru!”
26Nalwo lwa Pilato yavoholola Baraba; khandi namali khuhaana lilako Yesu ashiutwi, yamuhaana avambwi.
Vasikali Vakholela Yesu Shihenye henye
(Mk 15:16-20; Yoh 19:2-3)
27Nalwo lwa vasikali va Pilato vahila Yesu Mupritoriomu, ma mukaanda kwa vasikali voosi nivalaangwa halala. 28Vamufwalula tsinguvu tsietsie nivamufwala inguvu ya sambarau. 29Valukha ingara ya mavwa nivamufwala khu murwi kwekwe. Vavukula lusala nivara mu mukhono musatsa kwa Yesu; vasikama imbeli wewe, nivamukholela shihenye henye. Vavoola, “Mwami wa Vayahudi, uhindile muno!” 30Vasutsila Yesu maree, nivamurumula nu lusala khu murwi. 31Lwa vali nivamali khumukholela shihenye henye, vamufwalula ikaanzu ya sambarau, nivamufwala tsinguvu tsietsie; vamurulitsa ilwanyi, nivatsia khumuvamba.
Yesu Yavambwa khu Musalaba.
(Mk 15:21-32; Luka 23:26-43; Yoh 19:17-27)
32Lwa vali nivarulaho, vakana nu mundu, walaangwangwa Simoni wi litaala lia Kurene; khandi nivamunika ni tsingulu khuchinga musalaba kwa Yesu. 33Lwa vatukha havundu halaangwangwa Golokotsa (Kavoolanga, “Havundu hi Shihanga”), 34vamuha idivai yatsukanyinywa shindu shilulu; navutswa lwa yatsanzamakhu, yambakhana khuching'wa.
35Lwa vali nivamali khuvamba Yesu khu musalaba, vakhuva ikura khukavulana tsinguvu tsietsie vene khuvene; 36nivikhalaho hasi khumulinda. 37Khumusalaba kwa Yesu hikulu hene vali vahandikakhu shivune shiachila nakhalachilwa likhutsa, shivoolanga, “Uyu neye Yesu, Mwami wa Vayahudi.” 38Vavamba vandu vanuuli vavili halala na Yesu, mulala khuluveka lu mukhono kwekwe musatsa na wundi khuluveka lu mukhono kwekwe mukhali.
39Vandu vali nivaviraho vasung'usa mirwi chiavo, nivasiuvila Yesu manyeko, 40nivavoola, “Yivi wakhapomole Litempeli khandi uliumbashe mumatukhu kavaka, yihonyinyi mwene! Niiva uli Mwana wa Nyasaye, yikha hasi khurula khu musalaba.”
41Khali ndio, vasalisi vakali, veechitsi va Malako nende vasakhulu, vakholela khandi Yesu shihenye henye. 42Vavoola, “Yahonyinyanga vandi; navutswa shianyala khwihonyinya mwene tawe. Neye Mwami wa Israeli. Leshi yishi hasi khurula khu musalaba nunundi; khandi khusuuvile muye! 43Yasuuvilanga mu Nyasaye nu khwilaanga neye Mwana wa Nyasaye; nu vulahi, leshi khulole niiva Nyasaye alamuhonyinya nunundi.” 44Khali vanuuli vavambwa neye vamunyeka.
Likhutsa lia Yesu
(Mk 15:33-41; Luka 23:44-49; Yoh 19:28-30)
45Lwa tsisaa sita tsiu mbasu tsiatukha, shivala shiosi shiamwama nishikwa shisuundi khutukha tsisaa tisa. 46Himbi tsisaa tisa, Yesu yalila nu mwoyo mukali, navoola, “Eloi, Eloi lama Sabaktani,” nakhwo khuvoola, “Nyasaye wanje, Nyasaye wanje, shichila shina unzivale?” 47Lwa vandu vali nivasinjileho vahulila ndio vavoola, “Alanganga Eliya!” 48Mulala khu vandu venavo yilukhaka vwangu navukula shitasi, niyinikha mu idivai indulu. Yavoha khu shisala naha Yesu ang'wi.
49Navutswa vandi vavoola, “Lindilili, khulole niiva Eliya aliitsa khumuhonyinya!”#27:49 Mahandiko kandi kakhale kameetakhu makhuva yaka “khandi wundi yavukula lirimu, namulivira mumbalu; ma matsi nikarulamu nende musahi.”
50Yesu yalila nu mwoyo mukali, nakhutsa.
51Luvaala lwali nulwashinga mu Litempeli lwarandukhamu hali khavili khurula ikulu khutukha hasi. Shivala shiatechela, khandi tsinyanda ni tsiatikhanamu, 52vilindwa vialama nivikukha, ma vandu va Nyasaye vanyishi vali nivakhutsa ni visimushitswa khurula mu likhutsa. 53Varula mu vilindwa; khandi lwa Yesu yali namali khwisimukha khurula mu likhutsa, yasimukha natsia mu Litaala likali Litakatifu, wa vandu vanyishi va valola.
54Lwa mwimilili wa vasikali imia nende yavo va yali navo vali nivalindanga Yesu vahulila shivala nishitechelanga, khandi vindu vindi viali nivikholekhanga, vatechela nivavoola, “Ni kilikali, mundu uyu yali Mwana wa Nyasaye!”
55Khwaliho na vakhali vanyishi, vaheenzelelanga ihale wene, vali nivalondi Yesu khurula mu lusomo lwa Galilaya, khwitsa khumurumishila. 56Valala khu vakhali venavo valimu Mariya Magadalena, Mariya mama wa Yakobo nende Yosefu, khandi mukhali wa Zebedayo.
Khuyeveelwa khwa Yesu mu Shilindwa
(Mk 15:42-47; Luka 23:50-56; Yoh 19:38-42)
57Lwa khulukolovo khwatukha, mundu muhinda wi litaala lia Arimatseya walaangwangwa Yosefu yatukhaho; khandi yali mwechi wa Yesu. 58Yosefu yasimukha natsia khu Pilato, nareeva amuhe mmbili kwa Yesu. Pilato yahaana lilako vamuhe mmbili kwenoko. 59Khulwa yako, Yosefu yavukula mmbili kwenoko, nakulinjila mu luvaala lwa naavwa khu machoro malahi ku khunavakhu; 60Yosefu yakura mu shilindwa shieshie shia yali niyayeeva mwene mu lwanda. Yakolongominya lichina likali mu vwinjililu vu mu shilindwa, narulaho. 61Mariya Magadalena nende Mariya wundi vali nivikhaleho, nivaheenzi shilindwa.
Valindi Valindanga ha Shilindwa
62Litukhu lialondakhu, nilili litukhu li Lisabato, vasalisi vakali nende Vafarisayo vakana na Pilato, 63nivavoola, “Mwami, khwitsushitsanga makhuva ku mundu muvehi woyo yavoola, lwa yali nashili mwoyo, ‘Matukhu kavaka nikakhavira, niitsa khwisimushitswa khurula mu likhutsa.’ 64Haana malako shilindwa shieshie khulindwa vulahi muno khutukha khulitukhu lia khavaka, khu veechi veve vavuli khutsia khuhuuva mmbili; khandi vavoolele vandu ndi umali khwisimushitswa khurula mu likhutsa. Vuvehi vukhumalilikha yuvu vulava vutamanu muno khuvira vuvehi vu khuraanga.”
65Pilato yavavoolela, “Vukuli mulindi unyala khulinda; simushi mutsi, muchelitsi khulinda shilindwa vulahi khuli munyala.” 66Khulwa yako, vatsia nivalomba vulahi muno shilindwa, lwa vavikhakhu muhuuli khu lichina, khandi nivalekhaho musikali unyala khushilinda.
ទើបបានជ្រើសរើសហើយ៖
MATAYO 27: LLLCATHOLIC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013
