MATAYO 26
26
Liloshitsa liu Khwiira Yesu
(Mk 14:1-2; Luka 22:1-2; Yoh 11:45-53)
1Lwa Yesu yali namali khuvoola vindu vienevo viosi, yavoolela veechi veve, 2“Mumanyi ndi matukhu kavili nikakhavira, khuliitsa khuva nu Mulukha kwa Pasaka, khandi Mwana wu Mundu atsitsanga khuhaanwa khuvambwa.”
3Vasalisi vakali nende vasakhulu vakanila halala mu inzu yu vwami yu Mukali wa vasalisi voosi walaangwangwa Kayafa, 4nivakhava khuli vanyala khukumila Yesu muvwivisi nu khumwiira. 5Navutswa vavoola, “Khuvuli khukhola yaka khulitukhu liu Mulukha kwa Pasaka, shichila vandu valiitsa khukhola shileeche.”
Yesu Yavekhwa Makura Betsania
(Mk 14:3-9; Yoh 12:1-8)
6Lwa Yesu yali nali mu litaala lia Betsania, mu inzu ya Simoni wali niyalwala vuchele, 7mukhali wundi yinjilamu natsia khu Yesu, nachinji ichupa ya alabasita ya makura ku vukuuli vululu. Yatsukha makura kenako khu murwi kwa Yesu, lwa Yesu yali naliitsanga shiukhulia. 8Navutswa lwa veechi valola ndio, vali nu vurima, nivareeva, “Shichila shina nu mwononyinya makura yaka koosi? 9Makura yaka kakhakuulitswi tsisenti tsinyishi, tsiheelwi vamanani.”
10Yesu yamanya ka vavoolanga, navavoolela, “Shichila shina munyashitsanga mukhali uyu? Ukholele shikholwa shilahi muno. 11Muliitsa khuvetsanga na vamanani mu munyi shia khase khosi; navutswa niitsa khuvula khuva na munyi shia khase khosi. 12Lwa yatsukha makura khu mmbili kwanje, yakhola ndio khunzirecheshitsa khuyeveelwa mu shilindwa. 13Muvoolelanga kilikali ndi lwa Ivanjeli yilwatswangwa shia havundu hosi mu shivala, shikholwa shiu mukhali uyu akholi shilitsa khuvoolwa, khwitsushitsa mukhali uyu.”
Yuda Yahuchilila Khutsama Yesu
(Mk 14:10-11; Luka 22:3-6)
14Mulala khu veechi likhomi na vavili, walaangwangwa Yuda Isikarioti, yasimukha natsia khu vasalisi vakali; 15navareeva, “Ni shina shia mutsisanga khumba niiva natsama Yesu khu munyi?” Vamurunga tsisenti vitonye makhomi kavaka tsialombwa khu ifetsa. 16Khuraanjila lwenolo, Yuda yaraanga khukhava vwiyangu vulahi vukhutsama Yesu khuvo.
Yesu Yalia Shiukhulia shia Pasaka na Veechi Veve
(Mk 14:12-21; Luka 22:7-14,21-23; Yoh 13:21-30)
17Khulitukhu liu khuraanga liu Mulukha Kukhulia Mikati Chialombwa Vuchila Mamela, veechi vatsia khu Yesu; nivareeva, “Ni hena ha wenyanga khutsi khukhulombele wa khunyala khulia shiukhulia shiu Mulukha kwa Pasaka?”
18Yesu yavavoolela, “Simushi mutsi khu mundu wundi mu litaala likali, mumuvoolele, ‘Mwechitsi avoolanga, isaa yanje yakhatukha; inzi na veechi vaanje khutsitsanga khwikhoyela munzu mwomwo Mulukha kwa Pasaka.’”
19Veechi vakhola khuli Yesu yali navavoolele, nivalomba shiukhulia shiu Mulukha kwa Pasaka.
20Lwa khulukolovo khwali nu khwakhatukha, Yesu nende veechi veve likhomi na vavili vikhala hasi nivalia. 21Lwa vali nivaliitsanga shiukhulia, Yesu yavavoolela, “Muvoolelanga kilikali ndi mulala khu munyi atsitsanga khunzama.”
22Veechi veve vavelela mu mwoyo, nivaraanga khumureeva shia mulala, “Mwami, anyala khuva ninzi toto?”
23Yesu yavachipa, “Mundu winikhanga halala ninzi mukati kwekwe mu ibakuli, atsitsanga khunzama. 24Mwana wu Mundu khutukha aliitsa khukhutsa khuli Mahandiko Matakatifu kavoolanga aliitsa khukhutsa; navutswa mundu uliitsa khumutsama aliitsa khuva khu vutiinyu muno! Vwakhavele vulahi niiva mundu mwenoyo shiyakhavele niyivulwa tawe!”
25Yuda wali natsami Yesu yareeva, “Mwechitsi, toto shiali ninzi tawe?” Yesu yamuchipa, “Mwene uvooli katoto.”
Shiukhulia Shiukhumalilikha shiu Mwami
(Mk 14:22-26; Luka 22:14-20; 1 Vakor 11:23-25)
26Lwa vali nivaliitsanga shiukhulia, Yesu yavukula shitonye shiu mukati, nasanditsa, natong'olanyinya, naha veechi veve. Yavoola, “Vukuli, mulii; shichila yuku nakwo mmbili kwanje.”
27Yesu yavukula khandi shikombe shilimu ni idivai. Lwa yali namali khusanditsa yavaha navoola, “Munyi voosi, mung'wimu. 28Yaka ni masahi kaanje ki lilakano, kasuundulwa shichila khusemeha vwoni vwa vandu vanyishi. 29Muvoolelanga ndi nzitsanga khuvula khung'wakhu khandi idivai yiyi nishili khung'wa idivai impia na munyi mu Vwami vwa Tata wanje.”
30Lwa vali nivamali khwimba lwimbo, vasimukha nivatsia khu Shikulu shia Misayituni.
Yesu Yavoola Kushili Khuli Petro Amwambakhana
(Mk 14:27-31; Luka 22:31-34; Yoh 13:36-38)
31Yesu yavoolela veechi veve, “Vutukhu vunu, munyi voosi mutsitsanga khunzilukha khandi munzivale, shichila Mahandiko Matakatifu kavoolanga, ‘Nyasaye aliitsa khwiira mwayi, khandi shiayo shia makondi koosi kaliitsa khusalana.’ 32Navutswa lwa mba nimali khwisimushitswa khurula mu likhutsa, naraanga khutsia mu lusomo lwa Galilaya imbeli wenyu.”
33Petro yavoolela Yesu, “Khali niiva voosi vatsitsanga khukhwilukha, inzi shinyala khukhwilukha tawe!”
34Yesu yavoolela Petro, “Khuvoolelanga katoto ndi itaywa nishili khulakula vutukhu vunu, uliitsa khuvoola hali khavaka wangorwa.”
35Petro yamuvoolela, “Khali niiva nyala khukhutsa nivi, shinyala khukhwambakhana tawe.” Veechi vandi voosi vavoola makhuva malala mele.
Yesu Yasaala mu Getsesemani
(Mk 14:32-42; Luka 22:39-46)
36Nalwo lwa Yesu yasimukha natsia na veechi veve havundu halaangwangwa Getsesemani. Yavavoolela, “Mwikhale hanu, nishitsia khusaala yeyo.” 37Yesu yavukula Petro halala na vaana vavili va Zebedayo. Yaraanga khuvelela mu mwoyo naheenda mwoyo. 38Yesu yavavoolela, “Mwoyo kwanje kuvelele muno, khali khutukha khu shikha shiu khukhutsa; mwikhale ninzi, mutsililile khuheenza.”
39Yesu yisuundakhu hambeli hatititi; yinama hasi nasaala, “Tata wanje, niiva kanyala khunyalikha, rulitsa shikombe shi linyakhana yishi khwinzi! Liakhava lienya lianje tawe, navutswa lienya liolio likholeshe.”
40Yesu yakalukha khu veechi veve, navanyola vakonanga tsindolo; nareeva Petro, “Shiumuvele mwaheenzakhu munyi vavaka khali isaa indala ninzi tawe? 41Muheenze vulahi khandi musaale muvuli khukwa mu machelitso; mwoyo kwanje kwihulilanga, navutswa mmbili kuteteshele.”
42Yesu yarulaho lwa khavili, natsia khusaala, “Tata wanje, niiva shikombe shi linyakhana yishi shinyala khuvula khurulitswaho, khutukha lwa shing'wakhu, lienya liolio likholeshe.” 43Yesu yakalukha khandi nanyola veechi vashikonanga tsindolo; shichila tsimoni tsiavo tsiali nitsitsuli tsindolo.
44Yesu yavalekha khandi, nasaala lwa khavaka, navoolanga makhuva malala mele. 45Yesu yakalukha khu veechi veve nareeva, “Mushitsililanga khukona tsindolo numuhulukha? Loli, isaa yakhatukha; Mwana wu Mundu ahaanwangwa khu vandu vooni. 46Vukhi, chendi khutsi; loli, mundu unzamanga neye uyu.”
Yesu Yakumilwa
(Mk 14:43-50; Luka 22:47-53; Yoh 18:3-12)
47Yesu yali nashilomolomanga lwa Yuda, wali mulala khu veechi likhomi na vavili yatukhaho. Yuda yali halala ni shituma shikali shia vandu niviyavaale vivavi nende vikong'o, shia vasalisi vakali nende vasakhulu vali nivarumi. 48Yuda yali usimi shituma shia vandu uvavoolele, “Mundu wanzunzunakhu neye wa mwenyanga; mumukumile.”
49Yuda yasimukha natsia vulunji khu Yesu, namuvoolela, “Milembe Mwechitsi,” manamutsunzuna.
50Yesu yamureeva, “Mulina, shichila shina uli hanu? Khola shindu shikhuleri hanu?” Vitsa, nivakumila Yesu, nivamurulitsaho. 51Mulala khu yavo vali na Yesu yasomola shivavi shieshie nareema shiroyi shiu murukwa wu Mukali wa vasalisi voosi, nishikutukha vutswa. 52Yesu yamukaya, “Kalushitsa shivavi shioshio mushiula shiashio; shichila voosi vayaanza khukwana ni shivavi, valiitsa khwiirwa ni shivavi. 53Mukanakananga nyala khuva mbulakhu vunyali vu khureeva vukhonyi khu Tata wanje, andumili mikaanda chi tsinjelosi tsiliihe chiviri likhomi na tsivili? 54Navutswa niiva nyala khukhola ndio, Mahandiko Matakatifu kakhanyala khurweshitswa munjila shina kavoolanga yaka kutukha kikholeshe?”
55Mutsisaa tsienetso, Yesu yavoolela shituma shia vandu, “Mukanakananga nu mukholi vulahi khwitsa ni vivavi nende vikong'o khungumila, khuli mundu munuuli? Shia litukhu nali namenya ninzikhalanga, khandi ninzechitsa mu Litempeli, navutswa shiumwangumila tawe. 56Navutswa yaka koosi kamali khwikholekha, khu ka vaprofeti vahandika mu Mahandiko Matakatifu karweshitswi.” Nalwo lwa veechi voosi vamulekha nivilukha.
Yesu Imbeli wi Shikhaalo
(Mk 14:53-65; Luka 22:54-55,63-71; Yoh 18:13-14,19-24)
57Vandu vakumila Yesu vamuhila mu inzu ya Kayafa, wali nali Mukali wa vasalisi voosi, mwa veechitsi va Malako nende vasakhulu vali nivakanile halala. 58Navutswa Petro yalonda Yesu ihalekhu hatititi khutukha mu lwanyi lu Mukali wa vasalisi voosi. Yinjila mukari niyikhala halala na valindi valindaho khulola kikholekha. 59Khulwa yako, vasalisi vakali nende vandu vi Shikhaalo voosi vachelitsa khukhava vushiahidi vu vuvehi khulondokhana khu Yesu khu vamwiiri, 60navutswa shivavunyola tawe, khali niiva vashiahidi vu vuvehi vanyishi valolekhaho. Lukhumalilikha, vandu vavili valolekha 61nivavoola, “Mundu uyu avooli, ‘Ndi nu vunyali vukhupomola Litempeli lia Nyasaye; khandi khuliumbakha matukhu kavaka nikakhavira.’ ”
62Mukali wa vasalisi voosi yasinjila nareeva Yesu, “Uvulakhu lichipu liunyala khuhaana khu ka vandu yava vakhuyaalilakhu?” 63Navutswa Yesu yahonjela vutswa. Mukali wa vasalisi voosi yamuvoolela, “Khwisuuhitsanga khuvirila khu lira lia Nyasaye uli mwoyo ndi ukhuvoolele katoto niiva nivi Masiha, Mwana wa Nyasaye.”
64Yesu yamuvoolela, “Khuli lumali khuvoola. Navutswa muvoolelanga munyi voosi ndi khuraanjila nunundi muliitsa khulola mwana wu Mundu niyikhale khuluveka lu mukhono musatsa ku Mwami Witsingulu Tsiosi, niyitsanga khuvirila mu malesi ku mwikulu!”
65Mukali wa vasalisi voosi yarandula tsinguvu tsietsie, navoola, “Unyekane! Shichila shina mutsilililanga khwenya vashiahidi vandi! Muhulili khuli anyekane. 66Mukanakananga khumukhole shina?” Vamuchipa, “Utushili khwiirwa.”
67Nalwo lwa vamusutsila maree mu tsimoni, nivamushuta khandi valala nivamusamula, 68nivareeva, “Masiha, khuvoolele! Ni viina ukhutuuyi?”
Petro Yavoola Shiamanyikhu Yesu Tawe
(Mk 14:66-72; Luka 22:56-62; Yoh 18:15-18,25-27)
69Petro yali nashikhale ilwanyi mu lwanyi, lwa mulala khu varumishi vi shikhana vu Mukali wa vasalisi voosi yatukhaho khuye, navoola, “Khali yivi uvele na Yesu wa Galilaya.”
70Navutswa Petro yambakhana imbeli wavo voosi, navoola, “Shinyala khumanya ka ulomolomanga tawe.” 71Lwa Petro yisuunda khu muliango, murumishi wundi mwana wi shikhana yamulola, navoolela vandu vali nivasinjileho, “Mundu uyu avele na Yesu wa Nazareti.”
72Petro yambakhana khandi niyisuuha, navoola, “Shimanyikhu mundu uyu tawe.”
73Isaa indititi niyakhavira, vandu vali nivasinjilenjeho vatsia nivavoolela Petro, “Ni katoto, uli mulala khuvo, shichila ulomolomanga khuli vo.”
74Khulwa yako, Petro yavoola, “Nzisuuhanga mbolanga katoto! Saalanga ndi Nyasaye asalilitse niiva ngatanga! Shimanyikhu mundu uyu tawe!”
Hari hatititi, itaywa yalakula, 75Petro niyitsushitsa ka Yesu yali namuvoolele, “Itaywa nishili khulakula, ulavoola hali khavaka wangorwa.” Yasimukha natsia ilwanyi, nalila nu vurima.
ទើបបានជ្រើសរើសហើយ៖
MATAYO 26: LLLCATHOLIC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013
