MATAYO 25
25
Lukanu khu Vakhana Vachima Likhomi
1“Mumatukhu kenako, Vwami vu mwikulu vuliitsa khusasanyinywa khu vakhana vachima likhomi vavukula tsitaaha tsiavo nivatsia khwakanila musatsa waselelanga mwiiha. 2Varanu khuvo vali vasilo; na vandi varanu nivava nu vusitsa. 3Lwa vasilo vavukula tsitaaha tsiavo, vivilila khuchinga makura; 4navutswa yavo vali nu vusitsa vachinga tsichupa tsia makura ki tsitaaha tsiavo. 5Lwa musatsa waselelanga mwiiha yacheleva khutukha, vakhana venavo voosi varenjetsa, nivakona tsindolo.
6“Navutswa hakari mu vutukhu, mundu yalaanjilila navoola, ‘Loli, musatsa uselelanga mwiiha neye uyu! Hambi mumwakanili.’ 7Vakhana vachima venavo voosi vavukha khandi nivasuunda tsindambi tsi tsitaaha tsiavo tsiashie vulahi vwene. 8Vasilo yavo vareeva vali nu vusitsa venavo, ‘Khuhikhu makura kenyu mati, shichila tsitaaha tsieru tsitsimanga.’ 9Navutswa vakhana vali nu vusitsa vavachipa, ‘Shikaliitsa khuva kario tawe! Ni mati khu khutsi nende munyi; tsi khu vandu vakuulitsanga makura, mukuuli kenyu.’ 10Lwa vakhana vasilo vali nivatsitsanga khukuula makura, musatsa waselelanga mwiiha yatukhaho; navutswa yavo vali nivirecheshe vatsia naye mu inzu yu khukholelamu shiselelo shiu khuhilana; ma muliango nu kwikalwa.
11“Tsisaa tsindititi nitsiakhavira, vakhana vandi vasilo yavo vakalukha khandi, nivavoola, ‘Mwami, Mwami, khwikulili muliango.’ 12Navutswa Mwami yavachipa, ‘Muvoolelanga katoto ndi shimumanyikhu tawe.’ 13Khulwa yako, muheenzeshitsi, shichila munyala khuva mwakorwa khumanya litukhu inoho isaa.
Lukanu khu Varumishi Vavaka
(Luka 19:11-27)
14“Mumatukhu kenako, Vwami vu mwikulu vuliitsa khusasanyinywa khu mundu wali natsitsanga khu luchendo. Mundu mwenoyo yalaanga halala varumishi veve, khandi navaha vunyali vu khusinjilila miandu chiechie. 15Yaha shia mulala khulondokhana khu tsingulu tsietsie. Yaha mulala tsitalenta#25:15 Tsitalenta: inoho tsisenti tsialombwa khu itsahabu tsiheelefu tsiranu. tsiranu, wundi tsitalenta tsivili, khandi wu khumalilikha italenta indala; natsia khu luchendo. 16Murumishi yaheelwa tsitalenta tsiranu yasimukha natsia khukholela muhinzilu, nanyola vukhala vwi tsindi tsiranu. 17Khali nindio, murumishi wali niyaheelwa tsitalenta tsivili, yanyola vukhala vwi tsindi tsivili. 18Navutswa mundu wali niyaheelwa italenta indala yasimukha natsia khuchiyeveela hasi mu malova, navisa italenta yu muruchi wewe yali namuheele.
19“Matukhu manyishi nikakhavira, muruchi wa varumishi venavo yakalukha, narunishitsa livishilu halala na varumishi veve. 20Murumishi wali niyaheelwa tsitalenta tsiranu yali wu khuraanga khwitsa. Yalera tsitalenta tsindi tsiranu, navoola, ‘Mwami, wamba tsitalenta tsiranu; nyolelekhu vukhala vwi tsindi tsiranu.’ 21Muruchi wewe yamuchipa, ‘Yivi murumishi mulahi khandi musuuvilwa, wakhola shikholwa shilahi. Shichila wali musuuvilwa khu shindu shitititi, nakhuha vunyali vu khusinjilila vindu vinyishi. Hamba usanje mu vuyaanzi vwanje inzi muruchi wowo.’
22“Murumishi wali niyaheelwa tsitalenta tsivili yalondakhu, navoola ‘Mwami, wamba tsitalenta tsivili. Lola, nyolelekhu vukhala vwi tsindi tsivili.’ 23Muruchi wewe yamuchipa, ‘Yivi uli musuuvilwa mu vindu vitititi, nakhuha vunyali vu khusinjilila vindu vinyishi. Hamba usanje mu vuyaanzi vwanje inzi muruchi wowo.’
24“Murumishi wali niyaheelwa italenta indala khandi yalondakhu, navoola, ‘Mwami, nakhumanya uli mundu mutinyu, shichila uchesanga ha wakharaaka, khandi uvunanga ha wakhamitsa vukuutsa; 25nakhuria ninzia khuvisa italenta yoyo hasi mu malova. Lola, shindu shioshio nashio yishi.’
26“Muruchi wewe yamuchipa, ‘Yivi murumishi mutamanu khandi mukaara! Khani ni kilikali wamanya njesanga ha nakharaaka, khandi mbunanga ha nakhamitsa vukuutsa tawe? 27Nu vulahi; wakhavishi tsisenti tsianje mu livishilu liu khulera vukhala, nilinyolelakhu vukhala lwa ngalukha. 28Khulwa yako, munuuli italenta yali nayo mamuhe mundu uli natsio likhomi. 29Mundu uli ni shindu aliitsa khumeetwa vinyishi, ave navio mu vunyishi; navutswa mundu uvula shindu, aliitsa khunuulwa khali shiali nashio. 30Khulondokhana khu murumishi uvula vukhonyi uyu, musiuvi ilwanyi mu shisuundi; wa vandu valiitsa khulila nu khwikhula.’
Mwana wu Mundu Aliitsa Khukhalachila Vandu Voosi
31“Lwa Mwana wu Mundu aliitsa khwitsa mu vukhumi vwevwe, halala ni tsinjelosi tsiosi nitsili naye, nalwo lwa aliitsa khwikhala khu shisoko shieshie shiu vwami shiu vukhumi vwevwe mwikulu. 32Vandu vi tsimbia tsiosi valiitsa khwakanila halala imbeli wewe; khandi aliitsa khwahula haluveka shia mulala, khuli mwayi yahulanga haluveka makondi khurula mu tsimbuli. 33Aliitsa khuvikha makondi khuluveka lu mukhono kwekwe musatsa, navutswa tsimbuli khuluveka lu mukhono kwekwe mukhali.
34“Nalwo lwa Mwami aliitsa khuvoolela vandu vali khuluveka lu mukhono kwekwe musatsa, ‘Munyi va Tata wanje yakasitsa, hambi! Hambi munyole Vwami vwa Tata wanje yali ni yamwirecheshitsila khurula shivala nishiloongwa. 35Nali ni inzala, numumba shiukhulia. Nali nu vuluhu, numumba shiu khung'wa. Nali mucheni, numunzinjilitsa mu tsinzu tsienyu. 36Nali shekenye, numufwala tsinguvu. Nali mulwale, numuninda vulahi. Nali muvohe mucheela, numunjeniha.’
37“Nalwo lwa vandu vi likhola liu vulunji valiitsa khumuchipa, ‘Mwami, ni litukhu shina lia wali ni inzala, nukhukhuha shiukhulia, inoho nu vuluhu, nukhukhuha shiu khung'wa? 38Litukhu shina lia wali mundu mucheni, nu khukhwinjilitsa mu tsinzu tsieru, inoho ni shekenye, nu khukhufwala tsinguvu? 39Litukhu shina khandi lwa wali mulwale inoho nuvoheelwi mucheela, nu khukhucheniha?’ 40Mwami aliitsa khuvachipa, ‘Muvoolelanga kilikali ndi khuli mwakholelanga mulala khu vasuuvili vatititi vaanje yava, nindio khandi mwakholelanga inzi.’
41“Aliitsa khuvoolela vandu vali khuluveka lu mukhono kwekwe mukhali, ‘Munyi va mwalaamwa, ruli imbeli wanje, mutsi mu mulilu kwi mihika ni mihika kwarecheshitsilwa Ibilisi ni tsinjelosi tsietsie; 42shichila nali ni inzala, navutswa mwanyiima shiukhulia. Nali nu vuluhu, navutswa mwanyiima shiu khung'wa. 43Nali mucheni, navutswa mwambakhana khunzinjilitsa. Nali shekenye, navutswa mwambakhana khufwala. Nali mulwale khandi muvohe mucheela, navutswa mwambakhana khuninda vulahi.’
44“Navo valiitsa khumuchipa, ‘Mwami, ni litukhu shina lia wali ni inzala inoho nu vuluhu inoho mucheni inoho shekenye inoho mulwale inoho muvohe mucheela, nu khwambakhana khukhukonya?’ 45Mwami aliitsa khuvachipa, ‘Muvoolelanga kilikali ndi ka mwavula khukholela mulala khu vatititi vaanje yava, nindio khandi mwakholelanga inzi.’ 46Valiitsa khutsia mu mulilu kwi mihika ni mihika ku khusalilitswa; navutswa vandu vi likhola liu vulunji valiitsa khutsia mu vulamu vwi mihika ni mihika.”
ទើបបានជ្រើសរើសហើយ៖
MATAYO 25: LLLCATHOLIC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013
