Malu Menza 14
14
Polu ne Barnabase mu Ikoniyume
1Mu Ikoniyume Polu ne Barnabase kubuela kabidi mu nzubu wa kutendelela wa bena Yuda. Bu muvuabu balongesha bimpe, bena Yuda bavule, ne bantu ba bisamba bikuabu, kubuela mu Tshisumbu tshia bena ditaba. 2Kadi bena Yuda bakuabu bavua babenga kuitaba, kusonsolabu bantu ba bisamba bikuabu, bua baluishe bana betu abu. 3Kadi Polu ne Barnabase bavua amu mua kushala matuku makumbane mu Ikoniyume. Bavua batekemena kudi Mfumu, balongesha bantu ne: Mfumu ke udi utupa bumfumu bua kuenza bishima ne malu a dikema. Ke mudiye unuleja ne: bitudi tunulongesha pa dinanga didi Mvidi Mukulu utunanga nadi mbilelela. 4Ke bena mu tshimenga kuabulukangana: bamue banyisha bena Yuda, bakuabu bitaba bapostolu.
5Bena Yuda, bantu ba bisamba bikuabu, ne bamfumu babu, bavua bajula tshimvundu, bakeba kukengesha Polu ne Barnabase, kubasa mabue, kubashipa. 6Polu ne Barnabase bamanya bualu ebu, kunyemabu mu Listra ne mu Derbe, bimenga bia mu Likawoniya. 7Kuine aku, ne mu misoku ya pa mpenga, kulongeshabu Lumu lua Disanka.
Polu ne Barnabase mu Listra
8Mu Listra muvua muntu ne bulema ku makasa, biangatshile ku buana buende. Katshi bamutela, kavua wenda to. 9Uvua muteleje muvua Polu wakula. Polu kumujooja, kumona ne: uvua ne ditaba, utekemena kuenda. 10Kumuambilaye ne diyi dikole ne:
— Juka, imana mululame bimpe.
Muntu kutupika, kuimana, kuenda bimpe. 11Bantu bavule bavua bamona tshivua Polu muenze atshi, kuelabu mbila mu tshiena Likawoniya, bamba ne:
— Mvidie mmituluke muetu munu bu bantu!#14.11 Fuanyikija ne 28.6.
12Bavua binyika Barnabase ne: Zewuse, Polu ne: Ermese,#14.12 Bena Ngreke ku kale bavua banemeka Zewuse bu mfumu wa nwidie yonsu, Ermese bu mutumibue wende. bualu Polu ke uvua wakula. 13Mutuangaji wa mu nzubu wa nwidie Zewuse uvua ku tshibuelelu tshia tshimenga, kufikaye ku tshibuelelu atshi ne ngombe milume milengeja ne bilongu. Bualu yeye ne bantu bavua basue kuyilambula Barnabase ne Polu. 14Kadi bapostolu babidi kumanya bualu abu. Kupandabu bilamba biabu, kuya lubilu kudi bantu, benda bela mbila ne:
15— Bana betu, tshinudi nuenza nunku ntshinyi? Tudi amu bantu bu nuenu. Tudi tunumanyisha Lumu lua Disanka, bua nulekele nwidie yonsu ya tshianana eyi, nupingane kudi Mvidi Mukulu wa muoyi, udi mufuke diulu, buloba, mayi manene, ne bionsu bidimu.#14.15 Tangila Tshim 20.11; Mis 146.6. 16Ku kale Mvidi Mukulu uvua muanyishe bua bantu ba bisamba bikuabu balonde wabu njila. 17Kadi uvua udimanyisha matuku onsu mu malu mimpe avuaye wenza: udi unulokeshila mvula, ubobesha bikunyibua mu tshikondu tshiabi,#14.17 Fuanyikija ne Mis 147.8; Yirm 5.24. unupa biakudia, usankisha mioyi yenu. 18Kadi nansha bapostolu bakula nanku, bivua bikole bua kukandika bantu, bua kababalambudi milambu. 19Bena Yuda ba mu Antiyokiya wa mu Pisidiya, ne ba mu Ikoniyume, kufika. Kuenzejabu bantu, bua batue ku tshiabu. Nanku bantu kuasa Polu mabue, kukeba kumushipa. Pashishe kumupulumunabu, kupatuka nende mu tshimenga, bamanye ne: mmufue. 20Kadi bena ditaba kuvua kunyungulukila Polu. Yeye kujuka, kupingana nabu mu tshimenga. Butshia, Polu ne Barnabase kuya mu Derbe.
Polu ne Barnabase badi bapingana mu Antiyokiya wa mu Siriya
21Polu ne Barnabase kulongesha Lumu lua Disanka mu tshimenga tshia Derbe. Kupetabu bena ditaba bavule muaba awu. Pashishe kupitshilabu mu Listra, ne mu Ikoniyume, bua kupingana mu Antiyokiya wa mu Pisidiya. 22Bavua bakolesha balongi ku muoyi, bua bananukile mu ditaba, babambila ne:
— Tudinebua kumvua makenga mavule, bua tuetu kubuela mu Bukalenga bua Mvidi Mukulu.
23Bavua bateka bakulu mu Tshisumbu tshionsu tshia bena ditaba.#14.23 Bavua bateka bakulu…: bamue badi bandamuna ne: Kubasunguilabu. Bamane kujila biakudia, kutendelelabu Mvidi Mukulu amue matuku. Pashishe kubatekabu mu bianza bia Mfumu, uvuabu bitabe.
24Pashishe bapostolu kupitshila mu ditunga dia Pisidiya, bua kufika mu ditunga dia Pamfiliya.#14.24 Pisidiya…: tangila 13.14. — Pamfiliya: mu ditunga dia Pamfiliya mudi tshimenga tshia Perje (tangila 13.13 ne diumvuija), ne tshia Ataliya (kan. 25). 25Kumanyishabu muaku wa Mvidi Mukulu mu Perje. Pashishe kuyabu mu Ataliya. 26Bumuka mu Ataliya, kuyabu ne majuwa mu Antiyokiya. Ke muaba uvua bena ditaba badianze kubateka mu bianza bia Mvidi Mukulu, muena dinanga, bua mudimu uvuabu bakumbaje mpindiewu.
27Bafika ku Antiyokiya, kusangishabu Tshisumbu tshia bena ditaba. Kubalondelabu bionsu bivua Mvidi Mukulu wenza nabu, ne muvuaye munzuluile bantu ba bisamba bikuabu kabidi tshiibi, bua bafike ku ditaba. 28Polu ne Barnabase kushala ne bena ditaba matuku mavule muaba awu.
ទើបបានជ្រើសរើសហើយ៖
Malu Menza 14: TSH96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible avec Livres Deutérocanoniques en Tshiluba © Société Biblique de la R. D. Congo, 1996
