Malu Menza 13
13
Badi basungula Barnabase ne Shawule, babatuma ku mudimu
1Mu Tshisumbu tshia bena ditaba ba mu Antiyokiya muvua bambi ne balongeshi. Mena abu adi nunku: Barnabase, Shimeyone (udibu binyika ne: Mufiike), Lusiyuse wa mu Sirene, Manayene (uvua mukole pamue ne Erode, mulombodi wa ditunga#13.1 Ke Erode Antipase, mulombodi wa Ngalileya (tangila Luk 3.1).), ne Shawule. 2Dituku dikuabu, bobu bamane kujila biakudia amue matuku, pavuabu batendelela Mfumu, Mueyelu wa Tshijila kubambila ne:
— Kanupeshi Barnabase ne Shawule mudimu mukuabu to. Baye amu kuenza mudimu undi mubabikidile.
3Bena ditaba kujila kabidi biakudia matuku makuabu, kutendelela Mvidi Mukulu. Pashishe kutentekabu Barnabase ne Shawule bianza, kubatuma ku mudimu wabu awu.
Barnabase ne Shawule badi balongesha mu Shipre
4Nanku Mueyelu wa Tshijila kutuma Barnabase ne Shawule ku mudimu. Kufikabu mu Selekiya.#13.4 Selekiya: ke tshisabu tshia mu Antiyokiya, tshitangilangana ne tshidila tshia Shipre. Muaba awu kubuelabu mu majuwa, batangile ku tshidila tshia Shipre. 5Kufikabu mu Salamine. Kulongeshabu muaku wa Mvidi Mukulu mu nzubu ya kutendelela ya bena Yuda. Yowanane Marke uvua nabu, ubambuluisha. 6Kukosololabu tshidila tshijima, too ne ku tshimenga tshia Pafose. Mu tshimenga atshi kusanganabu muena dialu, diende dina Bar-Yezu. Uvua muena Yuda, udiamba mudiye muambi wa Mvidi Mukulu. 7Uvua usomba kua Serjiyuse Polu, muntu wa lungenyi, uvua ulombola tshidila atshi. Serjiyuse kubikidisha Barnabase ne Polu, bualu uvua ujinga kumvua muaku wa Mvidi Mukulu. 8Kadi Elimase (ke mudibu bandamuna dina diende mu tshiena ngreke nanku), muena dialu awu, uvua uluisha Barnabase ne Polu, ukeba bua mulombodi kafiki ku ditaba. 9Ke Shawule, udibu binyika kabidi ne: Polu,#13.9 Shawule ke dina diende dia mu buena Yuda; Polu diende dia mu buena Rome (tangila 22.27-29). muwule ne Mueyelu wa Tshijila, kumujooja, 10wamba ne:
— Wewe udi muntu mubi, muena dishima, muana wa diabolu, mubengi wa malu mimpe onsu. Neulekele kujikila Mvidi Mukulu njila diba kaayi? 11Mpindiewu, teleja: Mfumu neakunyoke. Neushale mpofu, kuyi umona diba amue matuku.
Diakamue mesu a Elimase kufofama. Ukadi udimona butuku, unyunguluka nseke yonsu, ukeba muntu udi mua kumulombola, mumukuate ku tshianza. 12Mulombodi wa tshidila umona bivua bienzeka abi, kuitabaye. Bivuabu bamulongesha bualu bua Mfumu, bivua bimutua ku muoyi bikole.
Polu ne Barnabase badi balongesha mu Antiyokiya wa mu Pisidiya
13Polu ne binende kubuela mu majuwa mu Pafose, kuya mu Perje wa mu Pamfiliya. Yowanane Marke#13.13 Perje: ntshimenga tshia ku muelelu wa mayi manene kuinshi mu ditunga dia Aziya mukese. — Yowanane Marke: tangila 12.12, 25; 13.5. kubashiya muaba awu, kupingana ku Yerushalayime. 14Polu ne binende kutungunuka ne luendu, kumuka mu Perje, kufika mu Antiyokiya wa mu Pisidiya. Dituku dia Dikisha, kubuelabu mu nzubu wa kutendelela wa bena Yuda, kusombabu. 15Bantu bamane kubala mukanda wa Mikenji ne wa Bambi, bamfumu ba nzubu wa kutendelela kubalomba ne:
— Bana betu, panuikala ne imue miaku ya kukolesha nayi bantu ku muoyi, nudi mua kuakula mpindiewu.
16Polu kujuka, kupuwisha bantu ne tshianza, wamba ne: — Nuenu bena Izrayele, nuenu kabidi bena bisamba bikuabu badi batendelela Mvidi Mukulu, ntelejayi: 17Mvidi Mukulu wa tshisamba etshi, Mvidi Mukulu wa Izrayele, mmusungule bankambua betu. Uvua muvu-dije tshisamba etshi, pavuatshi kua bende mu ditunga dia Ejipitu. Pashishe kubapatulaye mu Ejipitu ku bukole buende. 18Uvua mubalame bidimu bu makumi anayi mu tshipela.#13.18 Uvua mubalame: bakuabu badi bandamuna ne: uvua mubadishe. — Tun 17-18: tangila Tshim 1.7; 12.51; Dib 14.34; Diel 1.31. 19Kubutulaye bisamba muanda mutekete mu buloba bua Kenaane. Kufilaye buloba buabi kudi bantu bende ne: mbuenu.#13.19 Tangila Diel 7.1; Yosh 14.1. 20Bionsu abi bivua bienzeka munkatshi mua bidimu bu nkama inayi ne makumi atanu.
Pashishe kupeshaye bankambua betu balombodi, too ne ku tshikondu tshia muambi Samuwele.#13.20 Badi bandamuna kanungu aka mishindu mishilangane. — Balombodi: tangila Bal 2.16 ne diumvuija . — Samuwele: tangila 1 Sam 3.20. 21Kadi bankambua betu kulomba mukalenga kudi Mvidi Mukulu. Yeye kubapesha Shawule, muana wa Kishe, wa mu tshisamba tshia Binyamine. Kushalaye mu bukalenga bidimu makumi anayi. 22Mvidi Mukulu mumane kubenga Shawule, kutekaye Davide, bua ikale mukalenga wabu. Mvidi Mukulu kuamba ne: “Ndi musungule Davide, muana wa Ishayi, muntu wa pa muoyi wanyi. Neakumbaje bionsu bindi musue.#13.22 Tun. 21-22: 1 Sam 8.5,19; 10.21; 13.14; 16.12. Fuanyikija ne Mis 89.21.” 23Ku ndelanganyi ya Davide, ke kudi Mvidi Mukulu mupatuile bena Izrayele Yezu, Musungidi wabu, amu muvuaye mulaye. 24Yezu kayi muanji kufika, Yowanane kubela bantu bonsu bua badilengeje, babatue mu mayi.#13.24 Tangila Mar 1.4; Luk 3.3. 25Pavua Yowanane mumane kufika ku matuku ende a ndekelu panu, uvua ukonka bantu ne: “Nudi nuela meji ne: meme ndi nganyi? Tshiena unudi bindile awu to! Kadi unudi batekemene udi ufika munyima muanyi. Tshiena muakanyine nansha mua kukopola bisabata bia ku makasa ende.#13.25 Tangila Yow 1.20; Mat 3.11; Mar 1.7; Luk 3.16; Yow 1.27. ”
26Bana betu, nuenu ndelanganyi ya Abrahame, kabidi ne nuenu bena bisamba bikuabu bitabi ba Mvidi Mukulu, mbatutumine tuetu bonsu mukenji wa lupandu ewu. 27Bualu bena mu Yerushalayime, ne bamfumu babu, kabavua bamanye ne: Yezu udi nganyi. Nanku kabavua bajingulule miaku ya bambi, ivuabu bababadila dituku dionsu dia Dikisha. Kadi bavua bakumbaje miaku eyi pa kufundila Yezu tshibawu tshia lufu. 28Nansha muvuabu kabayi basangana bualu bua kunufundila lufu, kulombabu Pilate bua amushipeshe. 29Bobu bamane kukumbaja bionsu bivua Mikanda ya tshijila midianjila kuamba bualu buende, kumutululabu ku mutshi mutshiamakane, kumuteka mu lukita.#13.29 Tun. 28-29: tangila Mat 27.22-23,57-61; Mar 15.13-14; 42-47; Luk 23.21-23, 50-56; Yow 19.15,38,42. 30Kadi Mvidi Mukulu kumubisha ku bafue. 31Matuku mavule Yezu kumuenekela bavuaye mufume nabu ku Ngalileya, muye nabu ku Yerushalayime. Bobu abu ke badi bajadikila bena Izrayele mpindiewu malu ende.#13.31 Tangila 1.3. 32Tuetu kabidi tudi tunumanyisha Lumu lua Disanka elu ne: bivua Mvidi Mukulu mulaye bankambua betu, 33ke bidiye mutukumbajile tuetu, ndelanganyi yabu, mpindiewu. Bualu mmubishe Yezu ku bafue, amu mudibu bafunde mu musambu muibidi ne:
“Wewe ke Muananyi,
biangatshile lelu, meme ndi Tatuebe.”
34Mvidi Mukulu uvua ne bua kubisha Yezu ku bafue, bua mubidi wende kaubodi. Ke bivuaye mudianze kumanyisha bantu ne:
“Nennupe mapa a tshijila adi kaayi anyanguka,
amvua mulaye Davide.”
35Ke padi Mvidi Mukulu ujadika kabidi muaba mukuabu ne:
“Kuakulekela mukuitabi webe abolele mu lukita.#13.35 Kan. 33: Mis 2.7. — Kan. 34: Yesh 55.3, muvua bena Ngreke bandamune kanungu aka kale. — Kan. 35: Mis 16.10.
36Mu tshikondu tshiende, Davide mmukumbaje bivua Mvidi Mukulu musue. Pashishe kufuaye. Kumujikabu pabuipi ne bankambua bende, kubolaye.#13.36 Tangila 1 Bak 2.10. 37Kadi udi Mvidi Mukulu mubishe ku bafue, ki mmubole to. 38Nenku, bana betu, tudi tunumanyisha se: Yezu ke udi ujimija mibi yenu. 39Muntu yonsu udi umuitaba, neapete dijimija dia mibi yonsu, dinuvua kanuyi mua kupeta kudi mikenji ya Moshe. 40Nanku dimukayi, bua bivua bambi bambe kabinuenzekedi.#13.40 kabinuenzekedi: mu mikanda mikuabu ya kale, mbafunde amu ne: kabienzeki. Bavua bambe ne:
41“Nuenu bena kapeja, tangilayi!
Zakalayi ne bowa, nubutuke!
Bualu mu tshikondu tshienu etshi nkadi pa kuenza tshishima,
tshidi muntu mua kunulondela, kanuyi mua kuitaba.#13.41 Abak 1.5, muvua bena Ngreke bandamune miaku eyi ku kale.”
42Polu ne Barnabase bapatuka mu nzubu wa kutendelela, bantu kubalomba bua bapingane Dituku dia dikisha didi kumpala, bua kuyukila kabidi nabu pa bualu ebu. 43Ditendelela dimane kujika, bena Yuda bavule, ne bantu ba bisamba bikuabu bavua bamane kubuela mu Tshisumbu tshia bena ditaba ba bena Yuda, kulondabu Polu ne Barnabase. Bobu abu bavua bayukila nabu, babakolesha ku muoyi, bua bashindame mu ditaba divuabu bapete kudi Mvidi Mukulu.
44Dituku dia dikisha di vua kumpala, bena mu tshimenga bu bonsu kusangila bua ku-mvua muaku wa Mfumu. 45Kadi bena Yuda bamona bungi bua bantu abu, kupetabu lubabu, babenga bivua Polu wamba, bamupenda kabidi. 46Kadi Polu ne Barnabase bavua babambila patoke ne:
— Nuenu ke batuvua ne bua kudianza kumanyisha muaku wa Mvidi Mukulu. Kadi bu munudi nuubenga, nudimona ne: katuena bualu ne muoyi wa kashidi, nanku tuetu tudi tuya kudi bantu badi kabayi bena Yuda. 47Bualu Mfumu mmutuleje bua kuenza nunku, pavuaye wamba ne:
“Ndi mukuteke butoke bua bantu ba bisamba bikuabu,
bua ufikishe lupandu ne ku ntengu ya buloba.#13.47 Yesh 49.6.”
48Bavua kabayi bena Yuda bumvua nanku, kusankabu bikole, bela Mfumu tuasakidila bua muaku wende. Bantu bonsu bavuabu basungula bua kupeta muoyi wa kashidi, kubuelabu mu Tshisumbu tshia bena ditaba.
49Muaku wa Mfumu kutangalaka mu ditunga dijima. 50Kadi bena Yuda kusonsola bakaji ba baneme bavua bamane kubuela mu Tshisumbu tshia bena ditaba ba bena Yuda, ne balombodi ba tshimenga, bua bakebele Polu ne Barnabase mvita. Nanku kubipatabu mu ditunga diabu. 51Polu ne Barnabase kubatutuila lupuishi lua ku makasa,#13.51 Tangila Mar 6.11 ne diumvuija . kuya mu Ikoniyume. 52Kadi bena ditaba ba mu Antiyokiya bavua ne disanka, buwule ne Mueyelu wa Tshijila.
ទើបបានជ្រើសរើសហើយ៖
Malu Menza 13: TSH96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible avec Livres Deutérocanoniques en Tshiluba © Société Biblique de la R. D. Congo, 1996
