Mark 1
1
John Onumanyi no N’asɛnka
(Matthew 3.1-12; Luke 3.1-18; John 1.19-28)
1Jesus Kraest, [Nyankopɔn Ba]#1.1 Tsetse akyerɛwfo no bi mmfa Nyankopɔn Ba yi nnka ho. no, ne nsɛmpa no ahyɛse.
2 #
Mal 3.1
Dɛ mbrɛ wɔakyerɛw no wɔ nkɔnhyɛnyi Isaia mu dɛ,
Hwɛ, morosoma mo bɔfoe ma oeedzi w’enyim kan,
Obesiesie wo kwan mu;
3 #
Isa 40.3
Obi ne ndze retsea mu wɔ sar no do dɛ,
Hom nsiesie Ewuradze no kwan,
Hom mma n’atsempɔn ntsentsen;
4John bae bonumae wɔ sar no do na ɔpaa mu kaa nnuho enuma a ɔdze kɔ bɔnfakyɛ mu no ho asɛm. 5Na Judea man nyina, na Jerusalɛmfo nyina puee kɔr no hɔ kɛkaa hɔn bɔn, na onumaa hɔn wɔ Esutsen Jordan mu. 6#2 Ahe 1.8 Nna John fura efupɔnkɔnhwi tam na nwoma abɔdo bɔ n’asen, na odzi mbɛbɛw na kwaa mu ewo. 7Na ɔpaa mu kaa dɛ, Obi a no ho yɛ dzen kyɛn me dzi m’ekyir reba a no nsokota ho ahoma mpo mennsɛ dɛ mobɔkotow masan. 8Emi dze, munumaa hom nsu mu, na ɔno, dze, obonuma hom wɔ Sunsum Krɔnkrɔn mu.
Jesus N’enuma na Nsɔhwɛ
(Matthew 3.13—4.11; Luke 3.21, 22; 4.1-13)
9Na ɔbaa dɛ nda no mu no Jesus fii Galilii Nazarɛt bae, na John numaa no wɔ Esutsen Jordan mu. 10Na ntsɛmara a ofi nsu no mu reba no, ohun dɛ sor apaa ebien na Sunsum no tse dɛ ebubur risian ba no do: 11#Gye 22.2; Dwom 2.7; Isa 42.1; Mat 3.17; 12.18; Mar 9.7; Luk 3.22 na ndze bi fii sor baa dɛ, Ɔwo nye mo Dɔba a esɔ m’enyi.
12Na amonmu hɔ ara na Sunsum no faa no ɔhardo kɔr sar no do. 13Na odzii sar no do hɔ adaduanan, ma Satan sɔɔ no hwɛe; nna ɔnye hambowa wɔ hɔ; na abɔfo no soom no.
Jesus Frɛ Esuafo Baanan
(Matthew 4.12-22; Luke 4.14, 15; 5.1-11)
14Na afei woyii John mae no ekyir no, Jesus baa Galilii bɛkaa Nyankopɔn ho asɛmpa no, na ɔsee dɛ, 15#Mat 3.2 Aber no aso na Nyankopɔn ahenman no abɛn: hom nnu homho, na hom ngye asɛmpa no ndzi.
16Na ɔnenam Galilii po ho no, ohun Simon nye Simon no nua Andrew dɛ wɔrotow eboa wɔ po mu, osiandɛ wɔyɛ apofo. 17Na Jesus see hɔn dɛ, Hom mbedzi m’ekyir na mebɛma hom ayɛ nyimpa enufo. 18Na ntsɛmara wɔdaan eboa no gyaae na wobedzii n’ekyir. 19Na ɔkɔr enyim kakra no, ohun James, Zebedee ne ba no, ɔnye no nua John a hɔn so wɔwɔ hɛn mu resa hɔn mboa. 20Na ntsɛmara ɔfrɛɛ hɔn; na wɔdaan hɔn egya Zebedee nye apaafo no gyaa hɛn no mu, na wokedzii n’ekyir.
Nyimpa bi a Ɔwɔ Sunsum Fi
(Luke 4.31-37)
21Na wɔkɔr Karpernaum; na ntsɛmara ahomgyeda no ɔkɛhɛɛn nhyiamudan no mu kɛkyerɛkyerɛe. 22#Mat 7.28, 29 Na ne nkyerɛkyerɛ yɛɛ hɔn ahobow, osiandɛ ɔkyerɛkyerɛɛ hɔn dɛ nyia ɔwɔ tum, na ɔnntse dɛ kyerɛwfo no. 23Ber no ara mu no, nna nyimpa bi wɔ nhyiamudan no mu a ɔwɔ sunsum fi; 24na ɔtseaa mu see dɛ, Ebɛnadze na yɛnye wo wɔ yɛ, Jesus Nazarɛtnyi? Ana ebae dɛ erebɛsɛɛ hɛn? Minyim wo nyimpa ban, Nyankopɔn no Hotseweenyi no a. 25Na Jesus bɔɔ no ham dɛ, Ka w’ano to mu, na fi no mu fi! 26Na sunsum fi no twaa no hwee hɔ na ɔkaa mu kɛse fii no mu firii. 27Na hɔn nyina ho boow hɔn ara ma wobisabisaa hɔnho dɛ, Ebɛnadze nye yi? Nkyerɛkyerɛ fofor bɛn a! Ɔdze tum hyɛ esunsum fi mpo, na wotsie n’asɛm. 28Na ntsɛmara ne nka tahyee ɔman a etwa Galilii ho nyina mu.
Jesus Sa Nkorɔfo Pii Yarba
(Matthew 8.14-17; Luke 4.38-41)
29Na ntsɛmara wofii nhyiamudan no mu firii no wɔbaa Simon nye Andrew fie, wɔnye James nye John. 30Nna Simon n’asew da hɔ yar papu; na ntsɛmara wɔkaa no ho asɛm kyerɛɛ no; 31na Jesus kosuoo ne nsamu maa no do; na papu no fii no do, na ɔhyɛɛ ase soom hɔn.
32Na ewimbir a ewia kɔtɔree no wɔdze hɔn a wɔyaryar na hɔn a mbɔnsam afa hɔn nyina brɛɛ no. 33Na kurow no nyina behyiaa mu wɔ abow no ano. 34Na ɔsaa dodowara a wɔwɔ nyarba horow no yarba, na otuu mbɔnsam pii; na ɔamma mbɔnsam no kwan dɛ wɔnkasa, osiandɛ wonyim no.
Jesus N’asɛnka Wɔ Galilii
(Luke 4.42-44)
35Na anapaatu, ansaana adze rebɛkye no, ɔsoɛree na opuei kɔr sar bi do, na ɔkɔbɔɔ mpaa wɔ hɔ. 36Na Simon nye hɔn a wɔka no ho no, tsiiw no; 37na wohun no na wɔsee no dɛ, Nyimpa nyina rohwehwɛ wo. 38Na ɔsee hɔn dɛ, Hom mma yɛnkɔ nkurow nkaa no so mu, ama maakɛka asɛm no wɔ hɔ so, osiandɛ iyi ntsi na mebae. 39#Mat 4.23; 9.35 Na ɔkɔr hɔn nhyiamudan a ɔwɔ Galilii nyina mu kɛkaa asɛm no, na otuu mbɔnsam.
Jesus Sa Kwatanyi bi Yarba
(Matthew 8.1-4; Luke 5.12-16)
40Na kwatanyi bi baa no hɔ bɛserɛɛ no, bɔkotoow no, na ɔsee no dɛ, Sɛ epɛ a, ibotum dɛ ema mo ho san. 41Na Jesus ne yamu hyehyee no maa no, na ɔtseen ne nsa dze kaa no, na ɔsee no dɛ, Mepɛ, wo ho nsan wo. 42Na ntsɛmara na kwata no fii no ho, ma no ho sanee. 43Na Jesus braa no dzendzenndzen, na ɔmaa ofii hɔ ntsɛmara, na ɔsee no dɛ, 44#Lev 14.1-32 Hwɛ ma aannka biribi annkyerɛ obiara; na san kɔ, fa woho kɛkyerɛ ɔsɔfo no, na w’ahosan ntsi kotua dza Moses hyɛe no fa yɛ dase ma hɔn. 45Na ɔno dze, ɔdze kɛtahyee pii, na ɔmaa asɛm no trɛe, ma dɛm ntsi Jesus enntum annkɔ kurow bi mu petee bio, mbom sar do hɔ beebi na ɔtsenae; na wofii mbea nyina baa ne nkyɛn.
ទើបបានជ្រើសរើសហើយ៖
Mark 1: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.