Matthew 26
26
Wɔfa Jesus ho Apam
(Mark 14.1, 2; Luke 22.1, 2; John 11.45-53)
1Na ɔbaa dɛ Jesus wiee nsɛm yi nyina ka no, ɔsee n’esuafo no dɛ, 2#Eks 12.1-27 Hom nyim dɛ aka nda ebien ma apaho no edu, na woribeyi nyimpa Ba no ama, ma wɔaabɔ no mbeamudua mu. 3Nna asɔfompanyin nye ɔman mpanyimfo no kehyiaa ɔsɔfopanyin a wɔfrɛ no Kaiafas n’aban mu, 4na wotuu egyina wɔ mbrɛ wɔnam nyansa mu bɛkyer Jesus eku no ho. 5Na wɔsee dɛ, Nnyɛ afahyɛ mu bi a, amma wentwiwentwi aammba ɔman no mu.
Wɔsera Jesus Ngohuam wɔ Bɛtlɛhɛm
(Mark 14.3-9; John 12.1-8)
6Na ber a Jesus wɔ Bɛtani wɔ Simon kwatanyi no ne fie no, 7#Luk 7.37, 38 ɔbaa bi a ɔdze ngohuam a ɔsom bo alabastron toa ma baa ne nkyɛn, na ɔtse edzidzi no, obohuei guu n’etsifi. 8Na esuafo no hunii no, wonyaa ebufuw na wɔsee dɛ, Adzesɛɛ a ɔtse dɛm yi ase nye dɛn? 9Nkyɛ wɔbɔtɔn ngohuam yi agye sika pii na wɔdze akyɛ ehiafo. 10Na Jesus tsee no, ɔsee hɔn dɛ, Ebɛnadze ntsi na hom rehaw ɔbaa no? Na ɔayɛ edwuma pa wɔ mo ho. 11#Deut 15.11 Na hom wɔ ehiafo wɔ hom nkyɛn daa; na emi dze, hom nnyi me daa. 12Na dɛ oehue ngohuam yi egu me nyimpadua do yi, ɔayɛ ama me nsiei. 13Meka no nokwar kyerɛ hom dɛ, Beebiara a wɔbɛka asɛmpa yi wɔ wiadze nyina mu no, dza ɔbaa yi ayɛ so wɔbɛka dze ayɛ ne nkaa.
Judas Pen dɛ Obeyi Jesus Ama
(Mark 14.10, 11; Luke 22.3-6)
14Nna duebien no mu kor a wɔfrɛ no Judas Iskariot no kɔr asɔfompanyin no hɔ, 15#Zek 11.12 na ɔkɛsee hɔn dɛ, Hom bɛma me ebɛnadze ma meeyi no ama hom? Na wokeer ndwetɛbona eduasa maa no. 16Na ofitsi aber no, ɔhwehwɛɛ mbrɛ obenya kwan eyi no ama.
Jesus Nye N’esuafo Dzi Apaho Afahyɛ no
(Mark 14.12-21; Luke 22.7-13, 21-23; John 13.21-30)
17Na epitsi afahyɛ da a odzi kan no, esuafo no baa Jesus nkyɛn bɛsee no dɛ, Hen na epɛ dɛ yesiesie ma ikedzi apaho no? 18Na ɔsee dɛ, Hom nkɔ kurow no mu osimesi no hɔ, na hom nkɛse no dɛ, Kyerɛkyerɛfo no se, Me ber abɛn: wo fie na menye m’esuafo bedzi apaho no. 19Na esuafo no kɛyɛɛ dɛ mbrɛ Jesus hyɛɛ hɔn no na wosiesiee apaho no. 20Na odur ewimbir no, ɔnye esuafo duebien no bɛtsenaa edzidzii. 21Na woridzidzi no, ɔsee dɛ, Ampa, mese hom dɛ, Hom mu baako beyi me ama. 22Na ɔyɛɛ hɔn awerɛhow pii, na wɔhyɛɛ ase see no nkorkor dɛ, Ewuradze, ana emi a? 23#Dwom 41.9 Na obuae see dɛ, Nyia ɔnye me to nsa wɔ ɔsɛn no mu no, ɔnoara na obeyi me ama. 24Na nyimpa Ba no rokɔ, dɛ mbrɛ wɔakyerɛw wɔ no ho: mbom nyimpa a wɔnam no do beyi nyimpa Ba no ama no ndue! Sɛ wɔannwo dɛm nyimpa no a, nkyɛ oye ma no. 25Na Judas a oriyi no ama no buae see dɛ, Kyerɛkyerɛfo, ana emi a? Ɔsee no dɛ, Aka.
Ewuradze Edzidzi
(Mark 14.22-26; Luke 22.14-20; 1 Korintefo 11.23-25)
26Na woridzidzi no, Jesus faa paanoo na ohyiraa do na obubui, na ɔdze maa n’esuafo no na ɔsee dɛ, Hom ngye ndzi: iyi nye me nyimpadua. 27Na ɔfaa kɔɔpow, na ɔdaa ase, na ɔdze maa hɔn dɛ, Hom nyinara nnom bi: 28#Eks 24.8; Jer 31.31-34 na iyi nye mo bɔgyaa a ɔyɛ ahyɛmu no dze a dodowara ntsi woruhue egu ama bɔnfakyɛ. 29Na mese hom dɛ, Ofitsi ndɛ, moronnom wenyinaba yi bio dze ekesi da no a menye hom bɔnom no fofor wɔ m’Egya n’ahenman no mu no.
30Na wɔtoow ndwom no, wopuei kɔr Ngo Bepɔw no do.
Jesus Ka Peter ne Pa a Ɔbɛpa no ho Asɛm
(Mark 14.27-31; Luke 22.31-34; John 13.36-38)
31 #
Zek 13.7
Nna Jesus see hɔn dɛ, Mo ho bɛyɛ hom nyina fintsidua anadwe yi: na wɔakyerɛw dɛ, Mobɔbɔ oguanhwɛfo no, na kuw no mu nguan nyina abɔ apetse. 32#Mat 28.16 Naaso me nyan ekyir no mibedzi hom enyim akɔ Galilii. 33Na Peter buae see no dɛ, Sɛ wo ho bɛyɛ hɔn nyina fintsidua a, emi dze, ɔnnkɛyɛ me fintsidua. 34Jesus see no dɛ, Meka kyerɛ wo wɔ nokwar mu dɛ, Anadwe yi, ansaana akokɔ bɔbɔn no, ebɛpa me mprɛnsa. 35Peter see no dɛ, Sɛ menye wo bowu mpo a, meremmpa wo da; na dɛmara na hɔn nyina so kae.
Jesus ne Mpaabɔ wɔ Getsemane
(Mark 14.32-42; Luke 22.39-46)
36Nna Jesus nye hɔn baa beebi a wɔfrɛ hɔ Getsemane, na ɔsee n’esuafo no dɛ, Hom ntsena ha ma monkɔ noho monkɔsɔr. 37Na ɔfaa Peter nye Zebedee mba beenu no kaa no ho, na no werɛ hyɛɛ ase howee, na ɔbɔmee. 38Nna ɔsee hɔn dɛ, Awerɛhow ahyɛ me kra no do dze kɔ owu mu: hom ntsena ha na hom nye me nweɔn. 39Na ɔkɔr enyim kakra na ɔdze n’enyim kobutuwii, na ɔbɔɔ mpaa dɛ, Egya, sɛ ɔbɛyɛ a, ma kɔɔpow yi mpa mo ho nkɔ: naaso nnyɛ dɛ mbrɛ mepɛ bi a, na mbrɛ ɔwo epɛ a. 40Na ɔbaa esuafo no nkyɛn, na obohun dɛ wɔdeda, na ɔsee Peter dɛ, Aso hom enntum nye me annweɔn dɔnhwer kor mpo? 41Hom nweɔn na hom nsɔr, mma hom aannkɔ nsɔhwɛ mu: sunsum pɛ dze, na honam yɛ mberɛw. 42Bio, ɔkɔr ne mpɛn ebien kɔsɔɔr dɛ, M’Egya, sɛ kɔɔpow yi nnkɛpa mo ho akɔ gyedɛ monom a, wo pɛ nyɛ hɔ. 43Na ɔbae no, obohun dɛ wɔadeda bio, osiandɛ hɔn enyiwa akom. 44Na ogyaa hɔn hɔ kɔr bio kɔsɔɔr ne mprɛnsa kaa asɛm kor no ara. 45Nna ɔbaa esuafo no nkyɛn, na ɔsee hɔn dɛ, Na hom da ho da regye hom ahom? Hwɛ, dɔn no abɛn, na Nyimpa Ba no, woeyi no ahyɛ ndzebɔnyɛfo nsa. 46Hom nsoɛr ma yɛnkɔ: hwɛ, nyia oriyi me ama no abɛn.
Jesus ne Nkyeree
(Mark 14.43-50; Luke 22.47-53; John 18.3-12)
47Na ɔda do rekasa no, hwɛ, Judas a ɔyɛ duebien no mu baako no, bae, na nyimpadodow pii a wɔdzedze nkrantsee nye mpɔtsibaa fi asɔfompanyin nye ɔman mu mpanyimfo no hɔ ka no ho. 48Na nyia oyii no mae no maa hɔn asɛnkyerɛdze dɛ, Nyia mebɛfew n’ano no, ɔno nye no: hom nkyer no. 49Na ntsɛmara ɔbaa Jesus nkyɛn na ɔsee dɛ, Kyerɛkyerɛfo, o! Na ɔfeew n’ano. 50Na Jesus see no dɛ, Damfo, yɛ dza ɔnam do ma aba. Nna wɔbae dze hɔn nsa bosusuoo no mu, na wɔkyekyeer no. 51Na hwɛ, hɔn a wɔnye Jesus nam no mu baako tseen ne nsa twee ne nkrantsee, na ɔdze bɔɔ ɔsɔfopanyin no n’akowaa n’aso twae. 52Nna Jesus see no dɛ, Fa wo nkrantsee hyɛ ne hyɛbea bio, na hɔn a wɔtwe nkrantsee nyina, nkrantsee anomu na wɔbɔtotɔr. 53Ana edwen dɛ murunntum mennserɛ m’Egya ma mprɛmprɛ ara ɔnnsoma abɔfo a wɔbɔbor asafokuw duebien? 54Nna dɛm a, kyerɛwnsɛm no bɛyɛ dɛn aba mu dɛ otwar dɛ ɔyɛ dɛm? 55#Luk 19.47; 21.37 Dɔn no ara mu na Jesus see nyimpadodow no dɛ, Ana hom firii baa mo do dɛ owifo do, na hom dze nkrantsee nye mpɔtsibaa rebɛkyer me yi? Daa nna metse asɔrfi mu rekyerɛkyerɛ no, hom annkyer me. 56Na yinom nyina yɛe ma nkɔnhyɛfo no kyerɛwnsɛm no aaba mu. Nna esuafo no nyina gyaa no hɔ, na woguanee.
Wɔdze Jesus Kɔ Mpanyimfo no Enyim
(Mark 14.53-65; Luke 22.54, 55, 63-71; John 18.13, 14, 19-24)
57Na hɔn a wɔkyeer Jesus no dze no kɔr Kaiafas ɔsɔfopanyin no nkyɛn, mbrɛ kyerɛwfo nye mpanyimfo no ehyia. 58Na Peter dzii n’ekyir wɔ ekyirekyir dze kodur ɔsɔfopanyin n’abanguado, na ɔkɛhɛɛn mu nye asomfo no kɛtsenaa hɔ dɛ ɔrohwɛ dza obesi. 59Na asɔfompanyin nye baguafo no nyina hwehwɛɛ Jesus ho dasekrum dze eku no: 60na adasetorfo pii bae naaso woennya bi. Na ekyir no beenu bae. 61#Joh 2.19 Na wɔsee dɛ, Oyi kaa dɛ, Mubotum medwuruw Nyankopɔn asɔrdan no na mesi no ndaansa. 62Na ɔsɔfopanyin no gyinae na ɔsee no dɛ, Irummbua bi? Ebɛnadze na yinom ridzi dase tsia wo yi? 63Na Jesus muaa n’ano. Na ɔsɔfopanyin no see no dɛ, Meka tsease Nyankopɔn dɛ sɛ ɔwo nye Kraest no, Nyankopɔn ba no a, ka kyerɛ hɛn. 64#Dan 7.13 Jesus see no dɛ, Aka: eso mese wo dɛ, Ofi ndɛ hom bohu nyimpa Ba no dɛ ɔtse tum no nsa nyimfa, na ɔreba wɔ sor nsuwusiw do. 65#Lev 24.16 Nna ɔsɔfopanyin no sunsuaan n’atar mu, na ɔsee dɛ, Ɔaka ebususɛm: ebɛn hia na ohia hɛn adasefo bio? Hwɛ, afei hom atse ebususɛm no: 66hom dwen dɛn? Wobuae see dɛ Ɔsɛ owu. 67#Isa 50.6 Nna wohinaa n’enyi do ntafi, na wɔbobɔɔ no ekutuku, na binom so bobɔɔ no asotɔr dɛ, 68Kraest, kyerɛ hɛn! Woana na ɔbɔɔ wo?
Peter Ka dɛ Onnyim Jesus
(Mark 14.66-72; Luke 22.56-62; John 18.15-18, 25-27)
69Nna Peter dze, ɔtse abangua no do hɔ; na abaawa bi baa ne nkyɛn bɛsee dɛ, Ɔwo so enye Jesus Galiliinyi no nam. 70Na ɔsanee wɔ hɔn nyina enyim dɛ, Minnyim dza ereka yi. 71Na ofiir edzi kɔr paado no, abaawa bi so hun no, na ɔsee hɔn a wɔwɔ hɔ no dɛ, Oyi so nye Jesus Nazarɛtnyi no nam. 72Na bio ɔdze ntanka saan dɛ, Minnyim nyimpa no. 73Na ɔkyɛɛr kakra no hɔn a wogyina hɔ no bae bɛsee Peter dɛ, Ampa dɛ ifi hɔn mu, na wo kasaa yi wo edzi. 74Nna ɔhyɛɛ ase dzii nsew na ɔkekaa ntam dɛ, Minnyim nyimpa no. Na ntsɛmara na akokɔ bɔnee. 75Na Peter kaa Jesus n’asɛm a ɔkaa kyerɛɛ no dɛ, Ansaana akokɔ bɔbɔn no, na apa me mprɛnsa. Na ofiir edzi, na okosuu yayaayaw.
ទើបបានជ្រើសរើសហើយ៖
Matthew 26: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
