Matthew 25
25
Mbaabun Du no
1 #
Luk 12.35
Nna wɔdze sor ahenman no bɔto mbaabun du a wɔfaa hɔn nkandzea dɛ worikehyia ayeforkun kwan no ho. 2Na hɔn mu beenum yɛɛ mbadwemba, na beenum dze, wɔannyɛ mbadwemba. 3Na hɔn a wɔannyɛ mbadwemba no, wɔfaa hɔn nkandzea no, wɔammfa ngo annka ho; 4na mbadwemba no faa ngo guu hɔn ntoa mu kaa hɔn nkandzea no ho. 5Na ayeforkun no kyɛree no, hɔn nyina totɔɔ nkom na wɔdedae. 6Na esuom no, wɔtseaa mu dɛ, Hwɛ, ayeforkun no reba o! Hom nkɔ nkehyia no. 7Nna mbaabun no nyina soɛree na wɔkekaa hɔn nkandzea. 8Na hɔn a wɔannyɛ mbadwemba no see mbadwemba no dɛ, Hom mma hɛn hom ngo no bi, na hɛn nkandzea rudundum. 9Na mbadwemba no buaa dɛ, Oho, bɛyɛ na ɔronnso hɛn nye hom; na mbom hom nkɔ hɔn a wɔtɔn no hɔ nkɔtɔ homdze. 10Na wɔkɔree rokɔtɔ no, ayeforkun no bae, na hɔn a wɔayɛ krado no nye no kɔr ayefor ase, na wɔtoow abow no mu. 11#Luk 13.25 Na ekyir no na mbaabun nkaa no so bae bɛsee dɛ, Owura, owura, bue hɛn. 12Na ɔno dze, obuaa hɔn dɛ, Nokwar mese hom dɛ, minnyim hom. 13Dɛm ntsi hom nweɔn, na hom nnyim da no anaa dɔn no, (a Nyimpa ba no bɛba.) #25.13 Tsetse Akyerɛwfo binom mmfa a Nyimpa ba no nnka ho.
Nkowaa Baasa ho Bɛ
(Luke 19.11-27)
14 #
Luk 19.11-27
Na ɔtse dɛ nyimpa a ɔrodɔ mu akɔ beebi a ɔfrɛɛ no nkowaa, na ɔdze n’adze a ɔwɔ hyɛɛ hɔn nsa. 15Na ɔmaa baako talent enum, ɔbaako so ebien, na ɔbaako so kor, dɛ mbrɛ hɔn nyina hɔn tum tse, na ɔkɔree. 16Na ntsɛmara nyia onyaa talent enum no kɔree, na ɔdze kedzii gua, na onyaa ho talent enum so. 17Dɛmara so na nyia onyaa ebien no, onyaa ho ebien so. 18Na nyia onyaa kor no, ɔkɔree kɔbɔɔr daadze, na ɔdze no wura ne sika no sumae. 19Na ɔkyɛree kyɛree no, nkowaa no hɔn wura no bae, na ɔnye hɔn bobuu nkontaa. 20Na nyia onyaa talent enum no bae dze talent enum ka ho baa dɛ, Mo wura, edze talent enum hyɛɛ me nsa: hwɛ, menya ho talent enum aka ho. 21No wura see no dɛ, Mbo! Akowaa pa nye nokwafo, edzi ndzɛmba kumaabi ho nokwar: medze wo besi ndzɛmba pii do: kɔ wo wura dɛw mu. 22Na nyia onyaa talent ebien no so bae, na ɔsee dɛ, Mo wura, edze talent ebien hyɛɛ me nsa: hwɛ, menya ho talent ebien aka ho. 23No wura see no dɛ, Mbo! Akowaa pa nye nokwafo, edzi ndzɛmba kumaabi ho nokwar, medze wo besi ndzɛmba pii do: kɔ wo wura dɛw mu. 24Na nyia onyaa talent kor no so bae bɛsee dɛ, Mo wura, minyim wo dɛ eyɛ nyimpa a eyɛ dzen a itwa wɔ mbrɛ innduae, na eboaboa ano wɔ mbrɛ emmfae mmpetsee; 25na musuroi, na mokɔree, na medze wo talent no kosumaa daadze: hwɛ, w’adze nye yi. 26Na no wura buae see no dɛ, Akowaa bɔn nye kwadwefo, inyim dɛ mutwa wɔ mbrɛ munnduae, na moboaboa ano wɔ mbrɛ memmfae mmpetsee: 27dɛm ntsi nkyɛ ɔsɛ wo dɛ edze me sika kɛma sikasesafo, na meba a, mabɛgye m’adze nye no ho nsiho. 28Dɛm ntsi, hom ngye talent no wɔ ne nsamu, na hom mfa mma nyia ɔwɔ talent du no. 29#Mat 13.12; Mar 4.25; Luk 8.18 Osiandɛ obiara a ɔwɔ no, wɔbɛma no na oenya mbordo; na nyia onnyi no, dza ɔwɔ no mpo, wɔbɛgye ne nsamu. 30#Mat 8.12; 22.13; Luk 13.28 Na akowaa a no ho nnyi mfaso no dze, hom ntow no nkyen ekyirekyir sum no mu: hɔ na osu nye asetwɛr wɔ.
Atsɛmbu a Odzi Ekyir no
31 #
Mat 16.27; Mat 19.28 Na aber a nyimpa Ba no bɛba wɔ n’enyimnyam mu, na n’abɔfoe no nyina ka no ho no, nna ɔbɛtsena n’enyimnyam ahengua no do; 32na wɔbɔboaboa amanaman nyina ano wɔ n’enyim, na ɔbɛpaapaa hɔn mu dɛ mbrɛ oguanhwɛfo paapaa nguan nye mpɔnkye mu; 33na ɔdze nguan no begyina n’enyimfa, na ɔdze mpɔnkye no egyina n’abankum. 34Nna Ɔhen no bɛse hɔn a wɔwɔ n’enyimfa no dɛ, Hom mbra, hom a m’Egya ehyira hom, hom mbɛfa ahenman a wofitsi wiadze ahyɛse siesiei maa hom no ntsena mu: 35osiandɛ ɔkɔm dzee me, na hom maa me edziban; nsukɔm dzee me, na hom maa me anondze; meyɛɛ hɔho, na hom faa me kɔr fie; 36midzii adagyaw, na hom furaa me tam; meyaree, na hom bɔhwɛɛ me; medaa efiadze na hom baa me nkyɛn. 37Ɔno na atsenenee no bobua ase no dɛ, Ewuradze, dabɛn na yehun wo dɛ ɔkɔm dze wo, na yɛmaa wo edziban, anaa nsukɔm dze wo, na yɛmaa wo anondze? 38Dabɛn na yehun wo dɛ eyɛ hɔho na yɛfaa wo kɔr fie, anaa idzi adagyaw, na yefuraa wo tam? 39Anaa dabɛn na yehun wo dɛ eyar anaa eda efiadze, na yɛbaa wo nkyɛn? 40Na Ɔhen no bobua ase hɔn dɛ, Nokwar mese hom dɛ, Susuampa dɛ hom ayɛ ama mo nuanom nketseaba yi mu kor no, hom ayɛ ama me. 41Ɔno na ɔbɛse hɔn a wɔwɔ bankum no so dɛ, Hom a wɔadom hom, hom mfi me nkyɛn nkɔ onnyiewiei gya a woesiesie ama abɔnsam nye n’abɔfoe no no mu. 42Osiandɛ ɔkɔm dzee me, na hom amma me edziban; nsukɔm dzee me, na hom amma me anondze; 43meyɛɛ hɔho, na hom ammfa me annkɔ fie; midzii adagyaw, na hom emmfura me tam; meyaree na medaa efiadze, na hom ammbɔhwɛ me. 44Ɔno na hɔn so bobua ase dɛ, Ewuradze, dabɛn na yehun wo dɛ ɔkɔm dze wo, anaa nsukɔm dze wo, anaa eyɛ hɔho, anaa idzi adagyaw, anaa eyar, anaa eda efiadze, na yɛannsom wo? 45Ɔno na obobua hɔn dɛ, Nokwar mese hom dɛ, Susuampa dɛ hom annyɛ amma hom nuanom nketseaba yi mu kor no, hom annyɛ amma me. 46#Dan 12.2 Na yinom bɔkɔ onnyiewiei amandzehu no mu, na atsenenee no bɔkɔ onnyiewiei nkwa no mu.
ទើបបានជ្រើសរើសហើយ៖
Matthew 25: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
