Eksodɔs 29
29
Aaron Na Ne Mba Asɔfohyɛ Ho Nhyehyɛɛ
(Levitikɔs 8.1-36)
1Na iyi nye adze a fa yɛ hɔn fa tsew hɔn ho, na wondzi m’asɔfoe: fa nantwisaa eburwa kor nye nguannyin ebien a wonndzi dzɛm, 2nye epitsi boodoo, nye epitsi tatar a wɔdze ngo aforɔw, na epitsi tatar ntrɛtraba a wɔasera ho ngo: ewifua pa isiam na fa yɛ. 3Na fa gu kɛntsɛn kor mu, na ongu kɛntsɛn no mu ma fa bra, ɔnye nantwisaa no nye nguannyin ebien no. 4Na fa Aaron nye ne mbabanyin no bra ehyiadzibuw no n’abowano, na fa nsu hohor hɔn ho. 5Na fa ntar no, na fa sortar no, nye egugudo ne bataker no, nye egugudo no, nye akatabo no hyɛ Aaron, na fa egugudo abɔdo a wɔawen no nkyermu no bɔ no mu: 6na fa asɔfokyɛw no soa no, na fa kyɛw krɔnkrɔn no si asɔfokyɛw no do. 7Na nkyii fa ɔserango no, na hue gu ne tsir do, na fa sera no. 8Na fa ne mbabanyin no bra, na hyehyɛ hɔn ntar. 9Na fa abɔdo bobɔ hɔn mu, Aaron nye ne mbabanyin no, na bobɔ hɔn mbɔtsir: na wonnya asɔfodzi no nyɛ hɔndze dɛ daa ahyɛdze; na tu Aaron nye ne mbabanyin no si nkyɛn. 10Na fa ɔnantwisaa no bra ehyiadzibuw no enyim: na Aaron nye ne mbabanyin no mfa hɔn nsa ngu nantwisaa no etsifi. 11Na ku nantwisaa no wɔ EWURADZE enyim, wɔ ehyiadzibuw no n’abowano. 12Na fa nantwisaa no no bɔgyaa bi, na fa wo nsatseaba bɔ mu sera afɔrmbukyia no ne mmbɛn ho; na hue bɔgya no nyinara gu afɔrmbukyia no ase. 13Na yi seradze a ɔkata ayamudze no ho nyinara, nye dza ɔsensɛn berɛbo no ho no, nye nsɛbea ebien no, nye seradze a ɔwɔ do no, na hyew no wɔ afɔrmbukyia no do. 14Na ɔnantwisaa no ne nam, nye no nwoma, nye n’egyanan dze, fa gya hyew no wɔ nseraban no ekyir: ɔyɛ bɔn ho afɔr. 15Eso fa oguannyin kor; na Aaron nye ne mbabanyin no mfa hɔn nsa ngu n’etsifi. 16Na ku oguannyin no, na fa no bɔgyaa, na fa petse afɔrmbukyia no ho hyia. 17Na twitwa oguannyin no esinesin, na hohor n’ayamudze, nye no ntwɛr ho, na fa ka n’esinesin, na ɔnye ne tsir no ho. 18Na hyew oguannyin no no nyinara wɔ afɔrmbukyia no do: ɔyɛ ɔhyew afɔr ma EWURADZE: ɔyɛ adze huanhuam, afɔr a wɔdze gya bɔ ma EWURADZE a. 19Na fa oguannyin kor no so; na Aaron nye ne mbabanyin no mfa hɔn nsa ngu oguannyin no etsifi. 20Na nkyii ku oguannyin no, na fa no mbɔgyaa bi, na fa ka Aaron n’aso nyimfa ano, nye ne mbabanyin no hɔn aso nyimfa ano, nye hɔn nsa nyimfa kokrobetsir ano, nye hɔn anan nyimfa kokrobetsir ano, na fa bɔgya no petse afɔrmbukyia no ho hyia. 21Na fa afɔrmbukyia no do bɔgya no bi, nye ɔserango no bi, na fa petse Aaron do, nye ne ntar do, nye ne mbabanyin no do, nye ne mbabanyin no hɔn ntar do ka no ho, ma ɔntsew ɔno nye ne ntar, nye ne mbabanyin no, nye ne mbabanyin no hɔn ntar ho nka no ho. 22Nkyii so fa oguannyin no ne seradze, nye ne seradze dua no, nye seradze a ɔkata n’ayamudze ho no, nye adze a ɔsensɛn ne mberɛbo ho no, nye nsɛbea ebien no, nye no do seradze no, nye aserɛ nyimfa dze no; osiandɛ ɔyɛ etuhoakyɛ oguannyin: 23na boodoo ntɔwmu kor, nye boodoo tatar a woegu mu ngo kor, nye tatar trɛtraba kor, fa fi epitsi kɛntsɛn no a osi EWURADZE enyim no mu: 24na fa ne nyina gu Aaron nsamu, nye ne mbabanyin no nsamu; na hihim no yɛ EWURADZE enyim ohim afɔr. 25Na gyegye no wɔ hɔn nsamu, na hyew no wɔ afɔrmbukyia no do wɔ ɔhyew afɔr no do, ma ɔnyɛ EWURADZE enyim adze huanhuam: ɔyɛ afɔr a wɔdze gya bɔ ma EWURADZE. 26Na fa Aaron n’etuhoakyɛ oguannyin no ne nyan, na hihim yɛ EWURADZE enyim ohim afɔr: na ɔnyɛ wo kyɛpɛn. 27Na ohim afɔr nyan no, na ɔmado afɔr aserɛ no a wɔdze fi Aaron nye ne mbabanyin no hɔn etuhoakyɛ oguannyin no a woehihim no, na wɔama do no mu no tsew ho: 28na ɔnyɛ dɛ daa ndzinoa mfi Israelmba nsamu mma Aaron nye ne mbabanyin: na ɔyɛ ɔmado afɔr: na ɔnyɛ ɔmado afɔr mfa mfi Israelmba hɔn asomdwee afɔr n’afɔrbɔdze mu, mekyerɛ hɔn ɔmado afɔr a wɔbɔ ma EWURADZE. 29Na Aaron ne ntar krɔnkrɔn no nyɛ ne mba a wodzi n’ekyir dze, ma wɔnsera hɔn ngo wɔ mu, na wontu hɔn nsi nkyɛn wɔ mu. 30Nda esuon na ɔbabanyin a odzi ɔsɔfo wɔ n’ananmu no nhyɛ, aber a ɔreba ehyiadzibuw no mu abɔsom wɔ bea krɔnkrɔn no. 31Na fa etuhoakyɛ oguannyin no, na noa ne nam no wɔ bea a ɔyɛ krɔnkrɔn. 32Na Aaron nye ne mbabanyin no ndzi oguannyin no ne nam, nye boodoo a ɔwɔ kɛntsɛn no mu no, wɔ ehyiadzibuw no n’abowano. 33Na wondzi ndzɛmba no a wɔdze yɛɛ mpata, ma wɔdze eetu hɔn esi nkyɛn, na wɔatsew hɔnho no: mbom mma nyimpa biara nndzi bi, osiandɛ ɔyɛ krɔnkrɔn. 34Na sɛ etuhoakyɛ nam no, anaa boodoo no bi ka ma adze kye do a, ɔno fa gya hyew dza aka no: mma wonndzi, osiandɛ ɔyɛ krɔnkrɔn. 35Na dɛm na fa yɛ Aaron nye ne mbabanyin no dɛ mbrɛ mahyɛ wo no nyinara: nda esuon na tu hɔn si nkyɛn. 36Na daa nyina fa nantwisaa bɔ bɔn ho afɔr no ma ɔnyɛ mpatadze: na tsew afɔrmbukyia no ho, aber a erepata wɔ ne tsir no; na sera ho ngo, fa tsew ho. 37Nda esuon na pata wɔ afɔrmbukyia no ne tsir, na tsew ho: na afɔrmbukyia no nyɛ krɔnkrɔn mu krɔnkrɔn; biribiara a ɔka afɔrmbukyia no ɔnyɛ krɔnkrɔn.
38Afei iyi nye dza fa bɔ afɔr wɔ afɔrmbukyia no do; daa daa nyina nguambaa ebien a woedzi afrenhyia afrenhyia. 39Eguambaa kor na fa bɔ afɔr anapa; na eguambaa kor so fa bɔ afɔr ewimbir: 40na fa isiam pa efa ebupɛn du mu kor a wɔdze ngo siwii bɔdambɔ kor na fa ebupɛn anan mu kor aforɔw; na wenyin bɔdambɔ kor na fa ebupɛn anan mu kor a ɔyɛ nom afɔr, ka eguambaa kor ho. 41Na eguambaa kor no so fa bɔ afɔr ewimbir, na yɛ no dɛ mbrɛ anapa edzidzi afɔr no, na mbrɛ no nom afɔr no tse, ma ɔnyɛ adze huanhuam, afɔr a wɔdze gya bɔ ma EWURADZE. 42Ɔnyɛ daa ɔhyew afɔr wɔ w’ebusuasantsen mu wɔ ehyiadzibuw no n’abowano wɔ EWURADZE enyim: mbrɛ menye hom behyia, makasa wɔ hɔ makyerɛ wo. 43Na hɔ na menye Israelmba behyia; na m’enyimnyam atsew Buw no ho. 44Na mebɛtsew ehyiadzibuw no, nye afɔrmbukyia no ho: Aaron so nye ne mbabanyin no mebɛtsew hɔn ho, ma woeedzi m’asɔfoe. 45Na mebɛtsena Israelmba no mu, na mayɛ hɔn Nyankopɔn. 46Na wobohu dɛ emi nye EWURADZE hɔn Nyankopɔn a miyii hɔn fii Egypt asaase do bae, dɛ mebɛtsena hɔn mu no: emi nye EWURADZE hɔn Nyankopɔn.
ទើបបានជ្រើសរើសហើយ៖
Eksodɔs 29: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.