Eksodɔs 28
28
Asɔfontar
(Eksodɔs 39.1-7)
1Na ma wo nua Aaron, nye ne mbabanyin no nka no ho, mfi Israelmba no mu mbra wo nkyɛn, ama wɔaabɛyɛ m’asɔfoe, mekyerɛ Aaron, Nadab, Abihu, Eleazar nye Itamar, Aaron ne mbabanyin no. 2Na pam ntar krɔnkrɔn ma wo nua Aaron, wɔ enyimnyam nye ahoɔfɛw ntsi. 3Na kasa kyerɛ hɔn a wɔyɛ abadwembafo a medze nyansa sunsum mahyɛ hɔn ma nyinara, ma wɔmpam Aaron ntar no mfa ntsew no ho, ma ondzi mo sɔfoe. 4Na ntar a wɔmpam nye yi; akatabo, nye egugudo, nye bataker, nye sortar a wɔawen no dam dam, asɔfokyɛw, nye abɔdo: na wɔmpam ntar krɔnkrɔn mma wo nua Aaron, nye ne mbabanyin, ma woeedzi mo sɔfoe. 5Na wɔmfa sika no, nye bibir no, nye ɔberdum no, nye serdaa no, nye ndwera fɛɛfɛw no nyɛ.
6Na wɔnyɛ egugudo no sika, bibir, nye ɔberdum, serdaa, nye ndwera fɛɛfɛw a woefira, odwimfo pa edwinsa. 7Onnya abatsir ahoma ebien a otuatua n’ano ebien no; ma wɔdze aabɔ mu atoa. 8Na nkyermu abɔdo a wɔawen a ɔwɔ no do, ma wɔdze aabɔ ne nyinara do no, nyɛ dɛ n’edwinsa a ofi ahoma kor no ara mu; sika, bibir, nye ɔberdum, nye serdaa, nye ndwera fɛɛfɛw a woefira. 9Na fa abo a no su tse dɛ epopobibir ebien, na kyerɛw Israelmba hɔn edzin wɔ do: 10hɔn edzin esia ndzi ɔbo kor do, na esia a wɔaka no hɔn edzin ndzi ɔbo kor no so do, dɛ mbrɛ hɔn awoe mu tse. 11Ɔbosiamfo edwinsa, ɔtse dɛ nsɔwanokaba nkyerɛwee, na fa kyerɛw abo ebien no do, dɛ mbrɛ Israelmba hɔn edzin tsetsee: yɛ no ma sika mbraho ntwa ho nhyia. 12Na fa abo ebien no bobɔ egugudo no n’abatsir ahoma no do, ma ɔnyɛ nkaa abo mma Israelmba no: na Aaron nsoa hɔn edzin wɔ n’abatsir ebien no do wɔ EWURADZE enyim mfa nyɛ nkaa.
13Na yɛ sika mbraho: 14nye sika mapa ntweaban ebien; yɛ no dɛ ahoma, mbɛsawɔw edwuma: na fa ntweaban a wɔawɔw no mbɛsa no hyehyɛ mbraho no do. 15Na yɛ atsɛmbu akatabo, odwimfo pa edwinsa; dɛ mbrɛ egugudo edwuma no tse na yɛ no; sika, bibir, ɔberdum, serdaa, nye ndwera fɛɛfɛw a woefira na fa yɛ. 16Ɔnyɛ etwaanan mbɔho; ne tsentsen nyɛ nsatseama, na ne tɛtɛr nyɛ nsatseama. 17Na fa nsisimu abo sisi mu, abo akyerɛpɛn anan: kyerɛpɛn a odzi kan no nyɛ bɔgyanambo, kratsebo, nye ahatawmomonbo kyerɛpɛn; 18na kyerɛpɛn a otsia ebien no nyɛ nserɛmɛmbo, hoabo, nye dɛnkyɛmbo; 19na kyerɛpɛn a otsia ebiasa no nyɛ ekutuhonbo, mfrafrabo nye ɔberdumbo; 20na kyerɛpɛn a otsia anan no nyɛ sikabereebo, epopobibirbo nye ahwehwɛbo:#28.17-20 NSISIMU ABO … AHWEHWƐBO: Iyinom nyinara yɛ aboɔdzen abo a wɔdze dzi edwin, mbrɛ hɔn su tsetsee no na ɔahwɛ ama hɔn edzin. na ne nsisimu no, sika ntwa ho nhyia. 21Na abo no nyɛ dɛ mbrɛ Israelmba hɔn edzin tsetsee, duebien, dɛ mbrɛ hɔn edzin tsetsee; dɛ nsɔwanokaba nkyerɛwee, dɛ mbrɛ baako biara ne dzin tse, wɔmfa mma ebusuakuw duebien no. 22Na fa sika mapa yɛ akatabo no do ntweaban dɛ ahoma, mbɛsawɔw edwuma. 23Na yɛ akatabo no do sika nkaba ebien, na fa nkaba ebien no hyehyɛ akatabo no n’ano ebien no do. 24Na fa sika ntweaban a wɔawɔw no mbɛsa ebien no hyehyɛ akatabo no n’ano nkaba ebien no mu. 25Na ntweaban a wɔawɔw no mbɛsa ebien no n’ano ebien a aka no fa toatoa mbraho ebien no mu, na fa hyehyɛ egugudo no n’abatsir ahoma no do wɔ n’enyim afamu. 26Na yɛ sika nkaba ebien, na fa hyehyɛ akatabo no n’ano ebien no do, wɔ ne nkyɛnmu afamu a ɔba egugudo no ho no. 27Na yɛ sika nkaba ebien, na fa hyehyɛ egugudo no n’abatsir ahoma ebien no do wɔ ase, wɔ n’enyim afamu, no ntoatoa no ne nkyɛn, wɔ egugudo no ne nkyermu abɔdo a wɔawen no do. 28Na wɔmfa bibir ahoma nkyekyer akatabo no ne nkaba no nsusuo egugudo no ne nkaba no mu, ma ɔmfam egugudo no ne nkyermu abɔdo a wɔawen no do, amma akatabo no aannsan emmfi egugudo no ho. 29Na sɛ Aaron rokɔ bea krɔnkrɔn no do a, ɔnsoa Israelmba no hɔn edzin wɔ atsɛmbu akatabo no mu wɔ n’akoma do, mfa nyɛ nkaa wɔ EWURADZE enyim daa. 30#Nka 27.21; Deut 33.8; Ezra 2.63; Neh 7.65 Na fa Urim nye Tummim#28.30 URIM NYE TUMMIM: Ndzɛmba ebien bi a nna ɔsɔfo fa do dze hwehwɛ Nyankopɔn ne pɛ; naaso yenntum nnhu kwan a nna wɔfa do dze yɛ adwuma. N’asekyerɛ nye: Kan na emudzi. no hyɛ atsɛmbu akatabo no mu: na sɛ Aaron rokɔ EWURADZE enyim a, aada n’akoma do: na Aaron nsoa Israelmba hɔn atsɛmbu wɔ n’akoma do wɔ EWURADZE enyim daa.
31Na fa bibir ara nko yɛ egugudo no ne bataker no. 32Na onnya tokur wɔ ne finimfin mfa mma tsir: na wɔmfa ɔtamban a wɔawen mban tokur no n’ano nhyia, ɔtse dɛ dadze atar no tokur, amma oeennsuan. 33Na no mbuano do no fa bibir, nye ɔberdum, nye serdaa yɛ pɔmegranate fa twa no mbuano no ho hyia; na sika ndɔndɔmba nsensɛn ne ntamu ne ntamu hyia: 34sika adɔmba nye pɔmegranate sika adɔmba nye pɔmegranate ntwa bataker no no mbuano no ho nhyia. 35Na Aaron mfa nhyɛ nsom: ama wɔaatse ne ndze wɔ aber a ɔrehɛn bea krɔnkrɔn no mu wɔ EWURADZE enyim, na aber a orifir edzi, amma oeennwu.
36Na fa sika mapa yɛ tɛrba, na kyerɛw do, dɛ nsɔwanokaba nkyerɛwee, dɛ KRƆNKRƆN MA EWURADZE. 37Na fa fam bibir ahoma do, na ɔnko asɔfokyɛw no ho; asɔfokyɛw no n’enyim na ɔmfam. 38Na ɔmfam Aaron no momapɔw do, na Aaron nsoa mbusu biara a aba krɔnkrɔndze a Israelmba tsew ho yɛ no krɔnkrɔn wɔ hɔn ayɛyɛdze nyinara mu no; na ɔnda no momapɔw do daa, ama EWURADZE n’enyi asɔ hɔn. 39Na fa ndwera fɛɛfɛw wen sortar no dam dam, na fa ndwera fɛɛfɛw yɛ asɔfokyɛw no, na yɛ abɔdo, nkyermuwemfo edwinsa. 40Na yɛ sortar ma Aaron ne mbabanyin, na yɛ abɔdo ma hɔn, na yɛ mbɔtsir bi ma hɔn, wɔ enyimnyam nye ahoɔfɛw ntsi. 41Na fa hyehyɛ wo nua Aaron ne mbabanyin no ka no ho; na sera hɔn ngo, na tu hɔn si nkyɛn, na tsew hɔn ho, ma wondzi m’asɔfoe. 42Na yɛ ndwera ntwontwo ma hɔn, ma ɔnkata hɔn adagyaw do, mfi asen nkodu nserɛekyir: 43na Aaron nye ne mbabanyin no, sɛ wɔrokɔ ehyiadzibuw no mu, anaa sɛ wɔreba afɔrmbukyia no nkyɛn abɔsom wɔ bea krɔnkrɔn no mu a, wɔnhyehyɛ, ma woeenndzi mbusu, na woeennwu: ɔnyɛ daa ahyɛdze mma ɔno nye n’asefo a wobedzi n’ekyir no.
ទើបបានជ្រើសរើសហើយ៖
Eksodɔs 28: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.