Eksodɔs 26
26
Ntamadan No Ho Nhyehyɛɛ
(Eksodɔs 36.8-38)
1Nkyii so fa nsensɛnho atam du yɛ ntamadan no; ndwera fɛɛfɛw a woefira, nye bibir, nye ɔberdum, nye serdaa na fa yɛ me kerubim a ɔyɛ odwimfo pa edwinsa. 2Nsensɛnho tam kor ne tsentsen nyɛ basafa duanan, na nsensɛnho tam kor ne tɛtɛr nyɛ basafa ebien: nsensɛnho atam no nyinara no nsusui ngyina kor. 3Wɔmfa nsensɛnho atam enum ntoatoa do kor ntoa kor so do; na nsensɛnho atam enum no so ntoatoa do kor ntoa kor so do. 4Na fa bibir bobɔ nsensɛnho tam kor mbuano do etokur wɔ ano wɔ ntoae no do; na dɛmara na yɛ wɔ nsensɛnho tam a odzi ekyir no no mbuano do wɔ ntoae a otsia ebien no do. 5Etokur eduonum na bobɔ wɔ nsensɛnho tam kor mu, na etokur eduonum so na bobɔ wɔ nsensɛnho tam a ɔwɔ ntoae a otsia ebien no so ano; etokur no ndzi abɔenyim nkorkor. 6Na yɛ sika nkɔtɔkorba eduonum, na fa nkɔtɔkorba no yɛ ma nsensɛnho atam no kor ntoae kor so do: na ntamadan no nyɛ kor. 7Na fa mpɔnkyenhwi yɛ nsensɛnho atam fa si buw wɔ ntamadan no do: yɛ no nsensɛnho atam dubiako. 8Nsensɛnho tam kor ne tsentsen nyɛ basafa duenum, na nsensɛnho tam kor ne tɛtɛr nyɛ basafa ebien: nsensɛnho atam dubiako no no nsusui ngyina kor. 9Na fa nsensɛnho atam enum toatoa yɛ no kor, na yɛ nsensɛnho atam esia so kor, na boka nsensɛnho tam a otsia esia no ma ɔnkata buw no do wɔ n’enyim. 10Na yɛ etokur eduonum wɔ nsensɛnho tam kor a odzi ekyir no mbuano do wɔ ntoae no do, nye etokur eduonum so wɔ ntoae a otsia ebien no ne nsensɛnho tam no mbuano do. 11Na yɛ mboran nkɔtɔkorba eduonum, na fa nkɔtɔkorba no susuo etokur no mu, na yɛ ma buw no ntoae mu, ma ɔnyɛ kor. 12Na buw no ne nsensɛnho atam a aka sensɛn hɔ no, nsensɛnho tam fa no a aka no, nsensɛn ntamadan no ekyir. 13Na buw no ne nsensɛnho atam no ne tsentsen mu anamɔn kor nye fa a abor do wɔ afa ha, nye anamɔn kor nye fa a abor do wɔ afa hɔ no nsensɛn ntamadan no ne nkyɛn nkyɛn wɔ afa ha nye afa ha nkata do. 14Na fa nguannyin nwoma a wɔahyɛ no memen yɛ buw no ne nkatado; na fa nsukraman nwoma yɛ no sor akatado.
15Na fa akeesia dua yɛ ntamadan no ne ntaabow a osisi hɔ. 16Basafa enum nyɛ taabow ne tsentsen, na bɛyɛ anamɔn ebien nye fa nyɛ taabow kor ne tɛtɛr. 17Anan ebien ntuatua taabow kor mu, nsusuo kor mu mfam kor so ho: dɛm na yɛ ma ntamadan no ne ntaabow nyinara. 18Na yɛ ntamadan no ne ntaabow no, ntaabow eduonu ndzi pomu afamu nkyerɛ pomu. 19Na yɛ ntaabow eduonu no n’ase dwetɛ ngyinado eduanan; ngyinado ebien nhyehyɛ taabow kor ase mma anan ebien no, na ngyinado ebien nhyehyɛ taabow kor so ase mma n’anan ebien no: 20na ntamadan no n’afa a otsia ebien no, odzi kwaamu afamu no, ntaabow eduonu: 21na no dwetɛ ngyinado eduanan no; ngyinado ebien nhyehyɛ taabow ase, na ngyinado ebien nhyehyɛ taabow kor so ase. 22Na ntamadan no n’ekyir a odzi anee afamu no yɛ hɔ ntaabow esia. 23Na yɛ ntaabow ebien ma ntamadan no no kutuw do wɔ n’ekyir afamu. 24Na ɔmpam ho wɔ ase, na ɔnyɛ mu dɛmara nkodu no sor nkaba kor ho: dɛm na n’ebien nyina nyɛ; wondzi kutuw ebien no do. 25Na ɔnyɛ ntaabow awɔtwe, nye no dwetɛ ngyinado, ngyinado duesia; ngyinado ebien nhyehyɛ taabow kor ase, na ngyinado ebien nhyehyɛ taabow kor so ase. 26Na fa akeesia dua yɛ mbeabeamu; enum nyɛ ntamadan no ne nkyɛn kor ntaabow no dze, 27na mbeabeamu enum so nyɛ ntamadan no ne nkyɛn kor no ne ntaabow no dze, na mbeabeamu enum so nyɛ ntamadan no ne nkyɛn ekyir wɔ anee afamu ntaabow no dze. 28Na finimfin mbeamu a ɔwɔ ntaabow no ne finimfin no ntwa mu mfi tsir nkodu tsir. 29Na fa sika duradura ntaabow no ho, na fa sika yɛ no ho nkaba no ma ɔnyɛ mbeabeamu no hyehyɛbea: na fa sika duradura mbeabeamu no ho. 30Na si ntamadan no dɛ mbrɛ ne nyɛbea a woeyi akyerɛ wo wɔ bepɔw no do no tse.
31Na fa bibir, nye ɔberdum, nye serdaa nye ndwera fɛɛfɛw a woefira yɛ ntwamutam: yɛ me kerubim a ɔyɛ odwimfo pa edwinsa: 32na fa sensɛn akeesia edum anan a woeduradura ho sika do, no nkwaba nyɛ sika, nsisi dwetɛ ngyinado anan do. 33#Heb 6.19; 9.3-5 Na fa ntwamutam no sensɛn nkɔtɔkorba no ase, na fa dasedaka no bra ntwamutam no mu: na ntwamutam no ntwa bea krɔnkrɔn no nye krɔnkrɔn mu krɔnkrɔn no mu mma wo. 34Na fa mbɔbɔrhu egua no si dasedaka no do wɔ krɔnkrɔn mu krɔnkrɔnbea no mu. 35Na fa ɔpon no si ntwamutam no ekyir, na kandzeadua no ndzi ɔpon no tsentsendo wɔ ntamadan no nkyɛn mu wɔ pomu afamu: na fa ɔpon no si kwaamu afamu. 36Na fa bibir, nye ɔberdum, nye serdaa, nye ndwera fɛɛfɛw a woefira, wen nkyermu fa yɛ ntamadan no n’abowano nkataano. 37Na yɛ akeesia edum enum fa ma nkataano no, na fa sika duradura ho; no nkwaba nyɛ sika: na gu boran ngyinado enum wɔ ase.
ទើបបានជ្រើសរើសហើយ៖
Eksodɔs 26: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.