Eksodɔs 25
25
Ehyiadzibuw Ho Afɔrbɔdze
(Eksodɔs 35.4-9)
1Na EWURADZE kasaa kyerɛɛ Moses dɛ, 2Ka kyerɛ Israelmba ma wɔmfa ayɛyɛdze mbrɛ me: nyimpa biara a n’akoma pɛ no no hɔ na hom ngye m’ayɛyɛdze. 3Na iyi nye ayɛyɛdze a hom ngye no wɔ hɔn hɔ; sika, nye dwetɛ, nye boran; 4nye bibir, nye ɔberdum, nye serdaa, nye ndwera fɛɛfɛw, nye mpɔnkyenhwi; 5nye nguannyin nwoma a wɔahyɛ no memen, nye nsukraman nwoma; nye akeesia dua; 6kandzea ho ngo, ɔserango ho nduhuam, nye nduhuam a wɔhyew ho edur; 7abo a no su tse dɛ epopobibir, nye abo a wɔdze besisi egugudo no, nye akatabo no mu no. 8Na ma wɔnyɛ krɔnkrɔnbea mma me; ma maatsena hɔn mu. 9Dɛ mbrɛ merekyerɛ wo no nyinara, ntamadan no saso, nye no mu ndzɛmba nyinara ne saso, dɛmara pɛ na hom nyɛ no.
Ahyɛmudaka Ho Nhyehyɛɛ
(Eksodɔs 37.1-9)
10Na wɔnyɛ akeesia dua adaka: ne tsentsen nyɛ bɛyɛ basafa kor na fa, na ne tɛtɛr bɛyɛ anamɔn ebien na fa, na no krɔn so bɛyɛ anamɔn ebien na fa. 11Na fa sika mapa dura ho, no mu nye n’ekyir na fa dura, na yɛ ho sika hankra twa ho hyia. 12Na gu no ho sika nkaba anan, na fa tuatua n’anan anan no ho; na nkaba ebien ndzi n’afa fakor, na nkaba ebien ndzi n’afa no ho. 13Na fa dua sian mpoma, na fa sika dura ho. 14Na fa mpoma no hyehyɛ nkaba no mu wɔ adaka no ne nkyɛn mu, ma wɔmfa nsoa adaka no. 15Mpoma no nhyehyɛ adaka no ne nkaba no mu: mma wonnyiyi mmfi mu. 16Na fa dase a medze mebɛma wo no to adaka no mu. 17#Heb 9.5 Na fa sika mapa yɛ mbɔbɔrhu egua: ne tsentsen nyɛ bɛyɛ basafa kor nye fa, na ne tɛtɛr bɛyɛ anamɔn ebien nye fa. 18Na yɛ sika kerubim ebien; ɔbor edwuma na fa yɛ, wɔ mbɔbɔrhu egua ne tsir ebien no do. 19Na yɛ kerubim kor wɔ ne tsir kor, nye kerubim kor wɔ ne tsir kor so: mbɔbɔrhu egua no mu na hom mma kerubim ebien no mfi wɔ ne tsir ebien no do. 20Na kerubim no ntserɛtserɛw hɔn ntsaban mu wɔ ɔsor, mfa hɔn ntsaban no nkata mbɔbɔrhu egua no do, hɔn enyim ndzi abɔenyim; mbɔbɔrhu egua no do na kerubim no hɔn enyim mbedzi. 21Na fa mbɔbɔrhu egua no si adaka no do sor; na adaka no mu na fa dase a medze mebɛma wo no to. 22Na hɔ na menye wo behyia, na mefi mbɔbɔrhu egua no do wɔ kerubim ebien a wɔwɔ dasedaka no do no ntamu maka wo ndzɛmba a mebɛhyɛ wo dɛ fa kyerɛ Israelmba no nyinara ho nsɛm.
Pon No Ho Nhyehyɛɛ
(Eksodɔs 37.10-16)
23Na fa akeesia dua pon: ne tsentsen nyɛ basafa kor, ne tɛtɛr anamɔn kor nye fa, na no krɔn bɛyɛ anamɔn ebien nye fa. 24Na fa sika mapa dura ho, na yɛ ho sika hankra hyia. 25Na yɛ ho ntotoano a ɔbɛyɛ nsatseama#25.25 NSATSEAMA: Iyi yɛ abasamu kor ne tsentsen. hyia, na yɛ ntotoano no ho sika hankra hyia. 26Na yɛ ho sika nkaba anan, na fa nkaba no sisi nkutuw anan a ɔwowɔ n’anan anan no ho no do. 27Ntotoano no nkyɛn papaapa na nkaba no ndzi, ma ɔnyɛ beebi mbrɛ wɔdze mpoma no bɛhyehyɛ dze asoa ɔpon no. 28Na fa akeesia dua sinsian mpoma no, na fa sika duradura ho, ama wɔdze aasoa pon no. 29Na yɛ do mboyaa, nye ntser, nye nkɔɔpow, nye nkorbaa a wɔdze bohue: sika mapa na fa yɛ. 30#Lev 24.5-8 Na fa kyerɛpaanoo si pon no do wɔ m’enyim daa.
Kandzeadua Ho Nhyehyɛɛ
(Eksodɔs 37.17-24)
31Na fa sika mapa yɛ kandzeadua: ɔbor edwuma na fa yɛ kandzeadua no, n’anan, nye no dua; no ho mpokuwa, no nkukuduuduw, nye ne nhyiren, mfi sin kor no ara mu: 32na abaw esia mfifi ne nkyɛn mu; kandzeadua n’abaw ebiasa mfi n’afa fakor, na kandzeadua no n’abaw ebiasa so mfi n’afa kor so: 33mpokuwa ebiasa a wɔayɛ no dɛ almɔnd nhyiren wɔ abaw kor ho, kukuduuduw nye nhyiren; na mpokuwa ebiasa a wɔayɛ no dɛ almɔnd nhyiren wɔ abaw kor no so ho, kukuduuduw nye nhyiren: dɛm na yɛ wɔ abaw esia a efifir wɔ kandzeadua no ho no ho: 34na kandzeadua no ho mpokuwa anan a wɔayɛ no dɛ almɔnd nhyiren, no kukuduuduw nye ne nhyiren: 35na kukuduuduw nhyɛ abaw ebien a otuatua ho no ase, na kukuduuduw nhyɛ abaw ebien a otuatua ho no ase, na kukuduuduw nhyɛ abaw ebien a otuatua ho no ase wɔ abaw esia a efifir kandzeadua no mu no ase. 36No ho nkukuduuduw nye no ho abaw no mfi mu ara, ne nyinara sika mapa na wɔmfa nyɛ no ɔbor edwuma kor. 37Na yɛ ne nkandzea no esuon: na wɔnsosɔ ne nkandzea no, ma ɔngyegye wɔ n’enyim. 38Na no ho adabaa, nye no ho nsompokuwa nyɛ sika mapa. 39Sika mapa kyɛpɛn kor na wɔmfa nyɛ, ɔnye no ho ndzɛmba yi nyinara. 40#Ndwu 7.44; Heb 8.5 Na hwɛ na yɛ no dɛ mbrɛ no nsusudo a wɔdze akyerɛ wo wɔ bepɔw no do no tse.
ទើបបានជ្រើសរើសហើយ៖
Eksodɔs 25: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.