Eksodɔs 22
22
Kaw No Ntuae Ho Mbra
1Sɛ nyimpa bi kowia nantwi, anaa guan, na oku no, anaa ɔtɔn no a; ɔmfa anantwi enum nhyɛ nantwi kor ananmu, na nguan anan nhyɛ guan kor ananmu ntua kaw. 2Sɛ wohu owifo no dɛ oebubu mu reba, na wɔbɔ no adze ma owu a, bɔgya asodzi nnyi hɔ mma no. 3Sɛ ewia pue no do a, bɔgya asodzi wɔ hɔ ma no: ahyɛnanmu na ɔnyɛ; sɛ onnyi hwee a, ɔno n’adzewia ntsi wɔntɔn no. 4Sɛ wohu adzewiadze no wɔ ne nsamu enyikan a, sɛ ɔyɛ ɔnantwi o, asoaso o, oguan o, ontua kaw mbɔho.
5Sɛ nyimpa bi ma wodzi haban anaa wenyin ture mu adze, na ogyaa n’abowa ma okedzi nyimpa kor so ne haban mu adze a, ɔmfa nankasa ne haban mu ndzepa, nye nankasa no wenyin ture mu ndzepa bi nhyɛ ananmu.
6Sɛ ogya pue, na ɔkɔsɔ nsoɛ mu ma eburow ekuwekuw, anaa eburow a ogyinagyina hɔ, anaa haban no hyew a; ɔhyɛ na nyia ɔsɔɔ gya no nhyɛ ananmu.
7Sɛ nyimpa bi dze sika anaa efidze ma ne nyɛnko esie, na wowia no wɔ nyimpa no ne fie a; sɛ wohu owifo no a, ontua kaw mbɔho. 8Sɛ woennhu owifo no a, ɔno fiwura no ntwe mbɛn Nyankopɔn nhwɛ kyerɛ dɛ ɔnntsen ne nsa nnka ne nyɛnko n’adze no a. 9Na mbrato ho asɛm biara, sɛ ɔyɛ ɔnantwi dze o, asoaso dze o, oguan dze o, anaa adze a ayew biara a obi bɛse wɔ ho dɛ, Ɔno nye yi o, wɔmfa hɔn beenu nyina hɔn asɛm mbra Nyankopɔn enyim; nyia Nyankopɔn bobu no fɔ no, ontua kaw mbɔho mma ne nyɛnko no.
10Sɛ nyimpa bi dze asoaso, anaa nantwi, anaa guan, anaa abowa biara ma ne nyɛnko esie; na owu anaa opira, anaa wɔka no to hamu, na nyimpa bi ennhu a: 11EWURADZE ntam mbra hɔn beenu no ntamu, kyerɛ dɛ ɔnntsen ne nsa nnka ne nyɛnko no n’adze no a: na adze no wura no ɔmpen do, na mma ɔnnhyɛ ananmu. 12Sɛ wowia no wɔ ne nkyɛn dze a, ɔnhyɛ adze no wura ananmu. 13Sɛ wɔatsetsew no esinesin a, ɔmfa mbra mbedzi dase; dza wɔatsetsew no no mma ɔnnhyɛ ananmu.
14Na sɛ nyimpa bi kɛfɛm biribi wɔ ne nyɛnko hɔ, na ɔsɛɛ, anaa owu, dɛ adze no wura no no ho nnyi mu a, ɔhyɛ na ɔnhyɛ ananmu. 15Sɛ adze no wura no no ho wɔ mu a, mma ɔnnhyɛ ananmu: sɛ ɔyɛ apaabɔ adze a, na ogyina n’apaabɔdze do.
Abrabɔ Na Nyamesom Ho Mbra
16 #
Deut 22.28, 29 Na sɛ nyimpa bi kɛdaadaa ɔbaabun a wɔnngyee no yer, na ɔnye no da a, ɔno ɔmma ne tsiadze ma ɔnyɛ ne yer. 17Sɛ n’egya pow koraa dɛ ɔdze no ma no a, onker sika mma, dɛ mbrɛ mbaabun tsiadze tse.
18 #
Deut 18.10, 11 Mma mma ɔbaa anyɛn kwan ma ɔntsena ase.
19 #
Lev 18.23; 20.15, 16; Deut 27.21 Obiara a ɔnye abowa bɛda no, oku na wonku no.
20 #
Deut 27.2-7
Nyia ɔbɔbɔ afɔr ama onyame biara, na nnyɛ EWURADZE nko no, wɔnsɛɛ no koraa. 21#Eks 23.9; Lev 19.33, 34; Deut 24.17, 18; 27.19 Na ɔhɔho dze mma nnyɛ no bɔn, nkyii so mma nnhaw no: osiandɛ hom yɛɛ ahɔho wɔ Egypt asaase do. 22Mma hom nntseetsee ɔbaa kunafo biara, anaa egyankaba. 23Sɛ etseetsee hɔn ɔkwan biara mu, na wosu frɛ me dze a, otsie ara na mibetsie hɔn sufrɛ no; 24na m’ebufuw ano bɛyɛ dzen, na medze afona boku hom; na hom yernom bɛyɛ ekunafo na hom mba ayɛ ngyanka.
25 #
Lev 25.35-38; Deut 15.7-11; 23.19, 20 Sɛ efɛm me man mu ohianyi biara a ɔnye wo wɔ hɔ sika a, mma nnyɛ dɛ ɔpempensinyi; nkyii so mma hom nngye no nsiho. 26#Deut 24.10-13 Sɛ egye wo nyɛnko tam ahoba a, wi rotɔ no fa san ma no: 27osiandɛ ɔnoara nko nye n’akataho, no honam ho tam a: ebɛnadze na ɔmfa nda? Na ɔbɛba dɛ, sɛ osu frɛ me a, mibetsie: osiandɛ mbɔbɔrhufo nye me.
28 #
Ndwu 23.5
Mma nnyeyaw Nyankopɔn, anaa nndom wo man mu ɔpanyin. 29Mma nnkyinkyim dɛ edze wo ndɔbaa anaa wo nsa mu bi bɔbɔ afɔr. Wo mbabanyin mu abakan no fa ma me. 30Dɛmara na yɛ w’anantwi, na ɔnye wo nguan: nda esuon na ɔnye ne na ntsena; da a otsia awɔtwe no fa no brɛ me. 31#Lev 17.15 Na hom bɛyɛ nyimpa krɔnkrɔn ama me: dɛm ntsi mma hom nndzi bɔnam bi a abowa atsetsew mu wɔ haban mu; hom ntow nkyen mbɔdɔm.
ទើបបានជ្រើសរើសហើយ៖
Eksodɔs 22: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.