1 Makabhewu 16
16
Gupadwa ga Kendebhewu
1Khavbo avbo, Johane a di gwela khu Gezeri aya Jerusalema, aya embeledzela babe waye Simoni satshavbo si giredzedwego khu Kendebhewu. 2Khavbo avbo, Simoni a di ranisa sanana saye sa sivili nya vakoma, Johane ni Judha, a va embela, khuye:
“Eni gumogo ni vandriyangu ni nyumba ya vababe vangu, hi dwanide mayunga nya nyimbi ya Israyeli gukhugela wudzahani gwathu kala litshigu la muhuno. Hi dzi kodzide khu mandza yathu gu vbulugisa Israyeli gikhati nya gingi. 3Gasi olu, eni nyi gumbide, nari gu enu khu wuhigo wa Nungungulu, mu ngari ni tanga nya yadi. Tshikedzani wulanga wangu ni owu wa ndriyangu, indrani mu ya dwanela va na gyathu, giphaso gya ndzadzini gi na manege avbo gwanu.”
4Johane a di ramba gipimo nya magumavili magumi mazana (20.000) nya madzaha nya masotshwa ni vakhileli nya dzikavalu a guya ghova navo a dhumela Kendebhewu. Va diya ghova vbafuvbi ni Modhini. 5Va di wuga na wu gu khuga Wuronga, va gimbila panini, va wona masotshwa nya mangi ni vakhileli nya dzikavalu na va gu va tela. Mitsawa ya mivili nya vadwani nya nyimbi yi di hambaniswa basi khu gitsongwana. 6Johane a di sasamedzela masotshwa yaye mbeli ga nala, aholu, na wone gukhuye avo va ngu khala hwanga gu khisa tsongo, uye a di va thangela a phela khuye a ndraga tsongo, khavbo avbo, vatshavbo va di mu landrela. 7A di kabanisa vadwani nya nyimbi khu sipandre sivili, a gu vega vakhileli nya dzikavalu khu vbakari ni vbakari nya masotshwa ma gimbilago khu mawundru, kholu vakhileli nya dzikavalu ya valala va diri vangi ngudzu. 8Gu di wombwa mipundru. Kendebhewu ni vathu vaye va di padwa; nya vangi vawe va di songwa khu matshari, avo va nga vbulugago gu songwa, va di thavela likhokholani. 9Judha, ndruye wa Johane, bayisidwe, aholu Johane a di simama gu lundra nala kala Kedhroni, wulanga wu nga vbahedzwago khu Kendebhewu. 10Nya vangi va di thavela makhokholani ma vbahidwego marembweni ya Asidhodhi, aholu Johane a di ma rotha khu nilo, gufa tanga nya magumavili mazana (2.000) vama. Khu hwane nya ugo, Johane a di bwelela khu gurula tigoni ga Judheya.
Gufa ga Simoni
11Pitolomewu, mwamana wa Abhidhi, a di vegwa kha nga muthangeli wa panini ga Jeriko. A diri ni talo nya ndralama ni parata, 12Kholu a diri mwane wa khongolo nya muphasi nya mhamba. 13Monyo waye wu di gugumuga khu matshandza, a tedwa khu mapimo nya gu dzi gire mune nya litigo latshavbo. A di luga gikungo nya guriye Simoni ni sanana saye gasi gu va fuvisa mafuni.
14Khu ngima nya likhumi na moyo, a gu ngima nya Kebhati, nya mwaga nya lizana ni livbandre na mavili magumi ni livbandre na mivili (177), avbo uye a nga bani a gu gimbilagimbila madhoropani ya ndrani nya litigo a wonelela silo saye, Simoni a di relela Jeriko ni sanana saye, Matatiya ni Judha. 15Gyanana gya Abhidhi gi di va hakha khu monyo nyamba si wadi, likhokholani gu ranwago pwani Dhoki, a nga vbahago uye. A di va girela buzo nya wukhongolo ngudzu, aholu a di siha vama nya gikwata gyaye likhokholani. 16Avbo a nga wonago nya gukhuye Simoni ni sanana saye va sede va leva, Pitolomewu ni vama vale va di khuga, va ya dzega matshari yawe va gu bayisa Simoni, va mu songa nyumbani nya buzo, gumogo ni sanana saye sa sivili ni sithumi saye. 17Egi gikungo nya guvivbe ngudzu gi giridwego tigoni ga Israyeli, nya gulivbe wuwadi khu guvivba.
18Pitolomewu a di lovela lidangalila mufumeli gasi gu mu tivisa, ni gu mu lomba gukhuye a mu rumela masotshwa guta mu phasedza, afela gu ningela mandzani gwaye gipandrengulu nya litigo ni madhoropa yakone. 19A di rumela gambe myango Gezeri nya gukhuye va songe Johane; a embela vathangeli nya dzinyimbi gukhuye va dzi pate gwaye, kholu a na va ninga parata ni ndralama ni dzisagwati. 20Rumede gambe yimbe myango nya gukhuye va wandre Jerusalema ni gigomo nya guage. 21Aholu mwama moyo a di dziti a va hegudza gu vboha Gezeri aya tivisa Johane gukhuye babe waye songidwe gumogo ni vandriyaye, ni gukhuye Pitolomewu rumede vasongi gasi guta mu vbedza womi waye. 22Na pwide mahungu yaya, Johane a di tala khu likhulo, a di rumela gu mola vale va nga bani va tela guta mu songa, a gu va songa, kholu a di gu gi pima gwadi gikungo gyawe nya guvivbe. 23Simbe sigiro sa Johane, mayunga a dwanidego, sigiro a giridego khu tshivba nya gusamadzise, ni thumo nya guvbahedze mabhiyo, 24satshavbo soso si lovetedwe umo nya libhuku nya Matimo nya mwaga ni mwaga nya thumo waye nya wuphasi nya wukhongolo nya mhamba, gukhugela gikhati a khadego khongolo nya vaphasi nya mhamba, a tshikedza wulanga wa babe waye Simoni.
ទើបបានជ្រើសរើសហើយ៖
1 Makabhewu 16: BGG2014
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.