1 Makabhewu 15
15
Lidangalila la Antiyoko
1Antiyoko, mwamana wa mufumeli Dhemetriyo, nari sidwani sa Phwani, a di lovela lidangalila Simoni, muphasi nya mhamba ni muthangeli wa Vajudha#15:1 Antiyoko VII, ndruye wa Dhemetriyo II a di vbwetedzela mano khu wugengeli, gasi gu mana wupari ni gu phasedzwa khu Simoni. Aholu, gikhati a dzi pwidego na khadzisegide gwadi a tiya vbawufumutunu, a di vbindrugedza a wugela Simoni a dzi gira nala waye. ni vathu vatshavbo. 2Mahungu a nga lovago umo nya lidangalila khaya: “Eni mufumeli Antiyoko, nyi ngu lovela Simoni, khongolo nya vaphasi nya mhamba ni mufumeli wa vathu vatshavbo va Judheya. Gurula ni womi! 3Vama nya gukari nyambasi vadi va wandride wufumu wa vavelegi vangu, aholu eni nyi hungide gu wu dzega nyaluphye, kha nga idzo gu nga bani guri idzo khu gale. Nyi dongisede tsawa nya tshivba nya vadwani nya nyimbi, nyi rumide guvbahwa mataro nya nyimbi. 4Nya guvbweta gu bela tigoni gwangu gasi nyi ya phodza ga vatshavbo vale va nga li saselago, va gu mbembisa madhoropa nya mangi. 5Khu lidangalila leli, nya gu vbweta gu tiyisa gutshipiswa nya mikhupo yatshavbo, ni gu tiyisa siningwa satshavbo u ningidwego khu vafumeli nya lisine va nyi thangedego. 6Eni nyi ngu gu dzumedzisa gu khandra sikwangwangwa nya dzitsapawu dzi na thumiswago tigoni gwangu. 7Nya gu vbweta gukheni Jerusalema ni malanga nya guage ma khale malanga ma tshulegidego, ni makhokhola u ma vbahidego ma guromo mandzani gwago, ma vegise. 8Nya gu vbweta gukheni, gukhugela muhuno kala gupindruga, u tsetseledwa mangava yatshavbo u gu nawo ni aya u na bani uri nawo ga gikhwama nya thomba nya wufumeli. 9Gikhati hi na gu bani hi bede gufumani nya litigo lathu, hi na gu tadza khu wuzundzo nya wukhongolo ngudzu nya guvbindre owu, uwe ni vathu ni Nyumba ya Nungungulu, gasi wudhumo wanu wu pwale ndruma tigoni gwatshavbo.”
Antiyoko nya livbandre na wuvili (VII) a ngu dwana ni Trifoni
10Khu mwaga nya lizana ni livbandre na mavili magumi na mina (174), Antiyoko a di bela mufumoni ga vavelegi vaye, mitsawa yatshavbo nya vadwani nya nyimbi yi diya dzi pata gwaye. Vadugwana ngudzu avo va nga tshalago ni Trifoni. 11Oyu, a di tutumiswa a gu thavela nyumbani ga Dhori, vbafuvbi ni yiphwa, 12olu a di gu dziti gukhuye libango li diya na li gu mu manela ni gu wona nya gukhuye masotshwa yaye nya nyimbi ma mu thavide ma mu tshiya enga. 13Antiyoko a di ya randrela Dhori khu lizana ni magumavili magumi mazana (120.000) vama nya nyimbi ni livbandre na mararu magumi mazana (8.000) vakhileli nya dzikavalu. 14Va di randrela lidhoropa khu phwani ni mafuni, va hunga lirandrelo va li ramisa nyamba dzumedzisa muthu gu bela mwendro guduga khu dhoropani.
Guwusedza pwanano ni Varoma
15Khu gikhati gyogyo, Numeniyo a di wuya khu Roma ni malangalila ma lovedwego vafumeli ni mayigo, na gu ganedwa khu mahungu yaya:
16“Eni Lisiyo, muwoneleli nya mufumo wa Varoma, nyi ngu gu lovela uwe mufumeli Pitolomewu, nyi gu suvela womi ni gurula! 17Vama va nga rumedwago khu Simoni, Muphasi nya Khongolo nya mhamba ni vathu vaye vatshavbo va Judheya, kha nga dzipari ni vangana nya pwanano, va dzude ga ethu gasi guta wusedza wupari nya pwanano kha nga gale. 18Va hi resede gambe ni gitshangu nya ndralama nya likhumi mazana (1.000) dzimina nya gulemele. 19Khu kharato hi wonide nari gwadi gu lovela vafumeli ni mayigo gasi va si gireli guvivba Vajudha, va si va dwanisi khu dzinyimbi, va si dhumeli madhoropa yawe, mwendro litigo lawe, ni gu va si giri pwanano ni valala vawe. 20Hi gode gu hakha gitshangu nya ndralama va hi resedego. 21Va gu manega Vajudha nya gukari va duga va ta thavela iyo gwanu, va moleni mu ya va ningela ga Simoni, Khongolo nya vaphasi nya mhamba, gasi uye a va tsayise gupima khu nayo wawe.” 22Lidangalila la limwedo li rumedwe ga mufumeli Dhemetriyo, ni ga Atalo, ga Ariyarate, ga Arisase 23ni ga mayigo yatshavbo, ga Samipisamo, Vaesparita, Vadhelo, Vakarinaso, Varobhe, Vafaselidha, Vakhosi, Vasidhe, Varadho, Vagoritina, Vakinidho, Vakipro ni Vakireni. 24Lidangalila la limwedo, li di rumedwa ga Simoni, Muphasi nya Khongolo nya mhamba.
Antiyoko a ngu wugela Simoni
25Mufumeli Antiyoko a di hunga lirandrelo ga lidhoropa la Dhori, a gu vbaha sigiro nya gudwane khiso nyimbi, a gu randrela Trifoni nyamba mu dzumedzisa gu bela mwendro gu duga. 26Simoni a di rumela magumavili mazana (2.000) vama nya guhathedwe, ni parata, ni ndralama ni matshari nya mangi gasi guya patana naye va dwana. 27Aholu mufumeli Antiyoko kha dzumela gu hakha gilo, gambe a di bwelela hwane ga situmbiso satshavbo a nga bani a hungide ni Simoni guhegula. A di vbindrugedza a dzi gira nala. 28A di rumela pari yaye Antenobhiyo ga Simoni, guya mu embela magana yaya: “U wandride madhoropa ya Dzope ni Gezeri, ma lumbago mufumo wangu, bwelo khavbo u wandra gambe ni likhokhola la Jerusalema. 29U sasede litigo u li pfhungumulela bwelo khavbo u dzega dzindranga nyambana tengo mufumoni gwangu. 30Olu, hatha gimwegyo, gu nyi bweledzela madhoropa u dzegidego, ni gu livba mikhupo nya sipandre u si gundrelago vbavbandze nya mivbingano ya Judheya, 31mwendro gu livba livbandre magumi mazana (5.000) dzitaleta khu madhoropa yale, ni dzimbe livbandre magumi (50) dzitaleta gasi gu livba esi si ghohekedego ni mikhupo nya madhoropa. Mwa gu wo, hi na dwana litunga nanu.”
32Antenobhiyo, pari ya mufumeli a di vboha Jerusalema, na wonide wuzundzo va girelago Simoni ni sombo nya wuzundzo va reselago umo guhodza vbamezatunu gwaye, sikombe nya ndralama ni parata, na wone gambe ni nyumba yaye nya wufumu, a di liwuga ngudzu, a di embeledzela Simoni magana ya mufumeli. 33Simoni a di hakha, khuye: “Ethu khandri hi di wandra mayigo ya valombo,#15:33 Khandri hi di wandra litigo nya valombo: Avba mulovi a gu vhikela dzifanelo dza va na Israyeli na gu alakanya matimo ya gale Eks 23:31 Dhet 11:24; a gu tiya khu mivbingano nya mufumo yi nga vegwago khu mufumeli Dhavhidhe, a nga dandrisago ngudzu litigo nya Vajudha. mwendro gipeto gi si hi lumbigo; aholu hi di dzega basi dzithomba dza vababe vathu, dzi nga bani dzi gundredwe gikhati nya gukari, nyambana fanelo khu valala vathu. 34Gi di vboha gikhati nya guhengule dzithomba dza vababe vathu. 35Gasi khu mahungu ya Dzope ni Gezeri u ma hengulago, madhoropa ma giridego guvivba nya gukhongolo ngudzu ga vathu nya lifumbu lathu, ma nga saselago gipandrengulu nya litigo, ambari ulo ethu hi dzi emisede gu livba lizana dzitaleta khu ayo.” 36Antenobhiyo kha mu hakha gilo, aholu a di bwelela ga mufumeli na gorogide ngudzu, a di ya mu embeledzela magana ya Simoni, a gu mu tivisa gambe wuzundzo waye ni satshavbo a nga si wonago, avbo mufumeli a nga goroga ngudzu a gira likhulo.
Antiyoko a ngu rumela Kendebhewu guya dhumela Vajudha
37Khu matshigu yoyo, Trifoni a di thava khu ngalava a gu hongola dhoropani ga Horitosiya. 38Mufumeli a di emisa Kendebhewu kha nga mwamangulu nya gipandre gya bambe ni yipwa, a mu ninga gu gu khala muthangeli nya masotshwa ni vakhileli nya dzikavalu. 39A di mu ruma guya ghova mbeli nya litigo la Judheya ni guya vbahedza likhokhola la Kedhironi, gu tiyisa malimba, ni guphela gu dwana litunga ni vathu va Judha. Gasi mufumeli, a di simama gulundra Trifoni. 40Kendebhewu a di hongola Jaminiya aya phela gu garadza Vajudha, a dhumela litigo la Judheya, a gu mola vathu a va gira sibotshwa, a va ningela va songwa. 41Uye a di vbahedza Kedhironi a gu vega avbo vakhileli nya dzikavalu ni masotshwa, gasi gu khuga khavbo va dhumela Judheya, kha nga idzo a nga laywago khidzo khu mufumeli.
ទើបបានជ្រើសរើសហើយ៖
1 Makabhewu 15: BGG2014
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.