ZABUR 65
65
Nyanyian syukur lantaran berkah ALLAH
1Umaq pemimpin kor. Zabur Daud. Nyanyian.
2Kaji pade patut memuji Deside léq Sion, ya Allah
dait bayah sesangi kaji pade léq Deside.
3Séngaq Deside saq ngabulang do'e;
selapuq dengan parek ojok Deside séngaq sampun bedose.
4Dose-dose kaji berat gati léq kaji,
laguq Deside ngampunin selapuqne.
5Bahagie dengan saq Deside piléq,
dait Deside manikang jari ndot léq Gedéng Deside.
Kaji pade gen tepuasang siq selapuq saq solah
léq Gedéng Deside, taoq Deside meneng saq suci.
6Deside jawab kaji pade siq ngicanin kaji pade kemenangan,
Deside piaq hal-hal ajaip jari nyelametang kaji pade!
Deside harepan selapuq bangse
jangke dateng segare saq jaoq.
7Siq kekuatan Deside, Deside anjengang gunung-gunung,
jari nyatayang kuase Deside saq perkase.
8Deside engkahang umbak saq ngamuk dait saq beléq gati suarene,
dait Deside piaq tenang keributan léq tengaq bangse-bangse.
9Selapuq penduduk gumi takut dait hormat
serioq karye-karye Deside saq hébat.
Seantéro gumi
Deside piaq besurak cemoh.
10Tanaq nike Deside peliharaq dait Deside turunang ujan,
Deside jariang subur jangke hasilne belimpah-limpah.
Kokoq-kokoq Deside penoqang siq aiq,
Deside sedieang ie pade gandum,
tetu, maraq nike Deside nyedieang ie.
11Deside peraiq tanaq onos tenggaleanne
dait Deside basaqang bungkulan-bungkulan tanaqne.
Deside bélékang tanaqne siq ujan,
dait Deside jamin bahwe suli-suline gen tiwoq subur.
12Lantaran kesolahan Deside, sebilang taun Deside sedieang hasil tanaq;
léq mbé Deside rauh, léq derike araq hasil saq berlimpah-limpah.
13Padang gurun penoq siq bémbéq dait dombe,
selapuq bukitne besukecite.
14Lendang-lendang pupaq besimbut siq dombe,
tembéréng-tembéréng gunung penoq siq gandum.
Selapuqne besurak dait benyanyi siq cemohne.
ទើបបានជ្រើសរើសហើយ៖
ZABUR 65: LAISAS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល