Utu 30
30
1Laheli peaweni amuvelekili lepi Yakobo vana, akamuwonela wihu mulongo waki, ndi akamjovela Yakobo, “Nipela na nene vana, ngati lepi nifwa.”
2Yakobo akamuyomela Laheli, akamjovela, “Wu, nene ndi na Chapanga, mweakudivalili ndumbu na chiveleku?”
3Laheli akamjovela, “Apa avii Biliha mvanda wangu, gonekanayi naku ndi nene nipata uveleku kwa mwenuyo.” 4Penapo Laheli akampela Yakobo Biliha avyayi mdala waki, ndi Yakobo akagonekana naku. 5Kangi Biliha akavya na ndumbu, ndi akamuvelekela Yakobo mwana mgosi. 6Laheli akajova, “Chapanga anihengili lipyana, ayuwini kuvemba kwangu na anipelili mwana wa chigosi.” Ndi akamkemela mwana mwenuyo lihina laki Dani. 7Biliha, mvanda wa Laheli akavya na ndumbu kavili, akamuvelekela Yakobo mwana yungi wa chigosi. 8Penapo Laheli akajova, “Nibunini ngwala na mlumbu wangu na nene nihotwili.” Ndi mwana mwenuyo akamkemela Nafutali.
9Lea peaweni akotwiki kuveleka vana, ndi akamutola Zilipa mvanda waki akampela Yakobo avyayi mdala waki. 10Zilipa akamvelekela Yakobo mwana wa chigosi. 11Lea akajova, “Hinu mambu ganihambili bwina.” Akamkemela lihina laki Gadi. 12Zilipa mvanda wa Lea akamvelekela Yakobo mwana wa pili wa chigosi. 13Lea akajova, “Nivi na luheku neju, hinu vadala voha yati vakunikemela luheku.” Ndi akamkemela lihina laki Asheli.
14Lukumbi lwa mabenu ga nganu, Leubeni akahamba kumugunda akakolela mkongo wula mikiga yaki vadala vilya muni vapata ndumbu, ndi akazitola akamupelekela Lea nyina waki. Laheli akamjovela Lea, “Chondi nikuyupa unipele na nene mikiga ya mwana waku.”
15Nambu Lea akayangula cha ligoga, “Wu, wiholalela chindu chidebe veve kuninyaga mngwana wangu, na hinu wigana kutola na mikiga ya kunihotasa kuvya na ndumbu yila yeanipeli mwana wangu?”
Laheli akayangula, “Ngati unipelili mikiga ya mwana waku, uhotola kugona na Yakobo kilu ya lelu.”
16Lilanga pelatipamayi Yakobo awuyayi kuhuma kumugunda, Lea akahamba kumukumbatila, akamjovela, “Lelu uganikiwa ugona pamonga na nene, muni nikulipili kwa mikiga ya kunihotosa kuvya na ndumbu ya mwana wangu.” Ndi Yakobo akagona nayu kilu yeniyo.
17Chapanga akayuwana kuyupa kwa Lea, Lea akavya na ndumbu akavelekela Yakobo mwana mgosi wa mhanu. 18Lea akajova, “Chapanga anipelili njombi muni namupelili mgosi wangu mvanda wangu.” Ndi akamkemela lihina laki Isakali. 19Lea akavya na ndumbu kavili, akamuvelekela Yakobo mwana wa sita wa chigosi. 20Ndi Lea akajova, “Chapanga anipeli njombi yivaha neju. Lukumbi ulu mngana wangu yati akunihengela kwa utopesa ndava muni nimuvelekili vana sita wa vagosi.” Ndi akamkemela lihina laki Zabuloni. 21Mwanakandahi akaveleka mwana mdala, ndi akamkemela Dina.
22Kangi Chapanga akamkumbuka Laheli akayamyngula kuyupa kwaki, na akamdindula lutumbu lwaki na kamkita kuveleka. 23Akavya na ndumbu, akaveleka mwana wa chigosi, akajova, “Chapanga aniwusili soni yangu. 24Akamkemela lihina laki Yosefu.” Akajova Bambu aniyonjokesa mwana yungi wa chigosi.
Mifuya ya Yakobo yiyongeseka
25Laheli peamalili kumveleka Yosefu, ndi Yakobo akamjovela Labani, “Niyupa niwuyayi kunyumba, kumulima wangu. 26Nipela vadala vangu na vana vangu, venigotwili ndava kukuhengela niwuka navu, umanyi namuna yoki chenikuhengili.”
27Labani akamjovela, “Niyupa na nene nijove nimanyili kwa njila ya ulondola kuvya Bambu Chapanga animotisi ndava ya veve. 28Luwula luhuna lwewigana yati nikupele.”
29Yakobo akamyangula, “Wamwene umanyili chenakuhengili, na namuna mifuya yaku cheyayonjosiki mumawoko gangu. 30Muni kwakona nangabwela wavii na vindu videbe ndu, nambu tangiya nibwelili kwaku vindu vyaku viyonjosiki neju, Bambu akumotisi kila kwenahambili. Hinu mambu ga munyumba yangu namwene cha nikite ndali?”
31Labani akamkota, “Nikupela kyani?” Yakobo akamyangula, “Kotoka kunipela chochoha. Yati niyendelela kudima mifuya yaku ngati ndu unikitili chenigana. 32Niyidakila lelu nipitayi mumisambi yaku yoha ya mifuya, mumisambi nitola mambelele goha gegana mabala na madonyo, na mambelele goha gatitu goha kuhuma mumambelele genago, na mene yehina mabaka na madonyo. Lwenulo ndi cha luvye luhuna lwangu. 33Penapo ndi cha uuwone usadikika wangu magono gegibwela, peubwelayi kulola luhuna lwangu, mene yoyoha yangali mabaka amala madonyo, amala mambelele gangavya gatitu vikawonekanayi mumisambi yangu ndi yati umanya kuvya viyiviwi.”
34Labani akajova, “Chabwina! Yivyayi ngati cheujovili.” 35Nambu muligono lilolo Labani akahamba kuwusa mambelele gagosi goha gegana mabaka na madonyo na mbuguma zoha zezivi na mabaka na madonyo. Mewawa na kila hinyama vyevyavili na madonyo gamusopi, na mambelele goha gatitu, akavapela vana vaki vadima. 36Kangi Labani akajivagula patali na Yakobo lugendu lwa magono gadatu, ndi Yakobo akayendelela kudima mifuya ya Labani yeyasigalili.
37Yakobo akatola mambanda yivisi ga mikongo yeyikemiwa mlubina na mlozi na mwalamoni, akaziwusa mabasi, misitali yamusopi yiwonekanayi mumambanda geniyo. 38Mambanda genago akagayimika palongolo ya mifuya mu chindu cha kunywehela mifuya, pandu pepavii ndava ya mifuya kubwela kunywa manji. Muni mifuya yakwelini na kupata mgegu peyabwelili kunywa manji. 39Hinyama yikapata mgegu palongolo ya ndonga zenizo vakababa hinyama yeyivi na mabaka na madonyo.
40Mewa Yakobo akavagula mambelele gawana gene, akagakita galolesanayi pamihu na gala ga Labani gegavii gatitu na gegana mabaka na madonyo. Ahihangisini lepi na mifuya ya Labani ndi Yakobo apatili mifuya yaki mwene.
41Yikavya kila lukumbi lwa hinyama hyehikulupalili pehihamula, ndi Yakobo avikili mambanda genago palongolo ya vindu vya kunywihila manji muni hinyama yipata mgegu pa mambanda genago. 42Nambu avikili lepi mambanda genago palongolo ya mifuya yanga kulupala, ndi lukumbi luhupi ndu mifuya yehikulupalili hikavya ya Yakobo na yangakulupala hikavya ya Labani. 43Kwa njila yeniyo ndi Yakobo akavya na vindu yvamahele neju, mifuya yamahele na vavanda va chidala na vachigosi, na ngamiya na mapunda.
ទើបបានជ្រើសរើសហើយ៖
Utu 30: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.