Utu 29
29
Yakobo ihika kunyumba ya Labani
1Yakobo akayendelela na lugengu lwaki na akahika kumilima ya vandu va kwelihumila lilanga. 2Kwenuko kumtambu wa dasi akachiwona chiliva, pamuhana waki gavii mambelele misambi yidatu gagonili. Gavii ganywiswayi muchiliva chechagubikwi kwa liganga livaha. 3Misambi yoha ya mambelele pegikonganeka penapo, vadimaji vakulibilingusa liganga lenilo liwuka pamulomo wa chiliva na kunyweha mambelele. Vakamalayi vakuliwuyisa kangi pamulomo wa chiliva.
4Yakobo akavakota vadimaji, “Mwavankozi vangu, nyenye mwavandu va koki?”
Vakayangula, “Tete tavandu va ku Halani?”
5Akavakota, “Mumumanyili Labani, mjukulu wa Naholi?”
Vakayangula, “Ena, timumanyili.”
6Kangi Yakobo akavakota, “Wu, Labani ayimwiki bwina?”
Vakamyangula, “Avi bwina, hati msikana waki yula ibwela Laheli na mambelele.”
7Yakobo akavajovela, “Hinu kwakona muhi, lukumbi lepi lwa kuvika mambelele pamonga, muganywihayi manji na muhambayi kugadima.”
8Vakayangula, “Tihotola lepi, mbaka misambi yoha ya mambelele gakonganekayi ndi tibilindusa liganga na tinywisa.”
9Yakobo peavii akona ilongela na venavo, akahika Laheli alongwisi mambelele ga dadi waki, muni avii mdimaji. 10Yakobo peamuweni Laheli msikana wa mjomba waki Labani, na mambelele ga Labani, akahamba kuliwusa liganga pachiliva pala, akaganywiha mambelele ga mjomba waki. 11Yakobo akamkumbatila Laheli, akatumbula kuvemba kwa lwami. 12Yakobo akamjovela Laheli kuvya mwene ndi mjomba wa dadi waki na mewa ndi mwana wa Lebeka, penapo Laheli akajumba kunyumba kumjovela dadi waki mambu genago.
13Bahapo Labani peayuwini mambu ga Yakobo, msengesana waki, akayumbatika kumpokela akamukumbatila cha uganu akamukalibisa kunyumba yaki. Kangi Yakobo akamukokosela Labani mambu goha gegahumalili. 14Labani akajova, “Veve ndi mlongo wangu ngasi yimonga na nene.” Yakobo akatama naku kwa lukumbi lwa mwehi woha.
Yakobo igega vasikana va Labani
15Ligono limonga Labani akamjovela Yakobo, “Veve wamulongo wangu njwee, yiganikiwa lepi unihengela waka, jovayi ugana nikupela luhuna lwoki?” 16Labani avii na vasikana vavili, muvaha ikemelewa Lea, na mudebe lihina laki Laheli. 17Lea mihu gaki galembukayi, nambu Laheli avii mbwina wa higa na anyambili bwina.
18Yakobo amuganili Laheli, ndi akajova, “Yati nikuhengela kwa miyaka saba, luhuna lwangu ndi unigegesa Laheli mwana waku mudebe.”
19Labani akajova, “Mbanga Laheli nikupe veve, kuliku kuvapela vangi yendelela kutama penapa na nene.” 20Penapo Yakobo akamuhengela Labani miyaka saba ndava ya kumupata Laheli, nambu kwaki miyaka yeniyo akayiwona ngati magono gadebe ndu ndava cheamuganili Laheli.
21Kangi Yakobo akamjovela Labani, “Nipela mdala wangu muni nihotola kumgega, ndava miyaka yangu yimaliki.” 22Ndi Labani akavagongolela vandu voha va pandu pala na akakita mselebuko wa mtimbu. 23Nambu peyavii kilu Labani akamutola Lea msikana waki muvaha, akamuleta kwa Yakobo, na Yakobo akagona nayu. 24Labani akamutola Zilipa mvanda waki wa chidala, akampela Lea avyayi mvanda waki. 25Pelwahikili lukela Yakobo akamanya kumbi apewi Lea! Ndi akamkota Labani, “Ndava kyani unikitili naha? Wu, nakuhengili lepi ndava ya kumgega Laheli? Hinu ndava kyani unikongili?”
26Labani akamyangula, “Mvelu witu lepi tete kumugegesa mudebe na kumleka mvaha, titumbula mvaha. 27Mala hoti magono saba ga ndowa ya Lea, ndi na tete yati tikupela miyaka hingi saba ndava ya kumgega Laheli.”
28Yakobo akayidakila, akavya mumutimbu na Lea magono saba. Ndi Labani akampela Laheli avya mdala waki. 29Labani akamutola Biliha mtumisi waki wa chidala akampela Laheli avya mtumisi waki. 30Mewa Yakobo akagona na Laheli, akamugana neju Laheli kuliku Lea, akamuhengela Labani miyaka yingi saba.
Vana va Yakobo
31Bambu Chapanga peaweni kuvya Yakobo amganili lepi Lea ndi akamukita aveleka vana, nambu Laheli akavya ngaveleka. 32Lea akavya na ndumbu, akaveleka mwana wa chigosi, ndi akamkemela Leubeni muni ajovi, “Hinu Bambu Chapanga agaweni mang'aiso gangu, hinu mngana wangu yati anigane.” 33Lea akavya na ndumbu yingi ndi akaveleka mwana wa chigosi, akamkemela Simeoni, akajova, “Bambu Chapanga anigotolili kavili mwana wa chigosi ndava ayuwini kuvya niganwa lepi.” 34Akavya kangi na ndumbu, akaveleka mwana wa chigosi akamukemela Lawi, ndi akajova, “Hinu mngana wangu yati ivya pamonga na nene, ndava nimuvelekili vana vadatu va chigosi.” 35Lea akavya na ndumbu kavili, akaveleka mwana wa chigosi, akamkemela Yuda, akajova, “Lukumbi ulu yati nikumulumba Bambu Chapanga.” Kangi Lea akaleka kuveleka vana.
ទើបបានជ្រើសរើសហើយ៖
Utu 29: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.