लुका 11
11
ईसु चेला ने वीन्ती करवा ह़ीकाड़े
(मत्ती 6:9-13; 7:7-11)
1अने एक कावा ईसु वीन्ती करवा ना जागा पोर वीन्ती करवा बाज र्यो हतो: अने जत्यार तीहयो वीन्ती करीन नवराय ज्यो, ता तीना चेला मे नो एक जणो केदो, “ए मालीक ईसु! जेम बपतीस्मा आपण्यो युहन्नो आह़फा ना चेला ने वीन्ती करवा ह़ीकाड़्यो। तेम तु बी आमने वीन्ती करवा ह़ीकाड़ दे।”
2ईसु चेला ने केदो, “जत्यार तमु वीन्ती करे, ता आसम वीन्ती करजो: ए भगवान बाह! तारु नाम चोखलु मनाये। तारु राज आवे। 3दाड़ीन, आमने जोवे तेतरु खाणु आप्या कर। 4अने जेम आमु अमारा वीरोद मे पाप करन्या ने माफी आपला से, तेमेत तु आमने बी माफी आप; अने अमारी पारख ना करे।”
5ईसु तीमने अगो केतो ज्यो, “मान लेवो, कदीम तमारी माय्न कोयनो एक ह़ाते वाळो दोस्तीदार हय, अने तु तीनीन्तां आदी राते जाय्न केही, ‘दोस्तीदार, गीण करीन मने तीन रोट्ला आप दे। 6काहाके मारो एक दोस्तीदार घण नाम्बे गेथो पोरणो हमणेत आवलो से, तीने खवाड़वा जुगु मारी पांह कंय बी खाणु नी हय।’ 7अने ह़ाते वाळो दोस्तीदार घोर मे रीन जपाप आपे, ‘मने वेला ना पाड़े। झापलु देदलु घणी वार हय जेली से, अने मे अने मारा सोरा खाटला पोर ह़ुय र्या। एतरे मे उठीन रोट्ला नी आप्तो।’” 8ईसु अळी केदो, “मे तमने केम के, दोस्तीदार ना नाते नी, पण टीणे पड़ र्यो, करीन तीहयो तने आखरी मे उठीन आपहे, जे तु मांग र्यो।”
9एतरे मे तमने केम, भगवान पांह कंय बी मांगहु ता तीहयो तमने आपहे। अने ह़ोदो ता तमने जड़हे, झापलु ठोके ता तमारी जुगु झापलु उगाड़हे। 10काहाके जे कोय मांगे, तीने आपहे; अने जे ह़ोदतो हय तीने जड़हे; अने जे कोय बी झापलु ठोके ता तीनी जुगु झापलु उगाड़हे। 11“मान लेवो, तमु एक बाह से अने तमारो सोरो तमारी पांह माछला मांगे, ता तमु तीने गड़हो आपह़ु? 12कदीम तीहयो तमारी पांह ईन्डु मांगे, ता ह़ु तमु तीने वीसो आपह़ु? 13कदीम तमु कुहर्या हय्न बी तमारा सोरा ने वारली चीज आपवा जाणो, ता ह़रग नो भगवान बाह मांगवा वाळा ने चोखली आत्मा काहा नी आपे।”
ईसु अने डखी भुतड़ो बालजबुल
(मत्ती 12:22-30; मरकुस 3:20-27)
14भुत नी वजह सी तीहयो माणेह बोल नी सक्यो, ईसु माणेह मे गेथो भुत ने नीकाळ्यो: अने तीहयु माणेह मे गेथो भुत नीकळतेत बोलवा बाज ज्यु अने आखा देखण्या एक-बीजा भणी भाळता जाय्न वहराय ज्या। 15#मत्ती 9:34; 10:25पण तीमनी माय्न थोड़ाक माणहु केदा, “आहयो ते मुखी भुतड़ा बालजबुल नी लारे भुत ने माणहु मे गेथो नीकाळे।”
16 #
मत्ती 12:38; 16:1; मरकुस 8:11 थोड़ाक माणहु ईसु ने पारखवा करीन भगवान भणी गेथी एक सेलाणी मांग्या। 17पण तीमना मन नो वीच्यार जाणीन ईसु तीमने केदो, “जे राज मे बेरजाव पड़ जाय, तीहयु राज टेके नी, अने उजड़ी जाय, अने जे घोर मे झगड़ो हय जाय, तीहयु घोर ना माणहु खुट जाय।” 18कदीम बालजबुल आह़फा नो वीरोद करवा बाज जाय, ता भुतड़ा नु राज कीकम टेकलु रेहे? जरीक सोचो, काहाके तमु मारा बारा मे आहयु ह़ु की र्या के तु भुतड़ा ना लारे भुत ने नीकाळ र्यो। 19कदीम मे बालजबुल ना लारे भुत ने नीकाळु, ता तमारा सोरा कोयना लारे भुत ने नीकाळे? एतरे तीहयात तमारो हीसाब लीन तमारो नीयाव करहे। 20पण कदीम मे भगवान नी ज्योरे भुत ने नीकाळु, ता तमु हाव आहयु जाण लेवो के भगवान नु राज तमारी वच मे आय लागलु से।
21जत्यार जोर वाळु माणेह कानु बी हत्यार हात मे लीन आह़फा ना घोर नी रखवाळी करे, ता तीना माल-धन ने चोट्टा नी ली जाय, अने तीनु आखु माल-धन बचलु रेय। 22बाखीन कदीम कोय तीनी गेथो बी जादा जोर वाळो माणेह तीनीन्तां आवीन झुमाय्न तीने जीक लेय, अने जोर वाळा माणेह पांह गेथो, तीहयु आखु हत्यार हापकी लेय, जे हत्यार पोर तीहयो भरहो करतो हतो, अने तीनु माल-धन लुटीन बीजा माणहु ने वाट देय।
23 #
मरकुस 9:40
“जे मारी ह़ाते नी हय, तीहयो मारा वीरोद मे से अने जे मारी ह़ाते भगवान गेथा सेटा हयला माणहु ने भेळा नी करे, तीहयो तीमने रीवण्या-तीवण्या कर र्यो।”
भुत माणहु मे पासो आवे
(मत्ती 12:43-45)
24“जत्यार वीटळ्ळी आत्मा माणेह मे गेथी नीकळी जाय, ता तीहयी अराम करवा करीन, ह़ुकला जागा मे, जागो ह़ोदती रेय, अने जत्यार अराम करवा नो जागो नी जड़े ता तीहयी केय के ‘मे मारा तीहयात घोर मे पासी जत रेही, जा गेथी नीकळीन आवली से।’ 25अने तीहयी वीटळ्ळी आत्मा पासी आवीन भाळे ता तीहयु घोर झाटकीन बारलु अने घटाळ्ळु करलु देखाव पड़े। 26ता तीहयी वीटळ्ळी आत्मा पासी जत रेय अने जाय्न तीनी ह़ाते बीजी ह़ात कुहर्याण वीटळ्ळी आत्मा ने बी ली आवे। अने तीहया माणेह मे आवीन बह जाय, ता तीहयो माणेह पेले गेथो बी जादा गंडवाय्न बगड़ी जाय।”
खरलो सुख
27ईसु आहयी वात केवात बाज र्यो हतो, तत्यार गड़दी मे कानी बयर ईसुन्तां आवीन मोटेत केवा बाज जी, “जुगाळु से तीहयु गरब, जीनी मे तु र्यो, अने जुगाळा से, जे धाया, जीमने तु धायो!”
28पण ईसु तीहयी बयर ने केदो, “होव, बाखीन जुगाळा से तीहया, जे भगवान ना बोल ह़मळे अने माने।”
भगवान भणी गेथी सेलाणी नी मांग
(मत्ती 12:38-42)
29 #
मत्ती 16:4; मरकुस 8:12 जेमेत तीनी च्यारो-मेर घणा माणहु भेळा हय ज्या, तत्यार ईसु केवा बाज ज्यो, “आहयी पीड़ी ना माणहु पापी से; आहया एक सेलाणी ह़ोद र्या, पण भगवान वगे गेथा बोलन्या योना नी सेलाणी ने सोड़ीन आमने कानी बी सेलाणी नी जड़े।” 30जीसम योना नीनवे ह़ेर मे रेण्या माणहु जुगु एक सेलाणी बण जेलो हतो। तेमेत मनख्या नो सोरो बी आहयी पीड़ी ना माणहु जुगु एक सेलाणी बण जहे। 31नीयाव ना दाड़े दखवरा मुलक नी राणी आहयी पीड़ी ना माणहु भेळती जीव उठह़े अने ईमने गुनेगार ठेरावहे, काहाके तीहयी सुलेमान नी अक्कल भरली वात ह़मळवा करीन धरती नी काकड़ पोर गेथी आवली हती, अने ह़मळो! आंया ते अक्कल मे सुलेमान गेथो बी घणो मोटो से। 32नीयाव ना दाड़े नीनवे ह़ेर ना माणहु आहयी पीड़ी ना माणहु भेळे जीव उठह़े अने आहया माणहु ने गुनाळ्ळा ठेरावहे, तीहया योना नु परच्यार ह़मळीन, पाप करवा सोड़ देदा, अने देखो! आंया ह़ारीक ते योना गेथो बी घण मोटो भगवान नी वात ह़मळावण्यो से!
डील नो दीवो
(मत्ती 5:15; 6:22-23)
33 #
मत्ती 5:15; मरकुस 4:21; लुका 8:16 “कोय बी माणेह दीवो धपाड़ीन ह़ताड़ीन नी मेले, अने कांगणी तळे नी मेले पण दीवा ने दीवलाय पोर मेले, आनी करते के घोर मे आव्वा-जवा वाळा ने वीजाळु जड़े अने वारु देखाये। 34तमारा आखा ना डील नो दीवो तमारा डोळा से। एतरे तमारा डोळा वारु देखे ता तमारु आखु डील बी चोखुझण देखाये पण जत्यार तमारा डोळात वारु नी देखे ता तमारु डील बी अंदारला मेत से। 35एतरे मे तमने केम, चेतीन रेवो जे वीजाळु तमारी मे से, तीहयु अंदारु नी हय जाय। 36कदीम तमारु आखु डील वीजाळा मे रेय अने तीनो कानो बी वाटो अंदारला मे नी रेय, ता तीहयु आखु डील वीजाळु भरलु रेहे, जेम कानो दीवो पपळीन आह़फा ना कीराणा सोड़ीन आखे बीजे वीजाळुत-वीजाळु कर देय।”
ईसु एक फरीसीन तां खाणु खाय
(मत्ती 23:1-36; मरकुस 12:38-40)
37जत्यार ईसु वात करवा नवराय ज्यो, ता कानो फरीसी माणेह वीन्ती कर्यो, “मारीन्तां खाणु खावा चाल” अने ईसु तीनी ह़ाते घोर मे जीन खाणु खावा बह्यो। 38ईसु युहदी माणहु नी रीतीन तेम हात धोवीन खावा नी बह्यो, करीन तीहयो फरीसी माणेह वहराय ज्यो अने तीने वारु नी लाग्यु। 39मालीक ईसु तीहया फरीसी माणेह ने केदो, “तमु थाळी अने वाटकी ने उपर गेथा वारु उजाळो, पण तमारा मन मे लालच अने कुहराय भरायली से। 40ए वण-अकल्या माणहु! जे भगवान बारथु नु डील बणायो, तीहयो मोय वाळु मन नी बणायो ह़ु। 41जे कंय तमारी पांह से तीहयु गरीब ने आप देवो, अने देखो! आखु कंय तमारी जुगु चोखुझण हय जहे।”
42“पण फरीसी माणहु! तमारी पोर गरा आय पड़े! काहाके तमु पुदीना नी अने सुदाब नाम नी जड़ी-बुटी नो दसवो वाटो ते आपो, अने भात-भातीन दसवो वाटो बी आपो, पण भगवान ना नीयाव अने मोंग ने टाळ देत्ला: तमने ते आहया बे काम करता रेवा हतु अने कानी बी वात ने नी टाळवु हतु।”
43“ए फरीसी माणहु! तमारी पोर गरा आय पड़वा जोवे! काहाके तमने भगवान ना भक्ती ना घोर मे बहवा करीन खास गादी जोवे अने हाट मे वारु से के? करीन पुसण्या जोवे। 44तमारी पोर गरा आय पड़वा जोवे! काहाके तमु तीहया मड़ाट्यान तेवा से, जे देखाव नी पड़े, अने तीहया मड़ाट्या पोर माणहु हींडे-फीरे पण तीमने पतो नी चाले के आञे मड़ाट्यु से।”
45आहयु ह़मळीन युहदी-धरम नो मास्तर, ईसु ने केदो, “मास्तर! तु आसवी वात कीन अमारु नामबद्दी कर र्यो।”
46ईसु केदो, ए युहदी-धरम ना कायदा ना मास्तर्या! तमारी पोर गरा आय पड़वा जोवे! काहाके तमु माणहु पोर कायदो पाळवा नो भार नाख देवो अने तीमने भारलु उचलाड़े पण उचलवा करीन आह़फाम नी आंगळी जरीक बी नी टेकवे। 47तमारी पोर गरा आय पड़वा जोवे! काहाके जे, भगवान वगे गेथा केण्या माणहु ने तमरात डाह-डाहा मार देदला। अने तमु तीमना मड़ाट्या बांदे, 48एतरे तमु आहयी वात ना गवा से, अने आह़फाम ना पेल्ना डाह-डाहा ना एवात काम सी राजी से; काहाके तीहया ते तीमने मार नाख्या अने तमु तीमना मड़ाट्या बणावे। 49“एतरे भगवान नी अक्कल बी केय, मे आमनीन्तां भगवान वगे गेथा केण्या माणहु ने अने मार नेवताळा ने मोकलही; अने आहया तीमनी माय्न ढेरेत ने मार देहे, अने ढेरेत ने वेला पाड़हे। 50एतरे कळजुग नी सुरु गेथा जेतरा बी भगवान वगे गेथी वात केण्या माणहु ने मारीन लोय वयाड़ला से, तीमना आखा ना लोय नो हीसाब आहयी पीड़ी ना मनख्या ने आपवा पड़हे। 51हाबील ना लोय नो अने जकर्याह ना लोय नो हीसाब बी आपवा पड़हे, जे जकर्याह ने तीहया वेदी अने भगवान ना मंदीर नी वच मे चोखला जागा मे मारला हता, तीमनो हीसाब बी आहयी पीड़ी ना माणहु ने आपवा पड़हे।
52“ए युहदी-धरम ना कायदा ना मास्तर! तमारी पोर गरा आय पड़वा जोवे! काहाके तमु भगवान नी अक्कल नी कुची ते ली र्या बाखीन तमु आह़फा बी भगवान नी अक्कल हात नी कर्या अने जे भगवान नी अक्कल हात करवा नी हेर करे तीमने बी अक्कल हात नी करवा देदा।”
53जत्यार ईसु तीहया घोर मे गेथो नीकळ्यो ता युहदी-धरम ह़ीकाड़न्या अने फरीसी पंथवाळा रीहवाय्न ईसु पसळ पड़ ज्या अने ढेरेत वात पुसीन वेला पाड़वा बाज ज्या। 54अने तीहया ईसुन वाक काडे एवी कानीन कानी वात मे गुनो लगाड़ीन चुकाड़वान मोखो ह़ोदवा बाज ज्या।
ទើបបានជ្រើសរើសហើយ៖
लुका 11: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
