लुका 10
10
ईसु सत्तर ने बे चेला ने मोकले
1आहयी वात नी अळतेण मालीक ईसु बीजा बोहोत्तर चेला टाळ्यो अने जे ह़ेर अने गाम मे तीहयो जवा वाळो हतो, तां बे-बे जणा ने आह़फा नी अगळ मोकल्यो। 2#मत्ती 9:37,38अने तीहयो तीमने केदो, “मेर ते घणी से, पण दाड़क्या थोड़ाक से।” एतरे मेर ना मालीक भगवान सी वीन्ती करो के तीहयो आह़फा नी मेर वाडवा करीन दाड़क्या मोकल देय। 3#मत्ती 10:16मे तमने लेंड्यान वच मे गाडरान तेम मोकलु। 4एतरे तमारी माय्न कोय बी पय्हा नी कोथळी, झोलो अने खाहड़ा ना ली जावो अने वाट्ये कोयने वारु से के? पुसी-पुसीन वार नी लगाड़जो। 5जे बी घोर मे भरायहु, ता आखान पेले आहयु केजो, आहया घोर मे सुक-सांती आवे! 6कदीम तां कोयने सुक-सांती जोवती हय, ता तीनी पोर तमारी सुक-सांती थांगहे, नीता तीहयी सुक-सांती तमारीनतां पासी आवती रेहे। 7#1 कुरन्थी 9:14; 1 तीमुथीयुस 5:18तीहयात घोर मे थांगला रेजो अने तीनी पांह जे हय, तीहयुत खाजो-पीजो; काहाके दाड़क्या ने दाड़की नो हक से। आहया घोर अने ह़ेला घोर नी फीरजो। 8जे ह़ेर मे जहु अने जे माणहु तमारो आव-भाव करहे अने जे कंय तमने खाणु आपहे, तीहयुत खाय लेजो। 9तां वाळा मांदला माणहु ने आरगा करजो, अने तीमने केजो, “भगवान नु राज तमारी ह़ाते आय लागलु से।” 10#नेवताळा ना काम 13:51पण कदीम काना ह़ेर मे जहु अने तमारु आव-भाव नी करे, ता तीमना हाट मे जाय्न केजो, 11#मत्ती 10:7-14; मरकुस 6:8-11; लुका 9:3-5“अमारा पोग मे लागलो तमारा ह़ेर नो कादो लग आमु तमारी अगळ झटकी देजे। ते बी आहयु जाण लेजो के भगवान नु राज तमारी ह़ातेत आय लागलु से।” 12#मत्ती 11:24; मत्ती 10:15मे तमने आहयु केम, नीयाव ना दाड़े सदोम ह़ेर ना माणहु गेथो तीहया ह़ेर ना माणहु ने जादा डंड जड़हे।
वण-भरह्या ने ईसु नी चेतावणी
(मत्ती 11:20-24)
13“ए खराजीन ह़ेर ना माणहु! तमारी पोर गरा आय पड़े! ए बेतसेदा ह़ेर ना माणहु तमारी पोर गरा आय पड़े! जे भारी जुदा-काम तमारी मे हयला से, कदीम तीहया कामु सुर ह़ेर मे अने सेदा ह़ेर मे रेवा वाळा माणहु मे हयता, ता तीहया काय कत्यार ना चचर्या ठेला ओडीन अने आह़फाम ना डीले रोखड़ो चोपड़ीन आह़फाम ना पापु भणी गेथु मन बदलीन भगवान वगा हय जता! 14पण नीयाव ना दाड़े सुर अने सेदा ह़ेर ना माणहु गेथो तमने नीयाव ना दाड़े वेठाय नी एतरो डंड जड़हे। 15अने ए कफरनहुम ह़ेर ना माणहु! तमु ह़रगे लग उचा उचलाय जहु? नी, बाखीन तमु पताळ मे तक हेटा धेकलाय जहु?”
16 #
मत्ती 10:40; मरकुस 9:37; लुका 9:48; युहन्ना 13:20 ईसु चेलाम ने केदो, “जे तमारी ह़मळीन माने, तीहया मारी ह़मळीन माने, अने जे तमारो नीकारो करीन हेटा ह़मजे, तीहया मारो नीकारो करीन मने हेटो ह़मजे। अने जे मारो नीकारो करीन मने हेटो ह़मजे, तीहया ते ह़रगे वाळा बाह भगवान नो नीकारो करीन तीने हेटो ह़मजे, जे मने मोकल्लो से।”
बोहोत्तर चेला ईसुन्तां पासा आवे
17सत्तर ने बे चेला खुस हय्न पासा आया अने केदा, “ए मालीक! तारा नाम नी लेदे भुत बी अमारा हुकम ने मानीन नाह जाय।”
18ईसु तीमने केदो, “मे भुतड़ा ने वीजळीन तेम ज्योरेत ह़रगे गेथो हेटो पड़त्लो देख रेलो हतो। 19ह़मळो! मे तमने गड़हा अने वीसा ने पोग तळे कचरवा नो, अने मे तमने वेरी भुतड़ा ना आखा जोर पोर बी हक आपलो से। अने कानी बी चीज सी तमने कंय बी नुकसान नी हये। 20पण ते बी भुतड़ा अमारो हुकम मानीन अमारा हक मे से करीन तमु खुस नी हय जो, बाखीन अमारा नाम ह़रग मे लीखाय र्या करीन खुस हय जो।”
ईसु खुस हये
(मत्ती 11:25-27; 13:16-17)
21तीहयीत टेमे ईसु चोखली आत्मा नी लारे घण-जबर खुस हय ज्यो, अने केदो, “ए बाह! ह़रग अने धरती ना मालीक! मे तारा नाम ना गुण गावु, काहाके तु आहयी आखी वात ने अक्कल वाळा नी अने ह़मजदारी वाळा नी नींगा अगळ गेथी ह़ताड़ीन राख्यो अने नीस्ता वण-अकल्या सोरा अगळ उजन्ती कर्यो: होव, ए बाह! तने आहयुत गम्यु।
22 #
युहन्ना 3:35;
युहन्ना 10:15
“मारो भगवान बाह मने आखु कंय आप देदलो से। पण भगवान बाह ने सोड़ीन आहयु कोय बी नी जाणता के सोरो कोय से, अने सोरु ने सोड़ीन कोय नी जाणता के भगवान बाह कोय से। पण तीहया माणहु एतरात जाणहे जीमने सोरो आहयी वात उजन्ती कर देहे।”
23अने ईसु आह़फा ना चेला ने एक धेड़े ली जाय्न तीमने केदो, “जे तमु देखवा बाज र्या तीहयु देखण्या डोळा जुगाळा से!” 24काहाके मे तमने केम के “घणा ढेरका भगवान वगे गेथा वात करन्या माणहु अने राजा केदो के, जे वात ने तमु देखत्ला से तीहयी देखो; पण नी देख्या अने जे वात तमु ह़मळवा बाज र्या, तीहयी वात ह़मळत्ला से ह़मळो, पण नी, ह़मळ्या।”
आखा मे मोट्ला बे हुकम
25 #
मत्ती 22:35-40; मरकुस 12:28-34 अने एक दाड़े युहदी-धरम नो कायदो ह़ीकाड़न्यो मास्तर ईसुन्तां आयो, अने ईसु ने पारखवा करीन आहयु पुछ्यो, “ए मास्तर! अमरकाय जीवाय हात करवा करीन मे ह़ु करु?”
26ईसु तीने केदो “के मुसा ना सास्तर मे ह़ु लीखलु से, तु केम भणत्लो?”
27युहदी-धरम ह़ीकाड़न्यो जपाप आप्यो, “तु आह़फा ना मालीक भगवान ने आह़फा ना आखा मन नी लारे, अने आह़फा ना आखा जीव सी अने आह़फा नी आखी ताखत सी मोंग कर; अने आह़फा नी अक्कल सी, आह़फा ना आड़े-धेड़े वाळा ने आह़फान तेम मोंग कर।”
28ईसु तीने केदो, “तु वारु जपाप आप्यो, आहयुत कर, ता तु जीवत्लो रेही।”
29पण तीहयो युहदी-धरम नो मास्तर आह़फा ने वारलो केवाड़वा करीन ईसु ने पुछ्यो, “मारा आड़े-धेड़े वाळा कोय से?”
30ईसु तीने जपाप आप्यो, एक दाड़े एक माणेह यरुसलेम गेथो यरीहो ह़ेर भणी जवा बाज रेलो। वाट्ये चोट्टा तीनी पांह गेथा पेरला लुगड़ा हापकी लेदा अने तीने घण-जबर ठोक्या, अने आदमरतो नाखदीन जत र्या। 31अने अळतेण एक पुंजारो तीहयी वाट्ये जवा बाज र्यो हतो, ता तीहयो ते माणेह ने देख्यो ता तीहयो सेटो माय्न अगो जत र्यो। 32अळतेण एक लेवी बी तीहयी वाट्ये माय्न जवा बाज र्यो हतो। जत्यार तीहयो ते माणेह ने देख्यो, ता ह़ाते आयो अने तीनी भणी छोटो भाळ्यो। अने तीहयो बी आडु भाळीन अगोत जत र्यो। 33पण एक तीसरो माणेह तां आयो, तीहयो सामरी जीला नो माणेह हतो। जत्यार तीहयो ते माणेह ने देख्यो, ता तत्यारुत तीहयो तीनी पोर गीण कर्यो। 34तीहयो तीनीन्तां आयो, तीना घाव पोर अंगुर नो रोह चोपड़ीन पट्टी बांद्यो। अने अळतेण तीहयो ते माणेह ने आह़फा ना गदड़ु पोर बहाड़ीन एक धरमसाहळा मे ली ज्यो, तां ह़ारीक तीहयो तीनी अळी सेवा-चाकरी कर्यो। 35बीजा दाड़े तीहयो धरमसाहळा ना मालीक ने थोड़ाक पय्हा आपीन केदो, “आहयु माणेह नी वारु सेवा-चाकरी करजे अने कदीम जादा पय्हा लागे ता मे तने पासो आवती वखत आप देही।”
36ईसु युहदी-धरम ना मास्तर ने पुछ्यो, “तीहया तीन माणहु माय्न कोय तीने खरलो मोंग देखाड़्यो, जीने चोट्टा लुट लेदला हता?”
37युहदी-धरम नो मास्तर जपाप आप्यो, “जे तीनी पोर गीण कर्यो।” ईसु तीने केदो, “तां जा, तु बी तेमेत कर।”
ईसु मारथा अने मरीयम ना घोर ज्यो
38 #
युहन्ना 11:1
ईसु चालतो-चालतो एक गाम मे पुग्यो अने मारथा नाम नी बयर ईसु ने तीना घोर ली जी। 39अने मारथा नी एक बेनेह हती तीनु नाम मरीयम हतु; तीहयी मालीक ईसु ना पोग ने तां बहीन तीना बोलु ह़मळती हती। 40पण मारथा सेवा करती-करती घबराय जी, अने ईसुन्तां आवीन केदी, “ए मालीक! ह़ु तने मारी थोड़ीक बी फीकर नी हय, के मारी बेनेह मरीयम सेवा नो आखो बोज मारीत पोर नाख देदली से? हीने तु आहयु काहा नी केतो के तारी बेनेह ने मदत कर दे।”
41मालीक ईसु तीने जपाप आप्यो, “मारथा, ए मारथा! तु ढेरेत वात ना बारा मे फीकर करीन दुखी हये, 42पण तारी मे एक वात नी कसर से, अने मरीयम तीहयी एक वारली वात ने टाळ लेदली से: जे वात तीनी पांह गेथी कोय नी हापकी सके।”
ទើបបានជ្រើសរើសហើយ៖
लुका 10: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
