युहन्ना 16
16
1मे तमने आहयी आखी वात आनीन करते केदो, के भरहो नी सोड़ो। 2माणहु तमने तीमना भक्ती ना घोर मे गेथा बारा काड देहे। अने आहयी टेम बी आवहे के माणहु आहयु ह़मजीन तमने मारहे के आमु ईमने मारीन भगवान नी सेवा-चाकरी कर र्या। 3तीहया भगवान बाह ने बी नी ओळखे अने मने बी नी ओळखे। एतरे तीहया तमारी ह़ाते आसम वेहवार करहे। 4मे आहयी आखी वात आनीन करते देखाड़्यो, के जत्यार तीहया वेला पाड़हे, ता तमने आहयी आखी वात फोम आव्वा जोवे, के मे तमने आहयी वात पेलेत कीन चेताय देदलो से। एतरा दाड़ा मे तमारी ह़ाते हतो करीन मे आहयी आखी वात सुरु मे नी केदो।
चोखली आत्मा ना काम ना बारा मे ईसु देखाड़े
5पण हाव मे तीनीन्तां जवा बाज र्यो, जे मने मोकल्लो से, अने तमारी मे गेथो कोय बी आहयु नी पुछ्ता के तु कां जवा बाज र्यो? 6मे तमने आहयी आखी वात की देदो, करीन तमारु मन दुख सी भराय जेलु से। 7पण ते बी मे तमने ह़ाचलीन केम, मे जत रेही ता तमारी जुगु वारु रेहे; काहाके मे नी जाम, ता तमने सात देण्यो तमारीन्तां नी आवे। पण मे जही ता ते सात देण्या ने तमारीन्तां मोकल देही। 8अने जत्यार चोखली आत्मा आवहे, ता तीहयी आहयी कळी ना माणहु ने आहयु उजन्तु कर देहे के पाप नीयाव ना बारा मे गलत, अने भगवान नी खराय ना बारा मे संय से। 9पाप ना बारा मे आनीन करते के तीहया मार पोर भरहो नी करता। 10मे ते भगवान बाह ने तां जाम, अने जत्यार मे जत रेही ता तमु मने नी देखो; एतरे मारी अवजी पोर चोखली आत्मा तमारी ह़ाते रीन कळी ना माणहु ने तीमना झुटा धरम ना बारा मे पुरावा भेळ गुनो देखाड़ीन ह़मजाड़हे 11आहयी कळी ना मुखी भुतड़ा नो नीयाव हय जेलो से अने तीना पाप नो डंड तीने छोटोत जड़न्यो से। एतरे चोखली आत्मा कळी ना माणहु ने बी तीमना झुटा नीयाव ना बारा मे पुरावा भेळ देखाड़ीन ह़मजाड़हे।
12तमने केवा करीन अळी ढेरेत वात मारा मन मे आय री, पण हमणे केही ता तमने वेठाय नी। 13जत्यार आत्मा आवहे, ता तीहयी तमने भगवान नी आखी सच्चाय भणी लीजवा करीन अगवाय करहे। काहाके तीहयी आह़फा नी अवड़ते कंय बी नी केय, बाखीन तीहयी जे कंय मारी पांह गेथु ह़मळहे तीहयुत केहे, अने आव्वा वाळी वात ना बारा मे बी तमने देखाड़हे। 14तीहयी मारी बड़ाय करहे, काहाके तीहयी तमने मारी भणी गेथु जे जड़लु से, तीहयु तमने देखाड़हे। 15जे कंय बाह नु से तीहयु आखु मारु से, आनीन करते मे केदलो, के तीहयी मारी वातु मे गेथी तमने देखाड़हे।
दुख, खुसी मे बदली जहे
16ईसु आह़फा ना चेला ने अगो केतो ज्यो, “थोड़ीक वार मे तमु मने नी देखो। अने अळतेण अळी थोड़ीक वार मे मने देखहु।”
17तत्यार तीना थोड़ाक चेला आंबा-सांबा पुछ्या, “आहयु ह़ु से, जे तीहयो आमने केय, थोड़ीक वार मे तमु मने नी देखो, अने अळी थोड़ीक वार मे मने देखहु? अने आहयु आनीन करते के मे बाह ने तां जाय र्यो।” 18तत्यार तीहया केदा, “आहयी थोड़ीक वार जे तीहयो केय, ह़ु वात से? आमु नी जाणता, के ह़ु की र्यो।”
19ईसु आहयु जाणतो हतो, के हीय्या मने पुछवा हींड र्या, तीमने केदो, तमु आह़फा-आह़फा मारी वात ना बारा मे पुछवा बाज र्या, थोड़ीक वार मे तमु मने नी देखो, अने अळी थोड़ीक वार मे देखहु? 20मे तमने ह़ाची-ह़ाची केम, के तमु रड़हु अने कलपहु, पण आहयी कळी खुस हयहे अने तमु दुखी हयह़ु पण तमारो दुख खुसी मे बदल जहे। 21जत्यार बयर जणवा बाज जाय, ता तीहयी वेला करे, काहाके तीनी दुख नी टेम आय लागी, पण जत्यार तीहयी सोरु ने जण देय ता आहयी खुसी से के कळी मे एक माणेह पयदा हयु, तीहया दुख ने अळी फोम नी करे। 22हेमेत हमणे ते तमु बी दुखी से, बाखीन मे तमने अळी भेटही, तत्यार तमारा मन मे बी खुस हय जहु; अने तमारी खुसी ने तमारी पांह गेथी कोय सी नी हपकाये।
23ते दाड़े तमु मारी पांह कंय बी नी मांगो: मे तमने ह़ाची-ह़ाची आहयु केम, कदीम तमु भगवान बाह पांह मारा नाम सी वीन्ती करीन मांगहु, ता तीहयो तमने आपहे। 24हजु लग तमु मारा नाम सी कंय बी नी मांग्या। मांगो, ता भगवान तमने आप देहे, आनीन करते के तमारी खुसी पुरी हय जाय।
ईसु कळी ने जीक लेदलो से
25मे तमने आहयी आखी वात दाखला ना लारे केदलो से। आसवी टेम आव्वा बाज री, के मे अळी तमने दाखला ना लारे नी देखाड़ु; पण भगवान बाह ना बारा मे चोखुझण देखाड़ही। 26तीहया दाड़े तमु मारा नाम सी मांगहु, अने मे तमने आहयु नी केतो, के मे तमारी लेदे बाह सी वीन्ती करही। 27काहाके बाह ते खुद तमारी सी मोंग करे, आनीन करते के तमु मारी सी मोंग राखला से, अने आहयो बी भरहो कर्या, के मे बाह भणी गेथो आवलो से। 28मे बाह भणी गेथो धरती पोर आवलो से, अळी धरती ने सोड़ीन पासो बाह ने तां जवा बाज र्यो।
29ईसु ना चेला ईसु ने केदा, “देख, तु हाव दाखला ना लारे नी केतो पण चोखुझण केवा बाज र्यो। 30हाव आमु जाण ज्या, के तु आखु जाणे, अने जरवत नी के कोय तारी सी कंय पुछे, आनी सी आमु भरहो कर र्या, के तु भगवान भणी गेथो आवलो से।”
31ईसु तीमने केदो, “तमु वीच्यार कर र्या के हाव आमु पक्को भरहो कर लेदा। 32पण देखो! आसवी टेम आव्वा बाज री, अने आय वागली से, जत्यार तमु आखा रीवण्या-तीवण्या हय जहु, अने मने एखलोत सोड़ीन जत रेहु। ते बी मे एखलो नी हय, काहाके भगवान बाह मारी ह़ाते से।” 33हाव आहयी कळी मे तमने दुख झेलवा पड़हे। ते बी हीम्मत राखजो, मे आहयी कळी ने जीक लेदलो से। मे आहयी आखी वात आनीन करते केदलो से, के आव्वा वाळा दाड़ा मे तमु दुख झेलता जाय्न बी मारी मे सांती हात कर लेवो तेम।
ទើបបានជ្រើសរើសហើយ៖
युहन्ना 16: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
