Maatiyoosi 16
16
Malletoon Bi Bekkiyemmoyich Yesuusi Echeyoo
(Maariqoosi 8:11-13; Luqaasi 12:54-56)
1Ebiyee gubb, Fariseenaꞌonaa Saduuqeenaꞌonoochee ikkikkeenaꞌo Yesuusin muriciiya ii bi waan giddeꞌi, “Eke shimaayoochee malletoon nooch bekkiibe” iꞌi echeheete.
2Tunetaa Yesuusi wochiꞌi ishichiye: “Xum womikka ‘Shimaayoo ceelletone; amiyo dihaachemmone’ iyote; 3haree maaddoona ‘Shimaayoo ceellee qubetone; hanaach amiyo dihemmone’ iyote. Shimaayoon ciinniꞌi tunemmi mooyon ariyoon hakkiyote; tunebaani yemeenee malletoon beeggiꞌi tunemmi mooyon ariyoon hakkaachote? 4Hini gondoonaa yahechona tuneti shiijjeroo malletoon beegoyich qaawii beetone; tunetaa Yoonaasichi malletoyee besh bare malletoo biich icheyaachemmone” iye. Bi ishichitoyee gubb arooch boonoshin duppiichii bare xaaꞌooch hammiye.
Fariseenaꞌonaa Saduuqeenaꞌonochi Bukee Shittoo
(Maariqoosi 8:14-21)
5Yesuusichi dabbeenaꞌo baharoyee beqach boonoshi kimiyooba shohoon yeshaanoon batteheete. 6Yesuusi boonoshin “Fariseenaꞌonaa Saduuqeenaꞌonochi bukee shittoochee ittoshi qelloon quyebote” iye.
7Aroochee boonoshinaa boonoshina “Koshon yeshaano no qajjetoyich shaahiye bi gettiibeeto” iꞌi yibbaateheete.
8Yesuusi boonoshi gaboon ariiꞌi ishichiye: “Hini, ta toommooch mulloon tooꞌiyaaneenaꞌote, ‘Kosho nooch aalletoyich shaahiye’ iꞌi amoyichiye ittoshi yibbaateebeeto? 9And beddaahaa ittoshi mullooch giyaache? Uuche xekee koshon uuche hume ashich tiichaa ta qoodiyooba, echeti ambiche mokkoon ittoshi tiijjito gaata shalligaachote?#Maat. 14:17-21 10Wotta shabaatte xekee koshon awudde humeenaꞌoyich tiichaa ta qoodiyooba, echeti ambiche mokkoon ittoshi tiijjito gaata shalligaachote?#Maat. 15:34-38 11‘Fariseenaꞌonaa Saduuqeenaꞌonochi bukee shittoochee ittoshi qelloon quyebote’ iyaꞌa ta getteto kochichon toonoone. Ebin aabichiꞌi shalligaachote?” iye. 12Arooba Yesuusi gettito, Fariseenaꞌonaa Saduuqeenaꞌonochi doyoonalli, “Kochi bukee shittoochee ittoshi qelloon quyebote” iꞌi bi getti qayo batt boonoshi mullooch giyiye.
Yesuusi Echeton Pheexiroosi Wochoo
(Maariqoosi 8:27-30; Luqaasi 9:18-21)
13Yesuusi Filipphoosi Qesaariyi katemee gaꞌooch beeti showooch shaggiꞌi tiyii bi dabbeenaꞌon “Asheenaꞌo Ashi Bushoon konine ii beeteete?” iꞌi echehe.
14Boonoshiyoo “Ikkikkeenaꞌo ‘Hini Aacona Afaallechi Yowannisine’, echeenaꞌo ‘Eliyaasine’, echeenaꞌo wotta ‘Erimiyaasine woyee wonna Yeerichi qaaroon keemmii beetinaꞌoochee ikkoone’ ii beetinaꞌone” iyeete.
15Biyoo “Ittoshiyochi taan konine ii beetote?” iye.
16Simoon Pheexiroosi tiyiꞌi, “Ne Kiristoosi, beeyechi Yeerichi Bushoo neene” iye.
17Yesuusiyoo wochiꞌi ishichiye: “Yoonichi bushoo Simoono, ebin neech bekkiito shimaayooch beeti ta Nihoani asho toonoone; ebich diireeto neene. 18Tawoo neech gettoye, ne shigo Pheexiroosine; hini xaqqee toommooch ta kittinnee guuphon neechemmo taane; qitee giidolla bi tunetaa, ebi aroon kochii wochoon hakkaachemmone. 19Shimaajji taatittinee kellee qulfoon neech immemmo taane; showoochaa ne cucheti mooyo bulli shimaayoochaa cucheeto tunemmone; showoochaa ne biicheti mooyo bulli shimaayoochaa biicheto tunemmone” iye.
20Arooba bi dabbeenaꞌoyich “Ta Kiristoosi ta tunoon konichona gettaahote” iꞌi gettiye.
Bi Qitemmon Shiichii Yesuusi Geto
(Maariqoosi 8:31–9:1; Luqaasi 9:22-27)
21Aroobee aabooba Yesuusi bi dabbeenaꞌoyich ishichiꞌi getooch giyiye: “Yerusaalem hamo taach qaawiihe; aroochaa showee geeneenaꞌo, qeeshee ukkireenaꞌonaa Muusichi Sheeree dojjechinaꞌonochi kishoochee wodde xuuxoon beeggemmo taane; taan wuxemminaꞌone. Tunebaani keejje qemooba qitoochee tiyemmo taane” iye.
22Arooba Pheexiroosi Yesuusin ikke badd wochiꞌi, “Ebi ne waanee wohe! Cir ne toommooch shaggaaye!” iꞌi noggee kaarehe.
23Tunetaa bekkech Yesuusi guuddii wotteꞌi Pheexiroosin “Hini Sheexaanoocho, ta waanee wohe! Taach xugo tuneto neene. Ashichonalli Yeerichon gabaachine” iye.
24-25Arooba wotta Yesuusi daakkiꞌi bi dabbeenaꞌoyich ishichiye: “Bi kasheen wodiyoyich qaawiibeeto bulli muccemmone; tunebaani taacha iꞌi bi kasheen mucceebeeto bulli danemmone. Taan dabboon shunniibeeto koniyoona bi tunegaata, bi qelloon nookkebe; bi masqaloon shaagiree taan dabbibe. 26Wotta asho showee toommooch beeto bullin biicho tuniichii bi kasheen bi muccegaata, amoon biich hallehe? Asho bi kasheen wochiꞌi danoyich amoon qoco hakkehe? 27Ashi Bushoo bi Nihoochi oogee yiiroona bi maraakeenaꞌona tookki katinoon woyemmone; arooba bullich bi shuuni shuunoommon immemmone.#Shod. 62:12 28Iberoon ittoshich gettoye: Hiniich neexee beetinaꞌoochee ikkikkeenaꞌo Ashi Bushoo taateꞌi bi waataa boonoshi beegimmi wottoon, qitaachemminaꞌo beetinaꞌone” iye.
ទើបបានជ្រើសរើសហើយ៖
Maatiyoosi 16: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
