Maatiyoosi 15
15
Qaabbechinaꞌochi Doyoo
(Maariqoosi 7:1-13)
1Arooba ikkikke Fariseenaꞌonaa Muusichi Sheeree dojjechinaꞌona Yerusaalemee waa Yesuus waan giddeꞌi, 2“Ne dabbeenaꞌo no qaabbechinaꞌochi doyoon amoyichiye boonoshi shaaddeebeeto? Maayoon mamoyich boonoshi giddee beegaata, no doyoochoommon boonoshi kishoon macheyaacheete” iꞌi echeheete.
3Yesuusi wochiꞌi ishichiye: “Ittoshiyochi ittoshi doyoocha iꞌi amoyichiye Yeerichi sheeroon ittoshi shaaddeebeeto? 4Yeeri ‘Ne indeenaa ne nihoonon oogiibe’ wotta ‘Bi indeen woyee bi nihoon naaggimmoo qitibe’ itone.#Key. 20:12; 21:17; Lew. 20:9; Yibba. 5:16 5Tunetaa ittoshi ‘Ikke uro bi nihoon woyee bi indeen “Ittoshich ta immemmon Yeerich kichito taane; Yeerich yaafeetone” ii beeto bulli, 6bi nihoonaa bi indeenon dego qaawiyaache’ ii beeto ittoshine. Ittoshi doyoocha iꞌi Yeerichi qaaroon biichito ittoshine. 7-9Hini ittoshi maacoon xalloo shaahii beetinaꞌote! Isiyaasi ittoshichon ishichitone:
‘Hini asheenaꞌo boonoshi noonoona taan oogii beetinaꞌone;
tunetaa boonoshi mullo ta waanee oogeton wohone;
ashi doyoon Yeerichi qaaro tuniiꞌi dojjiibee,
duuboon taach goyinneheete’#Isi. 29:13
iꞌi bi keemmito iberooniye” iye.
Ashoon Eeꞌiibeeti Mooyo
(Maariqoosi 7:14-23)
10Aroochee wotta Yesuusi dofee asheenaꞌon bi waan ceeggiꞌi, “Ta getaa waayebote! Shalligibote! 11Ashoon eeꞌiibeeto kookkoona giyiibeeti maayo toonoone; tunetaa ashoon eeꞌiibeeto ashi noonoochee kechiibeeti mooyone” iye.
12Arooba bi dabbeenaꞌo Yesuus waan giddeꞌi, “Fariseenaꞌoyich hini boonoshi waayeti qaaro xugo bi tunoon ariitine?” iyeete.
13Tunetaa bi wochiꞌi, “Shimaajji ta Nihoo Yeeri bechaano bulli waaxemmone. 14Boonoshin qayote; aaf doogoon yaabiibeeti aaf doogeenaꞌone; aaf doogo aaf doogoon bi yaabigaata, gutteenaꞌo yesheree oppooch dihemminaꞌone” iye.
15Pheexiroosi tiyiꞌi, “Ashoon eeꞌiibeeti mooyoyich ne getteti shaahiyoon kaachiree nooch gete” iye.
16Ebich Yesuusi bi dabbeenaꞌoyich ishichiye: “Andoo ittoshi mullooch giyaache? Shalligaachote? 17Kookkoona giyiibeeto bulli maacooch giyiꞌi maach keyon ariyaachote? 18Tunetaa noonoochee kechiibeeto, mulloocheeniye bi kechiibeeto; ashoon eeꞌiibeeto aroone. 19Mulloochee kechii beetinaꞌo, gonde shalligoo, wuxoo, shunee mamo, yahoo, gaayo, kootee miixo, oono eboshine. 20Ashoon eeꞌiibeeto ebiyalli, Ayihudeenaꞌochi doyoommona kishoon macheyaanoon mamo toonoone” iye.
Kanaanee Showeexi Ureechi Busheen Yesuusi Wodiyoo
(Maariqoosi 7:24-30)
21Yesuusi aroochee tiyiꞌi Xiroosinaa Sidooninochi gaꞌooch beeti showooch hammiye. 22Bekkech are showooch beeti Kanaanee ure waaꞌa, “Ta Doonocho! Daawiti Bushoocho! Taach ariqqebe! Ta busheen giidechi maach biiyo yechitone” iyaꞌa cookaabee qollahan.
23Tunetaa Yesuusi amoonolla getaanoone. Bi dabbeenaꞌo bi waan giddeꞌi, “Hini ure cookaabee noon dabbaa beetine; daachiibe; hambuye” iꞌi qolleheete.
24Yesuusiyoo wochiꞌi, “Bago aalloommon aalleti Israꞌeeleenaꞌo ikkeetoyichiye wochetaa ta waato” iye.
25Tunetaa ure waaꞌa, “Ta Doonocho, taan gaachebe” iibee goyinnehan.
26Yesuusi wochiꞌi, “Bushiisheenaꞌochi maayoon tiijjiꞌi kunaaneenaꞌoyich dufo tato toonoone” iye.
27Ure wochaꞌa, “Ishi iberoone, ta Doonocho! Tunebaani kunaaneenaꞌolla boonoshi doonochi madoochee oojjiti ooyoon macii maa beetinaꞌone” iyan.
28Arooba Yesuusi ureyich wochiꞌi, “Haane, ta toommooch mulloon ne tooꞌiyoo oogeti mooyone. Ebich ne qaawitoommon neech tunebe” iye. Arooba bi bushee bekkech wodiyan.
Meeti Asheenaꞌon Yesuusi Wodiyoo
29Yesuusi aroochee tiyiꞌi Galiilee baharee gashooch hammiye. Arooch beeti geppoochoo kechiꞌi kotehe. 30Dofee asheenaꞌo baata yesheenaꞌon, dureenaꞌon, aaf doogeenaꞌon, noona miimeenaꞌon, meeti biiyechi bareenaꞌonoo bi waan deebiyeete; Yesuusichi baatooch kotiiheete; biyoo boonoshin wodiihe. 31Ebich dofee asheenaꞌo noona miimeenaꞌo yibbaatetaa, dureenaꞌo wodaa, baata yesheenaꞌo shaꞌetaa, aaf doogeenaꞌo ciinaa beeggiꞌi worganeheete; Israꞌeelichi Nuggishoon galleteheete.
Awudde Humeenaꞌoyich Yesuusi Maanjoo
(Maariqoosi 8:1-10)
32Ebiyee gubb Yesuusi bi dabbeenaꞌon bi waan ceeggiꞌi, “Hini asheenaꞌo taanna tookkii boonoshi koteto, hanaach keejje qemone. Boonoshi maayemmo aalletoyich, taan oogichii ayinikkitone. Gommoochaa maraateree boonoshi dihaachemmoyich, abete kashoona boonoshin daachiyoon shunaache” iye.
33Bi dabbeenaꞌo wochiꞌi, “Hini shaahe asheenaꞌon michiyemmi koshon hini gafoo aalli xaaꞌoochee amoochee danehone?” iyeete.
34Yesuusi “Ambiche kosho ittoshich beete?” iꞌi echehe.
Boonoshi wochiꞌi, “Shabaatte xekee koshonaa giisheche gishiishi haashoona beete” iyeete.
35Aree hillooch Yesuusi asheenaꞌon kotebote iye. 36Shabaatte xekee koshonaa haashoonon yechiꞌi Yeerin galletehe. Tiichiꞌi bi dabbeenaꞌoyich immiye. Bi dabbeenaꞌoo asheenaꞌoyich giddiiꞌi qoomeheete. 37Asheenaꞌo bulliyoo maaꞌi michiyeete. Aroyee gubb bi dabbeenaꞌo echeti ooyoon shabaatte mokkee ceenon tiijjiyeete. 38Arooba maati doonjeenaꞌo, genneenaꞌonaa bushiisheenaꞌona giyaanoon awudde humeenaꞌone. 39Yesuusi asheenaꞌo bullin diggiiꞌi bi daachiitoyee gubb, giishi markabeena Magidanee showooch hammiye.
ទើបបានជ្រើសរើសហើយ៖
Maatiyoosi 15: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
