Mbete Zak 1
1
1Soko yi̧n bi, gun Izarayelri ké sa̧w wah vba ɓa boh falu seɗe. A bi Zak mgbal Ŋgerzah, mgbal Gaŋ wah Ŋgermbay Zezu, mi vah wuri, a woiri ké i gbakra haniri ké tusiɓari ɓoɗ ɓoɗ.
2Yi̧n biri, í el ke tumbɔl ɓay fe-leh lawri ɓoɗ ɓoɗ ké ziŋ wuri. 3I tu wuri ɓahri se, fe-leh law woiri ƴo vbo kanlaw woiri kandɔk lari mí lu vbi̧ri-u ma fal el poŋ munu. Pihna fe-leh law hi̧ i ɓer gi̧w tul ketina ɓay Ŋgermbay.
4Dale í hi̧ ɓer gi̧w ra ɓá hi̧ law woiri ndu̧y hi̧ í ŋger ɓa nzuk pirmatul, í na ɓa gun Ŋgerzah a ketina. Fe laɓna suki mbew ta poh wuri ya.
5Gelke ru̧na poh nzuk mbew ké sakra woiri dale, ké vbi ru̧na-u ké ta̧w Ŋgerzah ké ƴo hi̧ nzukri gbam par par ke law mbew dan zɔmna le, ke ɓay hi̧ nzuku ru̧na. 6Mí nzuku ɓá vbi ke law mbew. Law ye ɓá tehre ya. Nzuk ké fah ɓay ra na kandɔk ŋgoro ké na tul mbih, ké kuna kɔklɔ ma gini ma sa̧. 7Nzuk a kandɔkaw ɓá lu kerɓay-ziŋ fe a hani ké ta̧w Gaŋ tul feri riw ma fal. 8Sam law nzuk a kaŋaw kehr gel seɗe tehre ni ɓil siŋ sina ye.
9Yi̧n ɓil Ŋgermbay a a̧y ké ɓa ko̧hko ɓá zay mun ɓay riŋ ɗina ye ké mgbe ké nunmbam. 10Mí yi̧n ké ɓa nzuk vana ba, ɓá zay mun ɓay ŋgerna ye ké ta-a ɓay fe le, ke ról kandɔk funa kpuh kaŋ. 11Seh ti̧h, gel za-zaŋ, gayri ri̧h sɔrɔrɔ, funa kpuhri rol ku̧ siɓa raɓ raɓ, mí ndɔhna-u ta mba. Kaŋ pi mí nzuk vana ɓay rol ké ɓil gel sina ye.
12Pol tehna Ŋgerzah teh tul nzuk a a̧y ké ɓer gi̧w tul ketina ɓay Ŋgermbay ké ɓil fe-leh lawri mí ti̧h ke ɓilu ɓa suki ɓay fe le, ɔkna ké-e ziŋu ɓay na ɓa gay mbay ké Gaŋ wah lek geŋ nzukri ké sa ni. 13Mí nzuk ké ƴo ɓil fe-leh law le, ko-ko ké ɓahri se : « Ŋgerzah mí pih fe-leh law bi-ay. » Ɗaka-laɓ suya ta ɓil law Ŋgerzah ya dara mí Ŋgerzah ta ndoh law nzuk ke ɓay hi̧ nzuku rih ɓil suya ya pi. 14A ge ge le fe-leh law ye ur ke ɗaka fe ké na ɓil law ye mí ƴo rah ni, ƴo mgba ni. 15Bol falu ké ɗaka fe tukala-u ɓu pa̧hra, gun ké-e sȩru ɓa suya, mí mi̧hri suya ra ŋger dale, mbuŋ hul.
16Yi̧n biri, gun sanari, í hi̧ law woiri ɓá rɔk wuri ya, 17fe hi̧na a suki ke fe puhna a kpakpaŋu gbam ɗer ke nunmbam ké ta̧w baah Ŋgerzah nzuk sa̧w gel tehna. A ye ke sɔɓ kandɔk siŋ sina fe-teh gelri ké nunmbam ya, ke sɔɓ kandɔk tem ké sɔɓ ke gelri ɓoɗ ɓoɗ ya. 18Mi̧hri ké baah Ŋgerzah mbuŋ gun yeri keni ɓa ɓay a ketina kandɔk ké-e lek kaŋ. Ke hi̧ nah ti̧h ɓa gun pol, fe a ɓoruri gbam ké-e laɓ ɓa toŋnafal. 19Í ker si tul ɓayay, yi̧n biri, gun sanari : A ge ge le ɓá lah ɓay a ketina hi̧ ɓayu guh law ye ɓa gah-u, ké mbi ɓay ɓa gah-u ya#1.19 Í mgba Mbete Zak 3.1-12 tuh ke gel ki̧na-ay., law ye ɓá zaŋ ɓa gah-u ya, 20ɓayu ké law zaŋna nzuk pirmatul ra ta laɓ pihna hi̧ nzuk tu Ŋgerzah ɓa záh ye ya. 21Sa̧wu mí í poŋ fe laɓnari ké sih law woiri ke sam suyari ɓoɗ ɓoɗ gbam ma fal. Ke siŋ sina law a voh-u, í el mgba ɓay a ketina ké Ŋgerzah ruh ɓil law woiri ra ndɔk seɗe, ɓayu mah ya̧ wuri ma-mah.
22Dale í mgba ɓayu, í ƴo tulu. I lah ɓay Ŋgerzah dan mgba ɓayu le, i rɔk mun woiri kaŋto ɓay fe le, 23nzuk ké lah ɓay kaŋto, mí ke ƴo tulu ya le, ke na kandɔk nzuk ké ko tem ye ké ɓil fe-ko tem. 24Ke ko tem ye, ke tɔr dale, ke yȩkre tem ye ké-e ko ra keɗ. Kaŋ mí ɓa nzuk ké lah ɓay Ŋgerzah mí yȩkre. 25Nzuk ké hekre ɓa ɗih-u ɓil bolkusol ké sel nzuk se-sel, mí ke ƴo tulu ɓa kpuh-u, ke yȩkre ya le, pol tehna Ŋgerzah teh tul sam nzuk a kandɔkaw. Feri gbam ké-e yih laɓu ɓay ti̧h suk#1.25 Í mgba Mbete Siŋ 1 tuh ke gel ki̧na-ay..
26Gelke nzuk ɗi mun ye ɓa nzuk misoŋ, mí ke ɓaŋ lagambal kan nzak ye ya le, ke rɔk tul ye kaŋto. Pihna Ŋgerzah ye-aw ɓa kuna. 27Mí pihna misoŋ ké ɓa teh-u ké ndɔh mah nun baah Ŋgerzah mí na-ay : mgbá sa̧w gun sehleri ke wu̧y sehri ɓil koseh woyri pi, kɔ́r mun ɓay fe laɓna tukalari ké sih law nzuk pi.
ទើបបានជ្រើសរើសហើយ៖
Mbete Zak 1: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.