Mbete Fe laɓna Tempuki 28
28
1Nah ka̧h tusiɓa ɓa suki dara mí nah lah riŋ tusiɓa ké na haŋsekle mahmbih ra ɓa Malta. 2Nzuk puh-uri ya̧ na gbam ɓa suki. Tel voh mbamba ɓay mbam ké ƴo tona. Ku gaŋ hɔrɔ hi̧ na, mí nah nu̧h. 3Pɔl si fa̧h kpuh mah fe gi ku̧ hɔrɔ bale, soy ti̧h te ndɔk ye hak sa sa ri. 4Nzuk puhri ko soy ké te ni hak sa sa ri bale, ku ɓahri : « Ma̧yɓay ta-a. Gunwo̧ro-ay ɓa nzuk-i hul gaŋ. Ke ya̧ mun ye ké ɓil mahmbih kara, záh-dal baa nzukri ta poŋ ni kaɓ tukala ya. »
5Pɔl kpoh soy ra wa̧y vbu ɓil hɔrɔ. A ye ba, ke lah sena a hani ya. 6Ku ker ɓahri, ndɔk ye ɓay mbah-u ya le, ke líh gba̧y ɓa hul. Ku geŋ doro-u kpu̧y le, ku ko fe a hani laɓ ni ya pi, mí ku el ɓah ɓay a ɓoru ɓáy ɓahri, nzukay ɓa záh.
7Kerpuh ŋgernzuk tusiɓa-aw ɗih ya ke gel ké nah ƴo ri. Riŋ ye ɓa Piɓliyo. Ke mgba na gahru ndɔk seɗe laɓ nam say. 8Bah ye na sena mun zaŋna ke zɔke sem pi. Pɔl rih si tul bah Piɓliyo goŋ Ŋgerzah. Ke ɓaŋ ndɔk kan tul nzuk sena ra, mí ke gah ni. 9Bol falu bale, tɔr nzuk senari ké na tusiɓa ké haŋsekle mahmbih-aw gi ta̧w Pɔl, mí ku ziŋ mun gahna. 10-11Nzuk tusiɓa-awri dim na mbamba.
Kumbon a hani, riŋu ɓa Záh-hore, ur ke Aleksandere. Ku ŋga̧h kumbonu na ɓel sew tusiɓa ké haŋsekle mahmbih ra ɓayu ké few sayaw mahful sí gahru tul mbih ta-a. Few say ra kal bale, nah hil kumbon ra ɓay tɔrna. Ku hi̧ na feri ké mah so na tul ful gahru wah.
Pɔl ka̧h Rɔm ké tusiɓa Itali
12Nah tɔr si ka̧h Sirakus, mí nah kaɓ ri nam say. 13Nah ur ké ri, nah gaɓ ke ɓel tusiɓa Sisili si ka̧h Regiyoŋ ké tusiɓa Itali. Tipele, kuna ɓel ɓil seh a fál lakna titil ku-u, mí nah gaɓ ke ɓel tusiɓa-aw nam seɗe dara mí nah ka̧h gel-dah kumbon ké Puzol. 14Nah ziŋ nzuk yi̧n ɓil Ŋgermbayri ké ri. Ku goŋ na, mí nah kaɓ ziŋ niri dimasi mbew. Kandɔkaw mí nah ka̧h keni Rɔm.
15Nzuk yi̧n ɓil Ŋgermbayri ké Rɔm lah ɓay sina wah ma Rɔm, mí ku nzɔh nun wah gi ka̧h lumu Apiyus ziŋ na ké ri. Nzuk a ɓoruri ka̧h puh ké riŋu ɓa Vulgahrusay. Pɔl ko niri kaŋ bale, ke yih soko hi̧ Ŋgerzah, ke ziŋ ŋgerna. 16Ka̧hna wah ké Rɔm, ku hi̧ Pɔl na vul gahru ye ɓoɗ ke soze-kɔr ni.
Pɔl sɔk ɓaysuki Ŋgermbay ké Rɔm
17Nam say bale, Pɔl ɗi ŋgernzuk ziɓri ké kaɓ Rɔm. Ku mbu̧h hani, mí ke ɓah hi̧ niri ɓahri : « Yi̧n biri, mi laɓ fe a hani ziŋ yi̧n wahri ya, mi ɓeɓ sa̧w fe laɓna zih wahri ya pi, mí ku mgba mi ké Zurusalem. Ku ɓaŋ mi ndoh ndɔk Rɔmri. 18Bol falu, ku fakla ɓay bi, mí ɓay a hani ké mah i mi ta-a. Ku yih poŋ mi. 19Mí ziɓri sa-a. Sa̧wu mí fe zɔklɔ-u sɔkrɔ mi ɓay mí ɓahri, ɓayay ɓá si ma ta̧w sezar. Mí a bi ba, kerɓay sek yi̧n biri ta law bi ya. 20Mí ku ŋga̧h mi ke sal lari-ay ɓay lák mbay Ŋgermbay ké mi te-teh ɓayu hi̧ gun Izarayelri kandɔk kú-u ɓaŋ law woyri geŋ namu. Sa̧wu mí-i yih ko wuri ɓayu. »
21Ku ɓah hi̧ ni ɓahri : « Yi̧n wahri ké tusiɓa Zude pih mbete sɔk na ɓay wo ya. Nzuk a hani kara, gi gelay mbi riŋ wo hi̧ na ɓa nani ya pi. 22Mí nah ko su-su ɓay náh lah kerɓay wo ké tul ɓay ziɓri ké dih fal Zezu nzuk Nasareɗ ra. Nah lah ɓahri, ké gelri gbam, ku sa ya̧ ɓay ye ya. »
23Ku wah ɓay el gi nam a ɓoru ɓay lah ɓay Pɔl, mí ku gi ɓa daɓa mbu̧h ké gel nam ye. Pɔl mbi ɓayri ɓil mbete Moyiz ke ɓil mbete vbehna gun nzak pihna Ŋgerzah a lewsa̧ri mí ƴo te-teh ɓay hi̧ niri ɓay lak mbay Ŋgerzah. Ke lu mberem Zezu hi̧ niri, ku ƴo lah-u ke fulu fulu ur ke tipele kpu̧ru ka̧h suŋ. 24Ziɓ a haniri ya̧ ɓay ké Pɔl sɔk. A ɓoruri ba, sa-a. 25Fahɓay ur ké haŋsekle woyri. Dara kú gbakra hani le, Pɔl ɔh ɓay ye kandɔkay : « Ɓay ké Tempuki ɓaŋ ndoh nzak Ezay gun nzak pihna Ŋgerzah a lewsa̧ sɔk ziihri ra ɓa ketina. 26-27Ke ɓahri :
Mú si sɔk nzukri-aw :
I lah ke suk woiri la-lah, mí ɓayu guh law woiri ya.
I ko ke nun woiri ko-ko, mí i ko da̧h.
Nzukri-aw, ku hi̧ law woyri kpuh.
Ku mbih suk woyri liɓ liɓ rɔkɔ kú lah.
Ku u̧m nun woyri si̧h si̧h rɔkɔ kú ko le,
law woyri ɓá guh hi̧ ku el gi ta̧w bi ɓay mí gah niri. »
28Pɔl el ɓah ra ɓáy ɓahri : « Mah ɓay í tu ɓa teh-u, sa̧wnzuk a ɓoruri mí Ŋgerzah pih nzak pihna hi̧ niri ɓay kú ti̧h ɓa gun puh lakna ye. A woyri-aw, ku yá̧ ɓayu. »
29 # 28.29 Nzuk goso fe tuna mbete Ŋgerzah ɓa ŋgi̧-u ɓahri, gel ki̧na-ay ta ɓil mbete vbehna Luk ke titilu ya. Faraŋse kuraŋ vbeh ɓahri, Fal ɓay ɓahna Pɔl, ziɓri tɔr ke fahɓay ɓa ŋgi̧-u ké sakra woyri. 30Laɓ mbihmbam seɗe Pɔl kaɓ ké Rɔm ɓil vul ké-e ƴo puh lari-u. Ke ya̧ nzukri gbam ké gi ko ni ɓa suki. 31Ke ka-kah ɓay lak mbay Ŋgerzah hi̧ niri. Ke sɔk niri ɓay Ŋgermbay Zezu Gaŋ tul feri riw ɓa teh-u dan fe zɔklɔ.
ទើបបានជ្រើសរើសហើយ៖
Mbete Fe laɓna Tempuki 28: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
