Mbete 1 Piyer 4
4
1Kandɔk Ŋgermbay ké ko seh ké mun ye ra, a woiri kara í lek mun woiri ke kerɓay mbew yaŋ ziŋ ni. Ɓay fe le nzuk a a̧y ké tu koseh tu le gba ke suya da. 2Nzuku ƴo mbi mun ye rih ɓil fe laɓna ɗaka sa̧y fe tukala mba. Wara le ke ƴo mbi mun ye laɓ fe ké rih law Ŋgerzah ke tɔ́r nam ye ké tukala-ay. 3Kaɓna woiri a pol ra i laɓ fe tukala ké rih law sa̧wnzuk a ɓoruri mí mah seeh. I ƴo dim záh a ɓoruri, i ƴo kpuh tul keni ziŋ Ŋgerzah kandɔkay : láɓ fe si wɔrɔk, láɓ fe ké voh ɗaka haymun, mbáh ɓil ke yim, mbú̧h hani gel yim nday, fáh hani ke nzó yim. 4Fe laɓna-aw uh kandɔk yiŋna mbih ké vba̧ nzuk kaŋ. Mí ku ko aŋay i mbu̧h ziŋ niri ɓilu mba le, na niri ɓa saŋ ɓahri, sa̧na munu. Ku ɓal riŋ woiri keni. 5Mí a woyri-aw ku ɓay ki̧ fal fe laɓna suya woyri hi̧ ni a ye ké-e ƴo tul bɔk ɓay kehr nzukri ké ƴo ke ɔkna ke nzuk a huluri. 6Sa̧wu mí ká-kah ɓaysuki lák mbay Ŋgermbay mgbe hi̧ nzuk a huluri gaŋ ɓay hi̧ salɓay hul ké mgba tul nzuk pirmatulri ké sa̧w woyri ɓa som siɓa hi̧ ku hu kara ku él kaɓ ɓa nzuk pirmatulri ké sa̧w ɔkna-u ɓa Tem Ŋgerzah.
7Nam-ɔh tukala ɗih mba dale, í ker ɓay ke nun a teh-u, í mgba tul woiri dale, í goŋ keni Ŋgerzah. 8-9Mí mahɓayri gbam ɓa rí̧h si̧w sa hani law mbew, ɓa mgbá haniri ɓa suki dan ŋgu̧hru ɓay. Ɓay fe le sá hani gboh su̧hru seh ma pol#4.8-9 Ɓayay na ɓil Mbete Proverbes 10.12.. 10A ge ge le Ŋgerzah hi̧ ni goso pihna ye goso pihna ye ɓay kú so keni haniri kandɔk gun-laɓ pihna a kpakpaŋuri ké mgba sa̧w lawsukiri ké Ŋgerzah wal. 11Wara le nzuk ɓah ɓay le, ké ɓah ɓay ké Ŋgerzah ɓaŋ ndoh nzak ye. Nzuk ké ƴo so nzukri, ké so nzukri ke huhrumun ké Ŋgerzah hi̧ ni, ɓay hi̧ fe laɓna woyri gbam ɓá el ke riŋ ɗina hi̧ Ŋgerzah ɓay riŋ Ŋgermbay Zezu a ye ké riŋ ɗina ke ŋgerna ɓa nzuku a ye sew ke sew kpatara. Gelu munu.
12Gun sanari, koseh ké tɔk law woiri ɓá na wuri ɓa saŋ ya, ɓá mba kerɓay woiri ya. 13Wara le í laɓ law rihna kandɔk ké i mbu̧h mbew ziŋ Ŋgermbay ɓil koseh ye. Koseh ké ziŋ Ŋgermbay ra ziŋ wuri pi, ɓay hi̧ í zay mun ke law rihna a mbamba-u ɓay riŋ ɗina ye ké ten mun ké sakra woiri. 14Ku far wuri ɓay riŋ Ŋgermbay ké kan tul woiri le, pol tehna ƴo ziŋ wuri ɓay fe le, Tem Ŋgerzah ké ɓa Tem riŋ ɗina kaɓ ziŋ wuri. 15Nzuk mbew ké sakra woiri ɓá ziŋ koseh ɓay í hul, ɓay ríh riɓa, ɓay fe laɓna suya mini ɓay zó toh ɓil ɓay nzuk a ɓoru ya pi. 16Mí ke ziŋ koseh ɓay riŋ Ŋgermbay ké na tul ye le, ké laɓ su̧hru ya. Ké pir Ŋgerzah ɓay riŋ ɗina-aw ra ma. 17Ɓay fe le sa̧wseh-kuŋ salɓay Ŋgerzah ti ke tul gun yeri. Mí titilu ke tul wah ra wa, kúŋ salɓay ye tul nzukri ké to suyɓay nzak pihna a suki ye vbu kpah ba, ɓay ɔh ani ɓáy le ? 18Nzuk ké ƴo mbew ke Ŋgerzah, ké ziŋ ɔkna ye kpuh mbamba ra wa, nzuk-saŋ Ŋgerzah, a ye nzuk suya ba, zíŋ ɔkna ye ɓay na ani ɓáy le#4.18 Ɓayay na ɓil Mbete Proverbes 11.31. ? 19Kandɔkaw mí sam kosehri ké Ŋgerzah yih, ké nzukri ko ra kú poŋ mun woyri ƴɔɗ ké ndɔk Nzuk-ƴo tul pihna ké-e laɓ ke titilu da̧y, kú toŋ laɓ suki keni.
ទើបបានជ្រើសរើសហើយ៖
Mbete 1 Piyer 4: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.