Gun mbete 1 Za̧h 5
5
1Nzuk a suŋ suŋ gbam ké law ye te sa tul ɓayay ɓahri, Ŋgermbay ɓa a ye Zezu le, sa̧w mi̧hri-mbuŋ ni ɓa Ŋgerzah. Nzuk a suŋ suŋ gbam ké sa bah gun le, sa sa̧w ye pi. 2Nah tu ɓahri, nah sa gun Ŋgerzahri kandɔkay le, nah sa Ŋgerzah, nah ƴo tul bolkusol yeri. 3-4Fe-u mí ɓa law sana Ŋgerzah mí na ɓay náh ƴo tul bolkusol yeri. Bolkusol yeri kara yih ɓa sukna ké tul wah ya ɓay fe le, nzuk a suŋ suŋ gbam ké mbuŋ mbuŋna a sa̧w mi̧hri Ŋgerzah le, haw ŋgermu tul tukala. A fe mí haw ŋgermu tul tukala le ? Kanlaw ké nah kan sa tul Ŋgermbay Zezu mí haw ŋgermu.
5A ge mí haw ŋgermu tul tukala le ? Sa ɓa nzuk ké kan law tul ɓayay ɓahri, gun Ŋgerzah ɓa a ye Zezu. 6Ŋgermbay ti̧h ɓa nzuk pirmatul fál a mbih pi, fál a sem pi mí ɓa a ye Zezu#5.6 Ɓay mbih ra, nzuk goso fe tuna mbete Ŋgerzah a haniri ɓahri, mbih ɓa mbih-u ké ti̧h ke nam mbuŋna nzuku. Karaŋri ɗi ɓa pa̧hra ndoy. Nzuk goso fe tuna mbete Ŋgerzah a ɓoruri ɓahri, mbih ɓa mbih batem. Nzuk a ɓoruri ɓáy ɓahri, mbih ra ɓa mbih ké ti̧h ke seh hul ye (Mbete Za̧h 19.34-35). Sa̧w nzak sɔk mbih a suŋ ya, mí Za̧h te-teh ɓay Zezu keni ɓahri, ke ɓa Ŋgermbay, mí ti̧h ɓa nzuk pirmatul. Í mgba Gun mbete 1 Za̧h 4.2 tuh ke gel ki̧na-ay.. Ke ti̧h ké mbih yaŋ ya. Wara le ke ti̧h ke ɓil mbih pi, ke ɓil sem pi. Tempuki mí te-teh ɓayu ɓay fe le, Temu ɓa Tem a Ketina. 7-8Tempuki, mbih, sem, feri ké sayaw gbam te-teh ɓay ye hi̧ na. Tehɓay feri ké sayaw ti̧h mbew yaŋ.
9Nzuk pirmatul te-teh ɓay le, nzukri ƴo ya̧-u. Tehɓay Ŋgerzah ŋger mba tehɓay nzuk pirmatulri mba-mba. Ŋgerzah te-teh ɓay gun ye Zezu kandɔkay : 10Nzuk ké kan law ye tul gun Ŋgerzah le, nzuku tu tehɓayu tu-tu. Nzuk ké ya̧ tehɓay Ŋgerzah ya le, nzuku kuŋ ɓay ku̧ nzak Ŋgerzah ɓay fe le, ke ya̧ tehɓay Ŋgerzah ké-e te-teh ɓayu si tul gun ye ra ya, mí ke tu tehɓayu ya pi. 11Tehɓay ké Ŋgerzah teh hi̧ na mí na-ay mí ƴo ɓahri se, ke hi̧ na ɔkna a ké na sew ke sew ɓa ŋgɔh. Sa̧w ɔkna-ay na ta̧w gun ye. 12Gun ye ƴo ziŋ nzuk le, nzuku ƴo ke ɔkna ra. Gun Ŋgerzah ƴo ziŋ nzuk ya le, nzuku ta ke ɔkna ya.
13Kandɔkaw mí-i vbeh ɓayu hi̧ wuri ɓay í tu ɓahri se, ɔkna ké na sew ke sew ɓa ŋgɔh ra, i ƴo wuri keni a woiri ké i kan law woiri sa tul riŋ ɗina gun Ŋgerzah. 14Ɓay fe ké hi̧ nah mbi ɓay ke selmun ké pol ye mí na-ay : gelke nah vbi fe ké si ke law ye le, ke lah na lah. 15Gelke nah tu ɓahri, ke lah vbiɓay wah lah le, nah tu ɓahri se, ke yih nzak wah da. 16Nzuk mbew ko ra nzuk mbaŋ ye ƴo laɓ sam suya ké mah si ziŋ ni ma hul ya le, nzuku ɓá vbi Ŋgerzah ɓay ɔkna nzuk mbaŋ ye-aw. Ke láh ni ɓay hi̧ nzukri ké ƴo ɓil suya ké mah hul ya ra ɓá ziŋ ɔkna. Sam suya ké ɓay si ziŋ nzuk ma hul ƴo ri#5.16 Sam hul ɓa seɗe. Hul a mbew ɓa hul a haymun. Hul a seɗe-u ɓa kehr hani nzuku ke Ŋgerzah. Nzuku ta ziŋ pa̧y mun a foyu kara ya pi. Ɔkna ye ta-a. Í mgba Mbete 1 Kɔrenteri 5.3-5 ke Mbete Ten sa̧wɓay 20.12-14 tuh ke gel ki̧na-ay.. Ɓay vbi Ŋgerzah ɓay nzuk ké laɓ sam suya a kandɔkaw le, mi ɓah ɓayu ya. 17Saŋna a ani ani-u gbam ké nzuk saŋ Ŋgerzah ɓa záh ye le, ɓa suya munu. Mí sam suya ké mah si ziŋ nzuk ma hul ya ra ƴo ri. 18Nah tu ɓahri, nzuk a suŋ suŋ gbam ké mbuŋ mbuŋna a sa̧w mi̧hri Ŋgerzah le, laɓ suya ya. Gun a sa̧w mi̧hri Ŋgerzah ƴo ko kona ma tul woyri. Záh law a pipiri-u a ye mbay záh tukala ta za niri ya. 19Nah tu ɓahri, sa̧w wah ɓa Ŋgerzah. Nzuk a ɓoruri gbam ba, na ndɔk záh law a pipiri-u ra. 20Nah tu ɓahri se, gun Ŋgerzah ƴo ri, mí ke mgbur nun wah hi̧ nah tu ni a ye ké-e ɓa ketina. Nah ƴo mbew ziŋ ni a ye ké-e ɓa ketina, nah ƴo mbew ziŋ gun ye Ŋgermbay Zezu. A ye ra, ke ɓa Ŋgerzah a ketina, ke ɓa sa̧w ɔkna ké na sew ke sew ɓa ŋgɔh. 21Gunri, í ko tul woiri ger ɓay záh a ɓoruri. Ku ɓa záh a kɔkuri.
ទើបបានជ្រើសរើសហើយ៖
Gun mbete 1 Za̧h 5: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.