Gun mbete 1 Za̧h 4
4
1Gun sanari, nzuk ɓah ɓay ɓahri, Tem sɔk ni le, í ya̧ ɓayu ɓa ɓay a Tem Ŋgerzah ya. Wara le í leh ɓayu, í ko. Temu ɓa Tem Ŋgerzah mini ɓa záh a ɓoru mí ndoh ɓayu ɓil law nzuku le ? Ɓay fe le gun nzak pihna a fohri ɓa ŋgi̧-u ƴo tukala. 2Kaŋaw mí i tu tem ké ɓa Tem Ŋgerzah. Nzuk a suŋ suŋ gbam ké tem hi̧ ni ɓah ketina ɓahri, Ŋgermbay ɓa Zezu ké gi ɓa nzuk pirmatul le, tem ké ƴo ziŋ nzuku ɓa Tem Ŋgerzah gaŋ. 3Nzuk a suŋ suŋ gbam ké tem hi̧ nzuku ɓah nzak ye ɓahri, Ŋgermbay ta ɓa a ye Zezu ya bale, tem ké ƴo ziŋ nzuku ta ɓa Tem Ŋgerzah ya. Temu ɓa tem nzukbaa Ŋgermbay munu. A ye ra i lah ɓahri se, tem nzukbaa Ŋgermbay ƴo gina, aŋay kara ke ƴo tukala da.
4A woiri gunri ba, sa̧w woiri ɓa Ŋgerzah. I haw ŋgermu ké tul nzukbaa Ŋgermbayri-aw ha-haw ɓay fe le, a ye ké-e ƴo ziŋ wuri ra ke ŋger mba tul a ye-aw ké ƴo ziŋ nzuk tukalari. 5A woyri-aw, sa̧w woyri ɓa tukala, sa̧w ɓayu mí nzak woyri ƴo ɓah ɓay fe tukala. Tukala kara lah nzak woyri pi. 6A wahri le sa̧w wah ɓa Ŋgerzah. Nzukay ké tu Ŋgerzah le, lah na lah. Nzukay ké sa̧w ye ɓa Ŋgerzah ya le, lah na ya. Kaŋaw mí nah tu keni tem ké ƴo ziŋ nzuk. Temu ɓa Tem a ketina mini temu ɓa záh a kuŋɓay kara, nah tu-tu.
7Gun sanari, náh sa wuri haniri ɓay fe le, law sana ur ké ta̧w Ŋgerzah. Nzuk a suŋ suŋ gbam ké sa nzuk mbaŋ ye le, sa̧w mi̧hri mbuŋna ye ɓa Ŋgerzah. Ke tu Ŋgerzah tu-tu. 8Nzuk ké sa nzuk mbaŋ ye ya le, bɔk mbew ye gel-tu Ŋgerzah ya ɓay fe le, law sana ɓa mun Ŋgerzah. 9Kaŋaw mí law sana Ŋgerzah ten mun ké mun wahri ɓay fe le, ke pih gun ye ké mbew yaŋ gi tukala hi̧ nah ƴo ke ɔkna ɓay tul gunu.
10Kaŋaw mí ɓa law sana ɓay fe le, law sana ti ke tul wah ya. Wara le a ye mí ke sa na. Ke pih gun ye ɓa fe puhna lu keni salɓay suya ké tul wah. 11Gun sanari, kandɔk ké Ŋgerzah sa na ba wa, a wah kara mbɔlu na tul wah ɓay náh sa wuri haniri kaŋ pi ya le ? 12Nzuk ké ko Ŋgerzah ke nun ta-a, mí gelke nah sa wuri haniri le, ke kaɓ mbew ziŋ na, law sana ye ya̧ gel gbam ké mun wahri. 13Kaŋaw mí nah tu ɓahri, nah kaɓ ziŋ ni. A ye kara ke kaɓ ziŋ na ɓay fe le, Tem ye mí ke hi̧ na. 14Mí nah ko-ko ra gaŋ. Nah te-teh ɓayu pi ɓahri, baah pih gun ye gi ɓa nzuk-ya̧ feri gbam ké Ŋgerzah laɓ ké nunmbam ke tusiɓa. 15Gelke nzuk ɓah ketina ɓahri, gun Ŋgerzah ɓa a ye Zezu#4.15 Í mgba Mbete Siŋ 2.7 tuh ke gel ki̧na-ay. le, Ŋgerzah kaɓ mbew ke nzuku, nzuku kara kaɓ mbew ke Ŋgerzah pi. 16A wah kara nah tu-tu, mí nah kan law wah sa tul law sana ké Ŋgerzah ku̧ tul wah. Law sana-u ɓa mun Ŋgerzah. Kaɓna nzuk ɓil law sana ra le, nzuku kaɓ mbew ke Ŋgerzah, Ŋgerzah kara kaɓ ziŋ ni.
17Kandɔkaw mí law sana ra ya̧ gel gbam ziŋ na mí hi̧ ƴo ke selmun ke seh-kuŋ salɓay ɓay fe le, nah na kandɔk a ye ké tukala. 18Hȩkme ta mbu̧h hani ke law sana ya. Wara le law sana ké mah ke law sana Ŋgerzah ƴo ni̧h hȩkme ma fal ɓay fe le, hȩkme ɓa fe ké laɓ nzuk se-se ɓay tul fe ké to tul ye. Hȩkme laɓ nzuk le, nzuku hu̧h ke law sana ya. 19A wah le nah sa nzuk mbaŋ wah ɓay fe le, a ye Ŋgerzah ke sa na ke titilu.
20Gelke nzuk ɓah : « Mi sa Ŋgerzah. »
Mí nzuku fu̧y nzuk mbaŋ ye le, ke ɓa nzuk nzak rɔkna. Kandɔk ké-e fu̧y mbaŋ ye ké-e ko ke nun ra wa, ani mí Ŋgerzah ké-e ko ni ke nun ya ba, ke sa ni lo ? 21Bolkusol ké-e pih hi̧ na ra, ke pih ɓay hi̧ nzuk ké sa Ŋgerzah le, ɓá sa nzuk mbaŋ ye pi.
ទើបបានជ្រើសរើសហើយ៖
Gun mbete 1 Za̧h 4: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.