Tohi a Paulo ki te kau LOMA 7
7
Kua ateaina te kilisitiano i te lao
1Pe e mole kotou iloi, u tehina, koteuhi e au palalau ki ni hahai e natou iloi te lao, e pule te lao ki te tagata i te temi e mauli ai? 2Koia, ko te fafine ohoana e hai e te lao ki tona ohoana i te temi katoa e mauli ai tona ohoana; kae kapau e mate te tagata, e ateaina te fafine mai te lao ae nee ina hai ia ki tona ohoana. 3Kae kapau, i te kei mauli o tona ohoana, e liliu te fafine ko te ohoana o he tahi age tagata, e fakahigoa anai ia ko te fafine tono; kae kapau e mate te tagata, kua ateaina te fafine mai te lao; e mole tono anai ia i tana toe liliu ko te ohoana o he tahi age tagata. 4Koia, u tehina, mo koutou foki, kua kotou mate ki te lao i takotou fakatahi ki te sino o Kilisito, ke kotou fakalogo ki he tahi age, kia ia ae nee toe tuuake mai te kau mate, koteuhi ke tou mau ni fua maa te Atua. 5Koteuhi, i te temi nee kei tou mauli ai i te kakano, ko te u holi fakavale o te agahala, ae nee fakaasilisili e te lao, nee natou gaue i otatou logoagasino, ke tou mau ni fua maa te mate. 6Kae i te temi nei, kua tou ateaina mai te lao, koteuhi kua tou mate ki te lao ae nee ina fakapilisoni tatou. Koia kua tou mafai ai te tauhi ki te Atua i he faahiga foou, i te pule a te Laumalie, kae mole i te faahiga afea, i te pule a te matai tohi.
Te uhiga o te Lao
7Kotea anai tatatou ui? Pe ko te lao e ko te agahala? Kailoa! Nee tonu e mole au iloi te agahala, nee au iloi ia aki te lao. Nee tonu e mole au iloi te manumanu, kae ko te lao nee ina ui mai kia au: Aua naa ke manumanu anai. 8Nee too e te agahala te faigamalie aki te fekau, o ina fakatupu ia au te u manumanu kehekehe fuli; koteuhi ka hala mo lao e mate te agahala. 9Kia au, i te temi nee au nofo ai i mua hala mo lao, nee au mauli; kae i te temi nee hau ai leva te fekau, nee toe mauli leva te agahala, pea ko au, nee au mate leva. 10Koia, ko te fekau ae nee tonu ke ina taki au ki te mauli, nee liliu leva ia kia au ko he mea e ina taki au ki te mate. 11Koteuhi ko te agahala, i tana too te faigamalie o te fakatotonu, nee ina fakahehe au, pea nee ina tamatei au. 12Koia e maonioni te lao, pea e maonioni te fekau, mo totonu, pea mo lelei. 13Pe kua liliu te mea e lelei ko he tupuaga o te mate kia au? Kailoa! Kae e ko te agahala, ke ha ia ko te agahala i tana tuku mai kia au te mate aki te mea e lelei, pea ke fakaha te agahala pau o te agahala aki te fekau.
Te lao o te agahala
14Io, e tou iloi ko te lao e fakalaumalie; kae ko au, e au kakano, pea nee fakatau au ke popula ki te agahala. 15Koteuhi e mole au mahino ki te mea e au fai: E mole au fai te mea e au loto ki ai, pea e au fai te mea e au fehia ki ai. 16Koia, kapau e au fai te mea e mole au loto ki ai, e au fakamooni i ai e lelei te lao. 17Pea i te temi nei e mole ko au ae kei ina fai te mea aia, kae ko te agahala ae e nofo ia au. 18Ko te mea ae e lelei, e au iloi, e mole nofo ia au, ko tona uhiga i toku kakano: e kau mau te finegalo, kae kailoa te mafai o te lelei. 19Koteuhi e mole au fai te lelei ae e au loto ki ai, kae e au fai te kovi ae e mole au loto ki ai. 20Pea kapau e au fai te mea ae e mole au loto ki ai, e mole ko au ae e au fai ia, kae ko te agahala ae e nofo ia au. 21Koia e au mau ia au te lao aeni: Ka e au loto ke fai te lelei, e au mafai pe te kovi. 22I te takele o toku loto, e au fakafiafia i te lao a te Atua; 23kae e au sio i oku kogasino ki he tahi age lao ae e tau fakafehagai ki te lao o toku atamai, pea e ina fakapopulai au i te lao o te agahala ae e nofo i oku kogasino. 24Tagata fakaofaofa ko au! Pe ko ai e ina haofaki anai au mai te sino aeni e ina toho au ki te mate?… 25Ke fakafetai ki te Atua ia Sesu-Kilisito totatou Aliki!… Koia, e au popula i toku atamai ki te lao a te Atua, kae i toku kakano e au popula ki te lao o te agahala.
ទើបបានជ្រើសរើសហើយ៖
Tohi a Paulo ki te kau LOMA 7: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
