Tohi a Paulo ki te kau LOMA 6
6
Mate mo Kilisito ke toe tupu mo Kilisito
1Kotea anai tatatou ui? Pe e tou nofo aipe i te agahala, ke asilisili te kalasia? 2E kailoa aupito! Ko tatou ae kua tou mamate ki te agahala, pe e feafeai anai tatatou mauli aipe i te agahala?
3Pe e mole kotou iloi e koutou, ko tatou fuli ae kua papitema ia Sesu-Kilisito, nee papitemai tatou i tona mate? 4Koia, i te papitema nee tanu fakatahi tatou mo ia i tona mate, koteuhi, o hage ko Kilisito nee toe tuuake ia mai te kau mate aki te kololia o te Tamai, ke tou haele, mo tatou foki, i te ulugaaga o te mauli foou. 5Koteuhi, kapau kua tou liliu ko he akau e tahi mo ia i tatatou fakatatau ki tona mate, e tou toe fena anai i tatatou fakatatau ki tana toe tuuake, 6o tou iloi ko totatou tagata afea nee tutuki ia i te koluse fakatahi mo ia, ke maumaui ai te sino o te agahala, ke aua naa tou toe popula ki te agahala; 7koteuhi ko ae kua mate kua ateaina ia i te agahala. 8Koia kapau kua tou mate fakatahi mo Kilisito, e tou tui, mo tatou foki, e tou toe mauli fakatahi anai mo ia, 9o tou iloi e mole toe mate ia Sesu-Kilisito ae nee toe tuuake mai te kau mate, pea e mole toe mau e te mate he pule kia ia. 10Koteuhi nee mate ia, pea nee mate tua tahi ia o uhiga mo te agahala; pea koeni kua toe liliu mai ia ki te mauli, pea e mauli ia o uhiga mo te Atua. 11Koia ko koutou totonu, ke kotou sio kia koutou, kua kotou mamate mooni ki te agahala, pea kua kotou mauli ki te Atua ia Sesu-Kilisito.
12Ke aua naa toe pule te agahala i tokotou sino mate, pea ke aua naa kotou fakalogo ki ona holi. 13Ke aua naa koutou tuku ki te agahala okotou koga sino, o hage ko ni mea gaue o te agahala, kae ke koutou tuku koutou totonu ki te Atua, o hage ko ni tagata mauli kua hao mai te mate, pea ke kotou momoli ki te Atua okotou koga sino o hage ko ni mea gaue a te maonioni. 14Koteuhi e mole mau anai e te agahala he pule kia koutou, koteuhi e mole kei kotou nofo i te lao, kae i te kalasia.
15E a koa! Pe e tou agahala anai koteuhi e mole kei tou nofo i te lao, kae i te kalasia? Kailoa aupito!
16Pe e mole kotou iloi kapau kua koutou tuku koutou ke koutou tauhi ki he tahi o fakalogo kia ia, e kotou popula kia ia e koutou fakalogo ki ai: Pee ki te agahala ae e ina taki ki te mate, pee ki te fakalogo ae e ina taki ki te faitotonu? 17Kae ke tuku te u fakafetai ki te Atua, koteuhi, i te osi o takotou popula ki te agahala, kua kotou fakalogo i te loto ki te lekula o te akonaki ae nee tuku atu kia koutou. 18Kua osi koutou i te fakaateainai mai te agahala, kua kotou liliu o popula ki te faitotonu. 19E au palalau o hage ko he tagata, o tupu ko te gaegae o tokotou kakano. O hage ko takotou tuku okotou koga sino ke popula ki te mauli fakalialia mo te agakovi, o kotou kaku ai ki te mauli maveuveu, ke kotou tuku foki, i te temi nei, okotou koga sino ke popula ki te agatonu, ke kotou kaku ai ki te maonioni. 20Koteuhi, i te temi ae nee kotou popula ai ki te agahala, nee kotou ateaina mai te faitotonu. 21Kotea te u fua ae nee kotou mau? Ko ni fua ae kua kotou ufiufi ki ai i te temi nei. Koteuhi ko te fakaosiaga o te u mea aena, ko te mate. 22Kae i te temi nei, i takotou ateaina mai te agahala, o popula ki te Atua, e kotou mau te u fua o te maonioni pea ko te fakaosiaga ko te mauli heegata. 23Koteuhi ko te totogi o te agahala, ko te mate; kae ko te foaki noa o te Atua, ko te mauli heegata ia Sesu-Kilisito totatou Aliki.
ទើបបានជ្រើសរើសហើយ៖
Tohi a Paulo ki te kau LOMA 6: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
