EVASELIO A MATEO 27
27
Tuku o Sesu kia Pilato
1I te kei hegihegi o te aho, nee fono leva te kau pule faisakilifisio fuli mo te kau matuatua o te hahai o fakafehagai kia Sesu, ke tamatei ia ia. 2I te osi o tanatou haihai ia ia, nee natou ave leva ia ia kia Posio Pilato, te kovana.
Fakahemala noa a Sutasi
3Pea ko Sutasi, ae nee ina fakatau ia Sesu, i tana sio kua tautea ia ia ki te mate, nee fakahemala lahi leva ia ia, pea nee ina toe liufaki leva te u foi paaga siliva e tolugofulu ki te kau pule faisakilifisio pea mo te kau fakamatuatua, 4o ui: Kua au agahala, i taku fakatau te toto maa. Nee natou tali leva: Kotea tona uhiga mai kia matou? Ko te mea aia a au tona vakai! 5Nee si leva e Sutasi te u foi paaga siliva ki te fale tapu, kae mavae leva ia ia, pea nee alu leva ia ia, o tautau i tona kia. 6Nee tae leva e te kau pule faisakilifisio te paaga, o ui: E mole gafua ke tuku te paaga aeni ki te koloa tapu, koteuhi ko te totogi ia o te toto. 7Pea, hili o tanatou talaga, nee natou totogi leva aki te paaga aia te kele o te tagata faiipu, ke tanu ai te hahai matapule. 8Koia nee fakahigoa ai te kele aia, ko te kele o te toto, o kaku mai ki te aho nei. 9Pea nee fakahoko ai leva te mea ae nee fakaha fakatomua e Selemia, te polofeta: Nee natou too te u foi paaga siliva e tolugofulu, ko te lahi aia o te totogi o ia ae nee natou fakafuafua, pea nee fuafua e te u fanau a Iselaele; 10pea nee natou foaki te paaga aia ke totogi ai te kele o te tagata faiipu, o hage ko tona fakatotonu mai kia au e te Aliki.
Sesu ia mua o Pilato
11Nee tuu leva ia Sesu ia mua o te kovana. Nee fehui leva e te kovana kia ia, o ui: Pe ko te hau koe o te kau Sutea? Nee tali leva e Sesu kia ia: Kua ke tala ia ia. 12Kae nee mole pe ina tali ki he mea i te u fakahalai a te kau pule faisakilifisio mo te kau matua. 13Pea nee ui leva e Pilato kia ia: Pe e mole ke logo ki te lahi o te u mea e natou fakahalai ai koe? 14Pea nee mole tali leva e Sesu ki he palalau pe e tahi o uhiga mo ia, pea nee ofolele aupito te kovana i te mea aia.
Ko Sesu pee ko Palapasi
15I te aho lahi fuli o te Pasikate, nee fai mahani e te kovana, e ina fakaateainai he tagata pilisoni e tahi, ae e kole ake e te hahai. 16Pea nee natou mau he tagata pilisoni iloa, nee higoa ko Palapasi. 17Nee natou fakatahi age leva kia Pilato, pea nee ina ui leva kia natou: Ko ai e kotou loto ke tuku atu, ko Palapasi pee ko Sesu, ae e higoa ko Kilisito? 18Koteuhi nee ina iloi, ko tonatou maheka ae nee natou fakatau ai Sesu. 19I tana kei nofo i te fakamaauga, nee fekau e tona ohoana ke fakaha kia ia: Ke aua pe naa i ai he mea i te vahaa o ou mo te tagata agatonu aia; koteuhi i te aho nei nee au mamahi lahi i taku moemisi o tupu ko ia. 20Kae nee faigai leva e te kau pule faisakilifisio mo te kau matua ki te hahai ke natou kole ia Palapasi, kae ke tamatei ia Sesu. 21Nee palalau leva te kovana, o ui kia natou: Ko ai ia naua e kotou loto ke au fakaateainai atu kia koutou? Nee natou tali leva: Palapasi. 22Nee ui leva e Pilato kia natou: Pe kotea anai te mea ke au fai kia Sesu, ae e higoa ko Kilisito? Nee natou tali fuli leva: Ke tutuki ia ia i te koluse! 23Pea nee ui leva e te kovana: Pe kotea te kovi nee ina fai? Kae nee natou toe lesili kalaga fakamalohi leva: Ke tutuki ia ia i te koluse! 24I te sio a Pilato e mole kei aoga he lea, kae kua kamata ke maveuveu, nee ina too leva he vai, pea nee fanofano leva ona nima ia mua o te hahai o ui: E au maa i te toto o te tagata agatonu aeni. Ko te mea aia a koutou pe tona vakai. 25Pea nee tali leva e te hahai katoa: Ke to tona toto kia matou mo amatou fanau!
26Pea nee fakaateaina leva e Pilato kia natou ia Palapasi; pea kia Sesu, i te osi o tona taofi ke haha ki ni akau, nee ina tuku leva ia ia ke tutuki i te koluse.
Kolona talatala o Sesu; taki ki Kolokota
27Nee taki leva ia Sesu e te kau solia a te kovana ki te peletolio, pea nee natou fakatahii leva te kau solia katoa o takatakai ia ia. 28Nee natou tatala leva ona kofu ia ia, kae natou fakakofu leva ia ia aki he pulupulu kula. 29Pea nee natou fau leva he kolona talatala, ae nee natou hili leva ki tona ulu, pea nee natou fakatoo leva ki tona nima matau he foi kaho; pea osi, nee natou tuutuli i ona mua, nee natou nukinuki kia ia, o ui: Malo, hau o te kau Sutea! 30Pea nee natou anuanuhi ia ia, pea nee natou too te foi kaho, o haha aki tona ulu. 31I te osi o tanatou nukinuki kia ia, nee natou tatala leva ia ia te pulupulu, kae nee natou toe fakatui leva kia ia ona kofu, pea nee natou ave leva ia ia ke tutuki i te koluse.
Tutuki o Sesu ki te koluse
32I tanatou hu ki tua, nee natou felavei leva mo he tagata mai Silene, nee higoa ko Simone, pea nee natou fakamalohii leva ia ia ke ina amo te koluse o Sesu. 33I tanatou kaku leva ki te kogamea nee higoa ko Kolokota, ko tona uhiga kogamea o te ulupoko, 34nee natou foaki leva kia ia he vino nee fio aki te ahu ke ina inu; kae, i tana ahiahii leva ia ia, nee mole loto leva ia ia ke inu.
35I te osi o tanatou tutuki ia ia ki te koluse, nee natou vahe leva ona kofu ia natou, o mate aki te toho, o tupu ke fakahoko ai te mea nee fakaha fakatomua e te polofeta: Nee natou vahe oku kofu, pea nee natou mate aki te toho toku pulupulu. 36Pea nee natou nonofo leva ki lalo, o leoleo ia ia.
37O tupu ke iloi te tupuaga o tona mate, nee tohi leva i oluga o tona ulu: Ko ia aeni ko Sesu, te hau o te kau Sutea. 38Nee tutuki fakatahi leva mo ia ni tagata kaihaa e toko lua, ko te tahi i tona fahai matau, pea ko te tahi i tona fahai hema.
39Ko natou nee fakalaka i ai nee natou nukinuki kia ia, pea nee natou kalo onatou ulu, 40o ui: Ia koe ae e ke maumaui te fale tapu, pea e ke toe fakatuu ia ia i ni aho e tolu, haofaki ia koe totonu! Pea kapau ko te Alo ia koe o te Atua, hifo mai te koluse ki lalo! 41Ko te kau pule faisakilifisio, fakatahi mo te kau sekelipa pea mo te kau matua, nee natou nukinuki foki kia ia, o ui: 42Nee ina haofaki ni ihi age, pea e mole feala tana haofaki ia ia totonu! Kapau ko te hau ia ia o Iselaele, ke hifo ia ia mai te koluse, pea e matou tui anai kia ia! 43Nee falala ia ia ki te Atua, ke haofaki ia ia e te Atua i te lakaga aeni, mo kapau e ofa te Atua kia ia. Koteuhi nee ina ui: Ko te Alo au o te Atua! 44Ko te u tagata kaihaa, ae nee kolusifikoi fakatahi mo ia, nee tatau osi, nee na laukovi kia ia.
Mate o Sesu
45Mai te hoata o kaku ki te hola tolu hili hoata, nee fakapouli leva te kele katoa. 46Pea i te hola tolu ape, nee kalaga leva ia Sesu o leo lahi: Eli, Eli, lama sabachthani! ko tona uhiga: Sioku Atua, sioku Atua, kotea nee ke siaki ai au? 47Ko ihi ia natou ae nee tutuu i ai, i tanatou logo kia ia, nee ui leva: E kalaga ia ia kia Elia! 48I te lakaga pe aia, nee lele leva he tahi o natou o too he foi unu, ae nee ina fakahuhua aki te vinika, pea, nee ina tuii ki he foi kaho, nee ina foaki leva kia ia ke inu. 49Kae ko natou ake ae nee natou ui: Tuku, tou sio mua pe e hau anai ia Elia o haofaki ia ia. 50Nee toe kalaga leva Sesu o leo lahi, pea nee ina tuku leva tona laumalie.
51Pea koeni, nee mahae lua leva te lito o te fale tapu, mai oluga ki lalo, nee mafuike leva te kele, nee mafaafaa leva te u utu, 52nee ava leva te u tanuma, nee toe tuuake leva te toko lahi o te kau sagato nee kua mamate. 53Nee natou mavae leva mai te u tanuma, pea nee natou ulu leva ki te kolo tapu, i te osi o te toe tuuake a Sesu, pea nee natou ha leva ki te toko lahi.
54Ko te setulio mo natou ae nee nonofo mo ia o leoleo ia Sesu, i tanatou sio ki te mafuike pea mo te u mea fuli kua hoko, nee natou matataku lahi leva, o ui: E mooni osi, ko te tagata aeni ko te Alo ia o te Atua.
55Nee i ai i hena ni fafine kaugamalie ae nee sisio mei mamao, pea nee natou mulimuli ia Sesu mai Kalilea, o tauhi kia ia. 56Nee kau i te u fafine aia ia Malia mai Maketala, mo Malia, fae a Sakopo mo Sosefo, pea mo te fae a te u foha o Sepeteo.
Tanu o Sesu
57I te hau a te afiafi, nee tau mai leva he tagata maukoloa mai Alimatea, nee higoa ko Sosefo, ko he tisipulo foki a Sesu. 58Nee alu ia ia kia Pilato, o kole te sino o Sesu. Pea nee fakatotonu leva e Pilato ke foaki age kia ia te sino o Sesu. 59Nee too leva e Sosefo te sino, o kofu aki he kie hina, 60pea nee ina tuku leva ia ki he tanuma foou, ae nee keli i te utu. Pea nee ina fuli leva he maka lahi ki te mua tanuma, pea nee alu leva ia ia. 61Nee nonofo i ai Malia mai Maketala mo te tahi age Malia, o sisio ki te tanuma.
Fakamaumau mo te leo o te tanuma
62I te pogipogi ake, ko te aho aia e teuteu ai ki te sapato, nee olo leva te kau pule faisakilifisio mo te kau faliseo, kia Pilato, 63o ui: Aliki, e matou manatui nee tala e te tagata kaka aia i tana kei mauli: I te osi o aho e tolu, e au toe tuuake anai. 64Koia ke ke fakatotonu ke leo te tanuma o kaku ki te tolu aho, o tupu ke aua naa omai ana tisipulo o kaihaa te sino, pea ke natou ui ki te hahai: Kua toe tuuake ia ia mai te kau mate. E kovi age anai te kaka aia i te uluaki. 65Nee ui leva e Pilato kia natou: E i ai takotou kau leo, kotou olo o leo ia ia o hage ko te mea ae e kotou loto ki ai. 66Nee natou olo leva, pea nee natou fakatuu leva he kau leo ki te tanuma, i te osi o tanatou fakamaumau aki te sima te maka pupunu.
ទើបបានជ្រើសរើសហើយ៖
EVASELIO A MATEO 27: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
EVASELIO A MATEO 27
27
Tuku o Sesu kia Pilato
1I te kei hegihegi o te aho, nee fono leva te kau pule faisakilifisio fuli mo te kau matuatua o te hahai o fakafehagai kia Sesu, ke tamatei ia ia. 2I te osi o tanatou haihai ia ia, nee natou ave leva ia ia kia Posio Pilato, te kovana.
Fakahemala noa a Sutasi
3Pea ko Sutasi, ae nee ina fakatau ia Sesu, i tana sio kua tautea ia ia ki te mate, nee fakahemala lahi leva ia ia, pea nee ina toe liufaki leva te u foi paaga siliva e tolugofulu ki te kau pule faisakilifisio pea mo te kau fakamatuatua, 4o ui: Kua au agahala, i taku fakatau te toto maa. Nee natou tali leva: Kotea tona uhiga mai kia matou? Ko te mea aia a au tona vakai! 5Nee si leva e Sutasi te u foi paaga siliva ki te fale tapu, kae mavae leva ia ia, pea nee alu leva ia ia, o tautau i tona kia. 6Nee tae leva e te kau pule faisakilifisio te paaga, o ui: E mole gafua ke tuku te paaga aeni ki te koloa tapu, koteuhi ko te totogi ia o te toto. 7Pea, hili o tanatou talaga, nee natou totogi leva aki te paaga aia te kele o te tagata faiipu, ke tanu ai te hahai matapule. 8Koia nee fakahigoa ai te kele aia, ko te kele o te toto, o kaku mai ki te aho nei. 9Pea nee fakahoko ai leva te mea ae nee fakaha fakatomua e Selemia, te polofeta: Nee natou too te u foi paaga siliva e tolugofulu, ko te lahi aia o te totogi o ia ae nee natou fakafuafua, pea nee fuafua e te u fanau a Iselaele; 10pea nee natou foaki te paaga aia ke totogi ai te kele o te tagata faiipu, o hage ko tona fakatotonu mai kia au e te Aliki.
Sesu ia mua o Pilato
11Nee tuu leva ia Sesu ia mua o te kovana. Nee fehui leva e te kovana kia ia, o ui: Pe ko te hau koe o te kau Sutea? Nee tali leva e Sesu kia ia: Kua ke tala ia ia. 12Kae nee mole pe ina tali ki he mea i te u fakahalai a te kau pule faisakilifisio mo te kau matua. 13Pea nee ui leva e Pilato kia ia: Pe e mole ke logo ki te lahi o te u mea e natou fakahalai ai koe? 14Pea nee mole tali leva e Sesu ki he palalau pe e tahi o uhiga mo ia, pea nee ofolele aupito te kovana i te mea aia.
Ko Sesu pee ko Palapasi
15I te aho lahi fuli o te Pasikate, nee fai mahani e te kovana, e ina fakaateainai he tagata pilisoni e tahi, ae e kole ake e te hahai. 16Pea nee natou mau he tagata pilisoni iloa, nee higoa ko Palapasi. 17Nee natou fakatahi age leva kia Pilato, pea nee ina ui leva kia natou: Ko ai e kotou loto ke tuku atu, ko Palapasi pee ko Sesu, ae e higoa ko Kilisito? 18Koteuhi nee ina iloi, ko tonatou maheka ae nee natou fakatau ai Sesu. 19I tana kei nofo i te fakamaauga, nee fekau e tona ohoana ke fakaha kia ia: Ke aua pe naa i ai he mea i te vahaa o ou mo te tagata agatonu aia; koteuhi i te aho nei nee au mamahi lahi i taku moemisi o tupu ko ia. 20Kae nee faigai leva e te kau pule faisakilifisio mo te kau matua ki te hahai ke natou kole ia Palapasi, kae ke tamatei ia Sesu. 21Nee palalau leva te kovana, o ui kia natou: Ko ai ia naua e kotou loto ke au fakaateainai atu kia koutou? Nee natou tali leva: Palapasi. 22Nee ui leva e Pilato kia natou: Pe kotea anai te mea ke au fai kia Sesu, ae e higoa ko Kilisito? Nee natou tali fuli leva: Ke tutuki ia ia i te koluse! 23Pea nee ui leva e te kovana: Pe kotea te kovi nee ina fai? Kae nee natou toe lesili kalaga fakamalohi leva: Ke tutuki ia ia i te koluse! 24I te sio a Pilato e mole kei aoga he lea, kae kua kamata ke maveuveu, nee ina too leva he vai, pea nee fanofano leva ona nima ia mua o te hahai o ui: E au maa i te toto o te tagata agatonu aeni. Ko te mea aia a koutou pe tona vakai. 25Pea nee tali leva e te hahai katoa: Ke to tona toto kia matou mo amatou fanau!
26Pea nee fakaateaina leva e Pilato kia natou ia Palapasi; pea kia Sesu, i te osi o tona taofi ke haha ki ni akau, nee ina tuku leva ia ia ke tutuki i te koluse.
Kolona talatala o Sesu; taki ki Kolokota
27Nee taki leva ia Sesu e te kau solia a te kovana ki te peletolio, pea nee natou fakatahii leva te kau solia katoa o takatakai ia ia. 28Nee natou tatala leva ona kofu ia ia, kae natou fakakofu leva ia ia aki he pulupulu kula. 29Pea nee natou fau leva he kolona talatala, ae nee natou hili leva ki tona ulu, pea nee natou fakatoo leva ki tona nima matau he foi kaho; pea osi, nee natou tuutuli i ona mua, nee natou nukinuki kia ia, o ui: Malo, hau o te kau Sutea! 30Pea nee natou anuanuhi ia ia, pea nee natou too te foi kaho, o haha aki tona ulu. 31I te osi o tanatou nukinuki kia ia, nee natou tatala leva ia ia te pulupulu, kae nee natou toe fakatui leva kia ia ona kofu, pea nee natou ave leva ia ia ke tutuki i te koluse.
Tutuki o Sesu ki te koluse
32I tanatou hu ki tua, nee natou felavei leva mo he tagata mai Silene, nee higoa ko Simone, pea nee natou fakamalohii leva ia ia ke ina amo te koluse o Sesu. 33I tanatou kaku leva ki te kogamea nee higoa ko Kolokota, ko tona uhiga kogamea o te ulupoko, 34nee natou foaki leva kia ia he vino nee fio aki te ahu ke ina inu; kae, i tana ahiahii leva ia ia, nee mole loto leva ia ia ke inu.
35I te osi o tanatou tutuki ia ia ki te koluse, nee natou vahe leva ona kofu ia natou, o mate aki te toho, o tupu ke fakahoko ai te mea nee fakaha fakatomua e te polofeta: Nee natou vahe oku kofu, pea nee natou mate aki te toho toku pulupulu. 36Pea nee natou nonofo leva ki lalo, o leoleo ia ia.
37O tupu ke iloi te tupuaga o tona mate, nee tohi leva i oluga o tona ulu: Ko ia aeni ko Sesu, te hau o te kau Sutea. 38Nee tutuki fakatahi leva mo ia ni tagata kaihaa e toko lua, ko te tahi i tona fahai matau, pea ko te tahi i tona fahai hema.
39Ko natou nee fakalaka i ai nee natou nukinuki kia ia, pea nee natou kalo onatou ulu, 40o ui: Ia koe ae e ke maumaui te fale tapu, pea e ke toe fakatuu ia ia i ni aho e tolu, haofaki ia koe totonu! Pea kapau ko te Alo ia koe o te Atua, hifo mai te koluse ki lalo! 41Ko te kau pule faisakilifisio, fakatahi mo te kau sekelipa pea mo te kau matua, nee natou nukinuki foki kia ia, o ui: 42Nee ina haofaki ni ihi age, pea e mole feala tana haofaki ia ia totonu! Kapau ko te hau ia ia o Iselaele, ke hifo ia ia mai te koluse, pea e matou tui anai kia ia! 43Nee falala ia ia ki te Atua, ke haofaki ia ia e te Atua i te lakaga aeni, mo kapau e ofa te Atua kia ia. Koteuhi nee ina ui: Ko te Alo au o te Atua! 44Ko te u tagata kaihaa, ae nee kolusifikoi fakatahi mo ia, nee tatau osi, nee na laukovi kia ia.
Mate o Sesu
45Mai te hoata o kaku ki te hola tolu hili hoata, nee fakapouli leva te kele katoa. 46Pea i te hola tolu ape, nee kalaga leva ia Sesu o leo lahi: Eli, Eli, lama sabachthani! ko tona uhiga: Sioku Atua, sioku Atua, kotea nee ke siaki ai au? 47Ko ihi ia natou ae nee tutuu i ai, i tanatou logo kia ia, nee ui leva: E kalaga ia ia kia Elia! 48I te lakaga pe aia, nee lele leva he tahi o natou o too he foi unu, ae nee ina fakahuhua aki te vinika, pea, nee ina tuii ki he foi kaho, nee ina foaki leva kia ia ke inu. 49Kae ko natou ake ae nee natou ui: Tuku, tou sio mua pe e hau anai ia Elia o haofaki ia ia. 50Nee toe kalaga leva Sesu o leo lahi, pea nee ina tuku leva tona laumalie.
51Pea koeni, nee mahae lua leva te lito o te fale tapu, mai oluga ki lalo, nee mafuike leva te kele, nee mafaafaa leva te u utu, 52nee ava leva te u tanuma, nee toe tuuake leva te toko lahi o te kau sagato nee kua mamate. 53Nee natou mavae leva mai te u tanuma, pea nee natou ulu leva ki te kolo tapu, i te osi o te toe tuuake a Sesu, pea nee natou ha leva ki te toko lahi.
54Ko te setulio mo natou ae nee nonofo mo ia o leoleo ia Sesu, i tanatou sio ki te mafuike pea mo te u mea fuli kua hoko, nee natou matataku lahi leva, o ui: E mooni osi, ko te tagata aeni ko te Alo ia o te Atua.
55Nee i ai i hena ni fafine kaugamalie ae nee sisio mei mamao, pea nee natou mulimuli ia Sesu mai Kalilea, o tauhi kia ia. 56Nee kau i te u fafine aia ia Malia mai Maketala, mo Malia, fae a Sakopo mo Sosefo, pea mo te fae a te u foha o Sepeteo.
Tanu o Sesu
57I te hau a te afiafi, nee tau mai leva he tagata maukoloa mai Alimatea, nee higoa ko Sosefo, ko he tisipulo foki a Sesu. 58Nee alu ia ia kia Pilato, o kole te sino o Sesu. Pea nee fakatotonu leva e Pilato ke foaki age kia ia te sino o Sesu. 59Nee too leva e Sosefo te sino, o kofu aki he kie hina, 60pea nee ina tuku leva ia ki he tanuma foou, ae nee keli i te utu. Pea nee ina fuli leva he maka lahi ki te mua tanuma, pea nee alu leva ia ia. 61Nee nonofo i ai Malia mai Maketala mo te tahi age Malia, o sisio ki te tanuma.
Fakamaumau mo te leo o te tanuma
62I te pogipogi ake, ko te aho aia e teuteu ai ki te sapato, nee olo leva te kau pule faisakilifisio mo te kau faliseo, kia Pilato, 63o ui: Aliki, e matou manatui nee tala e te tagata kaka aia i tana kei mauli: I te osi o aho e tolu, e au toe tuuake anai. 64Koia ke ke fakatotonu ke leo te tanuma o kaku ki te tolu aho, o tupu ke aua naa omai ana tisipulo o kaihaa te sino, pea ke natou ui ki te hahai: Kua toe tuuake ia ia mai te kau mate. E kovi age anai te kaka aia i te uluaki. 65Nee ui leva e Pilato kia natou: E i ai takotou kau leo, kotou olo o leo ia ia o hage ko te mea ae e kotou loto ki ai. 66Nee natou olo leva, pea nee natou fakatuu leva he kau leo ki te tanuma, i te osi o tanatou fakamaumau aki te sima te maka pupunu.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland