EVASELIO A MATEO 24
24
Ko te fale tapu e maumaui anai
1Pea i te ulu leva a Sesu ki tua mai te fale tapu, nee fakaoviovi age leva ana tisipulo kia ia, o vavalo kia ia te u mataga o te fale tapu. 2Kae nee ina ui leva kia natou: E kotou sisio ki te u mea fuli aia? E au ui mooni atu kia koutou, e mole toe mau anai i heni he maka i oluga o he maka, ae nee heeki li ki lalo.
Tona temi hoko mo tona fakailoga
3Nee lala leva ia ia i te mouga o Oliveto. Pea nee omai ateaina leva te kau tisipulo, o fai kia ia te fehui aeni: Fakaha mai kia matou, pe ko te temi fea ae e hoko ai anai te mea aia, pea kotea anai te fakailoga o tau toe liliu mai pea mo te fakaosi o te malamanei?
Ko te u temi fakaosi
4Nee tali leva e Sesu kia natou: Kotou tokaga pe naa kakaai koutou e he tahi. 5Koteuhi e omai anai he toko lahi i toku huafa, o ui: Ko au ko Kilisito. Pea e natou fakahehei anai ni hahai kaugamalie. 6E kotou logo anai ki te palalaui o ni tau mo ni teuteu tau: Kotou tokaga naa kotou hoha, koteuhi e tonu ke hoko te u mea aia. Kae e mole ko te aho fakamuli anai aia. 7E malaga ake anai he puleaga o fakafegai ki he tahi puleaga, pea mo he puleaga fakahau o fakafehagai ki he tahi puleaga fakahau; pea e i ai anai, i te u kogamea kehekehe, ni hoge mo ni mafuike. 8Kae ko te u mea fuli aia ko te kamataaga pe ia o te u mamahi. 9Pea e tuku anai koutou ke fakatagai, pea e tamatei anai koutou, pea e fehiainai anai koutou e te u puleaga fuli, o tupu ko toku huafa. 10Pea e higa anai te toko lahi, pea e natou fekakaaki anai ia natou pea mo fehihiaaki anai ia natou. 11E mafuta anai he kau polofeta loi toko lahi, pea e natou fakahehei anai ni hahai toko lahi. 12Pea, o tupu ko te asilisili mafola o te agahala, e momoko anai te ofa o te toko lahi. 13Kae ko ae e kataki fualoa anai o kaku ki te fakaosi, e haofaki anai. 14E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.
Te mamahi lahi
15Koia ka kotou sio anai kua tuu i te potu taputapu ia ia ae e higoa ko te fakalialia o te malaia, ae nee palalau ki ai te polofeta ko Taniela, ke tokaga ia ia ae e lau tohi! 16Pea ko natou ae e nofo anai i Sutea ke feholaki ki te u mouga; 17ko ae e nofo anai i te tuapatu ke aua naa hifo ia ia, o too he mea i tona fale; 18pea ko ae e nofo anai i te u gaueaga ke aua naa toe liliu ia ia ki muli, o too tona pulupulu. 19Malaia ki te u fafine ae e faitatama anai pea mo natou ae e fakahuhu toe anai i te u aho aia! 20Kotou faikole ke aua naa hoko takotou feholaki i te temi momoko pee ko he aho sapato. 21Koteuhi, i te u aho aia, e hoko anai he mamahi lahi, ae e mole hona tatau talu mai te kamataaga o te malamanei o kaku mai ki te aho nei, pea e mole toe mau anai hona tatau i he aho. 22Pea kapau nee mole fakasiisii te u aho aena, e mole haofaki anai he tahi; kae o tupu ko te kau filifiliia, e fakasiisii anai te u aho aia. 23Kapau e ui atu e he tahi kia koutou: Ko te Kilisito e i heni, pee: E i he ia ia, aua naa kotou tui ki ai. 24Koteuhi e mafuta anai ni kilisito loi mo ni polofeta loi; pea e natou fai anai ni fakailoga lalahi mo ni milakulo, ke fakahehei ai, mo kapau nee feala, mo natou foki ae nee filifili. 25Koeni, kua au fakaha fakatomua ia ia kia koutou. 26Kapau e ui atu anai kia koutou: Koeni, e nofo ia ia i te toafa, aua naa kotou olo ki ai; koeni, e nofo ia ia i te u kogafale, aua naa kotou tui ki ai. 27Koteuhi, o hage ko te tapa o te hila mai te hopoaga o te laa o ha i te toaga o te laa, e fena anai te toe liliu mai o te Foha o te tagata. 28I he kogamea pe e mau ai he sino mate, i hena e tanaki anai te u votu*.
Toe liliu mai o te hau ki te kele i te osi o te tautea
29I te osi pe o te u aho mamahi aia, e fakapouli anai te laa, pea e mole toe malama anai te mahina, pea e fetoki anai te u fetuu mai te lagi, pea e galulu anai te u malohi o te atu lagi. 30Pea e ha mai anai te fakailoga o te Foha o te tagata i te lagi, pea e fetagihi anai te u faahiga fuli o te kele, pea e natou sio anai ki te Foha o te tagata e hau i te u ao o te lagi mo he malohi pea mo he kololia lahi. 31E ina fekaui anai ana aselo mo te fakatagi pupuhi malohi, pea e natou tanaki anai tana kau filifiliia maia fahai matagi e fa, mai ae potupotu o te lagi ki ae potupotu.
Folafola o te fiki
32Kotou ako mai te folafola fakatata o te fuu fiki. Ka kamata malulu ona vaa, pea mo hohomo ona lau, e kotou iloi kua ovi mai te temi vevela. 33Pea e fena foki, moka kotou sisio anai ki te u mea fuli aia, ke kotou iloi kua ovi mai te Foha o te tagata, i te matapa. 34E au ui mooni atu kia koutou, e mole puli anai te taitupu aeni, kae e heeki hoko te u mea fuli aia. 35E puli anai te lagi mo te kele, kae e mole pe puli anai aku folafola.
Ke alaala
36O uhiga mo te aho pea mo te hola, e mole iloi e he tahi, pee ko te kau aselo i te atu lagi, pee ko te Alo, kae ko te Tamai toko tahi. 37Ko te mea ae nee hoko i te temi o Noe e toe hoko anai i te toe liliu mai o te Foha o te tagata. 38Koteuhi, i te u aho i mua o te lomaki, nee kai mo inu te u tagata, pea nee natou ohoana mo fakaohoana anatou fanau, o kaku ki te aho nee ulu ai leva ia Noe ki te aleka; 39pea nee mole pe natou amanaki ki he mea, o kaku ki te to a te lomaki, o ave ia natou fuli: E toe fena anai i te toe liliu mai o te Foha o te tagata. 40Koia, ia tagata e toko lua e nofo anai i he gaueaga, e too anai te tahi kae e tuku anai te tahi; 41ia fafine e toko lua ae e na fakamalu te fulumeto i te maka, e too anai te tahi kae e tuku anai te tahi. 42Koia kotou alaala, koteuhi e mole kotou iloi pe ko te aho fea e hau ai anai tokotou Aliki. 43Ke kotou iloi lelei te mea aia, kapau nee iloi e te pule o te api te hola o te pouli ae e tonu ke hau ai te tagata kaihaa, e alaala anai ia ia pea e mole ina tuku anai ke puuhi tona api. 44Pea ko koutou foki, ke kotou nofo teuteu, koteuhi e hau anai te Foha o te tagata i te hola ae e mole kotou talitali ki ai.
45Pe ko ai anai te tagata faifekau agatonu mo poto, ae kua fakanofo e tona pule ki tana hahai, ke ina foaki kia natou te meakai i tona temi totonu? 46Manuia te tagata faifekau aia, moka kaku mai tona pule, o mau anai ia ia e fai feia! 47E au ui mooni atu kia koutou, e ina fakanofo anai ia ia ke pule ki ona koloa fuli. 48Kae kapau ko he faifekau agakovi ia ia, ae e ina ui i tona loto: E tuai mai toku pule, 49pea kapau e ina kamata fue anai ona kaumea, pea e kai anai mo inu anai ia ia mo te kau konana, 50e hau anai te pule o te faifekau aia i te aho ae e mole amanaki ia ia ki ai pea mo te hola ae e mole ina iloi. 51Pea e ina tautea mamafa anai te tagata faifekau aia, pea e ina foaki anai kia ia tona vaega fakatahi mo te kau malualoi: Ko te kogamea aia e i ai anai ni tagi mo ni gugu o nifo.
ទើបបានជ្រើសរើសហើយ៖
EVASELIO A MATEO 24: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
