EVASELIO A MATEO 23
23
Valoki o te kau sekelipa mo te kau faliseo
1Pea nee palalau leva ia Sesu ki te hahai pea mo ana tisipulo, o ui:
2E heheka te kau sekelipa mo te kau faliseo i te hekaaga o Moisese. 3Koia ke kotou fai pea mo kotou taupau te u mea fuli ae e natou tala atu kia koutou; kae aua naa kotou mulimuli ki anatou gaue. Koteuhi e natou palalau, kae e mole natou fai. 4E natou hai ni kavega mamafa, o hili ki te u fugauma o te u tagata, kae e mole natou loto ke fafa ki ai honatou tuhi e tahi. 5E natou fai anatou gaue fuli ke sioi e te u tagata. Koia e natou ave ai ni tukuaga tohi laulalahi, pea mo ni tapai kie loloa i onatou kofu. 6E natou manako ki te uluaki nofoaga i te u kaitahi, pea mo te u uluaki hekaaga i te u sinakoka; 7e natou loto ke fakamalo age kia natou i te u kogamea hahai, pea ke too e te u tagata kia natou te higoa ko Lapi, pule. 8Kae ko koutou, aua naa fakahigoa koutou ko Lapi, koteuhi ko he foi toko tahi ko tokotou Pule, pea ko te u tehina fuli koutou. 9Pea aua pe naa kotou fakahigoa he tahi i te kele ko takotou tamai; koteuhi ko he foi toko tahi ko takotou Tamai, ia ae e nofo i te atu lagi. 10Aua naa fakahigoa koutou ko ni takitaki; koteuhi ko he foi toko tahi ko tokotou takitaki, ko Kilisito. 11Ko ae e lahi osi ia koutou e liliu anai ko takotou faifekau. 12Ko ae e fia malaga anai ki oluga e tuku anai ia ia ki lalo, pea ko ae e fakamalalo e hiki anai ia ia ki oluga.
Malaia o te kau sekelipa mo te kau faliseo
13Malaia kia koutou, kau sekelipa mo te kau faliseo malualoi! Koteuhi e kotou pupunu ki te tagata te puleaga o te atu lagi; e mole kotou ulu ki ai koutou totonu, pea e mole kotou tuku ke ulu ki ai natou ae e fia ulu.
14Malaia kia koutou, kau sekelipa mo te kau faliseo malualoi! Koteuhi e koutou foloko te u fale o te u finetaka, pea e koutou fai i tua ni kole loloa; koia e fakamaaui anai koutou o toe mamafa age.
15Malaia kia koutou, kau sekelipa mo te kau faliseo malualoi! Koteuhi e koutou feleleaki i te tai mo te kele o kumi he tahi ke tafoki atu kia koutou; pea ka tafoki anai he tahi, e kotou fakaliliu ia ia ko he foha o te seene o tua lua age tona kovi ia koutou.
16Malaia kia koutou, kau takitaki o te u kivi, ae e ui: E mea noa mo kapau e fakapapau he tahi i te fale tapu. Kae kapau e fakapapau he tahi i te aulo o te fale tapu, kua maua ia ia. 17Kau vale pea mo kau kivi! Kofea te mea ae e mauhiga age, ko te aulo pee ko te fale tapu ae e ina fakatapui te aulo. 18E koutou toe tala foki, e mole lau mo kapau e fakapapau he tahi i te aletale; kae kapau e fakapapau he tahi i te molaga ae e tuku i oluga o te aletale, pea kua maua ia ia. 19Kau kivi! Kofea te mea ae e mauhiga age, ko te molaga pee ko te aletale ae e ina fakatapui te molaga? 20Ko ae e fakapapau i te aletale e fakapapau ia ia i te aletale pea mo te u mea fuli ae e hili i oluga; 21ko ae e fakapapau i te fale tapu e fakapapau ia ia i te fale tapu pea mo ia ae e nofo i ai; 22pea ko ae e fakapapau i te lagi e fakapapau i te hekaaga fakahau o te Atua pea mo ia ae e heka i ai.
23Malaia kia koutou, kau sekelipa mo te kau faliseo malualoi! Koteuhi e kotou totogi te vaega hogofulu o te menete*, mo te aneti*, mo te kumini*, kae e kotou tuku kehe te u mea mauhiga o te lao, te faitotonu, mo te manavaofa, pea mo te maonioni: Koena te u mea ae e tonu ke fai, pea e mole fakanoai foki mo te u mea ake ae. 24Kau takitaki kivi! E koutou too te nono kae kotou folo te kamelo.
25Malaia kia koutou, kau sekelipa mo te kau faliseo malualoi! Koteuhi e kotou fufulu ia tua o te ipu mo te pa, kae i loto e natou fonu i te u kaihaa mo te u agakovi. 26Kau faliseo kivi, uluaki fufulu mua ia loto o te ipu mo te pa, o tupu ke liliu leva ia tua o maa.
27Malaia kia koutou, kau sekelipa mo te kau faliseo malualoi! Koteuhi e kotou hage ko ni tanuma hihina, ae e ha mai i tua e matalelei, kae i loto, e kotou fonu i te u huii mate pea mo te u uli fuli. 28E toe fena foki mo koutou, i tua e kotou mata agatonu ki te u tagata, kae i loto e kotou fonu i te malualoi mo te agahala.
29Malaia kia koutou, kau sekelipa mo kau faliseo malualoi! Koteuhi e koutou fau te u tanuma o te kau polofeta, pea e kotou teuteui te u tanuma o te kau agatonu, 30pea e koutou ui: Kapau nee matou mauli i te temi o amatou tamai, nee mole matou kau mo natou o liligi te toto o te kau polofeta. 31E kotou fakamooni i hena kia koutou totonu, ko koutou ko te u foha o natou ae nee natou tamatei te kau polofeta. 32Koia e koutou fakafonu ai te ipu o akotou tamai. 33Tuuga gata, lanu o vipeli, e feafeai anai takotou hao mai te tautea o te seene*? 34Koia leva, koeni, e au fekaui atu kia koutou ni polofeta, ni tagata poto pea mo ni sekelipa. E kotou tamatei anai ni ihi, pea e kotou kolusifikoi anai ni ihi, pea e kotou haha anai ki ni akau ni ihi i okotou sinakoka, pea e kotou fakatagai anai natou mai te kolo ki te kolo, 35o tupu ke to kia koutou te toto maa katoa ae nee liligi i te kele, mai te toto o Apele ko te tagata agatonu o kaku ki te toto o Sakalia, foha o Palakia, ae nee kotou tamatei i te vaha o te fale tapu mo te aletale. 36E au ui mooni atu kia koutou, e to anai te u mea fuli aia ki te taitupu aeni.
Tagi a Sesu ki Selusalemi
37Selusalemi, Selusalemi, ia koe e ke tamatei te kau polofeta pea mo ke tuki makai natou ae nee fekaui atu kia koe, kua tua fia toku loto ke au fakatahii au fanau o hage ko he matua moa e ina fakatahii ona uhi i ona lalo pakakau, pea nee mole koutou loto ki ai! 38Koeni, e tuku lavaki anai tokotou fale kia koutou; 39koteuhi, e au ui atu kia koutou, e mole kotou toe sio anai kia au, o kaku ki takotou ui: Manuia ia ia ae e hau i te huafa o te Aliki!
ទើបបានជ្រើសរើសហើយ៖
EVASELIO A MATEO 23: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
