EVASELIO A MATEO 17
17
Fakaha o Sesu i tona kololia
1Nee hili leva ki ai ni aho e ono, pea nee too leva e Sesu ia Petelo, mo Sakopo, mo Soane, tona tehina, pea nee ina ave leva natou ki he potu lavaki i te mouga maoluga. 2Nee fetogi fofoga leva ia ia i onatou mua; nee gigila leva ona mata o hage ko te laa, pea nee hihina leva ona kofu o hage ko te malama. 3Pea koeni, nee ha leva ia Moisese mo Elia kia natou, e na palalau mo ia. 4Nee palalau leva ia Petelo, o ui kia Sesu: Aliki, e lelei ke tou nonofo i heni; kapau e ke loto ki ai, e au fakatuu anai i heni ni falela e tolu, ko he tahi moo ou, ko he tahi moo Moisese, pea ko he tahi moo Elia. 5Nee kei lolotoga palalau ia ia, pea nee uufi leva natou e he ao gigila. Pea koeni, nee fakaha leva e he leo mai te ao te u folafola aeni: Ko ia aeni ko toku Alo ofaina, ae kua au tuku ki ai toku ofa katoa: Kotou fakalogo kia ia! 6I tanatou logo ki te leo aena, nee fetokahi leva te kau tisipulo o foohifo ki te kele, pea nee natou matataku lahi osi. 7Kae nee fakaovi age leva ia Sesu, o fafa kia natou, pea mo ui: Koutou tutuu ki oluga, aua takotou matataku! 8Nee tagaki ake leva onatou mata ki oluga, pea nee natou sio leva kia Sesu toko tahi pe.
9I tanatou lolotoga hifo mai te mouga, nee tuku leva e Sesu kia natou te fakatotonu aeni: Aua naa kotou palalau ki he tahi o uhiga mo te sio aia, o kaku ki te toe tuuake o te Foha o te tagata mai te kau mate.
10Nee fehui leva e te kau tisipulo kia ia: Kotea e ui ai e te kau sekelipa e maua ke hau mua ia Elia? 11Nee tali leva e Sesu: E mooni e maua ke hau mua ia Elia, o fakatokatoka te u mea fuli. 12Kae e au ui atu kia koutou kua hau ia Elia, pea nee mole natou iloi ia ia, kae nee natou fai kia ia o mulimuli ki te mea nee natou loto ki ai. E toe mamahi fena anai te Foha o te tagata maia natou. 13Pea nee mahino leva te kau tisipulo nee palalau ia ia kia natou o uhiga mo Soane-Patita.
Noa o te u tisipulo; Mafimafi o Sesu
14I tanatou kaku leva ki te hahai, nee hau leva he tagata o tuutuli ia mua o Sesu, o ui: 15Aliki, ofa mai ki toku foha, ae e mahaki ulu, pea e mamahi kovi osi; e tau to ia ia ki te afi pea mo te vai. 16Nee au aumai ia ia ki au tisipulo, pea nee mole feala ke natou fakamauli ia ia. 17Nee tali leva e Sesu: Lanu tui gataa mo agafakalialia, e kaku anai ki afea taku nofo mo koutou? E kaku anai ki afea taku kataki kia koutou? Koutou aumai ia ia ki heni. 18Nee lea malohi leva Sesu ki te temonio, ae nee mavae leva ia ia, pea nee mauli leva te toe i te hola pe aena.
19Pea nee fakaoviovi age leva te kau tisipulo kia Sesu, pea nee natou ui leva kia ia i tanatou ateaina: Kotea nee mole feala ai ke matou kapu te temonio aia? 20Nee ui leva e Sesu kia natou: E tupu ko takotou tui gataa. E au ui mooni atu kia koutou, kapau e kotou mau he tui o hage ko he fuai sinapi, e kotou ui anai ki te mouga aena: Mataaki i heni ki he, pea e mataaki anai ia ia, e mole toe faigataa anai he mea kia koutou. 21Kae ko te faahiga temonio aena e hoki mavae pe ia ia aki te faikole mo te sesunio.
22I te lolotoga o tanatou feoloaki i Kalilea, nee ui leva e Sesu kia natou: E maua ke tuku te Foha o te tagata kia nima o te u tagata; 23e natou tamatei anai ia ia, pea e toe tuuake anai ia ia i te tolu aho. Nee natou loto mamahi lahi osi leva.
Te foi piesi i te gutu o he ika
24I tanatou kaku leva ki Kafanaume, ko natou ae nee natou tae te u foi talame* e lua nee palalau leva kia Petelo, o ui kia ia: Pe e mole li e tokotou pule te u foi talame e lua? 25Nee ina ui leva: Ei. Pea i tana ulu leva ki te fale, nee taofi leva ia ia e Sesu, o ui kia ia: Kotea tau manatu, Simone? Ko te u hau o te malamanei, pe e natou tae te u maua mo te u tukuhau mai fea? Mai onatou foha, pee mai ni hahai kehe? 26Nee ui leva e Petelo kia ia: Mai ni hahai kehe. Nee tali leva e Sesu kia ia: E ateaina foki te u foha. 27Kae, o tupu ke aua naa natou higa, alu ki te tai, o li te matau, pea ke toho mai te uluaki ika ae ka hau anai; avahi tona gutu, pea e ke mau anai he foi setatele*. Too ia ia, pea ke foaki ia ia kia natou ma aku mo koe.
ទើបបានជ្រើសរើសហើយ៖
EVASELIO A MATEO 17: WB2011
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland