EVASELIO A MATEO 16
16
Valoki ki te kau faliseo kivi
1Nee olo age leva te kau faliseo mo te kau Satuseo o fakafelavei kia Sesu, pea o tupu ke natou ahiahii ia ia, nee natou kole leva kia ia ke ina fakasio natou ki he fakailoga ae e hau mai te lagi. 2Nee tali leva e Sesu kia natou: I te afiafi, e koutou ui: E afua anai, koteuhi e kula te lagi; pea i te uhu: 3E tuu kovi te aho aeni, koteuhi e kula fakapouli te lagi. E kotou iloi te vakai o te aluaga o te lagi, pea e mole kotou lavai te vakai o te u fakailoga o te u temi. 4E kole e he taitupu agakovi mo faiaga he milakulo; e mole toe tuku anai kia ia he tahi age milakulo i ae o Sonasi. Pea osi, nee ina tuku leva natou, pea nee alu leva ia ia.
Te fakatupu a te kau faliseo mo te kau satuseo
5Pea i tanatou fakalaka ki te tahi matatai, nee galo leva i te kau tisipulo, ke natou too ni pane. 6Nee ui leva e Sesu kia natou: Kotou tokaga aupito ki te fakatupu a te kau faliseo mo te kau Satuseo. 7Nee manatu leva te kau tisipulo i onatou loto, o ui: E tupu nee mole tou too ni pane. 8I te iloi e Sesu o te mea aia, nee ina ui leva: Kotea e kotou manatu fena ai i okotou loto, hahai tui siisii, o tupu ko takotou mole too ni pane? 9Pe e kei kotou hala atamai aipe, pe e mole kei kotou manatui te u foi pane e nima kia tagata e toko nima afe pea nee fia te u kato ae nee kotou ave, 10pee ko te u foi pane e fitu kia tagata e toko fa afe pea nee fia te u kato ae nee kotou ave? 11Pe e feafeai e mole koutou mahino ai e mole ko ni pane ae nee au palalau atu ai kia kotou? Ke koutou tokaga ki te fakatupu a te kau faliseo mo te kau Satuseo. 12Pea nee natou mahino leva i ai nee mole palalau ia ia ki te fakatupu ae o te pane, kae ki te akonaki a te kau faliseo mo te kau satuseo.
Fakaha e Petelo ko Sesu ko te Kilisito
13Nee kaku leva ia Sesu ki te fenua o Sesalea o Filipo, pea nee ina fehui leva ki ana tisipulo: Pe ko ai au i te lau a te hahai, ia au ko te Foha o te tagata? 14Nee natou tali leva: E ui e ihi ko koe ko Soane-Patita; ko ihi, ko Elia; ko ihi, ko Selemia, pee ko he tahi o te kau polofeta. 15Pea nee ina ui leva kia natou, ko koutou, pe e kotou ui ko ai au? 16Nee tali leva e Simone Petelo: Ko koe ko te Kilisito, ko te Alo o te Atua mauli.
Uluaki fakaha o te Ekelesia
17Pea nee folafola leva ia Sesu, o ui kia ia: E ke manuia Simone, foha o Sonasi; koteuhi e mole ko te kakano mo te toto ae nee na fakaha atu kia koe te mea aia, kae ko taku Tamai ae e nofo i te atu lagi. 18Pea ko au, e au ui atu kia koe, ko koe ko Petelo (petros, he foi maka), pea i te utu (petra, te foi utu) aia e au fakatuu anai toku Ekelesia, pea ko te u matapa o te nofoaga o te kau mate e mole natou malo anai ia ia. 19E au tuku anai kia koe te u kalavi o te puleaga o te atu lagi: Ko te mea ae e ke hai anai i te kele e hai anai i te atu lagi, pea ko te mea ae e ke veteki anai i te kele e veteki anai i te atu lagi. 20Pea nee ina kole fakamalohi leva ki te kau tisipulo ke aua pe naa natou fakaha ki he tahi ko te Kilisito ia ia.
Fakaha o tona mate mo tana toe tuuake
21Mai ai nee kamata fakaha leva e Sesu ki ana tisipulo e maua ke hake ia ia ki Selusalemi, ke tali mamahi lahi ia ia mai te kau matuatua, mo te kau pule faisakilifisio, pea mo te kau sekelipa, ke mate ia ia, pea ke toe tuuake ia ia i te tolu aho. 22Nee too leva ia ia e Petelo ki he kogamea kehe, o ina fai ni valoki kia ia, o ui: Aliki, ia mua o te Atua! E mole hoko anai te mea aena kia koe. 23Kae nee mafuli leva ia Sesu, o ui kia Petelo: Alu ki oku muli, Satana! E ke fakatupu higa kia au; koteuhi ko au manatu e mole ko te u manatu a te Atua, kae ko te u manatu a te u tagata.
Te kosekalasio* o te tisipulo
24Nee ui leva e Sesu ki ana tisipulo: Ko ia ae e fia muli mai ia au, ke fakafisi ia ia kia ia totonu, ke ina amo tona koluse, pea ke muli mai ia ia ia au. 25Koteuhi ko ia ae e ina fia haofaki tona mauli e ina pulihi anai ia ia, kae ko ia ae e ina pulihi anai tona mauli o tupu ko au e ina toe mau anai ia ia. 26Pe kotea tona aoga ki he tagata tana mau te malamanei katoa, kae e pulinoa tona laumalie? Pe kotea e foaki anai e he tagata ke totogi ai tona laumalie? 27Koteuhi e tonu ke hau te Foha o te tagata i te kololia o tana Tamai, mo tana kau aselo; pea e ina totogi anai ki te tagata taki toko tahi o mulimuli ki ana gaue. 28E au ui mooni atu kia koutou, ko ni ihi ia natou ae e nonofo i heni, e mole natou mamate anai, kae e heeki natou sisio ki te haele mai o te Foha o te tagata i tona pule fakahau.
ទើបបានជ្រើសរើសហើយ៖
EVASELIO A MATEO 16: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
