EVASELIO A MATEO 13
13
Te tagata nunusi pulapula
1I te aho aena, nee mavae leva ia Sesu mai te fale, o heka i te matatai. 2I te fakatahi age a he hahai kaugamalie ki ona tafa, nee hopo leva ia ia ki he vaka, pea nee hekaheka leva ia ia. Nee tutuu leva te hahai katoa i te matatai. 3Nee palalau leva ia ia kia natou ki ni u mea lahi, i ni folafola fakatata, o ui:
4Nee alu leva he tagata nunusi pulapula o nunusi tana pulapula. I tana nunusi, nee maluku leva he potu o te pulapula i te tafatafa o te ala: nee omai leva te u manulele o kai ia ia. 5Nee maluku leva he tahi potu i ni kogamea makamaka, ae nee mole ina mau i ai he kele loloto: nee homo vave leva ia ia, koteuhi nee mole ina mau he kele loloto; 6kae, i te hopo ake leva a te laa, nee mahunu leva ia ia o moamoa, koteuhi nee heeki ni ona aka. 7Nee maluku leva he tahi potu ki ni vao talatala: nee hohomo ake te u vao talatala, o taotao ia ia. 8Nee maluku leva he tahi potu ki te kele lelei: nee fua ia ia, ko te foi pulapula e tahi nee teau, ko te tahi age nee onogofulu, pea ko te tahi nee tolugofulu. 9Ko ae e ina mau ni ona taliga moo fakalogo, ke logo.
10Nee fakaovi age leva te kau tisipulo kia ia, o ui: Kotea e ke palalau ai kia natou i ni folafola fakatata? 11Nee tali leva e Sesu kia natou: Koteuhi kua foaki kia koutou ke kotou iloi te u misitelio o te puleaga o te atu lagi, kae nee mole tuku age te mea aena kia natou. 12Koteuhi e foaki anai ki ae e ina mau tana mea, pea e nofo anai ia ia i te mahu, kae ki ae e mole ina mau hana mea, e too anai maia ia te mea ae e ina mau. 13Koia, e au palalau ai kia natou i ni folafola fakatata, koteuhi i tanatou sisio mata e mole pe natou sisio, pea i tanatou fakalogo taliga e mole pe natou logo pee mahino. 14Pea kua fakahoko kia natou te folafola kikite aeni a Esaia:
E kotou logo anai aki okotou taliga, kae e mole kotou mahihino anai;
E kotou sisio anai aki okotou mata, kae e mole kotou malama anai.
15 Koteuhi kua liliu o mate noa te mafu o te hahai aeni;
Kua natou fakataliga tuli onatou taliga, pea kua natou pupunu onatou mata,
O tupu ke aua naa natou sisio aki onatou mata,
Ke aua naa natou logo aki onatou taliga,
Ke aua naa natou mahihino i onatou loto,
Ke aua naa natou tafoki, pea ke aua naa au fakamauli natou.
16Kae manuia okotou mata, koteuhi e natou sisio, pea mo okotou taliga, koteuhi e natou logo! 17E au ui mooni atu kia koutou, nee kaugamalie te kau polofeta mo te kau agatonu ae nee fakaamu ke sisio ki te mea ae e kotou sisio ki ai, kae nee mole natou sisio ki ai, ke fakalogo ki te mea ae e kotou fakalogo ki ai, kae nee mole natou logo ki ai.
18Koia, kia koutou, kotou fakalogo mai ki te uhiga o te folafola fakatata o te tagata nunusi pulapula. 19Ka logo he tagata ki te folafola o te puleaga pea e mole mahino ia ia ki ai, e hau te pule kovi o too te mea ae nee nunusi i tona loto: ko te tagata aena ko ia ae nee ina tali te pulapula i te u tafatafa o te ala. 20Ko ae nee ina tali te pulapula i te u kogamea makamaka, ko ia ae e fakalogo ki te folafola, pea e ina tali vave ia ia mo te fiafia; 21kae e mole ina mau ni aka ia ia totonu, e pipiki ia ia i he kii temi noa, pea ka hoko mai he mamahi pee ko he fakataga o tupu ko te folafola, e ina mau i ai he faigamalie ke higa. 22Ko ae nee ina tali te pulapula i te u vao talatala, ko ia ae e fakalogo ki te folafola, kae ko te u hoha o te sekulo pea mo te u holi ki te u koloa e natou pupunu te folafola aia, ke aua naa fua. 23Ko ae nee ina tali te pulapula i te kele lelei, ko ia ae e logo ki te folafola pea e mahino ki ai; e fua ia ia, pea ko he fuai pulapula e tahi e fua o teau, ko he tahi age o onogofulu, pea ko he tahi o tolugofulu.
Te sisania mo te pulapula lelei
24Nee toe tuku leva e Sesu kia natou he tahi folafola fakatata, o ui: E fakatatau te puleaga o te atu lagi ki he tagata ae nee ina nunusi he pulapula lelei i tana gaueaga. 25Kae i te lolotoga o te momoe a te hahai, nee hau leva tona fili o nunusi he sisania i te lotolotoga o te fulumeto, pea nee alu leva ia ia. 26I te homo ake leva a te fulumeto o kamata fua, nee toe ha ake leva i ai mo te sisania. 27Nee olo leva te u kaugana a te pule o te fale o ui kia ia: Aliki, pe nee mole ke nunusi he pulapula lelei i tau gaueaga? Pe e hau leva mai fea te sisania? 28Nee tali leva ia ia kia natou: Ko he fili aena nee ina fai te mea aia. Pea nee ui leva e te u kaugana kia ia: Pe e ke loto ke matou olo o taaki te sisania? 29Nee ina ui leva: Kailoa, koteuhi i takotou taaki te sisania, naa kotou lagai fakatahi mo te u aka o te fulumeto. 30Kotou tuku ke na hohomo fakatahi o kaku ki te temi ae e na matutua ai, pea, i te temi tuusi o te fulumeto, e au ui anai ki te kau tuusi fulumeto: Kotou taaki mua te sisania, o haihai ia ia fakafuhiga ke tutu, kae kotou tanaki te fulumeto ki toku fata.
Te fuai sinapi
31Nee ina tuku leva kia natou he tahi folafola fakatata, o ui: E fakatatau te puleaga o te atu lagi ki he fuai sinapi ae e ave e he tagata, o to i tana gaueaga. 32Ko te foi pulapula veliveli osi aia i te u pulapula fuli; kae ka homo ake ia ia, e lahi age ia ia i te u magisi fuli pea e liliu ia ia ko he fuu akau, pea e omai te u manulele o te lagi o faifatai i ona vaa.
Te fakatupu
33Nee ina toe fakaha leva kia natou he tahi folafola fakatata: E fakatatau te puleaga o te atu lagi ki he fakatupu ae nee too e he fafine, o natu fakatahi mo ni ipu falaoa e tolu, pea nee ina tuku leva ke tupu.
34Nee fakaha e Sesu te u mea aena ki te hahai i ni folafola fakatata, pea nee mole toe palalau ia ia kia natou o hala folafola fakatata, 35o tupu ke fakahoko te mea ae nee fakaha fakatomua e te polofeta:
E au avahi anai toku gutu i ni folafola fakatata,
E au fakaha anai ni mea ae nee ugia talu mai te fakatupu o te malamanei.
Fakamahino o te misitelio
36Pea nee ina tuku leva ke alu te hahai, kae nee ulu leva ia ia ki te fale. Pea nee fakaovi age leva ana tisipulo kia ia, o ui: Fakamahino mai kia matou te folafola fakatata o te sisania i te gaueaga. 37Nee ina tali leva kia natou: Ko ae e ina nunusi te pulapula lelei, ko te Foha o te tagata; 38ko te gaueaga ko te malamanei; ko te pulapula lelei ko te u foha o te puleaga; ko te sisania ko te u foha o te pule kovi; 39ko te fili ae nee ina nunusi te sisania ko te tiapolo; ko te temi tuusi o te fulumeto ko te fakaosi o te malamanei; ko te kau tuusi fulumeto ko te kau aselo. 40Pea, o hage ko te tanaki o te sisania o laku ki te afi, e fena anai i te fakaosi o te malamanei. 41E fekau anai e te Foha o te tagata ana aselo, ke natou taaki i tona puleaga te u mea fuli nee fakatupu agahala pea mo natou ae nee natou fai te agahala: 42Pea e laku anai natou ki te afi kakaha, i ai e logo anai ki ni tagi mo ni gugu o nifo. 43Kae e gigila anai te kau agatonu o hage ko te laa i te puleaga o tanatou Tamai. Ko ae e ina mau ni taliga moo fakalogo, ke logo.
Te koloa fufu
44E toe fakatatau foki te puleaga o te atu lagi ki he koloa nee fufu i he gaueaga. Ko te tagata ae nee ina mau ia ia e ina fufu ia ia; pea, i tona fiafia, e alu ia ia o fakatau te u mea fuli nee ina mau, pea e ina totogi te gaueaga aia.
Te fuai kahoa totogi kovi
45E toe fakatatau foki te puleaga o te atu lagi ki he tagata faikoloa ae e ina kumi ni fuai kahoa matalelei. 46Nee ina mau he fuai kahoa totogi kovi aupito; pea nee alu ia ia o fakatau te u mea fuli nee ina mau, pea nee ina totogi te fuai kahoa.
Te kupega
47E toe fakatatau foki te puleaga o te atu lagi ki he kupega ae nee li ki te tai, pea nee ina tanaki ni ika i te u faahiga kehekehe. 48Ka fonu ia ia, e toho ake leva ia ia e te u tagata tautai ki te one, pea e natou felalai leva ki lalo, o tanaki ki ni u kato te mea ae e lelei, kae e natou laku te mea ae e kovi. 49E toe fena anai i te fakaosi o te malamanei. E omai anai te kau aselo o vahei kehe te kau agakovi mai te kau agatonu, 50pea e natou laku anai te kau agakovi ki te afi kakaha, ae e i ai anai ni tagi pea mo ni gugu o nifo. 51Pe kua kotou mahihino ki te u mea fuli aia? Nee natou tali leva: Ei.
Te pule api
52Pea nee ina ui leva kia natou: Koia, ko te u sekelipa fuli kua ako o uhiga mo te puleaga o te atu lagi e tatau ia ia mo he pule api ae e ina too mai tona koloa ni mea foou mo ni mea afea.
Sesu i Nasaleti
53I te osi leva o te u folafola fakatata aia, nee mavae leva ia Sesu mai ai. 54Nee alu leva ia ia ki tona fenua, pea nee akonaki ia ia i te sinakoka, pea ko natou ae nee fakalogo leva kia ia nee natou punamauuli, o ui: Pe e ina mau mai fea te poto aena pea mo te u milakulo aena? 55Pe e mole ko te foha ia ia o te tufuga akau? Pe e mole ko Malia ae ko tana fae? Pe e mole ko ona tehina ae ko Sakopo, mo Sosefo, mo Simone pea mo Suta? 56Pe e mole nonofo fuli ona tuagaane i te lotolotoga o tatou? Pe e ina mau leva mai fea te u mea fuli aia? 57Pea nee liliu ia ia kia natou kohe mea fakatupu higa. Kae nee ui leva e Sesu kia natou: E fehiainai pe he polofeta i tona fenua totonu pea mo tona fale totonu. 58Pea nee mole lahi ni milakulo nee ina fai leva i te kogamea aena, o tupu ko tanatou mole tui.
ទើបបានជ្រើសរើសហើយ៖
EVASELIO A MATEO 13: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
