TOHI GAUE A TE KAU APOSITOLO 22
22
Lea a Paulo i mua o te hahai
1Tagata tehina mo tamai, kotou fakalogo i te temi nei ki te mea e au fia fakaha atu kia koutou o uhiga mo toku puipui!
2I tanatou logo nee palalau ake ia kia natou i te fakahepeleo, nee natou toe asilisili fakalologo leva. Pea nee ui age leva e Paulo:
3E au Sutea, pea nee au tupu i Talese i Silisia; kae nee au lahi ake i te kolo aeni, pea nee akoi au e Kamaliele i te mooni katoa o te lao o atatou tamai, pea nee au fonu i te ofa ki te Atua o hage ko kotou fuli i te aho nei. 4Nee au fakatagai o kaku ki te mate te akonaki aeni, pea nee au haihai o fafao ki te pilisoni te tagata mo te fafine. 5E fakamooni kia au te pule faisakilifisio mo te fono o te kau matua. Nee au mau foki maia natou ni tohi ki te u tehina i Tamaso, kogamea nee au alu ki ai, o tupu ke hai natou nee nonofo i ai, o aumai natou ki Selusalemi ke fakatua.
Tala e Paulo te ha a te Aliki kia ia
6I taku alu i te ala, pea kua au fakaovi ki Tamaso, nee fokifa pe i te oviovi hoata, kua mu mai te lagi he malama lahi, o hau kia au. 7Nee au to leva ki te kele, pea nee au logo leva ki he leo nee ina ui mai: Saulo, Saulo, kotea e ke fakatagai ai au? 8Nee au tali leva: Ko ai ia koe, Aliki? Pea nee ina ui mai leva kia au: Ko au ko Sesu mai Nasaleti ae e ke fakatagai. 9Ko natou ae nee olo mo au nee natou sisio leva ki te malama, kae nee mole natou logo ki te leo o ia ae nee palalau mai kia au. Pea nee au ui age leva: Kotea te mea e kau fai anai, Aliki? 10Pea nee ui mai leva e te Aliki kia au: Tuu ki oluga, o alu ki Tamaso, pea e fakaha atu anai i ai te mea fuli e tonu ke ke fai. 11I taku mole sio ki he mea, o tupu ko te gigila o te malama aena, nee too leva toku nima e natou nee olo mo au, pea nee au kaku leva ki Tamaso.
12Kae nee i ai he tagata nee higoa ko Ananiasi, tagata tauhi lelei ki te Atua o mulimuli ki te lao, pea nee fakamooni lelei fuli kia ia te kau Sutea nee nonofo i Tamaso, 13pea nee hau leva ia kia au, o ui mai: Saulo, toku tehina, ke toe sio ou mata. I te lakaga pe aena, nee toe sio leva oku mata, o au sio leva kia ia. 14Pea nee ina ui mai leva kia au: Kua filifili koe e te Atua o atatou tamai ke ke iloi tona finegalo, mo ke sio ki te Tagata faitotonu e Tahi, pea mo ke logo ki te u folafola mai tona gutu; 15koteuhi, e ke liliu anai ko tana tagata fakamooni, ia mua o te u tagata fuli, o uhiga mo te u mea e ke sio anai ki ai mo ke logo anai ki ai. 16I te temi nei kotea e ke tuai ai? Tuu ki oluga o tali te papitema ke fakamaa ai au agahala i tau paui ki te huafa o te Aliki.
Kalagai o Paulo ke alu ki te kau pagani
17I taku toe liliu mai ki Selusalemi, pea i taku faikole i te fale tapu, nee fakasio au e te Atua ki he sio fakaatua, 18pea nee au sio leva ki te Aliki nee ina ui mai kia au: Fakavilivili, pea ke mavae vave i Selusalemi nei, koteuhi e mole natou tali anai tau fakamooni kia au. 19Pea nee au ui leva: Aliki, e natou iloi totonu nee au fakaulu ki te u pilisoni mo haha i te u sinakoka fuli natou nee tui kia koe, 20pea i te aho nee liligi ai te toto o Setefano, tau tagata fakamooni, nee au nofo tonu i ai, o fakamooni mo natou ki tona fakapoogi, pea nee au leoleo te u kofu o natou ae nee natou tamatei ia. 21Pea nee ui mai leva e te Aliki kia au: Alu, e au fekaui anai koe ki mamao ki te u puleaga…
Fakaha e Paulo e Loma ia
22Nee natou fakalogo leva kia ia o kaku ki te palalau aena, pea nee natou kalaga leo lahi leva: Ke pulihi mai te kele te tagata aeni! E mole tonu ke tuku ia ke mauli. 23Pea nee natou kalaga, mo laku onatou kofu, pea mo laku ki oluga te efu. 24Nee fakatotonu leva e te tilipino* o te kau solia ke fakaulu ake Paulo ki te fale solia, pea ke fakafehui ia aki te suipi, ke iloi te tupuaga o tanatou kalaga feia kia ia. 25I te temi nee hai ai leva ia aki ni maea ke haha, nee ui age leva e Paulo ki te setulio nee nofo i ai: Pe e gafua kia koutou ke kotou haha he tagata Loma nee heeki fakamaaui? 26I te logo a te setulio ki te mea aia, nee alu aipe ia o fakaha ki te tilipino, o ui: Kotea anai ka ke fai? Ko te tagata aeni ko he tagata Loma. 27Pea nee hau leva te tilipino, o ui age kia Paulo: Fakaha mai kia au, pe e ke Loma? Pea nee ina tali age leva: Ei. 28Nee toe ui age leva e te tilipino: Ko au, nee au totogi aki he paaga lahi ke au mau te natula fakaloma. Pea nee ui age leva e Paulo: Kae ko au, e au Loma mai taku tupu. 29I te temi pe aia, nee mavae leva natou ae nee tonu ke natou fakafehui ia, pea nee toe mataku foki mo te tilipino, i tana kua iloi ko te tagata Loma ia Paulo, pea mo tana kua fakatotonu ke hai ia ia.
Paulo ia mua o te fono lahi a te kau Sutea
30I te aho ake, i tana loto ke iloi totonu te tupuaga o te tukugakovii o Paulo e te kau Sutea, nee fakatotonu leva e te tilipino ke vevete ona hai, pea ke fakatahi te kau pule faisakilifisio mo te fono lahi katoa; pea nee ina fakahifo age leva ia Paulo, o fakatuu ia i lotomalie o natou.
ទើបបានជ្រើសរើសហើយ៖
TOHI GAUE A TE KAU APOSITOLO 22: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
