TOHI GAUE A TE KAU APOSITOLO 21
21
Hake a Paulo ki Selusalemi
1I te osi o tamatou tuku folau mo natou, nee matou folau leva, pea nee matou olo fakahagatonu leva ki Kose, mo Lote i te aho ake, pea mai ai ki Patala. 2I te mau leva o he vaka nee folau ki Fenisia, nee matou hopo leva ki ai, o olo. 3I te kite o te motu ko Sipele, nee matou tuku leva ia i te faahi hema, kae hoko atu tamatou folau o taumua ki Silia, pea nee matou tau fenua leva i Tile, ae nee tonu ke laku ai te uta o te vaka. 4Nee matou mau leva i ai te kau tisipulo, pea nee matou nonofo leva i ai ia aho e fitu. I te takitaki a te Laumalie nee ui age leva e te kau tisipulo kia Paulo, ke aua naa hake ki Selusalemi. 5Kae, i tamatou kaku ki te fakaosi o te u aho aena e fitu, nee matou olo leva ke hoko atu tamatou folau, pea nee natou omai fuli leva mo matou, fakatahi mo te fafine pea mo te tamaliki, o kaku ki te tua kolo. Nee matou tuutuli ifo leva i te matatai, o faikole. 6Pea i te osi o tamatou tauine, nee matou hopo leva ki te vaka, kae nee natou toe liliu leva ki onatou api.
Paulo i Petolemaise mo Sesalea
7I te fakaosi o tamatou folau, nee matou olo leva mai Tile ki Petolemaise, ae nee matou felavei ai leva mo te u tehina, pea nee matou nonofo leva i ai i he aho katoa mo natou.
8Nee matou olo leva i te aho ake, pea nee matou kaku leva ki Sesalea. Nee matou ulu leva ki te fale o Filipo te evaselisita, ae nee kau i te toko fitu, pea nee matou nonofo leva mo ia. 9Nee ina mau ni ona ofafine taupoou e toko fa nee faikikite. 10I te fualoa o tamatou nofo i ai, nee hifo leva mai Sutea he polofeta nee higoa ko Akapusi, 11pea nee hau leva ia kia matou. Nee ina too leva te kilii pipi o Paulo, o ina hai leva ki ona vae mo ona nima, o ui: Koeni te mea e fakaha e te Laumalie Maonioni: Ko te tagata o ona te kilii pipi aeni, e haihai fenei anai ia e te kau Sutea i Selusalemi, pea e natou tuku anai ia kia nima o te kau pagani. 12I tamatou logo ki te mea aena, nee matou kole leva kia Paulo, e matou mo natou nee nonofo i te kogamea aena, ke aua naa hake ia ki Selusalemi. 13Pea nee tali mai leva e Paulo: Kotea e kotou fai i takotou fetagihi mo takotou fakamamahii toku loto? Koteuhi kua au teuteu, o mole gata pe ki toku seinii, kae ki toku mate foki i Selusalemi o uhiga mo te huafa o te Aliki Sesu. 14I te mole feala ke peluki tona loto, nee matou fakalologo leva, o ui: Ke fai te finegalo o te Aliki!
15I te osi o te u aho aena, nee matou fakamaopoopo leva amatou kavega, pea nee matou hake leva ki Selusalemi. 16Nee omai foki mo matou ni ihi o te kau tisipulo o Sesalea, o natou taki matou ki te fale o he tagata ko Manasone, mai te motu ko Sipele, ko he tisipulo mai te kamataaga, ae nee tonu ke matou nonofo i tona api.
Paulo mo Sakopo i Selusalemi
17I tamatou kaku leva ki Selusalemi, nee tali leva matou e te u tehina mo te fiafia. 18I te aho ake, nee alu leva Paulo mo matou ki te fale o Sakopo, pea nee omai foki ki ai te kau matuatua fuli. 19I te osi o te fakatau mauli mo natou, nee ina fakamatala katoa leva te u mea nee fai e te Atua i te atu puleaga i tana gaue. 20I tanatou logo ki te u mea aena, nee natou fakakololia leva ki te Atua. Pea nee natou ui age leva kia Paulo: E ke sio, tehina, kua laui afe te hahai o Sutea kua tui, pea e natou tauhi lelei fuli ki te lao. 21Kae kua natou logo o uhiga mo koe, nee ke akonaki ki te kau Sutea fuli nee nonofo i te kau pagani ke natou fakafisi kia Moisese, o ke ui kia natou ke aua naa silikosisioi anatou fanau pea ke aua naa mulimuli ki atatou agaifenua. 22Pe kotea anai he tonu ke fai? E mahino nei e fakatahitahi anai te hahai, koteuhi kua natou iloi kua ke hau. 23Koia, fai te mea aeni ka matou fakaha atu anai kia koe. E nonofo ia matou ni tagata e tokofa ae nee natou fai he fuakava. 24Too natou mo koe, fakamaa ia koe fakatahi mo natou, pea ke totogi te u mea fuli e aoga kia natou, o tupu ke natou tele onatou ulu. I te mea aia e iloi ai anai e te hahai katoa e mole pe mooni he mea i te u mea ae nee natou logo ki ai o uhiga mo koe, kae mo koe foki, e ke haele i te taupau o te lao. 25Ki te kau pagani kua tui, kua matou fai te tonu pea kua matou fai te tohi kia natou ke natou fakamamao mai te u mea nee momoli ki te u taulaatua, mo te toto, mo te u manu mamate, pea mo te faiaga. 26I te aho ake, nee too leva e Paulo te u tagata aia, pea nee fakamaa leva ia mo natou, pea nee ulu leva ia ki te fale tapu i te aho ake, o fakaha te aho e katoa ai anai tonatou fakamaa, pea mo te molaga kia natou taki toko tahi.
Puke o Paulo i te fale tapu
27I te fakaosi o te u aho aena e fitu, nee sio leva te kau Sutea o Asia kia Paulo i te fale tapu, pea nee natou lagai leva te hahai katoa pea nee natou puke leva ia Paulo, 28o kalaga: Kau tagata Iselaele, tokoni mai kia matou! Koeni te tagata ae e akonaki ki te hahai katoa i te u potu fuli o fakafehagai ki te hahai Iselaele, mo te lao, pea mo te kogamea aeni; pea nee ina fakaulu foki ni Keleka ki te fale tapu o ulihi ai te kogamea taputapu aeni. 29Koteuhi i mua atu, nee natou sio ki te taka fakatahi a Tolofime mai Efeso mo Paulo i te kolo, pea nee natou mahalohalo nee fakaulu ia e Paulo ki te fale tapu.
30Nee maveuveu leva te kolo katoa, pea nee feohofi mai leva te hahai katoa mai te u potu fuli. Nee natou puke leva ia Paulo, o toho ki fafo mai te fale tapu, kae nee natou mapunupunui atu aipe te u matapa. 31I tanatou kumi ke fakapoogi ia, nee kaku age leva te fakaha ki te tilipino* o te solia kua maveuveu ia Selusalemi katoa. 32I te lakaga pe aia nee ina too leva ni tagata solia mo ni setulio, pea nee lele leva ia kia natou. I tanatou sio ki te tilipino mo te kau solia, nee natou tuku leva te haha o Paulo. 33Pea nee fakaovi age leva te tilipino, o puke Paulo, o fakatotonu ke hai ia aki ni seini e lua. Pea nee ina fehui leva pe ko ai ia, pe kotea tana mea nee fai. 34Kae i te hahai nee kalaga ihi o feia, ko ihi o feia; i te mole feala tana iloi he mea e papau, o uhi ko te logoaa, nee ina fakatotonu leva ke ave Paulo ki te fale solia. 35I te lakaga nee kaku ai leva Paulo ki te tuuga, nee maua leva ke hiki ia i oluga e te kau solia, i te itaita a te hahai; 36koteuhi nee natou mulii ia, o kalaga: Ke mate ia!
37I te temi nee fakaulu ai ia ki te fale solia, nee ina ui age leva ki te tilipino: Pe e gafua ke au palalau atu ki he mea? Pea nee tali age leva te tilipino kia ia: E ke iloi te fakakeleka? 38Pe e mole ko te tagata Esipito ia koe ae nee hoki ke fakatupu nei pe he u maveuveu, pea nee ke taki ki te toafa ni kau tagata fakapo e toko fa afe? 39Nee ui age leva e Paulo: E au Sutea, mai Talese i Silisia, ko te tagata au o he kolo logologona. E au kole atu ke ke fakagafua mai mua ke au palalau ki te hahai. 40I te fakagafua age e te tilipino kia ia ke palalau, nee tuu ake leva Paulo ki oluga i te tuuga, o ina hiki age tona nima ki te hahai. Nee fakalologo fuli leva te hahai, pea nee palalau leva Paulo i te fakahepeleo, o ui:
ទើបបានជ្រើសរើសហើយ៖
TOHI GAUE A TE KAU APOSITOLO 21: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
