Lua tohi a Paulo ki te kau KOLINITO 9
9
Tapuakina o te foaki i te loto lelei
1E mole aoga ke au faitohi atu kia koutou o uhiga mo te tokoni ki te kau sagato. 2Koteuhi e au iloi tokotou lotolelei, ae e au fakakololia ai koutou i mua o te kau Masetonia, o au ui kia natou kua tokalelei ia Akaia mai te tau kua hili; pea ko tokotou holi fakamalotoloto nee ina lagai te kaugamalie. 3E au fekaui atu te u tehina, o tupu ke aua naa alu noa te fakavikiviki ae nee ma fai o uhiga mo koutou i te mea aeni, kae ke kotou nofo teuteu, o hage ko te mea nee au fakaha atu kia natou. 4Koteuhi e mole au loto, moka ma olo atu mo ihi o te kau Masetonia, ke natou mau atu koutou e heeki kotou tokalelei, pea ke liliu te falala aena ko he ufiufi kia maua, ke aua naa ui ko he ufiufi kia koutou. 5Koia nee au manatu ai e aoga ke kole ki te u tehina ke muamua atu kia koutou, o tanaki tokotou meaofa, ae nee kotou fakapapau fakatomua ki ai, o tupu ke tokalelei ia, pea ke hage ia ko he ofa mooni, kae e mole hage ko he fulupipiki.
6Ke kotou iloi, ko ae e nunusi siisii, e toli fakasiisii anai, pea ko ae e nunusi lahi, e toli lahi anai. 7Ke foaki e te tagata takitahi o mulimuli ki te mea ae kua fakapapau ki ai i tona loto, kae mole i te loto mamahi, pee i te fakamaua, koteuhi e ofa te Atua ki ae e foaki mo te fiafia. 8Pea e feala e te Atua tana fakafonu koutou aki ona kalasia fuli, koteuhi ke kotou mau tuumau te u mea fuli e aoga kia koutou, pea ke kotou toe mau foki o fakalaka ki te u gaue lelei fuli, 9o mulimuli ki te mea e tuu i te tohi:
Nee ina tufa ona meaofa,
Nee ina foaki ki te kau masiva;
E tuu tona agatonu o heegata. 10Ko ae
E ina foaki he pulapula ki te tagata gaue kele,
Pea mo he pane ki tana meakai. E ina foaki anai kia koutou pea mo ina liuliuga anai kia koutou te pulapula, pea e ina fakalahi anai te u fua o akotou gaue lelei fuli. 11Pea e ina fakamaukoloa anai koutou i te u mea fuli ki te fai o te u meaofa kehekehe, ae e natou fakatupu anai ni fakafetai ki te Atua ia maua. 12Koteuhi ko te gaue lelei aeni e kotou fai, e mole gata pe i te foaki o te u mea ae e aoga ki te kau sagato, kae ko he matapuna lahi foki ia o ni fakafetai lahi ki te Atua. 13I te sio leva ki te tokoni aeni kia natou, e natou fakakololia anai ki te Atua o uhiga mo takotou fakalogo ki te fakaha o te Evaselio a Kilisito, pea mo tokotou ofa lahi o vaevae okotou koloa mo natou pea mo te hahai katoa; 14e natou hufaki koutou, koteuhi e natou ofa kia koutou o uhiga mo te kalasia mauhiga ae kua fai e te Atua kia koutou. 15Ke fakafetai ki te Atua o uhiga mo tona meaofa matalelei osi!
ទើបបានជ្រើសរើសហើយ៖
Lua tohi a Paulo ki te kau KOLINITO 9: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland