Lua tohi a Paulo ki te kau KOLINITO 8
8
Vaevae fakatatau o te u koloa i te Ekelesia
Faifaitakiaga o te kau Masetonia
1E ma fakaha atu kia koutou, u tehina, te kalasia o te Atua ae kua fakaha i te u Ekelesia o Masetonia. 2Koteuhi i te ahiahi lahi i onatou mamahi, ko tonatou fiafia lahi mo tonatou masiva lahi nee na fakatupu o lahi osi ni foaki o te u meaofa ia natou. 3E au fakamooni nee natou foaki i te loto lelei o mulimuli ki te mea nee natou mau, pea nee fakalaka foki i te mea nee natou mau, 4koteuhi nee natou kole fakamalotoloto mai kia maua te kalasia ke natou kau ki te tokoni ki te kau sagato i Selusalemi. 5Pea nee mole gata pe i tanatou kau ki ai o hage ko tama amanaki lelei ki ai, kae nee natou foaki mua natou totonu ki te Aliki, pea osi kia maua, i te finegalo o te Atua.
Faifaitakiaga o Kilisito
6Koia nee ma filifili ai ia Tito ke ina fakaosi ia koutou te gaue ofa aia, o hage ko tana kamata. 7Koia, o hage ko koutou, nee kotou lelei tukupau i te u mea fuli, i te tui, i te palalau, i te iloilo, i te faa fai i te u mea fuli, pea mo te ofa kia maua, kotou fai ke kotou toe lelei tukupau foki i te gaue ofa aeni. 8E mole au fakaha te mea aeni ke tuku atu he fakatotonu, kae ke ahiahii ai, i te ofa o natou ake ae, te mooni o tokotou ofa. 9Koteuhi kua kotou iloi te kalasia o totatou Aliki ko Sesu-Kilisito, ae nee fakamasiva o uhiga mo koutou kae nee mau koloa ia, koteuhi ke kotou mau koloa i tana fakamasiva. 10Koia e au tuku atu kia koutou he manatu i te mea aeni: E lelei kia koutou, ke kotou hoko atu te mea ae kua kotou kamata i te tau kua hili. Koteuhi ko koutou ae nee kotou uluaki fai te gaue aeni, pea nee kotou uluaki lotolelei ki tona fai. 11Koia kotou fakaosi i te temi nei te gaue aeni, ke tatau te holi i te fakaosi mo te holi nee kotou mau i te kamataaga. 12Koteuhi kapau e mau te lotolelei ki te foaki, e tali e te Atua te mea e foaki o mulimuli ki te mea e mau, kae e mole ki te mea e mole mau. 13Koteuhi e mole ko he mea ke kotou mafasia ai kae fimalie natou ake ae, kae ke mulimuli ki te lekula o te vaevae fakatatau: I te temi nei ko te mea ae e mole aoga kia koutou e ina mapunui anai te u mea ae e aoga kia natou, 14o tupu i he tahi aho ko te mea ae e mole aoga kia natou ke ina mapunui te u mea ae e aoga kia koutou; e fena anai te fai o te vaevae fakatatau, 15o mulimuli ki te mea ae e tuu i te tohi: Ko ae nee ina tanaki lahi, nee mole ina mau o fakalaka, pea ko ae nee tanaki veliveli, nee mole puli he mea kia ia.
Tokaga a Tito ki te tanaki meaofa
16Kae ke fakafetai ki te Atua, i tana tuku ki te loto o Tito te fia tokaga kia koutou o hage ko maua; 17koteuhi nee ina tali tama kole; pea i te lahi o tona holi, nee alu atu aipe ia kia koutou. 18Pea kua ma fekaui atu mo ia te tehina ae kua logologona tana gaue ki te Evaselio i te u Ekelesia fuli; 19pea e mole ko ia pe, kae nee filifili foki ia ia e te u Ekelesia ke kau fagona mo maua i te gaue fakaofa aeni, ae e ma fai ki te kololia o te Aliki totonu pea ke fakamooni ai toma lotolelei. 20E ma fai fena, o tupu ke aua naa laukovi he tahi kia maua o uhiga mo te meaofa lahi aeni e ma tokaga ki ai. 21Koteuhi e ma kumi te mea e lelei, o mole gata pe ia mua o te Aliki, kae ia mua foki o te u tagata. 22E ma fekaui atu mo naua totatou tehina, ae kua tua lahi tama ahiahii tona holi malohi i ni mea lahi osi, pea kua ina toe fakaha o lahi age i te mea aeni tona holi o tupu ko tana falala lahi kia koutou. 23Koia ko Tito, ko toku kaumea ia i te gaue, pea e gaue ia mo au kia koutou; pea ko oma tehina, ko te u fakafofoga natou o te u Ekelesia, pea e natou gaue ki te kololia o Kilisito. 24Kotou fakaha kia natou, ia mua o te u Ekelesia, te mooni o tokotou ofa, pea kotou fakaha kia natou e tonu tama fakakololia o uhiga mo koutou.
ទើបបានជ្រើសរើសហើយ៖
Lua tohi a Paulo ki te kau KOLINITO 8: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland